30/04/2026
ساڈے ویلھے دا پیزا وی ایھو ہا تیں برگر وی ، سکول ءچو ولوں ہا پاتری دے تلے ہک وڈی چنگیر ہوندی ہئ جئیندے ءچ فجر نال تنور دیاں پکیاں روٹیاں اماں گنڑ کے رکھ ڈیندی ہئ کہ میڈے لال سکول ءچو اعلی تعلیم حاصل کرکے جڈاں ولسن تاں اے روٹی کھاسن ، اساں پچھدے ہاسے اماں سکھڑیں روٹی ہے بس ؟ اماں آکھے ہا نہ پتر کھٹڑے دے تلو وسَل(یعنی پیاز لاتھن انھیں کوں مُکھ مار کے بھن کے کھاندے ہاؤ تھاڈی مرضی یا کٹ کے نکے نکے کر کے روٹی تیں رکھ کے امیریں وانگوں کھاندے ہاؤ تھاڈی مرضی
زہن ءچ امیری دا خیال آن کے اساں کٹ گھندے ہاسے
حضور ء والا ، ساڈی نسل کوں شاید اے علم نہ ہووے کہ اساں رتیں مرچیں کوں چھاء ءچ سٹ کے وی روٹی کھا گھندے ہاسے ، چھاء کجھ علاقیں ءچ ایکوں لسی وی آکھیا ویندے۔
اے تاں ہن ساڈے گرمیں دے موسم ءچ کھاونڑے ، تیں سردیں وچ روٹی نال گُڑ ہوندا ہا کڈھائیں ککو وی نصیب تھی پوندی ہئ اگر نانی اماں دی نظر کنیں بچ ونجوں ہا تاں کھنڈ یعنی چینی روٹی تیں رکھ کے باہرو دو دروکڑی لئیندے ہاسے اے نہ ہووے گھر آلے ڈیکھ گھنن ، اچھا اوں ویلھے گھر آلے مریندے نہ ہن کُٹیندے ہن مارنڑ تاں ہوندے ہک ادھ چاٹ چماٹ کُٹنڑ ہوندا ہا کھلاء لہا کے گچی کوں گوڈیں ءچ پھساء کے دے مار ساڈھے چار رات کوں تشریف سیدھی کر کے سم ناسے سگدے ، دل ءچ کھلدے ہاسے چلو کھنڈ نال تاں روٹی کھادی سے۔
سال پسالی میلے لگدے ہن میڈے وسیب ءچ اوں میلے ءچ اساں روٹی گھرو گھن کے ویندے ہاسے اج دی نسل وانگوں کوئ رنگ برنگے ڈبے ٹفن تاں ہوندے نہ ہن ہک رنگین کندوری ہوندی ہئ جئیندی زیارت صرف مہمان آون ہا تاں تھیندی ہئ اماں دا ساوے رنگ دا بکسہ ہوندا ہا جئیندے وچ اے قیمتی اثاثہ لاتھا ہوندا ہا ، کوئ مہمان آوے ہا تاں او کندوری اماں ایویں لُکا کے کڈھدی ہئ کہ کہیں ہمسائے کوں پتہ نہ لگ ونجے نتاں او منگی رکھدے ہن آپڑیں مہمان کوں روٹی ڈیونڑ لو۔
خیر اساں اوں محترمہ کندوری ءچ روٹیاں پاء کے ولا چیل نال بدھ گھندے ہاسے تیں میلہ ڈیھدے ہوئیں جڈاں ڈوپہر تھیون ہا وڈا بھرا آکھے ہا ہنڑ روٹی کھاؤں ہک روپے دے پکوڑے گھن کے بھلا جو روٹی کھاندے ہاسے میں کنے وڈا بھرا میڈے نال جُٹ ہوندا ہا جتھ ونجوں ہا کٹھے ویندے ہاسے او میڈے ڈوجھے پکوڑے چاونڑ کوں ڈیکھے ہا ساری بھرپی بھل ویندا ہا تیں آھدا ہا گندیں ناسیں آلا ڈوجھا پکوڑا کھاندا پئیں میڈا اجاں پہلا ہے۔
مرشد اج ویلھا بیاء ہے میں ہک دفع سردیں ءچ چھٹی گیا ودا ہم گھر ساگ دا موسم ہا ساگ تاں ساڈی گھٹی ءچ شامل ہے میں ساگ پکوایا شام دا کھادا ولا فجر نال کھادا بال ڈوپہریں سکول ءچو آئن انھیں ماء کنیں پچھے سالن کیا ہے انھیں دی ماء ڈسیے جو ساگ لاتھے تھاڈے ابے دا میڈے نکےپُتر آکھیے ماء کوں ہولیں ہولیں ونج اے ساگ ابے دے ڈیڈھ تیں بدھ آ ساڈی جان تاں چھٹے ایں ساگ کولوں۔
خیر ہر بندے دی آپڑیں قسمت ہوندی ہے او ساڈی قسمت ہئ اے انھیں دی قسمت.
جمیل بلوچ ۔۔۔
