26/08/2026
شانتی نگر میں نمایاں نمبر حاصل کرنے والے مسیحی طلبہ و طالبات کے اعزاز میں پروقار تقریب
شانتی نگر: دی میتھوڈسٹ چرچ ساؤتھ ایشیا پاکستان کے زیرِ اہتمام پاکستان کے معروف مسیحی گاؤں شانتی نگر میں میٹرک کے امتحانات میں نمایاں نمبر حاصل کرنے والے مسیحی طلبہ و طالبات کے اعزاز میں ایک پروقار تقریبِ حوصلہ افزائی کا انعقاد کیا گیا۔
تقریب کے مہمانِ خصوصی بشپ آف پاکستان، تقدس مآب بشپ ڈاکٹر ایس عالم کھر صاحب، دی میتھوڈسٹ چرچ ساؤتھ ایشیا پاکستان نے خصوصی شرکت کی۔ اس موقع پر میٹرک کے امتحانات میں بہترین کارکردگی کا مظاہرہ کرنے والے طلبہ و طالبات میں نقد انعامات، اعزازی شیلڈز، کپ اور میڈلز تقسیم کیے گئے۔
تقریب سے خطاب کرتے ہوئے مقررین نے کہا کہ تعلیم کسی بھی قوم کی ترقی اور روشن مستقبل کی بنیاد ہے۔ مسیحی نوجوان ہمارا قیمتی سرمایہ ہیں، اور ان کی تعلیمی کامیابی نہ صرف ان کے والدین بلکہ پوری مسیحی برادری کے لیے باعثِ فخر ہے۔ ایسے پروگرام نوجوانوں کی حوصلہ افزائی کے ساتھ ساتھ دیگر طلبہ کو بھی تعلیم کے میدان میں مزید محنت کرنے کا جذبہ دیتے ہیں۔
تقریب کے روحِ رواں پاسٹر آئن گل، چیئرمین افتخار عالم، ایڈمنسٹریٹر نوانی کھر، کیپٹن عدیل اور پاسٹر ندیم صاحب نے بھی طلبہ و طالبات کی بھرپور حوصلہ افزائی کی اور نمایاں کارکردگی دکھانے والے بچوں کو مبارکباد پیش کی۔
اس موقع پر طلبہ و طالبات اور ان کے والدین میں بھی خوشی کی لہر دوڑ گئی۔ شرکاء نے دی میتھوڈسٹ چرچ ساؤتھ ایشیا پاکستان کی جانب سے تعلیمی میدان میں نمایاں کارکردگی دکھانے والے مسیحی بچوں کی حوصلہ افزائی کے اس اقدام کو سراہتے ہوئے اسے نوجوان نسل کے روشن مستقبل کی جانب ایک مثبت اور قابلِ تحسین قدم قرار دیا۔
