07/10/2026
စီးပွားရေးနှင့် ကူးသန်းရောင်းဝယ်ရေးဝန်ကြီးဌာန၏ ထုတ်ပြန်ချက်အရ ရွှေဈေးနှုန်းနှင့် ဈေးကွက် မတည်မငြိမ်မှုများ ဖြစ်ပေါ်လာနိုင်ချေရှိသဖြင့် ရွှေနှင့် ရွှေပါဝင်သော ပစ္စည်းများကို အွန်လိုင်းရောင်းချမှု မှတ်ပုံတင်လက်မှတ် (Online Sales Registration) ဖြင့် ခွင့်ပြုပေးမည် မဟုတ်ကြောင်း သိရသည်။
ပြည်တွင်းမီဒီယာတစ်ခု၏ အွန်လိုင်းမှတဆင့် ရွှေနှင့် ရွှေပါဝင်သော ပစ္စည်းများ ရောင်းချခွင့် ပိတ်ပင်ခြင်း ရှိ၊ မရှိ မေးမြန်းမှုကို ဝန်ကြီးဌာနက ယခုကဲ့သို့ ပြန်လည်ဖြေကြားခဲ့ခြင်း ဖြစ်သည်။ အွန်လိုင်းမှတဆင့် ရွှေရောင်းချမှုများသည် ဈေးကွက်မတည်မငြိမ်ဖြစ်စေရန် ရည်ရွယ်လုပ်ဆောင်လာနိုင်ခြေ ရှိနေသည့်အတွက် ရွှေ၊ ရွှေကြမ်းလက်ဝတ်ရတနာများအပြင် ရွှေနှင့် ရွှေကြမ်းဖြင့် ပြုလုပ်ထားသည့် အနုပညာပစ္စည်းများနှင့် အသုံးအဆောင်များ ရောင်းဝယ်ခြင်းကို အွန်လိုင်းစနစ်ဖြင့် မှတ်ပုံတင်ခွင့်ပြုပေးမည် မဟုတ်ပေ။
သို့သော် လက်ဝတ်ရတနာပစ္စည်းများ၊ ကုန်ပစ္စည်းအုပ်စုဖြင့် လျှောက်ထားရာတွင် ကျောက်မျက် (သီးသန့်) ကိုသာ ရောင်းချမည်ဆိုပါက သယံဇာတနှင့် သဘာဝပတ်ဝန်းကျင် ထိန်းသိမ်းရေးဝန်ကြီးဌာန၏ ရောင်းဝယ်ရေးလိုင်စင်အပြင် ရွှေနှင့် ရွှေကြမ်းပါသောပစ္စည်းများ လုံးဝမရောင်းချကြောင်း ဝန်ခံကတိပြုချက်ဖြင့် လျှောက်ထားပါက ကျောက်မျက်ရတနာပစ္စည်းများအတွက် Online Sales မှတ်ပုံတင်လက်မှတ်များကို ဆက်လက်ခွင့်ပြု ထုတ်ပေးလျက်ရှိကြောင်း သိရသည်။ စီးပွားရေးနှင့် ကူးသန်းရောင်းဝယ်ရေးဝန်ကြီးဌာနအနေဖြင့် အွန်လိုင်းရောင်းချခြင်းလုပ်ငန်းများ မှတ်ပုံတင်ခြင်းကို ၂၀၂၃ ခုနှစ် အောက်တိုဘာလမှ စတင်ကာ ခွင့်ပြုပေးခဲ့ခြင်း ဖြစ်သည်။
