Kristy Jesosy no Fehizoro indrindra

10/09/2022

04/20/2022

Hira Ffpm 150. He tsara ny fonenanao, Andriamanitra ô.

02/07/2022

APETRAHO AMIN'I JEHOVAH NY ENTANAO

Apetraho amin’i Jehovah ny entanao, Ary Izy no hanohana anao; Tsy havelany hangozohozo mandrakizay ny marina.
Salamo 55:22 MBP
https://bible.com/bible/873/psa.55.22.MBP

Ny zanak'Andriamanitra dia tsy mba irery izany eo amin'ny fiainana. Manana an'Ilay Andriamanitra Izay hitokiany izy ireo izay ambaran'ny Soratra Masina fa tsy miova omaly sy an'io ary mandrakizay. Andriamanitra Tompon'ny hery sy ny fahefana rehetra any an-danitra sy ety an-tany, izay momba mandrakariva ny olony ka tsy mba mandao azy ireo ho irery, indrindra fa ao anatin'ny fotoan-tsarotra. Tsy zavatra lazaina amin'izao fotoana sarotra izao fotsiny izany ka atao hifampaherezana, fa zavatra efa niainan'ireo mpanompon'Andriamanitra maro teo amin'ny tantara. Niaina izany ireo vahoaka Isiraely izay olon'Andriamanitra ao amin'ny Testamenta Taloha, niaina izany koa ireo olon'Andriamanitra ao Testamenta Vaovao, eny fa nandritry izay roa arivo taona niorenann'ny Fiangonana izay, dia izany Andriamanitra momba azy izany no antony mbola hijoroany, na dia betsaka aza no nitady handrava sy hanapotika azy.

Tsy mba azo refesina amin'ny trangan-javatra miseho sy iainan'ny Kristiana eto amin'ity fiainana ity ny fombàn'Andriamanitra azy, fa ireo izay mahatsapa fa miaina izany tokoa dia mahafantatra izany, eny fa na dia voageja amin'ny lafin-javatra maro eto amin'ity fiainana ity aza, fa hoy Paoly, "Voageja manodidina izahay, nefa tsy tery" (2 Kor 4:8). Tsy zavatra atao mahagaga loatra raha ny lalan-tsarotra izay lalovan'ny mpanompon'Andriamanitra, fa izany no hazofijaliana izay nolazain'i Jesosy fa tsy maintsy holanjain'ny mpanara-dia Azy. Ny Filazantsara anefa dia izao, Andriamanitra dia tsy mampitondra ny tsy zaka, fa hoy ny Soratra Masina, "mahatoky Andriamanitra ka tsy hamela anareo halaim-panahy mihoatra noho izay zakanareo" (1Kor 10:13). Tsy vitan'ny hoe tsy mampitondra izay tsy zaka fotsiny anefa ny Tompo, fa Izy ihany koa no mampisy lalana mba hivoahan'ny olony avy ao anatin'ny sedra sy olana samihafa.

Izay hampaherezako anao dia ny hijoroanao amin'ny finoana an'i Jesosy hatrany. Mivavaha Aminy, ka lazao Azy izay mba irin'ny fonao fa mihaino anao Izy. Manàna fanantenana ary mahareta, fa ho avy ny fotoana izay hamalian'Andriamanitra anao ka hanomezany anao izay irin'ny fonao, dia ny zavatra izay hangatahanao Aminy tsy mitsahatra. Aza kivy fa mahereza, ny Andriamanitrao dia mihevitra anao ary miasa ho anao, saingy manana ny fotoanany Izy. Koa dia apetraho Aminy tokoa ireo enta-mavesatrao rehetra, ny adinao, ny fanirian'ny fonao, fa Izy kosa dia hanohana anao; tsy hamela anao ho irery na hihozongozona Izy, fa ho avy hampahery anao kosa satria zanany ianao, malalany sady tiany. Mahereza ao amin'ny Tompo.

04/05/2021

Plug into the only source of true power. Meditate on Romans 1:16.

04/04/2021

Efa namangy ny olony, ffpm 133

04/04/2021

TSY ATO IZY FA EFA NITSANGANA
Tsy ato Izy, fa efa nitsangana araka izay nolazainy. Avia, ka jereo, fa tao no nandrian’ny Tompo.
Matio 28:6 MBP
https://bible.com/bible/873/mat.28.6.MBP

Ny P***a dia mampahatsiaro antsika ny fiombonantsika amin’i Kristy. Ny fahafatesany sy ny fitsanganany dia maneho amintsika ny fitiavany antsika na manao ahoana na manao ahoana ny trangan-javatra izay lalovantsika. Niaritra ny zava-tsarotra rehetra noho antsika Izy, araka izay voasoratra ao amin’ny Isaia 53: 2-4, hoe, Fa naniry teo anatrehany tahaka ny zana-kazo madinika Izy sy tahaka ny solofon-kazo amin'ny tany karankaina; tsy nanana endrika na fahatsaran-tarehy Izy; Ary raha nijery Azy isika, dia tsy nisy hatsaran-tarehy haniriantsika Azy. Natao tsinontsinona sy nolavin'ny olona Izy; lehilahy ory sady zatra ny fahoriana, Ary tahaka izay tsy tian'ny olon-kojerena akory Izy; natao tsinontsinona Izy ka tsy mba nahoantsika.

Inona no mampahory anao amin’izao fotoana izao? Mety aretina, mahatsiaro ho irery, fahasarotam-piainana, faharerahana ara-batana, ara-tsaina, sy ara-panahy koa, sns…
Mahafantatra sy mahazo tsara ireo zavatra izay lalovanao ireo Jesosy, satria efa niatrika ny mafy indrindra ho anao Izy teo ambony hazo fijaliana.
- Nolavina sy natao tsinotsinona Izy, nefa dia Ilay Andriamanitra mpanao fahagagan-dehibe
- Nampijaliana Izy, na dia Ilay masina indrindra aza
- Nororana izy sady koa nokapohana, nefa dia Ilay Zanak’Andriamanitra
- Nasiana totohondry mihitsy aza moa, nefa dia tsy mba nanao ratsy
- Irery izy koa tamin’izany fotoana, niala taminy tanteraka ireo izay tiany indrindra
- Nialan’ny olona rehetra mihitsy

Nitondra ny fahotana sy ny fahorianao rehetra anefa izy teo amin’ny toerana izay atao hoe, Golgota. Nanaraka hatramin’ny fahafatesana Izy, dia ilay fahafatesana teo ambony hazo fijaliana. Ny fijaliany no nahatonga antsika ankehitriny ho afaka amin’ny fahotantsika, sitrana amin’ny aretintsika, ary koa manana fihavanana amin’Andriamanitra, araka izay voalaza ao amin’ny Isaia 53:5, hoe, ny fampijaliana nahazoantsika fihavanana no namelezana Azy; ary ny dian-kapoka taminy no nahasitranana antsika.
Ny fiombonana amin’i Kristy amin’ny fijaliany dia lalana sarotra indrindra hoan’ny Kristiana, tsarovy anefa fa izany ihany koa dia lalana hoan’ny fandresena sy ny fitsanganana. Jesosy dia efa nandray ny toeranao mba tsy hahatonga ho irery intsony, eny fa na dia amin’ny fotoana sarotra indrindra lalovanao aza, fa vonona ny hiaraka aminao hatrany Jesosy ka hampandresy anao.
Anio dia tsarovy fa manokatra ny sandriny amin’ny fitiavany anao Izy, hampionona sy hampahery sady koa hampitony sy hanasitrana anao.
Mirary P***a sambatra ho anao aho, ho feno ny fidanan'i Kristy.
Jesosy no hanatanteraka ny zavatra rehetra, fa Andriamanitra velona Izy.

Voninahitra hoan’Andriamanitra irery ihany. Amena

Tsy ato Izy, fa efa nitsangana araka izay nolazainy. Avia, ka jereo, fa tao no nandrian’ny Tompo.

04/03/2021

Quel ami fidèle et tendre nous avons en Jésus Christ