05/10/2026
ՊԱԼԱԹՈՒ ԵԿԵՂԵՑՒՈՅ ՄԷՋ ԿԻՐԱԿՆՕՐԵԱՅ Ս. ՊԱՏԱՐԱԳ
Ն.Ա.Տ. Սահակ Բ. Պատրիարք Հայրը 4 Հոկտեմբեր 2026, Կիրակի առաւօտ, Պալաթու Ս. Հրեշտակապետ Եկեղեցւոյ մէջ կիրակնօրեայ Ս. Պատարագին նախագահեց։
Ս. Պատարագը մատոյց եկեղեցւոյ հոգեւոր հովիւ Արժ. Տ. Ներսէս Քհնյ. Այվազեան։ Ս. Սեղանին սպասարկեցին սարկաւագներ եւ դպիրներ։ Ներկայ էին Արժ. Տ. Ոսկի Քհնյ. Սարգիսեան, ծանօթ ակադեմական Աբրահամ Տէրեան, Մարի Գավաֆեանի գլխաւորութեամբ Թաղային Խորհուրդը։
Երգեցողութիւնները կատարուեցան Եկեղեցւոյ դպրաց խումբի կողմէ, առաջնորդութեամբ Լեւոն Գարատաղի։
Տէրունական Աղօթքէն առաջ Նորին Ամենապատուութիւնը քարոզեց «Ինչո՞ւ տրտում ես անձն իմ, ինչու կը խռովիս: Յուսա՛ Աստուծոյ» (Սաղմոս 42.5, 11) բնաբանով: Մարդ եթէ հաւատք ունի, պէտք չէ տխուր ըլլայ, քանի իր կեանքին մէջ Աստուած կայ: Առօրեայ կեանքի ընթացքին մարդ կը խօսի ինքն իր հետ: Մենք մեր սրտին մէջ կը խօսինք եւ ի մտի պէտք է ունենանք, որ մեր մէջ խօսող մը կայ: Կան խօսքեր, որոնք օգտակար են եւ կան խօսքեր, որոնք վնասակար են: Մեր ներքին խօսքերն են, որ կ’արտացոլան մեր կեանքին ու գործերուն: Կարեւոր է մեր սրտին մէջ լաւ խօսքեր, լաւ բաներ ունենալ: Այդ խօսքերն են մեր ճակատագիրը: Մենք մեր սրտին մէջի լաւ ու բարի գանձերը ի յայտ պէտք է բերենք: Մենք բարի բաներ կրկնելու, բարի բաներ խորհելու եւ խօսելու համար ջանք պէտք է թափենք եւ ո՛չ թէ ասոր համար հրեշտակներ կամ այլ անձեր սպասենք:
Նորին Ամենապատուութիւնը գնահատեց եկեղեցւոյ հոգեւոր հովիւ Արժ. Տ. Ներսէս Քհնյ. Այվազեանը, Մարի Գավաֆեանի գլխաւորած Թաղային Խորհուրդը եւ Լեւոն Գարատաղի վարած երկսեռ մանուկ եւ երիտասարդներէ բաղկացեալ դպրաց խումբը, որոնք կը սիրով կը ծառայեն Աստուծոյ փառքին եւ Պալաթու Ս. Հրեշտակապետ Եկեղեցւոյ պայծառութեան համար:
Եկեղեցական հանդիսութիւնը իր աւարտին հասաւ Նորին Ամենապատուութեան օրհնութեամբ:
Արարողութեանց աւարտին, եկեղեցւոյ սրահին մէջ սարքուեցաւ սիրոյ սեղան:
Լուսանկարներ՝ ԼՐԱԲԵՐ
