21/07/2024
Diinta aan haysano maanta iyo dhaqanka suuban waxaa asal u ahaa culimada Dhariiqada suufiyada waana hooyada culimada,caalim kastoo wayn cilmiga wuxuu kasoo cabay isha culimada suufida.
Taa Waxaa dheer in ay culimada suufida ku asteysan yihiin xalaal quudad aan xaaraanta shaqo kulahayn,hanti agoon iyo mid masaakiin aan quudin awlaadooda,ma ahayn kuwa lug kulahaa hurinta colaadaha iyo kumilanka qabyaaladda.
Waxaan xasuusataa marka laga reebo abtiyaasheey oo qaadiriya ubadnaa iyo adeeradeey oo axmadiya ubadan,anigana aan inbadan waqtigayga kusoo qaatay Xertii cabdalla iyo cawareer xamar xariryaale ama geed jacayl inta aan jaamacadda aadin,haddana mar walbo aan daawado xadrada soo xasuustaa jawi nabadeed iyo kalgacal ay bulshada isku qabeen berisamaadkii intaan duul qariban oo sirdoono dhambaalo usoo dhiibay nagu kalagayn sunta isnacayb iyo khilaafaadka si ay ubanaystaan dhiiga xurmada leh ee muslimiinta.
Culimada sharafta lahaa ee xalaal quudadka ayuu haldoor u ahaa Alle ha janeeyee Sheekha wayn ee Sh.Cusman xidig,haddana iyadoo lagu guda jiro munaasabadda duugistiisa in lagu xadgubo waa wax ka dhashay maangaabnimo,jahli iyo garaad sabool ka ah dhaqanka suuban ee diintayna xaniifka ah.
Kutubada tiro beelka ah ee uu alifay sheekha ee waxtarka uleh umadda waan aragnay ee kurayga hadlay majiraan hal kitaab uu alifay si ay umadda kaga faaโidaysato.
Kuwa soo aqristay kutubada yaryar ee aan fahamka ka haysan usuusha diinta iyo fiqigeedaba ee seef laboodka ah maaha kuwa ku cusub jismiga umadda muslimka ah oo waa soo jireen ah qaarkoodana ay gacan ku dhiigleyaal noqdeen ugu dambayn.
Qofka fahmi waayey alifbeetada diinta ee nabiga yiri abuu-jahal oo aabaha gaalada ahaa markuu dhintay โha caayina maydka abuu jahala waayo waxay dhibaysaa qofka nool oo wiilkiisii cikrama ahaaโ,bal suurayso caalim qiimihiisa bulshada dhexdeeda intaa la eg ninka isagoo geeriyooday ku gabood falay.
Xitaa haddaan dhihi laheyn ardayda sheekha dood diini ah hala gasho, ma uqalmaa in dood lala galo qof fahmi waayey qiyamta iyo ixtiraamka aadanaha iskaba daa culimadee!!!.
Ayadoo khliaafka diineed mar weliba jiray,jirina doono haddana waxaa intaas ka sareeya ilaalinta qiyamta iyo ixtiraamka cida aad la doodayso xitaa haddaad kala diin tihiin iskaba daa inaad masaaโil qaar ku kala duwantihiinee.
Aqoon horteeda edeb yeelo,cilmi hortiisana caasi hanoqon,culimada hilibkooda cisi iyo sharaf mooyee caay maleh.
Mar kale Alle haka raali noqodo raxmaddiisana huwiyo janadiisana ugu bishaareeyo sheekh Cusmaan xidig.
