انجمنِ مرقدِ حسین علیہ السلام

11/08/2022

پرسہ داری شبِ عاشور بمقام امام بارگاہ گل شاہ رضویہ گاڑی کھاتہ حیدرآباد 🙏

28/07/2022

" آدابِ مجلس "

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" اوقات کی پابندی "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

منتظمین کے ساتھ ساتھ شرکاء بھی اوقاتِ مجالس کی پابندی کا خاص خیال رکھیں مجلس جس وقت شروع ہونے کا اعلان کیا تھا اسی وقت شروع کر دی جائے ۔

کوشش کیجیے کہ مجلس میں حدیثِ کساء سے موجود رہیں ۔
اگر کسی سبب تاخیر ہو جاتی ہے تو عزاداروں کے کاندھے پھلانگ کر منبر کے قریب بیٹھنے کے بجائے جہاں جگہ مل رہی ہے وہیں بیٹھ جائیے تاکہ مجلس کا ماحول خراب نہ ہو ۔
مزید یہ کہ اگر جگہ تنگ ہے تو کھل کر نہ بیٹھیں بلکہ کوشش کریں کہ جو مومنین کھڑے ہوئے ہیں ان کے بیٹھنے کے لیے معقول جگہ بنائی جائے ۔

بقول اقبال کاظمی مرحوم ،

فرشِ مجلس پہ فاطمہ زہراؑ
لمحہ لمحہ شمار کرتی ہیں
آو مجلس میں اے عزادارو
فاطمہؑ انتظار کرتی ہیں

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" دورانِ مجلس بات چیت "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجلس میں بیٹھ کر آپس میں سلام دعا بات چیت سے گریز کیجیے ۔
عموماً یہ دیکھا گیا ہے کہ مجلس میں جب کسی " بڑی شخصیت " کی آمد ہوتی ہے تو لوگ ذکر کو چھوڑ کر انہیں سلام کرنے میں لگ جاتے ہیں ۔
یقین جانیے امامِ سجّادؑ بھی اسی فرش پر موجود ہوتے ہیں اور آنے والا " بڑا شخص " کتنا ہی بڑا کیوں نہ ہو ، امامؑ سے بڑا یقیناً نہیں ہو گا ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" ۔ VIPism کی نفی "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

جس طرح اسٹیڈیم میں میچ دیکھنے جائیں تو ایک VIP Court ہوتا ہے جس میں صرف خاص لوگوں کو بیٹھنے کی اجازت ہوتی ہے اسی طرح گزشتہ کچھ برس سے ایک روش دیکھنے میں آ رہی ہے کہ مجالس میں فرشِ عزا سے ہٹ کر منبر کے ساتھ ہی ایک تخت نما مسند ہوتی ہے جس پر صرف VIPs بیٹھتے ہیں جیسے کوئی دوسرا ذاکر یا اس پڑھنے والے کے دادیے وغیرہ ۔
ظاہراً تو یہ VIP Seats ہی معلوم ہوتی ہیں لیکن اگر ان کا مقصد کچھ اور ہے تو ضرور آگاہ کیجیے ۔
( یہاں منبر یا سوزخوانی کے تخت کی بات نہیں ہو رہی )

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" ممبر کے آداب "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

منبر پر آنے والا ہر فرد منبر کی حرمت کو سمجھے ۔
دیگر مکاتبِ فکر کے لیے شاید یہ محض لکڑیوں کا ڈھیر ہو لیکن ہمارے یہاں میں اس منبر کو منبرِ رسولؐ کا درجہ دیا جاتا ہے ۔
کوشش کریں کہ منبر سے زیادہ سے زیادہ فضائل و مصائب و پیغاماتِ آئمہؑ کا پرچار ہو ۔
منبر سے اگر ذکر جاری ہے تو چاہے کتنی کی بڑی شخصیت کیوں نہ آ جائے منبر پر بیٹھ کر اس سے سلام دعا سے گریز کریں ( البتہ احتراماً اور اس لیے کہ سامعین اس طرف متوجہ ہوتے ہیں ، جب تک وہ فرش پر بیٹھ رہے ہیں آپ درود پڑھوائیے کہ اس عبادت میں خدا کی بھی شراکت ہوتی ہے )

میر انیس مرثیہ خوان تھے کہ نواب واجد علی شاہ آ گٸے کسی کو علم بھی نہیں ہوا پیچھے کہیں جوتوں پہ بیٹھ رہے ۔ مجلس کے بعد علم ہوا تو نواب صاحب نے یہی بات کی کہ فرشِ عزا پر کوئی بڑا چھوٹا نہیں سب ایک برابر ہیں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" مجلس نماز کا تقابل "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجلس اور نماز کا تقابل بند کیجیے
" مجلس کے دوران نماز کا وقت ہو جائے تو نماز چھوڑ دیں کیوں کہ نماز کی قضا ہے اور مجلس کی قضا نہیں " ، وغیرہ وغیرہ
ایسا ہونے ہی کیوں دے رہے ہیں ؟
منتظمین مجالس ایسے اوقات میں منعقد کریں کہ نماز کا وقت بیچ میں نہ آئے ۔
فضول بحثوں کو اجازت ہی نہ دیں کہ وہ سر اٹھائیں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" باہمی محبت و احترام "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

قاریانِ حدیثِ کساء ، سوز خواں ، شعرا ، سلام و منقبت خواں ، خطیب اور نوحہ خواں سب آپس میں ایک دوسرے کا احترام کریں اور ایک دوسرے کو نہ صرف سنیں بلکہ سراہیں اور حوصلہ افزائی فرمائیں ۔

ماتمی دستوں سے خصوصی گزارش ہے کہ دیگر انجمنوں کو بھی سنا کیجیے اور اگر ان کے پاس ماتمی کم ہیں تو اپنے جوان ان کے دستے میں شامل کیا کیجیے ۔
اکثر شب بیداریوں میں دیکھا جاتا ہے کہ اگر ایک انجمن نوحہ خوانی کر رہی ہے تو صرف اسی کا ماتمی دستہ بارگاہ میں موجود ہو گا باقی کوئی دستہ اگر امام باڑے پہنچ بھی گیا ہے تو وہ چائے کافی ہنسی مذاق چٹ چیٹ میں مصروف رہتا ہے اور اپنی باری آنے تک اندر داخل نہیں ہوتا ۔
( یہ پیغام صرف ان کے لیے ہے جو ایسا کرتے ہیں )

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" تبرّک کی حرمت "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجلس کے تبرّک کا احترام بہر طور واجب ہے ۔
اگر نذر و نیاز ہے تو کوشش کیجیے کہ اتنا ہی لیں جتنا کھانے کی گنجائش ہو ایسا نہ ہو کہ آخر میں بہت سارا تبرک ضائع جائے ۔
مزیدیکہ کھاتے وقت خیال رہے کہ تبرک زمین پر نہ گرے اور اگر گر رہا ہے تو اسے واپس اٹھائیے ۔
صابر امامؑ کے دسترخوان پر بیٹھ کر صبر و تحمل سے کام لیجیے ۔ آپ تک تھال پہنچے میں اگر ذرا تاخیر ہو جائے تو نامِ مولا غصّہ پی کر بھوک پیاس مٹائیے ۔ تبرک پر لڑائی جھگڑا نہ کریں ۔ کھانے کھلانے والے بھی کوشش کریں کہ VIP Serving پر کم توجہ دیں ۔

مزیدیکہ تبرک چہرے اور لباس دیکھ کر نہیں بانٹا جائے بلکہ یہ جانتے ہوئے بانٹا جائے کہ ہم امام کے دسترخوان کے خادم ہیں اور ان کے مہمان کے لیے حاضر ہوئے ہیں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" فوٹو سیشن "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجالس میں فوٹو سیشن سے خود کو بچائیں ۔
یقیناً ہم میں سے کوئی یہ پسند نہیں کرے گا کہ ہمارے کسی قریبی کے جنازے پر لوگ آئیں اور ایک دوسرے کے ساتھ تصویریں کھنچوائیں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" موبائل کا استعمال "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مجلس میں داخل ہوتے وقت اپنا موبائل فون سائلنٹ پر لگا دیں ۔
دورانِ مجلس موبائل کے استعمال سے گریز کریں ۔
مجلس میں بیٹھ کر فیسبک واٹس ایپ ٹوئیٹر کا استعمال نہ کریں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" پان گٹکا سگریٹ نوشی "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

دھیان رہے کہ امام باڑا اہلِ بیتؑ کا گھر ہے ۔
اس کی حدود میں پان ، گٹکا ، سگریٹ اور دیگر ایسی اشیاء کے استعمال سے گریز کریں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" فرشِ عزا پر بیٹھیں "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کئی لوگ فرش پر نہیں بیٹھتے بلکہ جگہ موجود ہونے کے باوجود باہر کھڑے رہتے ہیں یا گاڑیوؓ میں بیٹھے رہتے ہیں جبکہ فرشِ عزا پر صرف آ کر بیٹھنا بھی ایک شرف ہے اور اس کا بہت ثواب ہے ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" با وضو رہیں "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔

تمام مومنین فرشِ عزا پر آنے سے پہلے اپنی پاک صاف حالت یقینی بنائیں ۔ با وضو ہو کر مجلس میں جائیں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" بچّوں کو ساتھ لانا "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

والدین کوشش کریں کہ اگر ان کے بچّے چھوٹے ہیں اور سمجھ بوجھ نہیں رکھتے تو اگر مردوں کی مجلس ہے تو بچّے کو والدہ سنبھال لیں اور اگر مردوں کی مجلس ہے تو والد سنبھال لیں تاکہ مجلس میں غیر ضروری خلل نہ پیدا ہو ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" غم کو خود پر طاری کریں "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

کوشش کریں کہ مجلس میں ہنسی مذاق نہ ہو ۔
فرشِ عزا پر بیٹھ کر سوائے فضائلِ اہلِ بیتؑ کے کسی اور بات پر مسکرائیں نہیں ۔
ذاکرین بھی کوشش کریں کہ منبر سے لطیفے اور چٹکلے سنانے سے گریز کریں ۔

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔
" زنانی مجلس کے آداب "
۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔

مَردوں سے گزارش ہے کہ جہاں خواتین کی مجلس ہو رہی ہو وہاں باہر بیٹھک لگانے سے گریز کریں ۔

خواتین سے گزارش ہے کے مجالس کے لیے لاؤڈ اسپیکر کا استعمال نہ کریں تاکہ ان کی آواز مجلس کی حدود سے باہر نہ جائے اور ان کی آواز باہر مرد حضرات کے کانوں میں نہ پڑیں ۔

سید ابوذر حسنین 💐💐❤️

22/07/2022