10/03/2026
*اکیسویں پارا*
اکیسویں پارے میں قرآنِ کریم کی درج ذیل پانچ سورتوں کے مضامین شامل ہیں:
1. سورۃ العنکبوت (بقیہ حصہ)
2. سورۃ الروم (مکمل)
3. سورۃ لقمان (مکمل)
4. سورۃ السجدہ (مکمل)
5. سورۃ الاحزاب (ابتدائی حصہ)
(1) سورۃ العنکبوت (بقیہ حصہ)
اس سورت کے آخری حصے میں بنیادی طور پر چار اہم مضامین بیان کیے گئے ہیں:
1۔ تلاوتِ قرآن اور نماز کا حکم
اللہ تعالیٰ نے قرآن کریم کی تلاوت اور نماز قائم کرنے کا حکم دیا ہے، کیونکہ یہی عبادات انسان کو اللہ کے قریب کرتی ہیں۔
2۔ نماز کی فضیلت
نماز کی یہ خصوصیت بیان کی گئی ہے کہ نماز انسان کو بے حیائی اور برے کاموں سے روکتی ہے اور اس کی زندگی کو پاکیزہ بناتی ہے۔
3۔ معاندین اور ان کی ہٹ دھرمی
کفار اور منکرینِ حق کی ضد، ہٹ دھرمی اور دلائل کے باوجود حق کو قبول نہ کرنے کے رویّے کا ذکر کیا گیا ہے۔
4۔ دنیا کی بے ثباتی
دنیا کی زندگی کو عارضی اور فانی قرار دیا گیا ہے، جبکہ اصل اور دائمی زندگی آخرت کی زندگی ہے۔
(2) سورۃ الروم
اس سورت میں دو بنیادی موضوعات بیان ہوئے ہیں:
1۔ دو عظیم پیش گوئیاں
1. پیش گوئی کی گئی کہ چند سال (تقریباً نو سال) کے اندر رومی عیسائی، ایرانی مجوسیوں پر دوبارہ غالب آ جائیں گے۔
2. اسی عرصے میں مسلمان بھی مشرکینِ قریش پر فتح کی خوشی منائیں گے، جو غزوۂ بدر کی صورت میں پوری ہوئی۔
2۔ توحید کے دلائل (اللہ کی قدرت کی سات نشانیاں)
اللہ تعالیٰ کی وحدانیت اور قدرت کو سات نشانیوں کے ذریعے بیان کیا گیا ہے:
1. مردہ سے زندہ اور زندہ سے مردہ پیدا کرنا۔
2. انسان کی تخلیق مٹی سے کرنا۔
3. میاں بیوی کے درمیان محبت اور رحمت پیدا کرنا۔
4. زمین اور آسمان کی تخلیق۔
5. رات کو آرام اور دن میں روزگار کی تلاش کا نظام۔
6. بجلی کی چمک، بارش کا برسنا اور اس سے فصلوں کا اگنا۔
7. زمین و آسمان کے نظام کا مضبوطی کے ساتھ قائم رہنا۔
(3) سورۃ لقمان
اس سورت میں تین بنیادی مضامین بیان کیے گئے ہیں:
1۔ توحید کے دلائل
اللہ تعالیٰ کی قدرت کی چار نشانیاں بیان کی گئی ہیں:
1. آسمان کو بغیر ستون کے قائم رکھنا۔
2. زمین میں مضبوط اور ثابت پہاڑ قائم کرنا۔
3. مختلف قسم کے جانور اور رینگنے والے مخلوقات پیدا کرنا۔
4. آسمان سے بارش برسا کر زمین کو زندہ کرنا۔
2۔ حضرت لقمان کی اپنے بیٹے کو نصیحتیں
حضرت لقمان علیہ السلام نے اپنے بیٹے کو نہایت حکیمانہ انداز میں پانچ نصیحتیں فرمائیں:
1. اللہ کے ساتھ کسی کو شریک نہ ٹھہراؤ۔
2. اللہ تعالیٰ ہر چھوٹی بڑی چیز کو قیامت کے دن ظاہر کر دیں گے۔
3. نماز قائم کرو، نیکی کا حکم دو، برائی سے روکو اور آزمائشوں پر صبر کرو۔
4. عاجزی اختیار کرو اور تکبر سے بچو۔
5. اپنی چال میں اعتدال رکھو اور نرم و مناسب آواز میں بات کرو۔
3۔ پانچ چیزوں کا علم صرف اللہ کو ہے
قرآن میں بتایا گیا ہے کہ پانچ امور کا علم صرف اللہ تعالیٰ کو ہے:
1. بارش کہاں اور کتنی برسے گی۔
2. قیامت کب قائم ہوگی۔
3. ماں کے پیٹ میں بچہ کن خصوصیات کا حامل ہوگا۔
4. انسان کی موت کب اور کہاں آئے گی۔
5. انسان کل کیا عمل کرے گا۔
(4) سورۃ السجدہ
اس سورت میں چار بنیادی موضوعات بیان کیے گئے ہیں:
1۔ قرآن کی عظمت
یہ بیان کیا گیا ہے کہ قرآن اللہ تعالیٰ کی طرف سے نازل کردہ برحق کتاب ہے جس میں کوئی شک نہیں۔
2۔ توحید
اللہ ہی آسمانوں اور زمین کا خالق ہے اور وہی کائنات کے تمام امور کی تدبیر کرتا ہے۔
اسی نے انسان کو پانی کے حقیر قطرے سے پیدا کیا اور مختلف مراحل سے گزار کر بہترین صورت اور متناسب جسم عطا کیا۔
3۔ قیامت کا منظر
قیامت کے دن مجرم ذلت اور ندامت کے ساتھ سر جھکائے کھڑے ہوں گے اور دنیا میں واپس جانے کی خواہش کریں گے۔
جبکہ مومن وہ ہیں جو دنیا میں اللہ کی رضا کے لیے اپنی راحتوں کو قربان کرتے ہیں، اور اللہ نے آخرت میں ان کے لیے ایسی نعمتیں تیار کر رکھی ہیں جنہیں کوئی آنکھ نہیں دیکھ سکتی۔
4۔ رسالت
اس سورت میں حضرت موسیٰ علیہ السلام کو تورات عطا کیے جانے کا ذکر بھی کیا گیا ہے۔
(5) سورۃ الاحزاب (ابتدائی حصہ)
اس سورت کے ابتدائی حصے میں دو اہم مضامین بیان ہوئے ہیں:
1۔ زمانۂ جاہلیت کے غلط عقائد کی تردید
اسلام نے جاہلیت کے تین غلط تصورات کی اصلاح کی:
1. بعض لوگوں کا یہ خیال تھا کہ انسان کے سینے میں دو دل ہوتے ہیں، قرآن نے واضح کیا کہ دل ایک ہی ہوتا ہے۔
2. ظہار (ایک خاص جاہلی طلاق کا طریقہ) کے الفاظ کہنے سے بیوی ہمیشہ کے لیے حرام نہیں ہوتی بلکہ کفارہ ادا کرنے سے نکاح برقرار رہتا ہے۔
3. منہ بولا بیٹا شرعی احکام میں حقیقی بیٹے کی طرح نہیں ہوتا۔
2۔ دو اہم غزوات کا ذکر
اس سورت میں دو تاریخی معرکوں کا ذکر کیا گیا ہے:
1. غزوۂ احزاب (غزوۂ خندق)
2. غزوۂ بنی قریظہ
