Dharma Vijaya Buddhist Vihara

09/07/2026

08/18/2026

ලක් අඹරේ නිවුණු තරුව

ලක් අඹරේ දිලුණු තරුවක්
නිවී ගියා අද නිහඬව
එහෙත් ඔබේ ගී හඬ තවමත්
ඇසේ අපේ හද තුළින්

බුදු ගුණ ගීයෙන් සසුන සරසා
දහමේ පණිවිඩ ලොවට ගෙනා
රඹුකන සිද්ධාර්ථ හිමිපාණෙනි
ඔබ කළ සේවය අමරණීයයි

ඔබට නිවන් සුව පතමු
සෙනෙහසින් සිහි කරමු
ඔබේ ගී රැව් දෙන තුරු
ඔබ අප අතරම සිටී…

ගායක ගායිකාවන්ගේ හඬ තුළින්
ඔබේ වදන් ලොවට ඇසුණා
සිංහල ගීයේ මල් පිපෙන්නට
ඔබේ පන්හිඳ මඟ පෑවා

සසුනට කළ ඔබේ මෙහෙවරත්
ලක් දෙරණට කළ සේවයත්
කාලය ගෙවුණත් නොමැකේවා
ඔබේ නාමය සදා බැබළේවා

නිවන් සුව ලැබේවා…
පින්වත් හිමියනි…
නැවත හෙළදිව උපත ලබා
දහම් ගීයෙන් ලොව සැනසේවා…

වල්පොල පියනන්ද හිමි

08/10/2026

"සිතේ නවාතැන"

(සුත්ත නිපාතයේ ජරා සූත්‍රය ඇසුරෙන්
වල්පොල පියනන්ද හිමි)

මල් පිපෙනවා... මල් පරවෙනවා...
හිරු නැගෙනවා... හිරු බැස යනවා...
ගඟක් වගේ කාලය ගලා යනවා
ගිය දවසක් යළි නොඑනවා...

යෞවන රුව අද ලස්සන වුවත්
හෙට එය වෙනස් වී යාවී...
දිරන මේ කය රැකගත්තාට
දිරන දේ අප සමඟ නොයාවී...

සිතට නවාතැනක් සොයනවා නම්
ලෝකය තුළ නොසොයනු මැනේ...
නොනැවතෙන මේ ජීවන ගමනේ
සත්‍යය හද තුළ දකිමු මැනේ...

රූපය මැකුණත් ගුණය නොමැකේ
කය දිරුණත් කරුණා නොදිරේ...
අපෙන් ලොවට ඉතිරි වන්නේ
මිනිසත්කමේ සුවඳ පමණේ...

රැලි වැටෙනා මේ සිරුර
කාලය ලියනා කතාවක්ය...
කැඩී බිඳී යන මේ කය හැර
කළ ගුණ දහම් පමණක් ඉතිරිය...

බාහිර ඔපය මැකී ගියත්
ඇතුළත එළිය නොමැකේවා...
රූපයට වඩා ගුණය වඩවා
මනුෂ්‍යකම අපෙන් නොගිලිහේවා..

සිතට නවාතැනක් සොයනවා නම්
ලෝකය තුළ නොසොයනු මැනේ...
නොනැවතෙන මේ ජීවන ගමනේ
සත්‍යය හද තුළ දකිමු මැනේ...

රූපය මැකුණත් ගුණය නොමැකේ
කය දිරුණත් කරුණා නොදිරේ...
අපෙන් ලොවට ඉතිරි වන්නේ
මිනිසත්කමේ සුවඳ පමණේ...

නින්දා ඇසුණත් සිනහ වෙමු
ප්‍රශංසා ලැබුණත් නොඇලෙමු...
ලාභ අලාභ, යස අයස මැද
සම සිතින් අපි මඟ යමු...

දහවල රැයක් වී යාවී
රැය දහවලක් වී යාවී...
“තව ටිකකින්” කියා නොසිට
ගෙවෙන මොහොතේ යහපත කරමු.

කියන්න ඇති සෙනෙහස් වදනක්
අදම කියමු කෙනෙකුගේ හදට...
දෙන්න ඇති කරුණා බිඳක්
අදම දෙමු කඳුළක් ඇති නෙතට...

රන් රිදී මුදල් රැස් කළත්
අවසාන ගමනේ ගෙන යා නොහැකී...
ගෙවල් දොරවල්, නම යසසත්
කාලයේ දොරින් එපිට නැතී...

අප සමඟ යන එකම සම්පත
කළ යහපත හා කළ අයහපත...
දුන් කරුණා, කළ උපකාර
ඉතිරි කරයි මිනිසත් සුවඳ.

සිතට නවාතැනක් සොයනවා නම්
ලෝකය තුළ නොසොයනු මැනේ...
නොනැවතෙන මේ ජීවන ගමනේ
සත්‍යය හද තුළ දකිමු මැනේ...

මල් පිපෙනවා... මල් පරවෙනවා...
ජීවිතයත් එසේම යනවා...
නොදිරන එකම සම්පත රකිමු
ගුණ දහමින් සිත සරසමු...

අදම ආදරය කරමු ලොවට
අදම යහපතක් කරමු ලොවට...
හෙටක් අපට හිමි වේදැයි
කියන්න කාටද හැකි වෙන්නේ...

මල් පිපේවි... මල් පරවේවි...
ජීවිතයත් ගලා යාවි...
කය දිරේවි... නම මැකේවි...
ගුණ සුවඳක් පමණක් ඉතිරි වේවි...

ලොවම වෙනස් වී යන මොහොතේ
අපේ සිතත් වෙනස් වේවි...
වෙනස් නොවන සත්‍යය සොයන විට
නිසල හද තුළ එය හමුවේවි..

සිතට නවාතැනක් සොයනවා නම්...
නිසල හද තුළ සොයනු මැනේ...
ලෝකය හැර යන අවසන් මොහොතේ
අප කළ ගුණයයි අප සමඟ යන්නේ...

සිතේ නවාතැන...
සිතේ නවාතැන...
කරුණාව වේවා...
සදා නවාතැන...

සිතේ නවාතැන...
සිතේ නවාතැන...
සත්‍යය වේවා...
සදා නවාතැන...