Parami Buddha Vihara

04/24/2026

အမေရိကန်ပြည်ထောင်စု California ပြည်နယ် La Puente မြို့ ရှိ Parami Buddha Vihara ၌ကျေးဇူးတော်ရှင်အောင်လံဆရာတော်ဘုရားကြီး၏ရခဲလှ သောအနိမိတ္တအခြေခံသမာဓိတရားကျင့်စဉ် နည်းစနစ်များကို Los Angeles နှင့် La Puente အနီးတဝိုက်ရှိ ဝေနေယျများအား အသေတတ်၍ အနေမြတ်စေခြင်းဌာ ရည်ရွယ်၍ တိုက်ခွဲ(၃၂)သဲအင်းဂူဝိပဿနာဓမ္မရိပ်သာ ဌာနချုပ်USAမှမဟာနာယကဆရာတော်အရှင်ဓမ္မပါရဂူ၏ကြီးကြပ်မှုဖြင့် ကျင်းပသည့်ယောဂီသစ်အဓိဌာန်(၇)ရက်တရားစခန်းကိုApril 4th-12th, 2026 ထိကျင်းပခဲ့ပါသည်။
တရားစခန်းတည်နေရာ - Parami Buddha Vihara

ပါရမီကျောင်း ဂေါပကအဖွဲ့

04/06/2026

ပါရမီဗုဒ္ဓဝိဟာရ လူငယ် ဗုဒ္ဓဘာသာနှင့် မြန်မာစာ ကျောင်းဖွင့်ပွဲ အခမ်းအနားကို ဇန်နဝါရီလ (၁၈) ရက်၊ ၂၀၂၆ ခုနှစ်တွင် အောင်မြင်စွာ ကျင်းပဖွင့်လှစ်ခဲ့ပါသည်။ အခမ်းအနားအစီအစဉ်မှူးအဖြစ် ဆရာမ မအေးသန္တာမှ တာဝန်ယူ ဆောင်ရွက်ခဲ့ပြီး နမောတဿ သုံးကြိမ် ရွတ်ဆိုကာ အခမ်းအနားကို ဖွင့်လှစ်ခဲ့ပါသည်။

ထို့နောက် ဆရာတော် အရှင်တေဇိန္ဒမှ အဖွင့်အမှာစကား ပြောကြားခဲ့ပြီး၊ ပါရမီဗုဒ္ဓဝိဟာရ ဂေါပက ဦးမိုက်ကယ်လ်မောင်နှင့် ပါရမီကျောင်းသား မိဘ ကိုဇင်လင်းထက် တို့မှလည်း ဖွင့်ပွဲအတွက် ကျေးဇူးတင်စကားများ ပြောကြားခဲ့ပါသည်။

အစီအစဉ်အရ ယခင် ၂၀၂၅ ခုနှစ်တွင် အခြေခံဗုဒ္ဓဘာသာ သင်တန်းကို သင်ယူပြီးမြောက်ခဲ့သော ကျောင်းသားကျောင်းသူများအား သင်တန်းအောင်မြင်ပြီးမြောက်ခြင်း လက်မှတ်များကို ဆရာတော် အရှင်တေဇိန္ဒမှ ပေးအပ်ခဲ့ပါသည်။ ထို့နောက် မြန်မာစာသင်တန်း သင်ယူပြီးမြောက်ခြင်း လက်မှတ်ပေးအပ်ခြင်းနှင့် အတန်းအလိုက် ဆုရရှိသော ကျောင်းသားကျောင်းသူများအား ဂုဏ်ပြုချီးမြှောက်ခြင်း အစီအစဉ်များကို ဆက်လက် ကျင်းပခဲ့ပါသည်။

သင်တန်းအောင်မြင်ပြီးမြောက်ခြင်း လက်မှတ်များကို အခြေခံပထမတန်း ကျောင်းသားကျောင်းသူများအား ဆရာမ ဒေါ်အေးအေးငြိမ်း မှ လည်းကောင်း၊ အခြေခံဒုတိယတန်း ကျောင်းသားကျောင်းသူများအား ဆရာမ ဒေါ်ခင်သီတာနွယ် မှ လည်းကောင်း၊ အခြေခံတတိယတန်း ကျောင်းသားကျောင်းသူများအား ဆရာမ ဒေါ်ဝင်းသန္တာ မှ လည်းကောင်း ပေးအပ်ခဲ့ကြပါသည်။ ထို့အပြင် အတန်းအလိုက် ဆုရရှိသော ကျောင်းသားကျောင်းသူများအားလည်း အခြေခံပထမတန်းကို ဆရာ ဦးဝင်းမော် ၊ အခြေခံဒုတိယတန်းကို ဦးမိုက်ကယ်လ်မောင် နှင့် အခြေခံတတိယတန်းကို ဆရာမ ဒေါ်မိုးအုန်း တို့မှ အသီးသီး ပေးအပ်ဂုဏ်ပြုခဲ့ကြပါသည်။

ထို့နောက် စာသင်ကျောင်း၏ စည်းမျဉ်းစည်းကမ်းများကို ဖွင့်ပွဲသို့ တက်ရောက်လာသော အုပ်ထိန်းသူမိဘများ၊ ဆရာဆရာမများနှင့် ကျောင်းသားကျောင်းသူများအား ပါရမီဗုဒ္ဓဝိဟာရ အတွင်းရေးမှူး ကိုပတ်ထရစ်မှ ရှင်းလင်း ပြောကြားခဲ့ပါသည်။ ထို့နောက် တက်ရောက်သူ အားလုံးမှ ဗုဒ္ဓသာသနံကို သုံးကြိမ် ရွတ်ဆိုကာ အခမ်းအနားကို အောင်မြင်စွာ ပြီးဆုံးခဲ့ပါသည်။

သင်တန်းနှစ်ခုစလုံးတွင် တက်ရောက်သင်ယူသော ကျောင်းသားကျောင်းသူ စုစုပေါင်း (၆၅) ဦးရှိပြီး လုပ်အားပေး ဆရာ၊ ဆရာမ (၁၅) ဦးမှ ပါဝင်အားဖြည့် ကူညီခဲ့ကြပါသည်။ သင်တန်းဖွင့်ပွဲ အခမ်းအနားပြီးဆုံးပြီးနောက် ကျောင်းသားကျောင်းသူများအတွက် ကြက်သားကင်နှင့် ပီဇာများကို မွေးနေ့ရှင် ကျောင်းသားများဖြစ်ကြသော မောင်ဘုန်းနေလရောင်ထွန်း မိသားစုနှင့် မောင်ထက်ဝဏ္ဏ မိသားစုတို့မှ ကုသိုလ်ဒါနအဖြစ် ကျွေးမွေး လှူဒါန်းခဲ့ကြပါသည်။ ကြာဇံချက် ကုသိုလ်ဒါနအဖြစ် BIC အဖွဲ့မှ ကုသိုလ်ပါဝင်ခဲ့ကြပါသည်။

11/20/2025

၉ နိုဝင်ဘာ ၂၀၂၅ တနင်္ဂနွေနေ့ မနက်ပိုင်း ၉:၃၀နာရီတွင် La Puanteမြို့ပါရမီ ဓမ္မဝိဟာရကျောင်း၌ LA Community မိသားစုဝင်များဖြစ်ကြသော အောက်တိုဘာ နိုဝင်ဘာ ဒီဇင်ဘာဖွား မွေးနေ့ရှင် ၃၁ဦးတို့၏ စုပေါင်းမွေးနေ့အလှူတခုကိုမြိုင်မြိုင်ဆိုင်ဆိုင် ကျင်းပဖြစ်ခဲ့ပါသည်။

အစဥ်အလာအတိုင်း BIC (Burmese Iron Chefs) နွေဦးတော်လှန်ရေးညီအမတတွေက ချက်ပြုတ် ဆွမ်းပြင် ကျွေးမွေးရေးကို ပျော်ပျော်ပါးပါး တာဝန်ယူကြပါသည်။
စားမယ်ဟင်းပွဲ အစုံအလင် ကြက် ဝက် ငါး ပုစွန် အပါအဝင် ချစ်တီးထမင်းနဲ့ ဟင်းလျာအပြင် အတို့ အမြှုပ်မကျန်စေဘဲ လုံလုံလောက်လောက် ပြင်ဆင်ထားကြပါသည်။
မွေးနေ့ကိတ်ကိုလည်း ပွဲကြီးနှင့် လိုက်ဖက်ညီစေရန် အထူး မှာယူထားပါသည်။

ပင့်ဖိတ်ထားသည့် ဖားအောက်တောရဆရာတော် အရှင်အဂ္ဂည၊ မြန်မာဗုဒ္ဓဘာသာကျောင်းဆရာတော် အရှင်စန္ဒာသီရိ၊ ဗုဒ္ဓဉာဏကျောင်းဆရာတော် အရှင်ဉာတိကတို့ အသီးသီး ကြွရောက်ချိန် ၉:၄၅နာရီခန့်တွင် ကျောင်းဓမ္မာရုံအတွင်း ဓလေ့ရှိသည့်အတိုင်း ဆရာတော် အရှင်အဂ္ဂညက ဦးစီးပြီး ပရိတ်တရား ရွတ်ဖတ် သရဇ္ဈာယ်ပြု၍ ကုသိုလ်ရှင်များက ဆရာတော်များအား နဝကမ္မ ဝတ္ထုအလှူငွေ ဆက်ကပ်ပြီးနောက် ရေစက်ချ အမျှဝေကြပါသည်အင်မတန် ကြည်နူး ချမ်းမြေ့စွာ သာဓု သုံးကြိမ် ချီိးမွမ်းရပါသည်။

ဆရာတော်များ ပူပူနွေးနွေး ဘုဥ်းပေးနိုင်ရန် ချိန်ခါညှိ ဆွမ်းပွဲများ ပြင်ဆင်ထားရာ ဆွမ်းစားဆောင်မှာ မွေးနေ့ရှင်များက ဆရာတော်များအား ဣဓမ္မေ ပုညာ နိဗ္ဗာနဿ ရွတ်ဆိုကြလျက် နေ့ဆွမ်းတော် ဆက်ကပ်အပြီးမှာ ရောက်ရှိနှင့်ပြီး နှင့် ချိန်ခါသင့် တဖွဲဖွဲ ကြွရောက်လာကြသော ဧည့်ပရိသတ်အပေါင်းတို့ကို ဝေယျာဝေစ္စ လုပ်အားပေးသူများ၏ တက်ညီ လက်ညီ စနစ်တကျ ပြင်ဆင် ဧည့်ခံ ကျွေးမွေးကြကာ ဧည့်သည်များကလည်း စိတ်တိုင်းကျ လိုလေသေးမရှိ ရွှင်လန်းစွာ မိတ်ဆုံစကားပြော သုံးဆောင်ကြရာ ရှုမြင်ရသူအသီးသီး ဝမ်းသာပီတိ ဖြစ်ရသည်မှာလည်း အတိုင်းမသိ ရှိလွန်းလှပါသည်။
မွန်းမတည့်မီလေးမှာ မွေးနေ့ ဆုပေး ဆုယူသီချင်းကို သိုက်သိုက်ဝန်းဝန်း သီဆိုကြပြီး ကိတ်မုန့်ခွဲဝေ စားကြသည်မှာလည်း ပျော်စရာကောင်းလှပါသည်။
စိတ်တူကိုယ်တူ ပါဝင် ထည့်ဝင် စိုက်ထုတ် ကောက်ခံရရှိငွေပမာဏမှာ $2705 ဖြစ်ပါသည်။
ငွေသားအချို့ကို အညာ(ရွှေဘို ဝက်လက်)နဲ့ ကရင်နီ(မိုးဗြဲ)PDF ရဲဘော်များအတွက် အဟာရအလှူတခု မမေ့မလျော့ စီစဥ်လှူဒါန်းဖြစ်ပါသည်။
ထိုအလှူများသို့ ဆရာတော်များကလည်း ပါဝင် ထည့်လှူပါသည်။

ဘုန်းတော်ကြီးများ၊ တရက်ကြိုတင် နေရာထိုင်ခင်း ခင်းကျင်း ပြင်ဆင် ပေးကြသူများ၊ လိုအပ်ရာရာ စိုက်ထုတ် လှုဒါန်းသူများ၊ ကြွရောက်ချီးမြှင့်ကြသူများ၊ ချက်ပြုတ် ပြင်ဆင်ပေးကြသူများ၊ အခမ်းအနားမှူးတို့အား အထူးကျေးဇူးတင်ရှိပါသည်။

ပါရမီကျောင်း ဂေါပကအဖွဲ့

10/28/2025

09/05/2025

၂၀၂၅ခုနှစ် ဩဂုတ်လ ၂၉ရက် သောကြာနေ့တွင် လာပွန်းတီမြီု့ပါရမီ ဗုဒ္ဓဝိဟာရမှာ Burmese American Dental Association မြန်မာ အမေရိကန် သွားဖက်ဆိုင်ရာ ဆရာဝန်များအသင်းက (၂၃) ကြိမ်မြောက် သံဃိက ဒါနအလှူပွဲ နှင့် တတိယအကြိမ်မြောက် ဒုလ္လဘ ရဟန်းခံ၊ သီလရှင်ဝတ်ခြင်းနှင့် ၄-ရက် တရားစခန်းကို သံဃာ၅ပါးပင့်ဖိတ်ပြီး ကြီးမှူးကျင်းပခဲ့ပါသည်။
လာပွန်းတီမြို့ Burma Buddhist Monastery ကျောင်းထိုင်ဆရာတော် ဦးသီလာစာရက ဥပဇ္ဈာယ်ပြုလျက် အရှင်၁၀ပါးကို ဒုလ္လဘရဟန်းခံပေးကာ
ဖားအောက် တောရ သစ္စဒီပက ဝိပဿနာရိပ်သာ ဆရာတော် ဦးအဂ္ဂညက ဦးစီးပြီး စူဠ ဝိဟာရ ဆရာတော် ဦးတေဇိန္ဒနှင့်အတူ
ဒုလ္လဘ ၁၀ပါး သီလရှင် ၄ပါး ယောဂီ ၄၀ဦးခန့်တို့ကို စက်တင်ဘာလ ၁ရက် တနင်းလာနေ့အထိ ၄ရက်တာ ဝိပဿနာ အလုပ်ပေးတရားစခန်း ဖွင့်လှစ် သင်ကြား ပြသခဲ့ပါသည်။
ဖွင့်ပွဲနေ့တွင် BADA အမှုဆောင်ကော်မတီဝင် သွားဖက်ဆိုင်ရာ ဆရာဝန် ဒေါက်တာ ဖူးပွင့်ဟန်က အခမ်းအနားမှူးအဖြစ် တာဝန်ယူလျက် အခမ်းအနား အဖွင့်မင်္ဂလာစကားကို ဦးဘုန်းရောင် ဦးက ပါရမီ ဗုဒ္ဓ ဝိဟာရ ကိုယ်စား ပြောပြီးနောက် BADA အမှုဆောင်ကော်မတီဝင် သွားဖက်ဆိုင်ရာ ဆရာဝန် ဒေါက်တာ မင်းလွင်က BADA ကိုယ်စား မိတ်ဆက်စကား ပြောကြားပါသည်။
ထို့နောက်တွင် ဆရာတော် ဦးသီလာစာရ အမှူးပြုလျက် ဧည့်သည်ဒကာဒကာမတို့ကို သီလပေးအပြီး ပရိတ်တော်များ ရွတ်ဖတ် သရဇ္ဈာယ် ရေစက်ချ အမျှပေးဝေ သာဓု အနုမောဒနာပြုပြီး သိမ်ဆင်းလောင်းပွဲကို ခြိမ့်ခြိမ့်သဲသဲ ကျင်းပကြပါသည်။
ပင့်ဖိတ် ရဟန်း သံဃာတော်များ ဒုလ္လဘရဟန်းများ မယ်သီလရှင်များအား ဆွမ်း ခဲဖွယ်ဘောဇဉ် အသီးအနှံ အချို စုံလင်စွာ ကပ်လှူ ပူဇော်အပြီးတွင် သိမ်ဆင်း ကပ်လှူ ပူဇော်ရာသို့ ကြွရောက်လာကြသော ဓမ္မမိတ်ဆွေ သူတော်စင် ဧည့်ပရိသတ် ၁၅၀ခန့်ကို မြန်မာထမင်းဟင်းတို့ဖြင့် ဧည့်ခံ ကျွေးမွေးပါသည်။
စက်တင်ဘာ ၁ရက် Labor Day တွင် စခန်းသိမ်းပွဲကျင်းပရာ အဇူဇာကျောင်းဂေါပကအဖွဲ့ဝင် ကိုသက်ထွန်းက အခမ်းအနားမှူးအဖြစ် ကူညီဆောင်ရွက်ပေးပါသည်။ ပါရမီ ဗုဒ္ဓဝိဟာရ ဂေါပက အဖွဲ့ဝင် မခိုင်ရွှေဝါအောင်က ကျေးဇူးတင်စကားပြောကြား၍ ဆရာဦးမင်းလွင်က ကုန်ကျငွေ လှူဒါန်းငွေ စာရင်းရှင်းတမ်းနှင့်အတူ ကျေးဇူးတင်စကား ပြောကြားပါသည်။ BADA အဖွဲ့ဝင်များက ပါရမီ ဗုဒ္ဓဝိဟာရ၊ ဖားအောက်တောရ သစ္စဒီပက ဝိပဿနာရိပ်သာ အတွက်အလှူငွေများအပြင် ဆရာတော်အရှင်အဂ္ဂညနှင့် ဆရာတော်အရှင်တေဇိန္ဒတို့အတွက် နဝကမ္မအလှူငွေများကိုဆက်ကပ်ခဲ့ပါသည်။
ရဟန်း ရှင် လူပရိသတ်တို့ အပြန်အလှန် ဝန်ချ တောင်းပန် သည်းခံ ခွင့်လွှတ် မေတ္တာပြုကြပြီး ဗုဒ္ဓ သာသနံ စိရံ တိဋတု ၃ကြိမ်ရွတ်ဆိုကာ အောင်မြင် ခမ်းနားစွာ မြန်မာ အမေရိကန် သွားဖက်ဆိုင်ရာ ဆရာဝန်များအသင်းကြီး၏ (၂၃) ကြိမ်မြောက် သံဃိကဒါန အလှူပွဲနှင့် တတိယအကြိမ်မြောက် ဒုလ္လဘ ရဟန်းခံ၊ သီလရှင်ဝတ်ခြင်းနှင့် ၄-ရက် တရားစခန်းကို ပိတ်သိမ်းပါသည်။
ထို့နောက် ရဟန်းတော်များ ဒုလ္လဘများနှင့် မယ်သီလရှင်များအား နေ့ဆွမ်းဆက်ကပ်လျက် ဧည့်ပရိသတ်တို့ကို မုန့်ဟင်းခါး၊ ကျောက်ကြော၊ ရွှေရင်အေး စသော အချိုပွဲတို့နှင့် ကျွေးမွေး ဧည့်ခံပါသည်။

01/14/2025

ပါရမီဗုဒ္ဓဝိဟာရ လူငယ် ဗုဒ္ဓဘာသာ နှင့် မြန်မာစာ ကျောင်းဖွင့်ပွဲ အခမ်းအနားကို ဇန်နဝါရီလ ၁၂ ရက် ၂၀၂၅ ခုနှစ်တွင်ကျင်းပ ဖွင့်လှစ်ခဲ့ပါသည်။အခမ်းအနားအစီအစဉ်မှူးအဖြစ် မမျိုးမျိုးမှ တာဝန်ယူဆောင်ရွက်ပေးပြီး နမောတဿ ၃ ကြိမ်
ရွတ်ဆို၍ အခမ်းအနားဖွင့်လှစ်ခဲ့ပါတယ်။
ဖားအောက်တောရကျောင်းဆရာတော် အရှင်ပညာဓိကာလင်္ကာရ မှ အဖွင့်အမှာစကား ပြောကြားခဲ့ပြီး၊
ဆရာမကြီး ဒေါ်တင့်ရီ၊ ပါရမီဗုဒ္ဓဝိဟာရ ဂေါပကဥက္ကဌ ဦးဘုန်းရောင်ဦး တို့မှလည်းဖွင့်ပွဲအတွက် ကျေးဇူးတင်အမှာစကား ပြောကြားခဲ့ပါသည်။
ထို့နောက် စာသင်ကျောင်း စည်းမျဉ်း စည်းကမ်းများကို ဖွင့်ပွဲတတ်ရောက်လာသော အုပ်ထိန်းသူ မိဘဆရာ ကျောင်းသူ/ကျောင်းသားများကို အခမ်းအနားအစီအစဉ်မှုး မမျိုးမျိုးမှ ရှင်းလင်း ပြောပြခဲ့ပြီးနောက် တတ်ရောက်သူအားလုံး ဗုဒ္ဓသာသနံ သုံးကြိမ်ရွတ်ဆိုကာ အခမ်းအနားအောင်မြင်စွာ ပြီးဆုံးခဲ့ပါသည်။

သင်တန်း ၂ခုလုံးအတွက် တတ်ရောက်သူ ကျောင်းသူ/ကျောင်းသား ၇၀ဦးရှိပြီး လုပ်အားပေး ဆရာ၊ဆရာမ ၁၅ဦး အားဖြည့်ကူညီခဲ့ပါသည်။သင်တန်းနှစ်ခုကြား နားချိန်အတွင်း ကျောင်းသူကျောင်းသားများအတွက် အဆာပြေ ဆီချက်ခေါက်ဆွဲ ကို Burmese Iron Chefs အဖွဲ့မှ ကုသိုလ်ဒါနပြု ကျွေးခဲ့ပါသည်။