Kibeho Holy Land

23/05/2026

*AMASOMO YO KU MUNSI MUKURU WA PENTEKOSITI, UMWAKA A MBANGIKANE(KUWA 24/05/2026).*

*Abatagatifu: Bikira Mariya Umubyeyi utabara abakristu, Donasiyani, Rogasiyani, Madalena-SofiyaBara, Visenti wa Rilini.*

*ISOMO RYA MBERE.*

*Isomo ryo mu gitabo cy'Ibyakozwe n’Intumwa(Intu 2, 1-11).*

1Umunsi wa Pentekositi uragera, bose bakaba bakoraniye hamwe. 2Ako kanya umuriri umeze nk’inkubi y’umuyaga uva mu ijuru, maze wuzura mu nzu bari barimo. 3Nuko haboneka indimi zisa n’iz’umuriro, zigabanya zijya kuri buri muntu muri bo. 4Ubwo bose buzuramo Roho Mutagatifu, batangira kuvuga mu zindi ndimi, uko Roho abahaye kuzivuga.

5Aho rero i Yeruzalemu habaga Abayahudi bubaha Imana, bari baraturutse mu mahanga yose ari mu nsi y’ijuru. 6Ngo bumve urwo rusaku, rubanda rwose barakorana maze barumirwa, kuko buri wese yabumvaga bavuga mu rurimi rwe bwite. 7Barashoberwa batangara bavuga bati “Mbese aba bose bavuga si Abanyagalileya ? 8Bishoboka bite se ko buri muntu muri twe abumva bavuga mu rurimi rwe kavukire ? 9Baba Abapariti, Abamedi n’Abelamu, baba abatuye muri Mezopotamiya, muri Yudeya no muri Kapadosiya, muri Ponti no muri Aziya, 10muri Furujiya no muri Pamfiliya, mu Misiri no mu uterrere twa Libiya duhereranye na Sireni, baba abashyitsi baturutse i Roma, 11Abayahudi kavukire n’abayoboke b’idini yabo, Abanyakireta n’Abarabu, twese turabumva bamamaza mu ndimi zacu bwite ibitangaza by’Imana.”

Iryo ni Ijambo ry'Imana.

*ZABURI*

*Zaburi ya 104(103), 1ab.24ac, 29b-30, 31.34*

*Inyikirizo: Nyagasani, wohereza umwuka wawe bikaremwa, maze imisusire y’isi ukayihindura mishya.*

Mutima wanjye, singiza Uhoraho !
Uhoraho Mana yanjye, uri igihangange rwose !
Uhoraho, mbega ngo ibikorwa byawe biraba byinshi !
Isi yuzuye ibiremwa byawe !

Ubivanamo umwuka b**ahwera,
b**asubira mu mukungugu byavuyemo.
Wohereza umwuka wawe bikaremwa,
maze imisusire y’isi ukayihindura mishya.

Ikuzo ry’Uhoraho riragahoraho ubuziraherezo !
Uhoraho arakishimira ibikorwa bye !
Icyampa ngo umuvugo wanjye umunyure,
maze Uhoraho ambere isoko y’ibyishimo !

*ISOMO RYA KABIRI.*

*Isomo ryo mu ibaruwa ya mbere Mutagatifu Pawulo yandikiye Abanyakorinti(1Kor 12, 3b-7.12-13).*

Bavandimwe, 3bnta wavuga ngo “Yezu ni Nyagasani” atabibwirijwe na Roho Mutagatifu. 4Ingabire ziranyuranye ariko Roho ni umwe ; 5muri Kiliziya kwitangira abandi biri kwinshi, ariko Nyagasani ni umwe ; 6uburyo bwo gukora buri kwinshi, ariko Imana ni Yo itunganya byose muri bose. 7Koko rero buri wese ahabwa kugaragaza ibyo Roho w’lmana amukoreramo, ngo bigirire akamaro bose. 12Mu by’ukuri umubiri ni umwe kandi ugizwe n’ingingo nyinshi; ariko izo ngingo zose n’ubwo ari nyinshi zigize umubiri umwe : ni ko bimeze no muri Kristu. 13Twese twabatirijwe muri Roho umwe ngo tube umubiri umwe. Twaba Abayahudi cyangwa Abagereki, twaba abacakara cyangwa abigenga, twese twuhiwe Roho umwe.

Iryo ni Ijambo ry'Imana.

*INDIRIMBO Y’IGISINGIZO CY’IYOBERA RYA ROHO MUTAGATIFU.*

Ngwino Roho Mutagatifu, uze mu mitima yacu,
maze uduhe umucyo wawe wo mu ijuru.

Ngwino mubyeyi w’abakene,
Ngwino wowe soko y’ingabire,
ngwino rumuri rw’imitima yacu.

Uri umuhoza usumba bose,
uri umushyitsi muhire wa roho zacu,
Uri ihumure rigarura ubuyanja.

Ni wowe buruhukiro bw’abanyamiruho,
ni wowe ucubya ubushyuhirane,
ni wowe uhanagura amarira y’abarira.

Yewe ga rumuri ruhire !
Ngwino urwuzuze mu mitima
y’abayoboke bawe bose !

Utaduhagarikiye, umuntu nta cyo yashobora,
nta n’icyo yagira cyiza !

Sukura ibyanduye,
sukira utuzi ibyumiranye,
womore inkomere.

Oroshya imitima ikomeye,
ususurutse imitima ikonje,
Ugarure imitima yayobye.

Abakwemera bose kandi bakakwizera,
bahe ingabire zawe ntagatifu uko ari indwi.

Urabahe n’igihembo cy’ibyiza bakoze,
Uzabahe amaherezo mahire y’agakiza,
Ubahe n’ibyishimo bidashira. Amen.

*IBANGONDIRIMBO RIBANZIRIZA IVANJILI*

Alleluia.

Alleluya Alleluya.

Ngwino Roho Mutagatifu.
usanganye imitima y'abayoboke bawe,
maze bagurumane umuriro w'urukundo rwawe !

Alleluya.

*IVANJILI NTAGATIFU.*

*Amagambo yo mu Ivanjili Ntagatifu uko yanditswe na Mutagatifu Yohani(Yh 20, 19-23).*

Ubwo hari nyuma y’urupfu rwa Yezu, 19ku munsi wa mbere ku cyumweru nimugoroba, inzugi z’aho abigishwa bari bateraniye zari zikinze bitewe no gutinya Abayahudi. Nuko Yezu agira atya araza ahagarara hagati yabo, arababwira ati «Nimugire amahoro.» 20Amaze kuvuga atyo abereka ib**anza n’urubavu rwe. Abigishwa babonye Nyagasani, ibyishimo birabasaga. 21Yezu yongera kubabwira ati «Nimugire amahoro. Nk’uko Data yantumye, nanjye ndabatumye.» 22Amaze kuvuga atyo abahuhaho, arababwira ati «Nimwakire Roho Mutagatifu. 23Abo muzakiza ibyaha bazabikizwa, abo mutazabikiza bazabigumana.»

Iyo ni Ivanjili Ntagatifu.

21/05/2026

BYARI IBIRORI BIHEBUJE!

Kuri uyu wa kane tariki ya 21 Gicurasi 2026, Paruwasi Katedrali ya Ruhengeri yizihije Umunsi Mukuru w'Uburezi Gatolika. Ibyo birori byabimburiwe na Misa yayobowe na Nyiricyubahiro Musenyeri Visenti HAROLIMANA, Umwepiskopi wa Diyosezi ya Ruhengeri, ku Ngoro ya Bikira Mariya Mwamikazi wa Fatima.

Yashimiye Imana ibyiza idahwema kugirira abagana amashuri Gatolika kandi ashimira ababyeyi bayagana ngo dufatanye kurera, abarezi bitanga batizigama baharanira kurera neza, n'abayobozi b'inzego zose bahora baharanira ko abana bacu b**a neza bagashaka ibikenewe byose.

Nyiricyubahiro Musenyeri yashimiye n'abana (abanyeshuri) bemera kurerwa maze nka Kristu i Nazareti bagakura mu gihagararo, mu bwenge no mu busabaniramana.

Mu gusoza, yasabye abantu bose bakorera ubutumwa mu Mashuri Gatolika gukomeza kurangwa n'ubumwe n'ubufatanye muri gahunda yo kurushaho kurera umwana ushoboye kandi ushobotse.

18/05/2026

https://whatsapp.com/channel/0029VbCdBDuLCoWwwSQr1G10

Amasomo ya Missa yo kuwa kabiri w’icyumweru cya VII cya Pasika

ISOMO RYA MBERE.

Isomo ryo mu gitabo cy’Ibyakozwe n’Intumwa(Intu 20, 17-27).

Pawulo wihutiraga kujya i Yeruzalemu, 17ari i Mileto ahamagaza abakuru ba Kiliziya ya Efezi. 18Bamugezeho arababwira ati « Muzi ko nabanye namwe kuva aho ngereye muri Aziya. 19Nakoreye Nyagasani, niyoroheje ku buryo bwose, mu marira no mu magorwa naterwaga n’ubugambanyi bw’Abayahudi. 20Nta cyo nabakinze mu byo nashoboraga kubabwira cyabagirira akamaro; byose narabitangaje, mbibigishiriza mu ruhame kimwe no mu ngo.

21Nashishikarizaga Abayahudi kimwe n’Abagereki kugarukira Imana no kwemera Umwami wacu Yezu. 22None dore ngiye i Yeruzalemu mbibwirijwe na Roho Mutagatifu; ibizambaho ngezeyo simbizi. 23Icyakora muri buri mugi, Roho Mutagatifu anyemeza ko ingoyi n’amakuba bihantegerereje. 24Nyamara ku bwanjye, ndahamya ko amagara yanjye bwite nta cyo amariye; icya ngombwa ni ukurangiza isiganwa ryanjye n’umurimo Nyagasani Yezu yanshinze, wo guhamya Inkuru Nziza y’ineza Imana ibagirira. 25Nzi neza ko kuva ubu mutazongera kumbona ukundi, mwebwe mwese abo nanyuzemo namamaza Ingoma y’Imana. 26Ni cyo gitumye rero, uyu munsi nshobora kwemeza mu maso yanyu ko ndi umwere w’amaraso yanyu mwese, 27kuko nabamenyesheje umugambi wose w’Imana, nta cyo mbakinze. »

Iryo ni Ijambo ry’Imana.


ZABURI

Zab 68(67), 10-11, 20-21.

Inyikirizo: Ngoma zose z’isi, nimuririmbire Imana yanyu!

Mana, wajyaga usesekaza imvura y’ umurindi,
wabona inyarurembo zawe zarembye, ukazisubiza imbaraga.
Indeka yawe babonyemo ikibanza,
ni wowe Mana wayibakebeye,
kubera ubuntu ugirira abakene.

Nyagasani aragahora asingizwa iminsi yose!
Iyo Mana ni yo dukesha gutsinda.
Iyo Mana ni yo itubera Imana yuje imitsindo,
Nyagasani Uhoraho ni we utuma umuntu ahonoka urupfu.

IBANGONDIRIMBO RIBANZIRIZA IVANJILI(Yh 15, 26).

Alleluya Alleluya.

Roho w’Imana, Roho Nyir’ukuri naze:
ahamye ibya Kristu mu mitima yacu.

Alleluya.


IVANJILI NTAGATIFU.

Amagambo yo mu Ivanjili Ntagatifu uko yanditswe na Mutagatifu Yohani(Yh 17, 1-11a).

Muri icyo gihe, Yezu agiye kuva kuri iyi si ngo asange Se, 1yubura amaso ayerekeza ku ijuru aravuga ati « Dawe, igihe kirageze, hesha ikuzo Umwana wawe kugira ngo Umwana wawe na we aguheshe ikuzo, 2nk’uko wamuhaye ububasha ku kiremwa cyose, ugira ngo abo wamuhaye bose abahe ubugingo bw’iteka. 3Ubwo bugingo bw’iteka ni ukukumenya, wowe Mana imwe y’ukuri, no kumenya uwo watumye Yezu Kristu. 4Jye naguhesheje ikuzo, ndangiza igikorwa wampaye gukora. 5None ubu Dawe, mpesha ikuzo iwawe, rya rindi nahoranye iwawe, isi itararemwa. 6Namamaje izina ryawe mu bantu wampaye ubakuye mu nsi. Bari abawe maze urabampa, na bo bubaha ijambo ryawe. 7Ubu bamenye ko ibyo wampaye byose ari wowe biturukaho, 8kuko nababwiye amagambo wambwiye maze barayakira, bamenyeraho by’ukuri ko ngukomokaho kandi bemera ko ari wowe wantumye. 9Ubu ni bo nsabira; sinsabira isi, ahubwo ndasabira abo wampaye kuko ari abawe. 10Kandi rero ibyanjye byose ni ibyawe, n’ibyawe byose bikaba ibyanjye, maze ngaherwa ikuzo muri bo. 11aUbu rero sinkiri mu nsi, ariko bo bayirimo, jye nje ngusanga.»

Iyo ni Ivanjili Ntagatifu.

https://whatsapp.com/channel/0029VbCdBDuLCoWwwSQr1G10

Follow Kibeho Holy Land's WhatsApp Channel. Join 97 followers for the latest updates.

17/05/2026

Amasomo ya Missa yo ku munsi mukuru wa Asensiyo (Yezu Kristu asubira mu Ijuru) - A

ISOMO RYA MBERE : Ibyakozwe n’Intumwa 1, 1-11
_________________________________
1Tewofili we, mu gitabo cyanjye cya mbere nanditse ibyo Yezu yakoze n’ibyo yigishije byose, kuva mu ntangiriro 2kugera ubwo ajyanywe mu ijuru, amaze guha intumwa yari yaritoreye amabwiriza ye, abigirishije Roho Mutagatifu. 3Ni na bo yari yariyeretse nyuma y’ibabara rye ari muzima, abihamya akoresheje ibimenyetso byinshi. Nuko ababonekera mu minsi mirongo ine, abaganirira iby’Ingoma y’Imana.
4Igihe yariho asangira na bo, abategeka ko batazatirimuka i Yeruzalemu, ahubwo ko bazahategerereza ibyo Imana Data yasezeranye. Arababwira ati “Ni na byo mwanyumvanye: 5ngo Yohani yabatirishije amazi, naho mwebwe muzabatirizwa muri Roho Mutagatifu, nyuma y’iminsi mikeya.” 6Nuko bakaba bateraniye hamwe, maze baramubaza bati “Nyagasani, ubu se ni ho ugiye kubyutsa ingoma ya Israheli ?” 7Arabasubiza ati “Si mwebwe mugenewe kumenya ibihe n’amagingo Data yageneye ubutegetsi bwe bwite, 8ahubwo mugiye guhabwa imbaraga za Roho Mutagatifu uzabazamo, bityo muzambere abahamya i Yeruzalemu, muri Yudeya yose no muri Samariya, ndetse no kugera ku mpera y’isi.”
9Amaze kuvuga atyo azamurwa mu ijuru bamureba, maze igicu kiramukingiriza ntibongera kumubona. 10Uko bagahanze amaso ejuru Yezu amaze kugenda, babona abantu babiri bambaye imyambaro yererana bahagaze iruhande rwabo. 11Barababaza bati “Yemwe bagabo b’i Galileya, ni iki kibahagaritse aho mureba mu ijuru ? Yezu uwo ubavanywemo akajyanwa mu ijuru, azaza nk’uko mumubonye ajya mu ijuru.”

Iryo ni Ijambo ry’Imana

ZABURI 47 (46), 2-3, 6-7, 8-9
_______________________
Inyik/ Imana izamutse, bayiha impundu, Uhoraho azamutse avugirwa n’impanda.

Miryango mwese nimukome yombi,
musingize Imana mu rwamu rw’ibyishimo,
kuko Uhoraho, Umusumbabyose ari Ruterabwoba,
akaba Umwami w’igihangange ku isi yose.

Imana izamutse bayiha impundu,
Uhoraho azamutse avugirwa n’impanda.
Nimucurangire Uhoraho, nimucurange !
Nimucurangire Umwami wacu, nimucurange !

Kuko Imana ari yo mwami w’isi yose;
nimucurange mwimazeyo mubyamamaze.
Uhoraho ni Umwami ugenga amahanga,
Imana itetse ku ntebe yayo yuje ubutungane !

ISOMO RYA KABIRI: Abanyefezi 1, 17-23
___________________________
17Imana y’Umwami wacu Yezu Kristu, Yo Mubyeyi wuje ikuzo, nibahe umutima w’ubwenge n’ubujijuke, maze muyimenye rwose. 18Ubonye yamurikiye amaso y’umutima wanyu, mugasobanukirwa n’ukwizera mukesha ubutorwe bwanyu, n’ikuzo rihebuje muzigamiweho umurage hamwe n’abatagatifujwe, 19mugasobanukirwa kandi n’ububasha bwayo butagereranywa yadusesuyeho, twebwe abemera! 20Izo mbaraga zitagira urugero yanazigaragarije muri Kristu, igihe imuzuye mu bapfuye, ikamwicaza iburyo bwayo mu ijuru, 21hejuru y’ibyitwa Ibikomangoma, Ibihangange, Ibinyabubasha n’Ibinyabutegetsi byose, ndetse no hejuru y’irindi zina ryose ryashobora kuvugwa ubu no mu bihe bizaza. 22«Ishyira rero byose mu nsi y’ibirenge bye », kandi mbere ya byose imugira umutwe wa Kiliziya , 23ari yo mubiri n’umusendero w’Uwo Imana ubwayo isendereyemo ku buryo bwose.

Iryo ni Ijambo ry’Imana

IVANJILI: Matayo 28, 16-20
__________________
16Nuko abigishwa cumi n’umwe bajya mu Galileya, ku musozi Yezu yari yarabarangiye. 17Bamubonye barapfukama, bamwe ariko bashidikanya. 18Yezu arabegera, arababwira ati «Nahawe ububasha bwose mu ijuru no ku isi. 19Nuko rero, nimugende mwigishe amahanga yose, mubabatize ku izina ry’Imana Data na Mwana na Roho Mutagatifu, 20mubatoze gukurikiza ibyo nabategetse byose. Dore kandi ndi kumwe namwe iminsi yose, kugeza ku ndunduro y'ibihe.»

Iyo ni Ivanjili NTAGATIFU

13/05/2026

Ku wa 13 Gicurasi 2026, Diyosezi ya Ruhengeri yizihije Umunsi mukuru wa Bikira Mariya Mwamikazi wa Fatima, Umurinzi n'Umuvigizi wayo. Ni Ibirori byahuriranye no guhimbaza Yubile y'Imyaka 25 Ingoro ya Bikira Mariya Mwamikazi wa Fatima imaze ishinzwe.

13/05/2026

Ishusho nini ya Bikira Mariya Umwamikazi wa Fatima yashyizwe mu marembo y'ingoro yaragijwe Bikira Mariya Umwamikazi wa Fatima mu Ruhengeri yahawe umugisha.

12/05/2026

12/05/2026

Rest in Peace Father🙏 🕊️

11/05/2026

11/05/2026

Nimugire AMAHORO