12/02/2026
﷽
“HARĀM IN MAGPUASA MAKAUNA HA RAMADHAN”
📜Kiyariwayat daing kan Abu Hurairah (رضي الله عنه) laung niya: “Nag sabda in Rasūl (ﷺ):
«Ayaw niyu unahi in (bulan) Ramadhān sin puasa hangka adlaw, atawa duwa adlaw, malaingkan in hambuuk usug in kaawnan niya mag pupuasa siya sin puasa (Sunnat maka una daing ha bulan Ramadhān) nā' (manjari siya) mamuasa (misan pa simabtan hangka adlaw atawa duwa adlaw ampa Ramadhan)».
📖Sahih al-Bukhari, (1914)
📖Sahih Muslim, (1082)
📝Daing ha manga paiddah makawa’ ha Hadith:
1️⃣ Liyangan in pag puasa Wājib ha wayruun pa simud in bulan Ramadhan.
Na’ in panglangi ini, manunjuki pa kaharam. Hati niya: Haram in pag puasa wajib hangka adlaw atawa duwa adlaw maka una daing ha Ramadhan. Na’, bang awn namuasa, na in siya nag ma’siyat, sarta’ in puasa niya di’ taymaun.
2️⃣ In Hikmat maytah liyangan in pag puasa ini:
a.Hasupaya di’ maawn in pag pahunit iban pag pasigpit iban pag palabi ha agama Islam.
b.Hasupaya di’ maawn in pangliyu lakad ha Sara’ sin Allâh (ﷻ) iban sin Rasūl (ﷺ).
3️⃣ Sasambagan matampal ha manga sila amuin muna-muna mag puasa misan wayruun pa simusud in bulan Ramadhan. Sabunnal tuud in sila nag dusa pa Allâh (ﷻ) iban di’ taymaun daing kaniya in ammal nila yattu.
4️⃣Pag palihala’ ha sara’ sin agama Islam, hasupaya pag addatan sin manusiya’.
5️⃣ Liyangan in pag pahunit iban pag pasigpit ha agama Islam. Bukun pa Ramadhan ayaw kaw mag puasa Wājib!
6️⃣ In puasa Sunnat amuin kabiyaksahan sin tau ha hangka adlaw ini atawa duwa adlaw, na’ wayruun da salla’ niya, di’ maka sud pa pag lang ini.
