07/04/2023
“ብውኁድ ዝተኣመንካ ሕያዋይን እሙንን ኣገልጋሊ ኣብ ልዕሊ ብዙኅ ክሸመካ እየ” (ማቴ 25፥23)
ዜና መዋዕል ሊቀ ማእምራን መሪጌታ ኣብርሃም ኃይለ ኢየሱስ
ሊቀ ማእምራን መሪ. ኣብርሃም ኃይለ ኢየሱስ ብ1948 ዓ.ም (1956 ዓ.ም.ፈ) ካብ ኣቦኦም ኃይለ ኢየሱስ ዑቕቡን ካብ ኣደኦም ኣስካሉ ቀሲስ ጸጋይን ኣብ ዓዶም ጸዓዘጋ፡ ተከለ ዓገባ፡ ናይ ሕጂ ንኡስ ዞባ በሪኽ ተወሊዶም፣ ክሳብ ወዲ 7 ዓመት ዝኾኑ ምስ ኣቦኦምን ኣዲኦምን ብኣገባብ እናዓበዩ ምስ ጸንሑ፣ ኣቦሓጎኦም ቀሲስ ጸጋይ ክፍለ፡ “ነዛ ክህነተይ ዝትክእ ንሱ እዩ” ዝብል ትንቢታዊ ሓሳብ ስለዝመጾም፣ ኣብ ትሕቲኦም ክዓብዩ ካብ ጸዓዘጋ ናብ ዓዲ ገብሩ ወሰድዎም። ኣብቲ ዓዲ መሪ. ጽጌ ዝተባህሉ መምህር ስለዝነበሩ ከኣ ካብ ፊደል ምቝጻር ኣትኂዞም ክሳብ ንባብ ወንጌል ዮሓንስ ተማህሩ። ብድኅርዚ ወዲ 13 ዓመት ምስኮኑ፡ ኣቦሓጎኦም ቀሲስ ጸጋይ ክፍለ ብልሒ ኣእምሮኦም ኣስተውዒሎም፣ ማይ ወሪዱ ከስተይኒ፡ ዕንጸይቲ ኣርዩ ከሙቐኒ ከይበሉ ብቑዕ ‘ኣብነታዊ ትምህርቲ ዝምህሩ ፍሉጥን ውሩይን ኣብ ዓዲ ከፈለት ዝተባህለ ዓዲ የነታ ኣካለወልድ ዝበሃሉ ኣለዉ’ ስለዝምሰዑ፣ ስንቆም ቆጺሮም ናብ የነታ ኣካለወልድ ኣረከብዎም።
ሊቀ ማእምራን መሪ. ኣብርሃም ፍሉይ ተውህቦ ናይ ምስማዕን ምስትውዓልን በሊሕ ኣእምሮ ስለዝተዋህቦም፣ ካብ የኔታ ኣካለወልድ ምሉእ ያሬዳዊ ዜማን ንባብን ብጽፈት ኣብነታዊ ዘብቅዕ ትምህቲን ተማህሩ። እዚ ማለት ድማ ዜማ ውዳሴ ማርያም ፡ ትምህርተ ኅቡኣት፡ መስተጋብእ፡ ኣርባዕት፡ ኣርያም፡ ሠለስት፡ ክሥተት፡ ምስማክ፡ ምሉእ ምዕራፍ፡ ጾመ ዱጓ፡ ኣቋቋም ክብረ በዓል ምስ መዝሙርን ወርኃ በዓልን፡ መዝገበ ቅዳሴ፡ ዝማሬ መዋሥዕት፡ ንባብ መጽሓፍ ክሳብ ዳዊት ብጽፈት ንመምህርነት ዘብቅዕ ተማህሩ።
“ተመሃራይ ከም መምህሩ እንተኾነ ይኣኽሎ እዩ” (ማቴ. 10:24) ከምዝብል መሪ. ኣብርሃም ድማ ኣብነታዊ ብቑዕ መምህር ከም መምህሮም ኮኑ። ብድኅርዚ ትምህርት ቅኔ ንኽመሃሩ ናብ ገዳም ኣቡነ ኣብሳዲ (ደብረ ማርያም) ናብቶም ውሩይን ፍሉጥን መምህር ቅኔ ዝነበሩ የኔታ ዮሓንስ ዝበሃሉ ከይዶም፣ ቅኔ ምስ ኣገባቡን ባሕረ ሓሳብን ተማሂሮም ኣብነታዊ መምህር ኮይኖም ተረኽቡ። ከምኡ’ውን ዝተረፈ ትምህርቶም ንምጽፋፍ ናብ ገዳም ኣቡነ መርቆሬዎስ (ደብረ ድማኅ) ንዝተወሰነ ዓመታት ተቐሚጦም ተማህሩ። ኣብዚ ገዳም እዚ ከኣ መኒኖም ብምንኵስና ከገልግሉ ሓሳብ ከምዝነበሮም ናይ ቐረባ ፈለጥቶም የዘንትዉ እዮም።
እንተኾነ በቲ ጊዜ‘ቲ ኣብ ሃገርና ኤርትራ ኲናት፡ ቅትለትን ሞትን ስለዝበዝኀ፣ ደሃይ ስድራቤቶም ክፈልጡ ንዓዲ መጽኡ እሞ፣ እቶም ብክንክን ኣዕብዮም፡ ኣብነታዊ መምህር ንክኾኑ ዘምሃሩዎም ኣቦሓጎኦም ቀሲስ ጸጋይ፡ ብግፍዒ ጸላኢ ተቐቲሎም ዓሪፎም ጸንሕዎም። ድኅሪዚ ዓባዮም ኣደይ ወለተኪዳን ዝኣልየን ስለዝሰኣና ንዕአን ክኣልዩ ኣብ ዓዲ ገብሩ ተቐመጡ። ዓባዮም ውን ቍሩብ ጸኒሐን ምስ ዓረፋ፣ ብ1971 ዓ.ም (1979 ዓ.ም.ፈ) ምስ ወይዘሮ ኣመተጽዮን ገብረእግዚአብሔር ብሕጊ ቃል ኪዳን ተመርዕዮም ኣብ ጸዓዘጋ ደብረ ሰላም ቅዱስ ጊዮርጊስ መምህር ተመዲም በቲ ዝተማህርዎ ትምህርቲ ብዙኃት ዲያቆናትን ካህናትን ኣፍረዩ።
ሊቀ ማእምራን መሪ. ኣብርሃም ሓሳባቶም ሰፊሕ ስለዝነበረ፡ “ንዅሉ ሠናይ ትምህርቲ ክበጽሖ ኣሎኒ” ብምባል፣ ጊዜያዊ ትምህርቲ ምእንቲ ክመሃሩ ብ1987 ዓ.ም.ፈ ካብ ጸዓዘጋ ናብ ኣሥመራ መጺኦም፣ ኣብ ቤተ ክርስቲያን ደብረ ሰላም ቅዱስ ጊዮርጊስ ገጀረት ተመዲቦም ከም መምህር እናኣገልገሉ፣ ብዙኃት ዲያቆናትን ካህናትን ኣፍረዩ፤ እቲ ዝሓሰብዎ ጊዜያዊ ትምህርቲ ከኣ ኣብ ናይ ምሽታዊ እብረ እናተማህሩ 12 ክፍሊ ኣጠናቐቑ። ድኅሪ ናጽነት ሃገርና ኤርትራ መሪ. ኣብርሃም ብ1994 ዓ.ም.ፈ፡ ኣብ መንበረ ፓትርያርክ ኣሥመራ ኣብ ክፍሊ ቅርሳ ቅርሲ (ቤተ መዝክር) ዋና ጸሓፊ ኮይኖም ተመዲቦም ብትግሃትን ተወፋይነትን ሠሪሖም እዮም። ከም ብሓድሽ ብዕቤት ኣብ ክፍሊ ንብረት ኃላፊ ኮይኖም ተመዲቦም እናሠርሑ እንከለዉ ብ2004 ዓ.ም ፈረንጂ ክእለቶም፡ ዓቕሞም፡ ትምህርቶምን ትዕግሥቶምን ርእዮም፣ ናብ ሃገረ ኣሜሪካ ክፍለ ሃገር ቴክሳስ ከተማ ህዩስቶን ንኣገልግሎት ቤተ ክርስቲያን ተላእኩ። ኣብዚ ቦታ ኮይኖም እናኣገልገሉ፡ ኣብ ኅቡራት መንግሥታት ኣሜሪካን ካናዳን ንመጀመርታ ጊዜ ሃገረ ስብከት ኣብ ዝቖመሉ ምክትል ኣቦ መንበር ብምዃን ን3 ዓመታት ኣገልገሉ።
ሊቀ ማእምራን ኣብርሃም ኣብ ኅቡራት መንግሥታት ኣሜሪካን ካናዳን ንዝርከባ ኵለን ኣብያተ ክርስቲያናት፡ ንኣገልገሎት ቀዳምነት እናተረኽቡ ዘገልገሉ ብምዃኖም ብኃለፍቲ ቤተ ክርስቲያን፡ ቤተ ክህነትን ሕዝብን ዝምስገኑ ሊቅ ከምዝነበሩ ሃገረ ስብከት ኣሜሪካ ዝምስክርዎ ሓቂ እዩ። ሊቀ ማእምራን ኣብርሃም በቲ እግዚአብሔር ዝሃቦም ጸጋ “ናሁ ጸጋሁ ውሉድ ዕሤተ ፍሬሃ ለከርሥ” ከምዝብል ኣቦ 4 ኣወዳትን 5 ኣዋልድን ኮይኖም፣ ከምቲ ቃሉ ኮይኖም ዝተረኽቡ ኣቦ እዮም። 1ይ ጢሞ 3:1። ቲቶ 1:6-9 ብተወሳኺ’ውን እግዚአብሔር ብዝሃቦም ብሩህ ኣእምሮን ፍልጠትን፡ ደኺመ ከይበሉ፡ ኣድለይቲ ዝኾኑ መጽሓፍቲ ከም ባሕረ ሓሳብን መጽሓፈ ቀሌምንጦስን ከምኡ ድማ ንኅትመት ተዳልዩ ዘሎ መጽሓፍ መዝገብ ቅዳሴ ንቤተ ክርስቲያን ኣበርኪቶም እዮም።
ኣብ መፈጸምታ ከምቲ ሓዋርያ ቅዱስ ጳውሎስ ናብ ጢሞቲዎስ ዝጸሓፎ መልእኽቱ፣ “ሠናይ ገድሊ ተጋዲለ እየ፤ ጕያይ ወዲአ እየ፤ ነታ እምነት’ውን ሓልየያ እየ፤ ደጊም እቲ ቅኑዕ ፈራዲ ዝኾነ ጐይታ በታ መዓልቲ እቲኣ ዝህበኒ ኣኽሊል ጽድቂ ተነቢሩለይ ኣሎ” ዝበሎ፡ ፍቓድ እግዚአብሔር ኮይኑ ሠናይ ጕያኦም ወዲኦም፡ ብዝኃደሮም ሓፂር ሃንደበታዊ ሕማም ብዕለት 4 ሰኔ 2015 ዓ.ም (11/06/2023 .ፈ) ኣብ ሕክምና ዓሪፎም። ስለዚ በቲ ዘፍረዩዎ ፍረ ከምቲ ነቲ በዓል 10 “ኣብ ልዕሊ ብዙኅ ክሽመካ እየ ናብ ሓጐስ ጐይታኻ እቶ።” ዝበሎ ንእኦም ዘይኃልፍ መንግሥተ ሰማያት፣ ንስድራቤቶም ድማ ጽንዓት ክህብ እግዚአብሔር ሠናይ ፍቓዱ ይኹን።
ቅኔ ሥላሴ ብሊቀ ብርሃናት መሪ. አፈወርቅ፦
ኢንክል ለብሂል መንገለ ከሀ ወኀበ ዝየ እንዘ ጊዜሁ ብርሃን እለ ተጋባእነ ንሕነ፣
ፀሓይ ሊቀ ማእምራን እስመ ዓርበ ብነ፣
እምነ ዓለም ስደት ይእዜ እንዘ በዋሕድ ሀሎነ፣
ደመና መቅበርተ በዘተከድነ፣
ኀበ ላዕል ወታሕት ኢይርአይ ዓይንነ፣
ዘዘኮነ ከማሁ ኢኮነ።
ስብሐት ለእግዚአብሔር ወለወላዲቱ ድንግል ወለመስቀሉ ክቡር፡ አሜን!
“ብውኁድ ዝተኣመንካ ሕያዋይን እሙንን ኣገልጋሊ ኣብ ልዕሊ ብዙኅ ክሸመካ እየ” (ማቴ 25፥23) ሊቀ ማእምራን መሪ. ኣብርሃም ኃይለ ኢየሱስ ብ1948 ዓ.ም (1956 ዓ.ም.ፈ) ካብ ኣቦኦም ኃይለ ኢየሱስ ዑ
