22/05/2026
ကျွန်တော်တို့ရဲ့ နေ့စဉ်အသက်တာထဲမှာ တစ်ခါတစ်ရံ ကိုယ်ပြောလိုက်တဲ့ စကားတခွန်း၊ ကိုယ်လုပ်လိုက်တဲ့ အပြုအမူတခု ဒါမှမဟုတ် ဟာသလုပ်လိုက်တဲ့ အရာတခုက တစ်ပါးသူရဲ့ စိတ်နှလုံးကို နာကျင်စေမိတတ်ပါတယ်။ ကိုယ်အတွက်တော့ ပျော်စရာ၊ အရေးမကြီးတဲ့ အရာတစ်ခုလို ဖြစ်နေနိုင်ပေမယ့် တစ်ဖက်လူအတွက်တော့ အရှက်ရစရာ၊ ဝမ်းနည်းစရာ ဒါမှမဟုတ် အတွင်းစိတ်ထဲမှာ အနာတရတစ်ခုလို ကျန်နေတတ်ပါတယ်။ ယုံကြည်သူတစ်ယောက်ရဲ့ ဝိညာဉ်ရေးရင့်ကျက်မှုဟာ ကိုယ်ပြောခဲ့တဲ့အရာကို အတင်းကာကွယ်နေခြင်းမှာ မဟုတ်ဘဲ၊ ကိုယ့်စကားကြောင့် တစ်ပါးသူ နာကျင်ခဲ့ရတယ်ဆိုတာကို နားလည်ပေးနိုင်ခြင်းနဲ့ နှိမ့်ချစွာ ပြန်လည်ပြင်ဆင်လိုတဲ့ နှလုံးသားရှိခြင်းမှာ ဖြစ်ပါတယ်။
ရှင်ပေါလုက ဧဖက်ဩဝါဒစာ ၄:၂၉ မှာ “ညစ်ညူးသော စကားတစ်ခွန်းကိုမျှ သင်တို့နှုတ်ထဲက မထွက်စေနှင့်။ ကြားနာသော သူတို့၏အကျိုးကို ပြုစုစေခြင်းငှာ၊ တည်ဆောက်စရာဖို့ ကောင်းသောစကားကိုသာ သုံးဆောင်ကြလော့။” လို့ သတိပေးထားပါတယ်။ ဘုရားသခင်က ကျွန်တော်တို့ရဲ့ စကားတွေဟာ လူတစ်ယောက်ကို တည်ဆောက်ပေးသလား၊ ဒါမှမဟုတ် ချိုးဖျက်ပစ်သလားဆိုတာကို သတိထားစေချင်ပါတယ်။ တစ်ခါတစ်ရံ လူတစ်ယောက် နာကျင်ဝမ်းနည်းနေတဲ့အချိန်မှာ သူတို့ရဲ့ခံစားချက်ကို နားမလည်ပေးဘဲ အပြစ်တင်တတ်ကြပါတယ်။ ဒါပေမယ့် ယေရှုခရစ်တော်ရဲ့ နှလုံးသားကတော့ နာကျင်နေသူကို ပိုပြီး ဖိနှိပ်ဖို့မဟုတ်ဘဲ၊ နားလည်ပေးဖို့နဲ့ ပြန်လည်ကုသပေးဖို့ ဖြစ်ပါတယ်။
သခင်ယေရှုဟာ လူတွေရဲ့ အားနည်းချက်ကို လှောင်ပြောင်မယ့်အစား ချစ်ခြင်းမေတ္တာနဲ့ ဆက်ဆံပေးခဲ့ပါတယ်။ အပယ်ခံဖြစ်နေသူတွေကို ပစ်ပယ်မယ့်အစား သူတို့ဘက်မှာ ရပ်တည်ပေးခဲ့ပါတယ်။ ဒါကြောင့် ကျွန်တော်တို့လည်း ကိုယ့်စကား၊ ကိုယ့်အပြုအမူတွေက လူတစ်ယောက်ရဲ့ နှလုံးသားကို တည်ဆောက်ပေးနေသလား၊ ဒါမှမဟုတ် နာကျင်စေပြီး ဝေးကွာသွားစေသလားဆိုတာကို သတိထားတတ်ဖို့လိုပါတယ်။ သမ္မာကျမ်းစာက “ကြားနာသော သူတို့၏အကျိုးကို ပြုစုစေခြင်းငှာ၊ တည်ဆောက်စရာဖို့ ကောင်းသောစကားကိုသာ သုံးဆောင်ကြလော့။” လို့ သွန်သင်ထားသလို၊ ကျွန်တော်တို့ရဲ့ အသက်တာဟာ တစ်ပါးသူကို ချိုးဖျက်တဲ့ အသက်တာမဟုတ်ဘဲ၊ မေတ္တာနဲ့ တည်ဆောက်ပေးတဲ့ အသက်တာဖြစ်ဖို့လိုပါတယ်။ ကိုယ့်မာနကို ကာကွယ်ဖို့ထက် တစ်ပါးသူရဲ့ နှလုံးသားကို ဂရုစိုက်နိုင်တဲ့ လူတွေဖြစ်လာတဲ့အခါမှာတော့ သခင်ယေရှုရဲ့ နှလုံးသားကို အမှန်တကယ် ထင်ဟပ်စေတဲ့ အသက်တာတစ်ခု ဖြစ်လာမှာဖြစ်ကြောင်း အသိပေး နှိုးဆော်လိုပါတယ်။
