14/09/2026
✟✟✟ ፬ መስከረም ✟✟✟
በስመ አብ ወወልድ ወመንፈስ ቅዱስ ፩ አምላክ
✟✟✟ ቅዱስ ኢያሱ ነቢይ ወመስፍን ✟✟✟
ኢያሱ ማለት መድሃኒት ማለት እዩ። ትውልዱ ካብ ነገደ ኤፍሬም እዩ። መምህሩ ሊቀ ነብያት ሙሴ ኣብ ምድረ ሞኣብ ምስ ዓረፈ ፥ብድሕሪ ዚ እግዚኣብሔር ኣምላኽ ከምዚ በሎ።
ኣባኻ ሓዲረ ንህዝበይ እስራኤል ናብታ ንፈተውተይ ኣብራሃምን ይስሓቅን ያዕቆብን ዝመሓልኩሎም ምድሪ ከነኣን እስራኤል ከእትዎም እየ እሞ ፥ በርትዕ ፥ ጽናዕ ፥ ከምቲ ምስ ሊቀ ነብያት ሙሴ ባርያይ ዝነበርኩ ከምኡ ድማ ኣብ ኩሉ ክርስትያናዊ ጉዕዞኻ ምሳኻ ኣሎኹ። ብድሕሪ ዚ መስፍን ነብይ ኢያሱ ንህዝበ እስራኤል ብግቡእ ይመርሖምን የማሓድሮምን ነበረ። ** መስፍን ነብይ ኢያሱ ንካሌብን ሳልሞንን ንኢያሪኮ ሰልዩ ኢሉ ምስ ለኣኾም ፥ ንሳቶም ድማ ንኹሉ ጎላጉል ሰልዮም ኢያሪኮ በጽሑ።
ንጉስ ኢያሪኮ ድማ እስራኤላውያን ካብ ግብጺ ምምጽኦም ሰሚዑ ንኢያሪኮ መታን ከይኣትው ብሸውዓተ ናይ ሓጺን ቀጽሪ ከሊሉዎ ይነብር ነበረ ። እቶም ሰለይቲ ማለት ካሌብን ሳልሞንን ኢያሪኮ ኣትዮም ኣብ ቤት ረኣብ ( ራኬብ ) እታ ኣመንዝራ ተዓቆቡ ( ኣብ ላዕለዋይ ናሕሲ ኣውጺኣ ሓሰር እንጣጢዕ ከዲና ሓብኣቶም) ።ሽዑ እቶም ልኡኻት ንጉስ ናብ ቤት ረኣብ( ራኬብ ) እታ ኣመንዝራ፥ መጺኦም መስፍን ነብይ ኢያሱ ዝለኣኾም ሰለይቲ ናብ ቤታ ከም ዝኣተው ፈሊጦም ከምዚ በሉዋ።
እስራኤላውያን ሰለይቲ ኣብ ቤትኪ ኣትዮም ስለ ዘለው ኣውጽእዮም በልዋ። ረኣብ ድማ ከምዚ በለቶም። እወ ምምጻእ መጺኦም ነይሮም እንጌራ በሊዖም ማይ ሰትዮም ድማ ቀቅድሚ ንስኹም ምምጻእኩም ከይዶም በለቶም። ሽዑ ምእታዎም ስለ ዘይከሓደት ፥ ከይዶም ክትብሎም ከላ ድማ ኣሚኖም ገዲፎማ ከዱ። ሽዑ ረኣብ ናብ ካሌብን ሳልሞንን ከይዳ ከምዚ በለቶም። ናብ ከተማና ክትኣትው ኢኹም ንነገስታትና ክትቀትልዎም ኢኹም ፥ ናይዚ ምልክት ድማ ብ 50 ን 60ን ሰብኡት ዝኽፈት ናይ ሓጺን ማዕጾ ፥ ባዕሉ ክኽፈትን ክዕጾን ይሓድር ኣሎ ፥ ስለዚ ኣብቲ ትመጹሉ ሰዓት ንዓይን ንስድራይን ከይተጥፍኡና መሓሉለይ በለቶም።
ንሳቶም ድማ "" ኩሎም ቤተ ሰብኪ ኣብ ቤትኪ ኣክብዮም ብመስኮት ድማ ሃሪ ገመድ ኣንጠልጢልኪ ጽንሕና "" ኢሎማ ከዱ። ብድሕሪ ዚ ንኢያሪኮ ሰልዮም ብምኻድ ዝረኣይዎን ዘጋጠሞምን ኩሉ ንኢያሱ ነገርዎ።
** መስፍን ነብይ ኢያሱ ድማ ታቦት ጽዮን ኣምሪሑ ብሓይሊ ኣምላኽ ንሩባ ዮርዳኖስ ከፊሉ ኣስገሮም። ክሳብ እዚ ግዜ ዚ ድማ ማና ካብ ሰማይ እንዳተመገቡ ማይ ካብ ከውሒ እንዳሰተዩ ይነብሩ ነበሩ። ካብዚ ንደሓር ግና ከነኣን ምስ ኣተዉ ግን ምድሪ ዘፍረየቶ ፍረ ተመገቡ። ከተማ ኢያሪኮ ድማ ሓጹራ ኣዝዩ ጽኑዕ ስለ ዝነበረ እስራኤላውያን ታቦት ኣምላኽ ሒዞም ሸውዓተ መዓልቲ ዘሩዋ።
ኣብ መበል ሻውዓይ መዓልቲ ድማ ነቶም ሓያላን ዝኾኑ ሕዝቦም ብየማንን ጸጋምን ኣሰሊፎም ፥ ካህናት ድማ ልብሲ ክህነት ተኸዲኖም ማዕጠንቲ ሒዞም ታቦት ጽዮን ኣብ ማእከል ገይሮም ፥ መስፍን ነብይ ኢያሱ እውን ኣብ ማእከል ኮይኑ ምስኦም ይኸይድ ነበረ። ድምጺ መለኸት ምስ ሰማዕኩም ዕልል በሉ ኢልዎም ስለ ዝነበረ ድማ ፥ መለኸት ምስ ተነፍሐ እቶም ህዝቢ ኩሎም """ ዕልል በሉ """" ። ቀጽሪ ኢያሪኮ ድማ ፈረሰ ።ሽዑ ረኣብን ቤተሰባን ብሰላም ወጽኡ ፥ ነብይ ኢያሱ ድማ ንህዝቢ ኢያሪኮ ኣጥፊኡ ከኣ ንከተማ ኢያሪኮ ተቖጻጸራ። መጽሓፈ ኢያሱ 6፥1--27 ንመልከት።
** መስፍን ነብይ ኢያሱ ንህዝቢ እስራኤል ኣኪቡ ከምዚ በሎም። "" ክሳብ ሕጂ ዘዝረኸብናዮ ንዓና ንወስዶ ነበርና ፥ ካብ ሕጂ ግን ዘዝረኸብናዮ ንእግዚኣብሔር ኣምላኽና ይኹን "" በሎም።
ዘዝረኸብዎ ድማ ንእግዚኣብሔር ኣምላኽ ሃቡዎ። ንከተማ ኢያሪኮ ምስ ተቖጻጸርዋ ከኣ ምስ "" ዓይ "" ክዋግኡ ተሰለፉ እሞ ክዋግኡ ከለው ብሓንሳብ 36 እስራኤላውያን ሞቱ። መስፍን ነብይ ኢያሱ ድማ ናብ እግዚኣብሔር ኣምላኽ ጸሎት ምስ ጸለየ ፥ እግዚኣብሔር ኣምላኽ ድማ ከምዚ በሎ። "" ዝበልካዮ ዘይገበረ ኣብ ማእከልኩም ኣሎ """ በሎ። ሽዑ መስፍን ነብይ ኢያሱ ነቲ ዝተባህሎ ዘይገበረ ሰብ ንምፍላይ ከኣ ዕጫ ኣውደቑ እሞ ፥ እታ ዕጫ ድማ ናብ ኣካን ወዲ ዛራ በጽሐት ። ሽዑ ንኣካን ምስቲ ዝሓብኦ ወርቅን ብሩርን ብእምኒ ጨፍጪፎም ቀተልዎ እሞ ሞተ። ብድሕሪ ዚ ጎይታ "" ንከተማ ዓይ "" ኣሕሊፉ ሃቦም። ከተማ ዓይ ሓሊፎም ድማ ንጊብዖን ምስ በጽሑ ሓሙሽተ ነገስታት ኣሞራውያን ሓቢሮም ተዋግእዎ እሞ ብሰይፊ ገይሩ ቀዘፎም። እቶም ካብኡ ዝተረፉ ከኣ እግዚኣብሔር ብመብረቕ ወድኦም።
መስፍን ነብይ ኢያሱ ድማ ናብቲ ዝሓሰቦ ከይበጽሐ ከኣ ጽሓይ ክትዓርቦ ደለየት እሞ ፥ ጸሎት ገይሩ ኣብ ዘላቶ ከም እትቐውም ገበራ። መጽሓፈ ኢያሱ 10፥12 ንመልከት። መስፍን ነብይ ኢያሱ ድማ ኣብ መወዳእታ ዘመኑ ንእስራኤላውያን ኣኪቡ ከምዚ በሎም።ምረጹ ንመን ከም እተገልግሉ ንናይ ሞኣባውያን ኣምላኽ ዲኹም ተምልኹ ወይስ ንእግዚኣብሔር """ በሎም። ንሳቶም ድማ "" ንእግዚኣብሔር ደኣ እምበር ፥ ንኣምላኽ ሞኣባውያን ኣይነምልኽን ኢና "" በልዎ። መስፍን ነብይ ኢያሱ ድማ "" ምልክት ግበሩለይ """ በሎም። ንሳቶም ድማ "" ንስኻ ዝበልካዮ ይኹን "" በልዎ። መስፍን ነብይ ኢያሱ ድማ ሰለስተ ገጻት ዘለዎ እምኒ ወሲዱ ኣብ ሴሎ ጥቓ ታቦት ጽዮን ተኸላ።
ኩሉ ዝረኣየ ድማ መስፍን ነብይ ኢያሱ ምስ እስራኤላውያን ዝተመሓሓለላ ሓወልቲ እንዳበለ ይዝክራ ኣሎ። ናይ ሎሚ ቤተ ክርስትያን እያ። መስፍን ነብይ ኢያሱ ብኩሉ ቅድስና ንእግዚኣብሔር ኣምላኽ ኣገልጊሉ ኣብ መበል 110 ዓመቱ 26 ሰነ ዓረፈ።
ጸሎቱን ጸጋ በረኸቱን ምስ ኩላትና ሕዝበ ክርስትያን ይኹን
✟✟✟ አባ መቃርስ ሊቀ ጳጳሳት ✟✟✟
በዛ ዕለት እዚኣ ፡ ቅዱስ አቦ ፡ ናይ እስክንድርያ ሊቀ ጳጳሳት አባ መቃርስ አዕረፈ። ንሱ ንአቦታት ሊቃነ ጳጳሳት መበል ፷፱ (69) ን እዩ።እዚ አቦ ካብ ብንእስንቱ ብገድሊ ዝተጸመደ ኾነ፡ ናይ ምንኩስና ልብሲ ክለብስ ስለ ዝፈተወ ድማ ናብ ገዳመ አስቄጥስ ከደ።
አብኡ ድማ ኣብ አባ መቃርስ ቤተ ክርስትያን መንኮሰ። አብ ምንኩስና ኮይኑ ድማ ዓብዪ ተጋድሎ ተጋደለ። ኵሉ ጊዜ መጻሕፍቲ ዘንብብን ትርጓሜኦም ዘረድእን ስለዝኾነ ብትሩፋቱ ስራሕ ልዕል ልዕል አብ ዝበለሉ ጊዜ ቅስና ተሾመ። ቅድሜኡ ዝነበረ ሊቀ ጳጳሳት አባ ሚካኤል ምስ አዕረፈ ድማ ኤጲስቆጶሳት ናብ ገዳመ አስቄጥስ ከዱ።ምስኣቶም ሃይማኖቶም ዝቐንዐ ብዙሓት ፈላጣት ካህናት ነበሩ።
አብ ገዳመ አስቄጥስ ምስ ዝነብሩ ዓበይቲ መነኮሳት አኼባ ጌሮም ድማ ነዛ ዝኸበረት ሹመት ዝግባእ ሰብ እናመርመሩ መዓልታት ተቐመጡ።ድሕሪኡ ዝሐሸ ነዛ ዝኸበረት ሹመት ዝግባእ ንአባ መቃርስ ረኺቦም፡ ሊቀ ጵጵስና ንክሸምዎ ኵሎም ብሐንቲ ምኽሪ ተሰማምዑ። ስለ ትሩፋቱን ስለ ተጋድሎኡን አብ ገዳመ አስቄጥስ ዝነብሩ ብዙሓት መነኮሳት ምስክር ስለ ዝኾኑ፡ ሒዞምዎ ክኸዱ ብዘይ ፍቓዱ አሰርዎ። ንሱ ግን ከምዚ እናበለ ዓው ኢሊ ይበኪ ነበረ።
"አነ ነዛ ዝኸበረት ሹመት ዘይግባእ እየ። አደይ ክልተ ሰብኡት ተመርዕያ ስለዝነበረት እዚ ሹመት አይግብአንን እዩ" ፡ ነዚ ዝበለ ምእንቲ ክገድፍዎ እንበር አደኡ ግን ብሐደ ሰብኣይ ጥራሕ ዝነበረት ካልእ ዘይትፈልጥ ንጽሕቲ ከም ዝኾነት ብዙሓት ምሥክር ኮይኖም እዮም። ስለዚ ድማ ነዚ ዝተዛረቦ አይተቐበልዎን። ድሕሪኡ ናብ እስክንድርያ ወሲዶም ሊቀ ጵጵስና ሸምዎ።ናብ ምስር አውጺኦም አብ መዓልቃ ትርከብ አብ ናይ ወላዲት አምላኽ ቅድስቲ ድንግል ማርያም ቤተ ክርስቲያን ናይ ሹመቱ ደብዳቤ ብዮናኒ፣ ብቅብጥን ብዓረብን ቋንቋ ተነበበት።
አብ ናይ ሹመቱ ወርሓት ጽቡቅ ስራሕ፣ ትሩፋትን ተጋድሎኡን አብዚሑ ዝሰርሕ ኮነ። ኵሉ ግዜ ድማ ንህዝቡ ንእግዚአብሔር ክፈርሑ ይምህሮም ስለ ድሕነት ነፍሶም ድማ ይግስጾም ነበረ። አብ ሹመቱ ዘመን ድማ ንባዕሉ ካብ ደሞዙ ንቤተ ክርስትያን ይህብ ንድኻታትን ንዝተሸገሩን እውን ይምጽውት ደኣ ነበረ እንበር፡ ካብ ናይ ቤተ ክርስትያን ገንዘብ ሓንቲ እኳስ አይወሰደን። አብ ሹመቱ 27 ዓመታት ኔሩ ንእግዚአብሔር ድማ አገልጊሉን ደስ አቢልዎን ብሰላም በዛ ዕለት እዚኣ አዕረፈ።
ንእግዚአብሔር ምሥጋና ይኹን ፡ ንዓና ድማ ብጸሎት እዚ አቦ ይምሐረና ፡ ልዘለዓለመ ዓለም
ዐርኬ
ሰላም ለመቃርስ በእስክንድርያ ዘተአምነ
መርዔተ ክርስቶስ ይርዐይ መሲሐውያነ
ለእለ ኀረይዎ ሕዝብ ዘይሰመዩ ኄራን
ጸሊኦ ሲመተ ጵጳሴ እንዘ ውእቱ ኢኮነ
ወልደ ዳግሚት ብእሲት ይቤሎሙ አነ።
ከሙኡ እውን ፡ በዛ መዓልቲ እዚኣ ፡ ስምዖን ዘጾማዕት፣ ፣ አርዳሲ ሊቀ ጳጳሳት፣ አብ ሀገረ አንጾኪያ ሰማዕት ዝኾኑ ፻፶ ሰማዕታት፣ ካብ ሰብአ እንጽና እንትያ ፣ ታዖድሮስ ኤጲስ ቆጶስ፣ ከምኡ እውን ቴዎጎሎስ ዘእመቃብረ እልዳኑ፤ መዘከርታኦም እዩ።
እግዚአብሔር ብጸሎቶም ይምሐረና ፡ ልዘለዓለመ ዓለም ፡ አሜን።
ዐርኬ
ሰላም እብል ለቴዎጎሎስ ደንጎላ
አመ ወለደቶ እሙ እንዘ ተሐውር ምድረ ቆላ
መቲሮሙ ዕፀ ሶበ ገብሩ ለምጽላላ
በተአምሪሁ ዕፀዋት በቈላ
ማርያምኒ ሰመየቶ ቴዎጎላ።
✟✟✟ ኣባ ሙሴ ዻዻስ ✟✟✟
እሥራኤላዊ ኮይኖም ካብ አቡነ #ሰላማ ቀጺሎም ዝመጽ ዻዻስ ምድረ ኣግኣዚ እዮም።
ፍጹም ገዳማዊን ትጉህ: ነዊሕ ዕድመ ዝገበሩ ጻድቅ እዮም።ገዳሞም ኣብ ኢትዮጵያ #ወሎ ኣብ ዝበሃል ቦታ ይርከብ እንተኮነ ግን እቶም መናንያን ዝጥእምዎ መግቢ እዃ ስኢኖም ክሽገሩ ምርእይ ኣዝዩ የሕምም እዩ።
✟✟✟ ኣብ ልዕሊ ቅዱስ ዮሐንስ ዝሓደረ ፍቅሪ ድንግል ማርያምን ወዳን ኣብ ልዕሌናውን ይሕደር።
✟✟✟ መስከረም 4 ዝክበሩ ዓመታዊ ቅዱሳን በዓላት
1.ቅዱስ ኢያሱ ወልደ ነዌ (ነቢይን መስፍንን)
2.ቅዱስ ዮሐንስ ወንጌላዊ (ልደቱ)
3.ቅዱሳን ዘብዴዎስን ማርያም ባውፍልያን
4.አባ መቃርስ ሊቀ ዻዻሳት
5.አባ ሙሴ ዻዻስ
✟✟✟ ወርኀዊ በዓላት
1.ቅዱስ እንድርያስ ሐዋርያ
2.ቅድስት ሶፍያ ሰማዕት
3.ቅዱስ ዮሐንስ ዘሐራቅሊ (ሰማዕት)
✟✟✟ ወስብሐት ለእግዚአብሔር ✟✟✟
ወለወላዲቱ ድንግል
ወለመስቀሉ ኩቡር
ኣሜን
