https://www.facebook.com/104118757799811/

From the Desk of Dr. Taito, Hayward, CA (2026)

04/24/2025

Hhh

02/20/2025

'Oku ou fa'a fai 'a e ngaahi me'a ni 'ia Kalaisi 'oku ne fai hoku fakamalohia.

Me’aTokoni Faka’aho
Tu’apulelulu ‘aho 20 ‘o Fepueli, 2025

"Pea pehē ange ʻe Tēvita, ʻKo e ʻEiki naʻá ne fakahaofi au mei he pesipesi ʻo e laioné pea moe peá, te ne fakahaofi au mei he nima ʻo e Filisitia ko ʻení.ʻ" 1 Samiuela 17:37

ʻI he 1 Samiuela 17:39, ʻoku tau ako ai ha lēsoni mahuʻinga meia Tēvita. ʻI he taimi naʻe pole ai ʻa Tēvita ke tau mo Kolaiaté, naʻe loto ʻa Tuʻi Saula ke ne tui hono teunga taú. ʻOku pehē ʻe he vēsí, "Naʻe haʻi ʻe Tēvita ʻene heletaá ki he kongaloto, ʻo ne feinga ke lue takai koeʻuhi naʻe ʻikai te ne anga ki ai. " Naʻá ne pehē ange kia Saula, "He ʻikai ke u lava au ‘o tui ‘a e teunga, koeʻuhí he ʻoku ʻikai ke u anga ki ai." Ko ia naʻá ne toʻo leva ‘a e teunga." ʻOkú ke ʻiloʻi ʻa e meʻa naʻe leaʻaki ʻe Tēvitá Naʻá ne pehē mai, "ʻOku ʻikai ko au ʻeni. He ʻikai ke u lava ʻo hoko ko koe. Naʻe ʻikai ke pani au ʻe he ʻOtua ke u hoko ko ha taha ‘oku ‘ikai ko au tonu ia. Pea ʻoku ou ʻiloʻi ʻoku ʻikai ʻasi ngingila mo fakaʻofoʻofa ʻeku kiʻi sengai ʻo hange ko hoʻo heleta fakatuʻi, ka ko e meʻa ʻeni naʻe foaki mai ʻe he ʻOtua kiate au keu ngaue 'aki. Ko e meʻaʻofa ʻeni naʻe foaki mai ʻe he ʻOtuá kiate aú, pea ko e taimi ʻoku ʻi ai ʻa e tākaí ‘o e pani, ʻoku mālohi."

ʻE pani koe ʻe he ʻOtuá ʻi he taimi ko ko e pe ia ‘o ‘ikai ko ha’o fa’ifa’itaki ki ha taha kehe. Mahalo te ke sio ki ha taha peá ke fakakaukau, "Tamani, sio ki hono fakaʻaongaʻi ia ʻe he ʻOtuá," peá ke fakakaukau, "Kapau te u lava ʻo hangē pē ko kinautolú, ʻe lava ke fakaʻaongaʻi au ʻi ha founga mālohi." Ka ʻoku maʻu ʻe he tangata to’a ‘I he tau ha fakaha-"ʻoku ʻikai fie maʻu ia ke u hoko ‘o fakangalingali ko hai kita pea ‘e toki fakaʻaongaʻi ʻe he ʻOtua."

Ko e taketi ia ‘a e fili ke ke ongo’i lotosi’i pea taʻepauʻia pe ko hai koe. Ki ha tokotaha foʻou, kuo pau pē naʻe hā ngali vale ʻa Tēvita, ‘I he ‘ene ʻasi ʻi he mala’etau ‘I he vala ʻo e tauhi - sipí pea ne toʻotoʻo pē mo e makata. Naʻe mei lava pē ke ʻahiʻahiʻi ke ne tui ʻa e teunga tau ‘o e taha ‘o e kau sōtia ke hange pe naʻá ne ʻiloʻi ʻa e meʻa naʻá ne faí. Ka naʻe ma’u pe loto ‘o Tevita peá ne pehē ange, "ʻIkai, te u hoko pē au ko au. Kuo lava ʻe he ʻOtuá ke fai ha ngaahi meʻa lalahi ʻiate au ʻi he kuohilí, pea te Ne toe fakahoko pē ia." Sio, ko e fakapulipuli moʻoni ʻo e falala ʻa Tēvitá naʻe ʻikai ko ʻene tui kiate iá pe ka ko ‘ene tui falala ki he ‘Otua. Naʻá ne mamata ki hono fakaʻaongaʻi ia ʻe he ʻOtuá ke ne fai ha ngaahi meʻa ʻoku ʻikai malava, ʻa e ngaahi meʻa naʻe ʻikai totonu ke fai ʻe ha tamasiʻi kei siʻi. Naʻá ne ʻiloʻi ko e matavai ʻo ʻene lavameʻá ko e hoko ‘a Sihova ko hono paletu’a. ʻI hoʻo maʻu ʻa e fakapapau ko iá, ʻokú ke ongoʻi malu ai ʻi he me’a ‘oku ‘amanaki ke ke fai pea fou atu ai ‘I he hala fononga.

Taʻofi hoʻo feinga ke hangē ko ha taha kehé. Naʻe ʻikai hao ʻa Tēvita ki he teunga tau ʻo Saulá he naʻe ʻikai ʻuhinga ia ke ne tui ia. ʻI he founga tatau, mahalo heʻikai nai te ke feʻunga ko e ke fa’ifa’itaki ha tokotaha ʻokú ke saiʻia lahi ai. Mahalo naʻe fakatupu koe ʻe he ʻOtua ke ke ikunaʻi ho fili ‘aki ha makata kae ʻikai ko ha heleta. Mahalo he ʻikai ke ke lava ʻo hoko ko ha toketa, kae mahalo te ke liliu e moʻui ʻaki haʻo hoko ko ha faiako. Mahalo he ʻikai te ke hoko ko e Palesiteni, ka te ke lava ʻo takiekina ha lauiafe ko ha tokotaha sipoti manavahe ʻOtua. Mahalo he ʻikai te ke hoko ko ha tokotaha malanga, kae mahalo te ke hoko ko e tokotaha ke taki ha ngaahi famili tukuhausia ʻe laungeau ki ha moʻui ʻoku lelei ange. He ʻikai ke ke lava ʻo fakamalohiʻi koe ke ke hao ha puha ʻo ha ui ‘o ha taha kehe. ʻOku taha pē koe ʻi he māmaní, pea he ʻikai ke toe ʻi ai ha taha hangē ko koé. Ko ia, ʻalu atu ʻo hoko ko e tatau lelei taha pe ko e ‘o ko e te ke lava, pea ʻi ho’o kau moe ‘Otua ‘I ho tafaʻaki, te ke hoko ko ha ivi malohi ʻi he mamani ko ʻeni!

ʻOku fiemaʻu ʻe he ʻOtuá ke tau maʻu ʻa e lototo’a moe falala ‘ia kitaua pea moe me’a kuo tuku ‘ehe ‘Otua ma’au kef ai. ‘Oku ʻikai ke tau pōlepole mo fielahi ka ko ha ʻilo pau ko hai kitautolu ‘ia Kalaisi! ʻOku totonu ke ʻasi ‘a e fofonga ‘o e ‘Otua hotau fofonga fakatāutahá, ko hotau tupuʻangá. ʻI he taimi ʻoku ke fie maʻu ai ha ivi takiekina ʻo e ongoʻi mahuʻingaʻia ʻiate kita, ʻoku ʻikai ha feituʻu lelei ange ia ke ke tafoki ki ai ka ko e Tohi Tapu! ʻOku fonu e folofolá ʻi he ngaahi moʻoni mo e talaʻofa ʻe lava ke tau falala ki ai.

Ko ʻetau falalá ʻoku ʻia Sīsū Kalaisi pea mo e ʻofa ʻa e ʻOtuá. ʻI he taimi ʻokú ke ongoʻi ai ʻoku ʻikai ke ke lelei feʻunga pe ʻikai mālohi feʻúnga, manatuʻi ko hai koe ‘I he lau ‘a e folofola. Kapau ‘e ‘ia Kalaisi ha tangata, ko e matu’aki fakatupu fo’ou ia, kuo mole ‘a e ngaahi me’a mu’a, kuo hoko ‘o fo’ou ‘a e me’a kotoa (2 Kolinito 5:17). Ko ia ‘oku ‘ikai ha fakafmala’ia kiate kinautolu ‘oku ‘ia Kalaisu Sisu (Loma 8:1). ʻI heʻetau hoko ko e fānau ʻa e ʻOtuá, ʻoku tau maʻu ha ngaahi talaʻofa fakaofo mo ha tofiʻa ʻoku fakafou mai ʻi heʻetau tui kia Kalaisí. ʻOku ʻuhinga ʻeni ʻoku tau ʻinasi ʻi he ngaahi tāpuaki mo e angalelei ʻa e ʻOtuá. ʻOku fakapapauʻi mai ʻe hotau tuʻunga ʻia Kalaisí ʻoku ʻikai ko kitautolu pē ʻoku ʻi he māmaní; ʻoku tau maʻu ha tuʻunga totonu ʻi he fāmili ʻo e ʻOtuá. ʻOku ʻomi ʻe he mahino kiate kitautolu hotau tofiʻá ha ʻamanaki lelei mo ha mālohi ke fehangahangai mo e ngaahi faingataʻá. ʻOkú ne fakamanatu mai ʻoku tau kau ki ha meʻa ʻoku lahi ange ʻiate kitautolu. Te tau lava ʻo mālōlō ʻi he moʻoni ʻoku malu hotau kahaʻú ʻiate Ia. Te tau lava ‘o fai ha ngaahi me’a pe he ko Sihova ‘oku ne fai ho tau fakakaukaua – Filipai 4:13.

‘Ofa ke tapuekina ‘e he ‘Eiki.

10/31/2024

‘Oua na’a ke fili ke fakafepaki ki he ‘Otua

Me’aTokoni Faka’aho
‘Okatopa 31, 2024

Semisi 4:4 “…ʻikai te mou ʻilo ko e feʻofoʻofani mo māmani ko e taufehiʻa ia ki he ʻOtua? Pea ko ia ia ʻoku loto ke kāinga mo māmani ko e fili ia ʻoe ʻOtua.

‘Oku lolotonga fai ‘a e fepaki ‘I ho tau fonua ni, ko e tau ‘oku fai ‘a Setane mo Satai, ‘a e lelei mo e kovi, ‘a e mo’ui faka’Otua moe mo’ui ta’e faka’otua, ‘a e angahala mo e ma’oni’oni, ‘a e fakakakano pea mo e fakalaumalie pea ‘oku hoko mai ia ke fakautuutu pea malohi ange ‘I he ngaahi ‘aho ko’eni. Ko e fehu’I ki ho’o mo’ui fefine moe tangata Kalisitiane ‘I he ‘aho ni. Ko fe ‘a e feitu’u ‘oku ke tu’u mei ai.? Ko e tokotaha fakalaumalie koe pe ko e tokotaha fakakakano. Ko e tokotaha ‘oku ke mo’ui ‘aki ‘a e folofola ‘a e ‘Otua, pe ko e Republican, pe Democrat, pe ‘oku ke Independent pe.? ‘Okapau ko ha Kalisitiane ko e, kuo pau pe ke ke tu’u ‘I he tafa’aki ‘o e ‘Otua. Ko Sisu ko e Eiki ia ‘I he me’a kotoa, pea ko ‘ene folofola ko e mulituku ia ‘o e malohi mo e mafai. Ko ha fonua ‘oku malu pea fefeka hono makatu’unga, ko ha fonua ia he’ikai ha toe uesia. ‘Okapau e faka’auha ‘a e makatu’unga ‘o ha fonua, ko e taimi nounou pe mei ai kuo faka’auha ‘a e fonua ko ia pea fou atu ‘I he faingata’a mo e fakatanga’I lahi ‘aupito. ‘Oku lava pe ke tau sio ai ‘I he hisitolia ‘o e folofola.

Ko e ‘uluaki makatu’unga pe ‘oku ala mai ‘a e tevolo mo e fili ke fk’auha ko e faka’auha ‘a e mo’ui pe ko e me’afakatupu ‘a e ‘Otua. Ko e “fakatotama” ko e hingoa ia ‘oku ngaue’aki ‘e he fonua ni mo e mamani ko’eni ki hono “tamate’i” ‘o ha ki’i valevale ‘oku si’i tonuhia pe ia. Levitiko 18:21 ‘oku pehe ‘e he folofola, “Pea ʻoua naʻa ke tuku ke ʻalu ʻa ho hako ʻi he afi kia Moleki, pea ʻoua naʻa ke fakaongokovi ʻae huafa ʻo ho ʻOtua; Ko au ko Sihova.” Ko Moleki ko e fu’u taulatevolo na’e hu ki ai ‘a e kakai tokolahi pe ko ‘ene tu’utu’uni ke fai mai ‘a e feilaulau kiate ia, ko e feilaulau ‘o e tamate’i e fanga ki’i fanau ‘o fai ‘ae feilaulau ki ai. Talamai ‘e he folofola ‘a e ‘Otua, ko e feilaulau ko ia te ne faka’auha ha fonua, ka ‘oku fai ia ‘I ‘Amelika ‘I he ‘aho kotoa pe. Ko e feilaulau ‘aki ‘a e fanga ki’I pepe hono tamate’I mei manava (abortion) ko e me’a tatau. Ko e me’a fakaloloma ko e ui ia ‘e he fonua ko’eni ko e “pro-choice” pe ko ho’o fili fa’iteliha ke to’o ho’o tama he ko ho sino pe ‘o’ou, pe ko e “pro-life” ko ho’o fili ki he mo’ui ke fakamo’ui ‘a e me’a mo’ui ‘oku fua ho manava. ‘Oku pehe koaa hono feinga ‘a e fonua ni ke fakatohuhia ‘a e tamate tangata ko e ki’i pepe koaa ‘I he manava ‘o e faee ‘oku te’eki hoko ia ko ha me’a mo’ui pe ko ha tangata ko ia ai ko e fili pe ‘a e fefine ki hono sino ‘o’ona ke to’o pe ‘ikai.

Kaikehe, kainga tui ‘I he ‘aho ko’eni tautautefito ki he fonua ko ‘Amelika. Ko e fili ‘oku ‘amanaki ke tau fou atu ai ‘I he ‘aho 5 ‘o Novema, 2024, ko e me’a lahi ia ‘a e paati politiki ‘a e taukave’I ‘o e fakatotama ko e fili fa’iteliha ‘a e faee, pe ko e tapu fakalao ke fai a e fakatotama he ko e tamate tangata ia. Ko ko e mo au ko e siasi pea mo ‘etau tui ki he mo’ui pea ko e fakatotama ko e tamate tangata.
Sio ange ki he tu’u mo e fakamamafa ‘a e paati ‘oku ke ‘amanaki fili ki ai pe ko e ha ‘enau tui mo e tu’u ‘I he ngaahi me’a mahu’inga ‘oku lau ki ai ‘a e folofola ‘a e ‘Otua. ‘I ho’o fili ki he paati ‘oku nau taukave’I ‘a e fakatotama ‘o a’u pe ki he mahina 9, ko ho fili ki he paati ‘oku nau taukave’i ia, ko ho’o halaia ai pe fakataha mo kinautolu ‘I he ‘ao ‘o e ‘Otua. Te ke tu’u ‘o fakamatala. Ko e me’a mahu’inga ia ke ke sio ki ai.

Ko e ma’uma’uluta ‘o e nofo mali, ko e me’a mahu’inga ia ‘e taha ‘I he’etau nofo fakafamili pe fakakainga ‘I he sosaieti ‘oku nau nofo ‘I ai. Senesi vahe 1 veesi 27 “Ko ia naʻe ngaohi ʻae tangata ʻe he ʻOtua ʻi hono tatau, naʻa ne ngaohi ia ʻi he tatau ʻoe ʻOtua; naʻa ne ngaohi ʻakinaua ko e tangata mo e fefine.” Ko e fefine mo e tangata na’e fakatupu ia ‘e he ‘Otua ‘I hono ‘imisi pea ne fakatapui ki naua ko e husepaniti mo e uaifi pea ke na fakafanau ‘o fakakakai ‘a e fonua. Ko e fefine mo e fefine pe ko e tangata mo e tangata he’ikai ‘aupito ke malava ia ke fakafanau. Ko e fonua ni mo hono ‘ulungaanga ‘oku nau pehe Te ke fa’iteliha pe ko e pe ‘oku ke fie liliu fefine pe tangata, ka ko e folofola ‘eni kainga, Senesi vahe 2 veesi 18 “Pea naʻe folofola ʻe Sihova ko e ʻOtua, “ʻOku ʻikai lelei ke tokotaha pe ʻae tangata: te u ngaohi kiate ia ha tokoni ʻoku taau mo ia.” 22 Pea ko e hui vakavaka ʻaia naʻe toʻo ʻe Sihova ko e ʻOtua mei he tangata, naʻa ne ngaohi mei ai ʻae fefine, pea ʻomi ia ki he tangata. 23 Pea naʻe pehē ʻe ʻAtama, “Ko e hui eni ʻo hoku ngaahi hui, mo e kakano ʻo hoku kakano: ʻe ui ia ‘ko e Fefine,’ koeʻuhi naʻe toʻo ia mei he Tangata.” 1 Kolinito vahe 11 veesi 8, ‘oku pehe ‘e he folofola, ko e me’a kotoa pe na’e fakatupu ‘e he ‘Otua, pea ‘oku ‘ikai ha mafai ‘o e lao ke ne fai tu’utu’uni ki he fa’u ‘a e ‘Otua.
Isaia vahe 5:20 ‌ʻE malaʻia ʻakinautolu ʻoku ui ʻae kovi ko e lelei, mo e lelei ko e kovi; ʻoku ui ʻae poʻuli ko e maama, mo e maama ko e poʻuli; ʻoku ui ʻae kona ko e melie, mo e melie ko e kona!”

‘Ikai ko e me’a ia ‘oku fai ‘e ho tau kau taki ‘I he fonua ni, ko e ui e lelei ia ko e kovi, pea ui ‘a e kovi ia ko e lelei. ‘Oku ui ‘a e tamate pepe ia ko e “tau’ataina ke fili” ‘a e fefine. Ko e palopalema ko e ‘ikai ko e paati Repulican pe ko e Democrat, ka ko e palopalema ‘o e ma’oni’oni pea mo e ta’ema’oni’oni. Ko e palopalema ‘o e lelei mo e kovi, koe maama mo e fakapo’uli. ‘Oku kumi mai ‘a e ‘Otua ki ha kakai te nau tu’u ma’a Kalaisi ke taukave’I ‘a e ma’oni’oni ka e ‘ikai ko e ta’ema’oni’oni, ke taukave’i ‘a e mo’ui ka e ‘ikai ‘a e mate, ke taukave’i mo’oni ka e ‘ikai ko e loi. Ke tau tu’u hange ko e tu’u ‘a e toko tolu Hepelu, tu’u hange ko Taniela pea ‘ikai pe ke punou ia ki ha ‘otua kehe pea tatau ai pe hono fakatanga’i kinautolu. ‘Oku kumi mai ‘a e ‘Otua ki ha kakai ‘oku nau tu’u pea taukave’i e mo’oni fakafolofola pea oua e toe fakahoho loto ‘a ‘enau tui mo e falala ‘Otua.

Kau Kalisitiane ‘I he ‘aho ko’eni, ko ko e ‘oku ke lava ‘o kau he fili ki he kau taki ‘o e fonua ni, ke ke vakai pea ke ‘ilo ‘a e tu’u ‘a e kakai ‘oku ke fili ai ‘I he me’a faka’Otua. ‘Oua te ke fili ‘o pehe ko e taha ‘eni ‘e ma’u mei ai ‘eku pa’anga lahi mo eku penefiti. Fili ko e ki he ma’oni’oni he ‘oku monu’ia ha tangata pe fonua ‘oku falala ‘Otua. ʻOku monūʻia ʻae puleʻanga ko ia ʻoku ʻOtua ʻaki ʻa Sihova; pea mo e kakai kuo ne fili ko e tofiʻa ʻoʻona Saame 33:12.

‘Ofa ke tapuekina kimoutolu ‘e he ‘Eiki.

10/26/2024

Fakalotolahi’i ‘e ko e KO E ‘I he Eiki

Me’aTokoni Faka’aho
‘Okatopa 26, 2024
A

1 Samiuela 30:6 “Pea naʻe mamahi lahi ʻa Tevita; he naʻe alea ʻae kakai ke tolongaki ia ʻaki ʻae maka, koeʻuhi kuo mamahi lahi ʻaupito ʻae loto ʻoe kakai kotoa pē, ʻo taki taha ʻae tangata ki hono ngaahi foha, pea ki hono ngaahi ʻofefine: ka naʻe fakafiemālieʻi ia ʻe Tevita ʻia Sihova ko hono ʻOtua.”

‘I he taimi na’e mole ai ‘a e me’a kotoa, na’e fakalotolahi’i ‘e Tevita ia ‘I he ‘Eiki. Ko ‘ene fanau mo e uaifi ne puke fakamalohi’i ‘e he fili pea tutu mo e me’a kotoa pe ki he kelekele pea ko e efu pe na’e toe. Ko ‘ene kau tangata e na’a nau fealelea’aki ke tolomaka’i ia. Na’e ‘ikai ke toe ‘iai ha taha ia ke ne fakalotolahi’i ‘a Tevita. Kainga tui, kuo pau pe a’u atu ‘a e fononga’anga ki he taimi pehe ‘o e mo’ui. Ko e me’a pe ke ta fai ‘o hangee ko Tevita, na’a ne fakalotolahi’i pe ‘e ia ia ‘I he ‘Eiki. Taimi ‘e ni’ihi ‘e ‘ikai ke ‘iai ho hoa pe ko kaume’a ofi, ke ne fakalotolahi’i ko e. Kaikehe kainga, na’e ‘iai ‘a e me’a mavahe na’e fai ‘e Tevita. Na’e fakalotolahi’i ‘e Tevita ia ‘I he ‘Eiki ko hono ‘Otua. Na’e ‘iai ‘a e kolotau matu’aki malu ‘i hono loto na’e hopo hake ia pea na’ane tekelele ia ke ‘ave ‘ene falala ki hono ‘Otua, ‘a e ‘Otua ‘oku ‘ikai tomui, ‘oku ‘ikai fai vave, ka ‘oku taimi ma’u pe ‘e ne founga mo ‘ene tokoni. Ko e fa’ahinga loto ‘o e tangata tui ‘Otua. Na’ane ‘ilo papau ‘a e me’a ke ne fai, ko e fakalotolahi’i ia ‘I he ‘Eiki. Ko e fehangahangai moe fu’u faingata’a pehe ‘e lava pe ia ‘e ha tangata tui malohi pea ma’u ‘a e laumalie ‘o ha tangata tau. Ko e me’a na’e hokoo na’a ne tekelele ‘a Tevita ke lotu pea tangi ki he ‘Otua. Ko e fakafeta’i mo e hu na’e ‘otometiki pe ‘e ne hoko mai ki he mo’ui ‘a Tevita.

Koia ai kainga, ko e fehu’i he pongipongi ko’eni, ‘e anga fefe ha’o fakalotolahi’i ‘e ko e KO E ‘I he ‘Eiki.? Ko e ha ho’o me’a ‘e fai ‘i ha hoko mai ha taimi pehe ni ‘o e mo’ui.? Ko e ha ha’o me’a ‘e fai ‘I he taimi ‘oku ‘ao’aofia ai ‘a e Langi pea kaupo’uli ‘a e mo’ui pea ‘ikai lava ke ke sio ki he maama ‘I he ngata’anga ‘o e ‘ana.?
1) Ko ‘uluaki me’a na’e fai ‘e Tevita, ko ‘ene toe fakamanatu ‘a e ikuna ‘o e ‘aneafi. Na’e fakafoki leva ‘e Tevita ‘e ne manatu. Manatu ko e taimi fakatu’utamaki ‘eni ‘I he mo’ui ‘a Tevita, mole e famili, mole e koloa ‘a e siliva mo e koula, ‘auha e me’a kotoa. Ko’ene nofo ko’eni ko e nofo ‘a e faka’ofa, ta’e ‘iai ha ‘api, nofo fiekaia. Ko e toe fakaloloma angee ko e kakai na’a ne fa’a falala ki ai ‘ene kau tangata kuo nau teu hono tolomaka’i. Kaikehe, mahalo pe na’e ‘alu ‘ene fakakaukau ki he taimi na’a ne tokanga ai ki he fanga sipi ‘ene tamai. Na’e ‘ikai hano ‘api pe fale pe pule’anga pe ko hano ngaahi kaume’a. Ka na’e ‘omai ‘e he ‘Otua ‘a e palofita ke ne pani lolo hono ‘ulu. Na’e manatu’if ‘e Tevita ‘a e malohi na’e foaki ‘e he ‘Otua ‘i he taimi ko ia na’e feinga mai ‘a e fili ke kaiha’asi ‘e ne fanga sipi. Na’a ne manatu ki he ‘ene lava ‘o tau’i ‘a e laione mo e pea ‘aki pe hono nina. Na’a ne manatu ki he’ene tamate’i ‘a e fu’u saieniti ko Kolaiate. Na’a ne fakalotolahi’i ‘ia ‘I he ‘Eiki. Kainga, tuku ke tau tupe’i ‘a e lotosi’i pea ‘oua te tau hoko ko e tokotaha ‘oku pa tataha holo ‘e he fili ka tau tu’u hake ‘o fakalotolahi’i ko e ‘I he ‘Eiki. Ko e ‘Otua ‘oku ke tauhi ‘oku ne tatau pe ia ‘I he ‘aho na’a ke faingata’a’ia ai pea ne kalofaki’I ho’o mo’ui ‘I he ‘aneafi, ko e ‘Otua tatau pe ia ‘I he ‘aho ni pea fai ‘o ta’engata.

2) Ko e ua ki ai, ko e me’a te ke lava ‘o fakalotolahi’I ‘aki ko e ‘I he Eiki, ko ho’o manatu ‘oku ke ‘I he malumalu ‘a Satai. Ko e kau ‘angelo ‘oku nau ‘a takai’i ko e ‘o fai ho tokanga’i mo ho malu’i. Ko Sihova ia ‘oku ne tokanga’I ko e mo ho famili. ‘Oku kei ‘iai pe ‘a e ngaahi feinga tau t eke fou atu ai ka ko’eni ‘oku ke malu ‘I he fakamalumalu ‘o e ‘Otua Mafimafi pea he’ikai monu’ia ha mahafu tau kuo teuteu ke ne tau’i ko e.

3) Ko e tolu ki ai, ko ho’o fakamanatu pe kia ko e, ko e ‘Otua ‘oku ke tauhi ko e ‘Otua ‘o e malava. Ko e ‘Otua fai me’a mana, ko e ‘Otua tofa hala, ko e ‘Otua ia ‘o e fakaai, ko Sihova ia hono huafa ko Sihova Saila, ‘oku tokonaki pe ‘e Sihova. Ko hono huafa ko Sihova Nisi, ko e ‘Otua ‘o e ikuna. Ko hono huafa ia ko Sihova Tisikenuu, ko ho fakama’oni’oni. Ko hono huafa ia ko Sihova Salome, ko e ‘Otua ‘o e melino. Ko hono huafa ia ko Sihova Sama, ko e ‘Otua ‘oku ne ‘I ai. Ko hono huafa ko Sihova Rapha, ko e ‘Otua ‘oku ne fai ho fakamo’ui. Ko Sihova ia ko e ‘Otua ta’engata, koe ‘alifa mo e ‘Omeka, ko e kamata’anga moe ngata’anga. ‘Ofa ke tapuekina kimoutolu ‘e he ‘Eiki.

AGAPE Love Fellowship
ME'ATOKONI FAKA'AHO

10/24/2024

Ko e faito’o ‘o e lotosi’I - (Part 3)

Me’aTokoni Faka’aho
‘Okatopa 24, 2024

Sute 1:20-21 “20 Ka ko kimoutolu, ko e ʻofeina, ke langa ʻaki hake ʻakimoutolu ki hoʻomou tui fungani māʻoniʻoni, pea lotu ʻi he Laumālie Māʻoniʻoni, 21 ‌ʻO tauhiʻi ʻakimoutolu ʻi he ʻofa ʻae ʻOtua, mo ʻamanaki ki he ʻofa mataʻataʻatā pē ʻa hotau ʻEiki ko Sisu Kalaisi ki he moʻui taʻengata.”

Ko e tali pe ko e faito’o ki he lotosi’i pe ko e loto hoha’a ko e teuteu pea faka’ata ‘a e laumalie ‘o e tufunga langa ‘i he’eta mo’ui. Kuo pau ke ke lotolahi pea teuteu ki he taimi ‘o e faingata’a ke ‘oua na’a faka’ata ‘a e fili ke ne ikuna’I ‘etau mo’ui. Ko e ngaahi hala ‘e tolu ‘oku fiema’u ‘e he ‘Otua ke ne toe langa hake ho’o mo’ui. Ko e ‘uluaki na’a tau ‘osi lave ki ai he me’atokoni ‘o e ‘aneafi, 10/23 pea ko e hono ua, kuo pau pe ke toe langa ‘a e ngaahi va kainga mo e tokotaha kotoa pe. ‘I he taimi na’e hoko mai ‘a e fili ke ne veuki ‘a e famili, tuku ‘a e fakaanga ka e fai ha me’a.

Ko e kuonga ‘eni ia ‘o e selfie. Kakai ia ‘e ni’ihi ko e ngaahi ‘ata ‘e 400 tupu he ‘aho hono upload hake ki he Facebook mo e ngaahi peletifoomu kehekehe. Kuo hoko mai ‘eni ia ‘a e laumalie ko ia ki he siasi pea ko e mo’ui siokita ‘oku fu’u malohi ia he kuonga ko’eni. ‘I he taimi ‘oku tau fou atu ai ‘I he faingata’a, ‘oku tau fasi’a ‘o pehe ko kitautolu ‘oku hoko mai ki ai ‘a e faingata’a pea ko au pe ia ‘oku faingata’a’ia. Tau sio pe kia kitautolu pe. Kaikehe, ko e faka’amu ‘a e ‘Otua kainga ke mafao atu ‘etau sio pea sio ki he fiema’u ‘a e kakai kehe pea ke langilangi ‘ia ‘a e ‘Otua ‘I he me’a kotoa pe. I he taimi te ke sio ai ki he fiema’u ‘a e kakai, te ke fakatokanga’I leva ‘a ho’o ‘ave ‘a e langilangi pe ki he ‘Otua ‘I he lavame’a kuo ke fai. ‘E fai ho faito’o ‘e Sihova ‘I he faingata’a ‘oku ke fou atu ai ‘I ha’o tokanga ke fai tatau ki he tokotaha kehe. Neongo ‘ene faingata’a ka t eke lava pe ‘okapau he ‘ikai te ke fo’i. Ko ho’o talaloto mo’ui te ne tokoni’i ha tokotaha ‘oku ‘I ai ha’a ne fiema’u.

Na’e ‘iai ha toketa Kalisitiane ko’ene ngaue ko e fale’i pea tokoni’i ‘a e kakai ‘oku nau fonu palopalema’ia faka’atamai. Na’e tokoni’i ‘e he toketa ko’eni ha fefine ‘I he ta’u ‘e 3. Ko e palopalema ‘oe kaunanga ko’eni na’e fu’u lahi pea ne fou atu ‘I he tamai moe faee na’a na fakaehaua ‘e ne mo’ui he’ene kei si’i, ko e nofo mali tu’o fiha ee pea ko e husepaniti na’a ne ngaahi kovi’i ia ‘o ne ta ma’u pe ia, ko ‘ene fanau kuo ‘osi ‘ave ia ‘ehe pule’anga pea ko hono palopalema na’e fu’u hulu tu’a. Kaikehe na’e hoko mai ki he ‘aho faka’osi ke fai ai ‘e ne ‘apoinimeni faka’osi na’e talaange ‘e he toketa ki he fefine ke talanoa ia ka ne fanongo pe ‘I he miniti ‘e 60 pea ko e miniti ‘e 15 ke tuku ange mu’a ki ai ke ne talatalanoa. Na’a ne fanongo ki he’ene talanoa he miniti ‘e 60 pea ko e miniti ‘e 15 na’e talanoa ‘a e toketa ko’eni ki he me’a ‘oku fou atu ia ai. ‘Oku ne puke ‘I he kanisaa pea ‘oku lolotonga fai hono faito’o kanisa ‘a e kimo, pea mo e ngaahi faingata’a’ia kehekehe ‘oku ne fou atu ai ka ‘oku ma’u pe ‘ene fiefia ‘I he taimi ‘oku ne tokoni ai ki ha tokotaha ‘oku faingata’a ‘ia hange pe ko ia. Na’e mafana ‘e loto ‘o e fefine ko’eni ‘I he ‘ene ‘ilo ko e tokoni na’e fai ‘ange ‘e he toketa na’e fai pe ‘I he loto fiefia mo e mata malimali ka 'i he funga 'o si'ene faingata'a 'ia. Kumi ha tokotaha ‘oku lahi ha’anaa palopalema ‘ia ko e pea ke fakalotolahi’i ia.

Ko e founga hono tolu ke fakalotolahi pe faito’o ‘a e loto si’I mo e loto ta’emanoga, ko e langa hake KO E. Suta 1:20 “Ka ko kimoutolu, ko e ʻofeina, ke langa ʻaki hake ʻakimoutolu ki hoʻomou tui fungani māʻoniʻoni, pea lotu ʻi he Laumālie Māʻoniʻoni.” Ko Tevita na’a ne mo’ui ia ‘I he tefito’I tui ko ‘eni, 2 Samiuela 20 ‘I he taimi na’e kaiha’asi ai hono famili mo e me’a kotoa na’a ne ma’u ‘I Sikileki, ko e lau ia ‘a e folofola na’e teuaki hono tolomaka ‘e he’ene kau tangata he ko honau ngaahi mali mo e fanau mo e me’a kotoa kuo kaiha’asi ‘e he fili. Na’a nau tukuaki’I ‘a Tevita ‘I he me’a na’e hoko. Talamai ‘e he folofola, na’e fakalotolahi’I ‘e Tevita ia ‘I he ‘Eiki. ‘I he taimi pe ‘oku ke fou atu ai ha palopalema ‘oku fu’u lahi faufaua, fakalotolahi’I ko e ‘I he ‘Eiki. Fakamo’ui ho’o letioo pe ko ho’o telefoni ki ha ngaahi hiva fakafeta’i ki ha ngaahi hiva fakalotu. Tuku hao taimi ke ke lue ai ‘I he paaka pe ko e mataatahi pea ke lotu pea fakakaukau ki he ngaahi lelei kotoa pe na’e fai ‘e he ‘Otua ki ho’o mo’ui. Ko e ‘Otua tatau pe ia na’a ne talilotu kiate ko e ‘I he ‘aneafi, ko e ‘Otua tatau pe te ke tokoni’I ko e ho palopalema ‘I he lolotonga.

‘ofa ke tapuekina ‘e he ‘Eiki.

10/23/2024

Ko e Faito’o pe ko e tali ki he Lotosi’I (Part 2)

Semisi 5:16 “Ko e lotu ‘a e ma’oni’oni ‘oku ‘aonga lahi.”
Ko e lotu ‘a e tokotaha ma’oni’oni ‘oku tali lotu ‘a Sihova!

Na’e ‘ikai ke ‘o hake ‘a Sisu ia ‘I he fale ‘o ha taula’eiki ‘I he ‘uluaki ta’u ‘e 30 ‘o ‘ene mo’ui. Na’e mo’ui hake ‘a Sisu ia ‘I he ‘api ‘o ha tangata tufunga. Na’e ako’i ‘e he ‘Otua ‘a Sisu ‘I he fale ‘o e tangata tufunga pea ko ‘ene mo’ui pea ko hono ‘a takai ko e langa ‘a e ngaahi me’a na’e maumau ‘I he ta’u ‘e 30 ka e ‘oleva pe ke hoko mai ‘a e taimi ke ne langa ‘a e mo’ui ‘a e kakai. Ko e tufunga pe langa ko e tali ia pe ko e faito’o ia ‘o e mo’ui ta’e ha ‘amanaki mo e loto ‘oku mafesi. Ko Sisu ‘oku ne ha ma’u pe ‘I ha fa’ahinga tafa’aki ‘o e mo’ui ko e palopalema fakafamili, maumau ‘a e va fakafamili, palopalema fakasiasi, faingata’a’ia fakafo’ituitui, fiema’u ‘oku vivili. Ko ‘ene ha ma’u pe he palopalema mo e laumalie ‘o e toe langa hake ‘a e me’a na’e holofa pe ko e laumalie ‘o e kamata fo’ou. Na’a ne ha mai mo e ongo ‘akau fakalava ‘e 2, mo e fa’o ‘e 3, mo e hamala ke ne toe langa hake ‘aia kuo mole, ‘a ia kuo maumau’I ‘e he fili.

‘I he taimi na’e taki leleaki’i mai ai ‘e he kau falesi ‘a e fefine fe’auaki mei hono mohenga ‘o e angahala pea tau tekelele ia ki he ve’e va’e ‘o Sisu, na’e mei ai ‘a e fai ‘e Sisu ‘a e ngaue ki he toe langa e mo’ui ‘a e fefine ko’eni. Ko e tevolo ‘oku ha’u pe ia ke kaiha’asi, tamate’i mo faka’auha, ka ‘oku ha’u ‘a Sisu ia ke ne ‘omai ‘a e ‘amanaki lelei ki ha tokotaha pe kuo mole ‘a e ‘amanaki ko ha fa’ahinga palopalema ‘oku ‘ikai ha toe tali ia ki ai. ‘Oku ou ‘i heni ke fakalotolahi’i ko e ‘oku ‘iai ‘a e mo’ui pe ko e ‘amanaki lelei ‘I he hili ‘a e palopalema ‘o e vete mali, ‘a e palopalema ‘o e ongo’I halaia ‘I he ‘osi ha mole ho’o tama ‘I ha fa’ahinga ‘uhinga pe tafa’aki. ‘Oku tatau ai pe pe ko e ha ‘a e angahala na’a ke fou atu ai pea ke ongo’i tautea pea ongo’I halaia ai. ‘Oku ‘ikai ha angahala ia ‘e lahi fefe. Ko Sisu ‘oku ne ‘ofa mai kiate koe ‘oku ‘I heni ia ke ne fakafo’ou, ke ne toe langa pe ho’o mo’ui ke hoko ko e fefine fo’ou, tangata fo’ou. Ko hono tavi ia e liliu e kovi mo e fakalielia ki he faka’ofo’ofa mo e matamatalelei. He kapau ‘e toki ‘ia Kalaisi ha tangata, ko e matu’aki fanau’I fo’ou ia. Kuo mole atu ‘a e ngaahi me’a mu’a, kuo hoko ‘o fo’ou ‘a e me’a kotoa pe. Fakafeta’I he ko e ngaue kafakafa ne fai ‘e Sisu ‘I Kalevale, koia pe te tau tu’u ta’ehalaia ai mo loto to’a ‘I he lotolotonga ‘o ha ‘Otua ma’a mo ma’oni’oni. Te tau lava ai ke lea “Apaa tamai, ko ‘emau tamai fakahevani ‘a e ‘Afiona” Fakafeta’i!

‘I he taimi na’e hoko mai ai ‘a e honge ki he fonua, na’e faka’amu ‘a ‘Ilaisia ke ngata ‘a e honge pea toe foki mai ‘ae tapuaki ki he fonua. Ko ia ai, na’a ne langa ‘a e ‘olita. Ko hono mo’oni na’a ne fekau’I ‘a e kakai ke lingi ‘a e vai ‘I he ‘olita. ‘Oku fu’u matu’aki faingofua ‘etau falala ki he ‘Otua he taimi ‘oku ma’u pe me’a ia, ka ‘oku faka’amu mai ‘ae ‘Otua ke ta falala ange ki ai ‘I he taimi ‘o e pakupaku mo e hala’ataa. Mahalo pe nai ‘oku ‘iai ha’o fiema’u matu’aki vivili ‘aupito, pe ko ho’o fiema’u ngaue pe ko ho’o pila ‘oku teu tu’usi ho’o vai mo e ‘uhila, pe ko ho hoa pe fanau ‘oku ‘iai ha mahaki’ia fakasino, pe ko ho’o fanau ‘oku nau mama’o mei ‘api pe ko e faito’o kongatapu pe ‘olokaholika, ‘oku faka’amu ‘a e ‘Otua ke ke falala pea tui pikitai kiate ia ‘I he me’a ‘oku ta’emalava. Langa ha ‘olita, pea ke huhua ki ai ho’o faingata’a’ia mo ho’o fiema’u. Na’e lotu ‘a ‘Ilaisia pea na’e hoko mai ‘a e afi mei he langi ‘o ne keina ‘a e feilaulau, ‘a e fefie mo e vai kotoa, pea ko e faka’ilonga’i ia ‘a e ngata ‘a e honge ‘I he funga ‘o e fonua. ‘I he taimi te ke fakaha ai ho’o fiema’u ki he ‘Otua, kuo pau pe ke ne fakaha ia ‘o tali lotu ma’au.

‘I he taimi ho’o lotosi’i mo e ongo’I ‘ulungia, ‘oku ‘I ai e me’a mahu’inga ‘e 3 ‘oku faka’amu ‘a e ‘Otua ke ne tokoni’I ko e ke toe langa hake. ‘Uluaki ‘oku faka’amu ‘a e ‘Otua ke toe langa hake ‘a e ‘olita, ‘a e mo’ui lotu ‘I ho’o mo’ui. ‘Okapau te ke toe langa e ‘olita, ko e tali ia ki ho’o mo’ui mo e tu’unga ‘oku ke ‘i ai. Ko e langa ‘olita, ko e ‘olita ‘o e lotu hufia, ko e ‘olita ‘o e lotu fakafeta’I, ko e ‘olita ‘o e lotu fakahikihiki ‘Otua. Ko e ‘olita ke langa he kuo maumau ia. Kuo hoko mai ‘a e ngaahi me’a ‘o e mamani mo e feinga ‘a e fili ke molea atu ai ‘a e mo’ui lotu meiate ko e. Toe foki pe mu’a ‘o toe langa ‘a e ‘olita ‘o e feilaulau. He kapau te ke toe langa ‘a e ‘olita ‘o e feilaulau, ‘e toe langa ‘e he ‘olita ‘a ho’o mo’ui, mo’ui ho famili, ho’o ngaahi fiema’u fakamatelia, ho kaha’u mo ho’o fanau. ‘Oku ‘ikai ha me’a ia ko e hele kolosi he kaunga’api ke ke a’u ki he feitu’u ‘oku ke ‘alu ki ai. Ko e lau ia ‘a Sisu, ko au pe ‘a e hala, mo’oni, mo e mo’ui.

Ko e lotu ‘a e tokotaha ma’oni’oni ‘oku tali lotu ‘a Sihova!
Te tau toki hoko atu ‘I he poini ‘e 2 ki he me’a ‘oku faka’amu e ‘Otua ke toe langa hake.

‘Ofa ke tapuekina ‘e he ‘Eiki.

10/22/2024

Ko e faito’o ‘o e Loto Si’i

Me’aTokoni Faka’aho
‘Okatopa 22, 2024

Saame 121: 1 Te u hanga hake hoku mata ki he ngaahi moʻunga, ʻaia ʻoku haʻu mei ai hoku tokoni.

Saame 3:3 “3 Ka ko koe, ʻE Sihova, ko e fakaū kiate au; ko hoku nāunau, mo e hiki hake ʻa hoku ʻulu.”

Ko e tokolahi ‘ia tekitautolu ko e ta’u lahi e ‘a ‘etau mo’ui ‘ulu punopunou pe. Ko e me’a pe ‘oku fai ki ai ‘a e sio ko e palopalema ‘o e ‘aho. ‘I he tohi ‘a Sakalaia vahe 1, ko e fakaloto lahi’I ia ‘e he ‘Otua ‘a ‘Isileli. Ko e fonua na’e faka’auha ia pea nofo popula he ta’u ‘e 70, ko ia ai na’e fekau’I ‘e he ‘Otua ‘a Sakalaia ke ne fai honau fakalotolahi’i. Sakalaia vahe 1:16 “Ko ia ʻoku pehē ai ʻe Sihova; kuo u foki mai mo e ʻaloʻofa ki Selūsalema, ʻe langa hoku fale ʻi ai…. V.17 ‘e toe fakafiemalie’I ‘e Sihova ‘a Saione, pea te ne toe fili ‘a Selusalema… v.20 ko e ngaahi nifo na’a ne fakahee’I ‘a Siuta mo ‘Isileli pea ‘ikai ai toe lava ‘o fa’a hanga hake ‘e ha tangata hono mata ko e ngaue ‘a e ngaahi nifo ‘a e Senitaile. Ka Kuo haʻu ‘a e kau Tufunga ke a ke maumauʻi ʻakinautolu, mo lī atu kituʻa ʻae ngaahi nifo ʻoe kau Senitaile, ʻakinautolu naʻe hiki hake honau nifo ki he fonua ʻo Siuta, ko hono fakahēʻi.”

Ko e ngaahi nifo, ‘oku ne fakafofonga’I ‘a e ngaahi malohi mo e mafai ‘oku nau fai ‘a e fakalotosi’i ‘a e fanau ‘a e ‘Otua. Kainga, ko e me’a tatau pe ia ‘oku hoko ‘I he kuonga ko’eni. ‘Ikai ha toe me’a fo’ou ‘a e feinga mai ‘a e fili ki he’eta mo’ui ke fai ai pe hota fakalotosi’i. Ko ‘ene feinga ke fakamoveuveu ‘a e nofo mali, famili, mo e siasi, pea ko ‘ene taumu’a pe ke tuku’I hifo ki taua ki lalo ke ta ‘ulu punopunou ai pe he ngaahi palopalema ‘o e nofo ko’eni. ‘Oku ‘ikai ‘aupito ke loto e fili ia ke ke sio hake ‘o ‘ilo’I ‘a e faka’ofo’ofa ‘a e palani ‘a e ‘Otua ki ho’o mo’ui mo ho kaha’u pea ke sio ki ai ‘I he tui. Ko ‘ene taumu’a ke fakamama’u pe ho’o sio ki he palopalema ‘o e ‘aho ni. Ka ko’eni kainga, ko e folofola ‘eni ‘a e ‘Otua, “Hanga hake ho mata ki he mo’unga.” Fakakfeta’i!

‘Oku faka’amu ‘a e ‘Otua ke ke ‘ilo, ‘oku ‘I ai ‘a e kaha’u ‘oku ha maama mai ki ho’o mo’ui. ‘Okapau kuo ‘osi foaki ho’o mo’ui ma’ae ‘Eiki ko Sisu Kalaisi, ‘e tatau ai pe pe ‘oku ke fou atu he ngaahi faingata’a pe ko e famili, pe ko e fanau, pe ko e ma’u’anga pa’anga, ko e ngaahi va fakakainga, va fakasiasi, mo ha fa’ahinga fakafe’atungia pe. Ko e folofola ‘eni ‘oku pehe mai, “Hanga hake ho fofonga ki ‘olunga, he ko ho tokoni ‘oku ha’u ia meia Sihova.” ‘Oua na’a ke ‘ulu punopunou ai pe ‘o ke sio pe ki he palopalema he aho kotoa. Ko e faito’o ‘a e ‘Otua ki he ‘ulu punopunou ko e, “Hanga hake ho ‘ulu.” He ‘ikai ke faka’ataa ‘e he ‘Otua ke ke ‘ulu punopunou ai pe. ‘Oku ‘I ai ‘a e faito’o ‘a e ‘Otua ki he lotosi’I mo e loto mafesi – ke ke ma’u ‘a e laumalie ‘o e tangata tufunga.
‘Oku faka’amu ‘a e ‘Otua ke ‘oatu kiate ko e ‘a e laumalie ‘o e tangata tufunga ke ke kamata leva ke toe langa pe a e maumau na’e fai ‘e he fili ki ho’o mo’ui mo ho famili. Ko e taimi ‘eni ke ta tu’u loto to’a ‘o toe fai pe ‘a e ngaue na’e fai ki mu’a. ‘A e mo’ui vekeveke ‘a e tauhi ki he ‘Otua. Kamata leva ke langa ha hala fakakavakava ke fakahoko ‘a e ngaahi va na’e maumau’I ‘e he fili. Kainga ‘oku faingofua ange pe kiate kita ‘a e tukuaki’I ha taha pe tuhu hoto nima ki hoto mali mo e fanau mo e tuofefine hoto mali pe ko e faee ‘I he fono, pe ko ‘ete faee, pe ko ‘ete tamai. Ko e fakalotolahi ‘o e pongipongi ni, to’o ‘e ko e ‘a e hamala ‘o kamata ‘a e langa e halafakakavakava ‘oe fakalelei, ‘a e fe’ofo’ofani, ‘a e angavaivai, angamalu, ‘a e angalelei, ‘a e fa’a fakamolemole, ‘a e ‘ofa. Kainga, ko ho’o hanga hake ia ki he mo’unga, he ko e tokoni ‘oku hu’ufataha pe ia mei he ‘Otua. Te ne ‘oatu ‘a e fiemalie, mo e nonga ki ho laumalie. Ko Sihova ia ko e ko ho fakau, ko ho naunau ia, pea ko e hiki hake ho ‘ulu. Saame 3:3 “3 Ka ko koe, ʻE Sihova, ko e fakaū kiate au; ko hoku nāunau, mo e hiki hake ʻa hoku ʻulu.”

Talamai ‘e he folofola ‘I he taimi na’e toe langa ai ‘e Nehemaia ‘a e aa ‘o Selusalema, na’e to’o ‘e he tangata kotoa pe, mo e fefine, ‘a e me’a ngaue ‘I he nima ‘e taha pea heleta ‘I he nima ‘e taha. Ngaahi faee ‘I he pongipongi ko’eni, tu’u hake, kuo pau pe ke ta tau ma’a hota famili. Ke ta tu’u ‘o tau pea fa’oa mai ‘a ho foha mo ho ofefine mei he faito’o konga tapu, mei he ‘olokaholika, mei he nofo he mo’ui fe’auaki. Tu’u of tau mo au ‘I he lotu pea fakamala’ia’I ‘a e ngaahi ngaue kovi kotoa pe ‘a e fili ki he’eta fanau. Kapau kuo ke fiu he lea pea ke pahia kae faifaikehe atu pe ho’o tama, ‘oua te ke lotosi’I k eke ma’u ‘a e laumalie ‘o e tangata tufunga. Sio angee ki he me’a ‘oku mataamama ‘I ho va mo ho’o tama pea toe langa mei ai. Langa pe mo tau. To’o me’a ngaue pe mo to’o me’a tau. Fakafeta’I pea toe fakafeta’i.

Saame 121: 1 Te u hanga hake hoku mata ki he ngaahi moʻunga, ʻaia ʻoku haʻu mei ai hoku tokoni.

Saame 3:3 “3 Ka ko koe, ʻE Sihova, ko e fakaū kiate au; ko hoku nāunau, mo e hiki hake ʻa hoku ʻulu.”

‘ofa ke tapuekina ‘e he ‘Eiki.

From the Desk of Dr. Taito

04/24/2025

02/20/2025

10/31/2024

10/26/2024

10/24/2024

10/23/2024

10/22/2024

Address

Website

Alerts

Contact The Place Of Worship

Shortcuts

Share

Category