25/06/2026
မိူဝ်ႈဢႃႇယုယႂ်ႇမႃးၼၼ်ႉ
ဢၼ်ႁဝ်းတေပွင်ႇၸႂ်မႃးႁင်းၵူၺ်းၼႆႉ
မီးဢၼ်ၼိုင်ႈ။
မိူဝ်ႈႁဝ်းပဵၼ်လုၵ်ႈဢွၼ်ႇၼၼ်ႉ
ႁဝ်းယၢမ်ႈထၢင်ႇဝႃႈ ၶၢဝ်းယၢမ်း ၼႆႉ ႁိုင်တႄႉႁိုင်ဝႃႈ။ ယႃႇဝႃႈၼိုင်ႈပီလႃႈ၊ တေႃႈၼင်ႇ တႄႇဢဝ်ၵၢင်ၼႂ် တေႃႇထိုင်ႁူဝ်ၶမ်ႈၼႆႉၵူၺ်းၵေႃႈ ၼၢၼ်းပူၼ်ႉၼႃႇ ဝႃႈၼႆ။
ၵူၺ်းၵႃႈ
ၽိူဝ်ႇဢႃႇယုႁဝ်းယႂ်ႇမႃးလွႆးလွႆးယဝ်ႉၼၼ်ႉ ႁဝ်းၸင်ႇၵွႆႈပွင်ႇၸႂ်ဝႃႈ မၢင်ၸိူဝ်ႉမၢင်လွင်ႈ ဢၼ်ႁဝ်းထၢင်ႇဝႃႈ တိုၵ်ႉႁႃပူၼ်ႉမႃးမိူဝ်ႈဝႃးၵူၺ်း ၼႆၼၼ်ႉ ယၢမ်းလဵဝ်တႄႉ ၶူၼ်ႁူဝ်ႁဝ်းၵေႃႈ ႁွၵ်ႇမႃးလွႆးလွႆး၊ တႃသႂ်ၵေႃႈမူဝ်းမႃးလွႆးလွႆး၊ ဢႅဝ်လင်ၵေႃႈ ၵွမ်းမႃးလွႆးလွႆး ၼိူဝ်ႉၼင်ၵေႃႈ ႁဵဝ်ႇၸွပ်ႇမႃးလွႆးလွႆး၊ ၼႃႈတႃၵေႃႈ ႁၼ်ႁွႆးတိၼ်ၼူၵ်ႉတိၼ်ၵႃ မႃးလွႆးလွႆး၊ ၵေႃႉတွႆး၊ ၵေႃႉႁၵ်ႉၵၼ်၊ ၵေႃႉမိုတ်ႈၵိုဝ်းၸမ်ၸႂ်ၵၼ်၊ ၵေႃႉႁူမ်ႈတုၵ်ႉႁူမ်ႈၶီၵၼ်ၵေႃႈ ၵေႃႉၼိုင်ႈလႄႈၵေႃႉၼိုင်ႈ ဢွၵ်ႇယၢၼ်ႁဝ်းၵႂႃႇတိၵ်းတိၵ်းယဝ်ႉလူး။
ဢေႃ ..... ၵူႈၸိူဝ်ႉၵူႈလွင်ႈၼႆႉ မၼ်းလၵ်ႉလႅၵ်ႈလၢႆႈယူႇႁင်းမၼ်း တဵတ်ႇတဵတ်ႇယဵၼ်ယဵၼ်ၸိူင်ႉၼႆလူင်ၼေႃး။
ပိူင်ပဵၼ်ၸိူဝ်းၼႆႉ ၽြႃးပဵၼ်ၸဝ်ႈတႄႉႁေႃးဝႃႈ “ဢၼိၸ်ႉၸ - ဢမ်ႇမၼ်ႈၵိုမ်း” လွင်ႈသင်သေဢမ်ႇဝႃႈ ပေႃးမီးလွင်ႈပဵၼ်ၵေႃႈ တိုၼ်းမီးလွင်ႈလႆႈလုၶိုၼ်းယဝ်ႉ ၼႆယူႇ။
ၶေႃႈၵႂၢမ်းၸိူဝ်းၼႆႉ ဢမ်ႇၸႂ်ႈတႃႇၵူဝ်၊ မၼ်းပဵၼ်ၶေႃႈၵႂၢမ်း ဢၼ်ပၼ်ၽၢင်ႉသတိႁဝ်း ႁႂ်ႈႁဝ်းတူင်ႉတိုၼ်ႇႁူႉတူဝ်ယူႇတႃႇသေႇ ၼၼ်ႉၵူၺ်း။
တူဝ်ၶၼ်ႇထႃႇလူင်ႁဝ်းၼႆႉၵေႃႈ ဢမ်ႇမၼ်ႈၵိုမ်း။
တူဝ်ၶိင်း ၼႃႈတႃႁဝ်း ဢၼ်ႁၢင်ႈလီၽၢင်လဝ်းယူႇ ၼႂ်းဝၼ်းမိူဝ်ႈၼႆႉၼႆႉ ပေႃးဝၼ်းၼိုင်ႈမႃး တၵ်းတေလႆႈထဝ်ႈ ဢမ်ႇႁၢင်ႉယဝ်ႉ။
ဢဵၼ်ႁႅင်းႁဝ်း ဢၼ်တိုၵ်ႉၵႅၼ်ႇၶႅင်ႁႅင်းၵိုမ်းယူႇ ယၢမ်းလဵဝ်ၼႆႉၵေႃႈ ထိုင်ဝၼ်းၼိုင်ႈမႃး တၵ်းတေလူတ်းယွမ်းလူင်းၵႂႃႇယဝ်ႉ။
လူမ်းထူၺ်ႈၸႂ်ႁဝ်း ဢၼ်တိုၵ်ႉထူၺ်ႈဝႆႉယူႇၼႆႉၵေႃႈ ထိုင်မိူဝ်ႈၽုၵ်ႈမႃး တေမီးထႅင်ႈယူႇၼႆၼၼ်ႉ ဢမ်ႇမီးၽႂ်ႁပ်ႉၶၢမ်ႇလႆႈ။
ဝႃႈၼၼ်သေတႃႉ
ၵူၼ်းႁဝ်းၵမ်ႈၼမ်သမ်ႉ ဢွၼ်ၵၼ်လိုမ်းဝႆႉ လွင်ႈဢမ်ႇမၼ်ႈၵိုမ်း သေ ဢဝ်တၢင်းၸႂ်ဢၼ်ဝႃႈ “ၵဝ်တိုၼ်းတေလႆႈမီး ငိုၼ်းၶမ်း၊ ၵုၼ်းမုၼ်၊ ဢႃႇၼႃႇ၊ တၢင်းႁၵ်ႉဢိူဝ်ႈ” ၼႆသေ ယူႇလိုမ်းႁၢင်ႈလိုမ်းတူဝ်ဝႆႉယူႇ။
ၵူၼ်းႁဝ်း ဢမ်ႇမီးၽႂ် တေထိင်းသိမ်းဝႆႉၵူႈၸိူဝ်ႉၵူႈလွင်ႈလႆႈတႃႇသေႇ။
ၵေႃႉႁဝ်းႁၵ်ႉၵေႃႈ တေလႆႈယၢၼ်ယဝ်ႉ။
ၵေႃႉႁဝ်းၸင်းၵေႃႈ တေလႆႈယူႇၸွမ်းယဝ်ႉ။
ဢၼ်ဢမ်ႇလူဝ်ႇ ဢမ်ႇၶႂ်ႈလႆႈၵေႃႈ ၸၢင်ႈလႆႈယဝ်ႉ။ ဢၼ်ၶႂ်ႈလႆႈသမ်ႉ ဢမ်ႇလႆႈၵေႃႈ တေၸၢင်ႈမီးယဝ်ႉ။ ၼႆႉပဵၼ်သၽႃႇဝလေႃးၵ ၶူင်းၵၢင်လူင်ၼႆႉယဝ်ႉ။
တီႈတႄႉမၼ်း
ၵူၼ်းၵေႃႉဢၼ်ႁူႉလွင်ႈ “ဢမ်ႇမၼ်ႈၵိုမ်း” ၼႆႉၵူၺ်း တေမေႃဝႆႉၵႃႈၶၼ်ၸၢတ်ႈပၢၼ်တူဝ်ၵဝ်ႇ။
ၵူၼ်းၵေႃႉဢၼ်ႁူႉဝႃႈ ၶၢဝ်းယၢမ်းၼႆႉ မီးဢၼ်မၵ်းၶၢၼ်းမၼ်းဝႆႉၼႆၼၼ်ႉ ၶဝ်တေဢမ်ႇၶၢမ်ႇသုမ်းၶၢဝ်းယၢမ်းၸွမ်း လွင်ႈပႅင်းၸင်းပိူၼ်ႈ၊ လွင်ႈၶႂ်ႈတွပ်ႇတႅၼ်းပိူၼ်ႈ၊ လွင်ႈသီႈၵႄႉႁႄႈတႃပိူၼ်ႈလႃးလႃး။
ၸႂ်ဢတ်ႉတ၊ ၸႂ်မႃႇၼ ၸိူဝ်းၼႆႉၵေႃႈ လူတ်းယွမ်းလူင်းမႃးၼၼ်ႉယဝ်ႉ။
ၵူၼ်းၵေႃႉဢၼ်ႁဝ်းႁၼ်ယူႇ မိူဝ်ႈၼႆႉၼၼ်ႉ ထိုင်ပီၼႃႈမႃး ဢမ်ႇမီးယဝ်ႉၵေႃႈ ၸၢင်ႈပဵၼ်လႆႈ။
တူဝ်ၶၼ်ႇထႃႇႁဝ်း ဢၼ်ယူႇလီမီးႁႅင်းယူႇ ၼႂ်းဝၼ်းမိူဝ်ႈၼႆႉၼႆႉ ထိုင်မိူဝ်ႈၽုၵ်ႈမႃး ဢမ်ႇမီးႁႅင်းယဝ်ႉၵေႃႈ ၸၢင်ႈပဵၼ်လႆႈ။
လွင်ႈယုမ်ႉႁၢင်ႈလီဢွၼ်ႁဝ်း မိူဝ်ႈၼႆႉၼႆႉ ထိုင်ဝၼ်းၼိုင်ႈမႃး ၸၢင်ႈယဵၼ်းပဵၼ်ၶႅပ်းႁၢင်ႈၵွင်ႉၽႃႁိူၼ်းၵေႃႈ ၸၢင်ႈပဵၼ်လႆႈ။
ၵွပ်ႈၼႆလႄႈ ဢၼ်ၽြႃးပဵၼ်ၸဝ်ႈႁေႃးဝႃႈ “ဢမ်ႇမၼ်ႈၵိုမ်း” ဢၼ်ဝႃႈၼႆႉ ပဵၼ်တႃႇႁႂ်ႈၸုၼ်ႉပႅတ်ႈလေႃးၵ မိူင်းၵူၼ်းၼႆ ဢမ်ႇၸႂ်ႈ။ ပဵၼ်တႃႇႁႂ်ႈႁဝ်းမေႃတူၺ်းႁၼ်လေႃးၵ ဢၼ်ထုၵ်ႇမႅၼ်ႈၸိုဝ်ႈၸႂ်ႈမၼ်းၵူၺ်း။
ၵေႃႉဢၼ်ပွင်ႇၸႂ် လွင်ႈဢမ်ႇမၼ်ႈၵိုမ်းၼၼ်ႉ လေႃးၽၵေႃႈ တေယွမ်းမႃး၊ တေႃးသၵေႃႈ တေလဵၵ်ႉၵေႇဢေႇမၢင်မႃး။ ၵေႃႉၼိုင်ႈလႄႈၵေႃႉၼိုင်ႈၵေႃႈ တေမီးလွင်ႈမေႃပွင်ႇၸႂ်ၼိူဝ်ၵၼ်ၼမ်မႃးယဝ်ႉ။ ၵွပ်ႈဝႃႈ ၵူႈၸိူဝ်ႉၵူႈလွင်ႈၼႆႉ ပဵၼ်ၶႅၵ်ႇလေႃးၵ မိူၼ်ၵၼ်တင်းမူတ်းၼၼ်ႉယဝ်ႉ။
ၸၢတ်ႈပၢၼ်ႁဝ်းၼႆႉ မၼ်းမိူၼ်ၼင်ႇ ၾႆးတဵၼ်းလႅမ်ႈၼိုင်ႈၼၼ်ႉၵူၺ်း။ ထိုင်ၶၢဝ်းယၢမ်းမၼ်းမႃးၵေႃႈ တၵ်းတေလႆႈမွတ်ႇၵႂႃႇယဝ်ႉ။
ဢၼ်လမ်ႇလွင်ႈမၼ်းတႄႉ ၽွင်းမိူဝ်ႈတိုၵ်ႉႁိူဝ်ႈလႅင်းဝႆႉယူႇၼၼ်ႉ ႁဝ်းပၼ်လွင်ႈႁိူဝ်ႈလႅင်း၊ လွင်ႈဢုၼ်ႇၸႂ်ပိူၼ်ႈလႆႈ မွၵ်ႈၵႃႈႁိုဝ်ၼႆၼၼ်ႉၵူၺ်း။
ထိုင်ဝၼ်းၼိုင်ႈမႃး ၵူၼ်းတင်းၼမ် တေလိုမ်းၸိုဝ်ႈႁဝ်းၵႂႃႇယဝ်ႉ။ ၼႃႈတႃႁဝ်းၵေႃႈ ဢမ်ႇမီးၽႂ်တွင်းလႆႈယဝ်ႉ။
ဝႃႈၼၼ်သေတႃႉ ၸႂ်မဵတ်ႉတႃႇ၊ ၸႂ်ၵရုၼႃႇ၊ လွင်ႈၸွႆႈထႅမ်ပိူၼ်ႈ လႄႈ လွင်ႈၶေႃႈလီၵႂၢမ်းဝၢၼ်ဢွၼ်ႇႁဝ်းၼၼ်ႉတႄႉ ၸၢင်ႈၵိုတ်းသဝ်းထင်ဝႆႉ ၼႂ်းမၢၵ်ႇလမ်းႁူဝ်ၸႂ်ၵူၼ်းသေၵေႃႉၵေႃႉယူႇ။
ၵွပ်ႈၼႆလႄႈ မိူဝ်ႈလႂ်မိူဝ်ႈႁဝ်းလႆႈယူႇ ၼႂ်းၸၢတ်ႈပၢၼ် “ဢမ်ႇမၼ်ႈၵိုမ်း” ယူႇယဝ်ႉၼၼ်ႉ
ႁႂ်ႈမီးၸႂ်မဵတ်ႉတႃႇတေႃႇၵူၼ်းၵူႈၵေႃႉ။
ဝႆႉလွင်ႈပွင်ႇၸႂ် ၼမ်လိူဝ်သေ တေႃးသ၊ ဝႆႉၸႂ်ၵရုၼႃႇ ၼမ်လိူဝ်သေ ဢတ်တ တူဝ်ၵဝ်ႇတႃႉ။
ၵွပ်ႈဝႃႈ ၸၢတ်ႈပၢၼ်ပဵၼ်ၵူၼ်းၼႆႉ မၼ်းပွတ်းလိူဝ်သေ ဢၼ်ႁဝ်းထၢင်ႇဝႆႉၼၼ်ႉယဝ်ႉ။
ၼပ်ႉယမ်ယႂ်ႇၼမ်သေ
ၸဝ်ႈၶူးတိုၼ်းႁၢၼ် တေၸဝံသ
ဝတ်ႉမႁႃႇဝိႁႃႇရ ၵျွင်းလူင် ဝဵင်းလၢင်းၶိူဝ်း
25/6/2026
