07/06/2026
ՏՈՆ ԿԱԹՈՂԻԿԵ ՍՈՒՐԲ ԷՋՄԻԱԾՆԻ
Այսօր Հայ Առաքելական Սուրբ Եկեղեցին տոնում է Կաթողիկե Սուրբ Էջմիածնի հիմնադրման տոնը՝ հայ ժողովրդի հոգևոր կյանքի ամենանշանակալի տոներից մեկը։
Ըստ ավանդության՝ Խոր Վիրապում երկարատև բանտարկությունից դուրս գալուց և Հայոց Մեծ Դարձից հետո Սուրբ Գրիգոր Լուսավորիչը տեսիլք է տեսնում, ուր Միածինը՝ մեր Տեր Հիսուս Քրիստոսը, հրաշափառ լույսով իջնում է երկնքից և ոսկե ուռով զարկում գետնին՝ ցույց տալով այն վայրը, որտեղ պետք է կառուցվեր հայոց սուրբ հավատի տաճարը։ Այստեղից էլ առաջացել է «Էջմիածին» անունը, այսինքն՝ «Իջավ Միածինը»։
Սուրբ Գրիգոր Լուսավորիչն իր տեսիլքը պատմում է հայոց Տրդատ թագավորին, և արքայի հովանավորությամբ կառուցվում է Մայր Տաճարը։ Քրիստոսի իջման տեղում կառուցվում է Իջման Սուրբ Սեղանը։
Սուրբ Էջմիածնի հիմնադրման խորհուրդը միայն պատմական հիշատակություն չէ։ Այն վկայում է, որ Հայոց Եկեղեցին մարդկային նախաձեռնությամբ չէ հիմնվել, այլ իր գոյության հիմքում կրում է Քրիստոսի ներկայության և առաջնորդության կնիքը։
Դարերի ընթացքում Սուրբ Էջմիածինը դարձել է հայ ժողովրդի հավատքի, միասնության և հոգևոր ինքնության կենտրոնը։ Այն մեր ազգային ու հոգևոր կյանքի սիրտն է, որտեղից դարեր շարունակ հնչել է Ավետարանի կենսատու պատգամը, զորացել է մեր ժողովուրդը և որտեղ պահպանվել է մեր սուրբ ավանդությունը։
Այս տոնական օրը աղոթենք, որ Միածնի լույսը միշտ լուսավորի մեր ժողովրդի ճանապարհը, ամրացնի մեր հավատքը և պահպանի Սուրբ Էջմիածինը՝ համայն հայության հոգևոր ծննդավայրը։
Տեր Ստեփանոս քահանա
