05/02/2026
[Ma'na sin kalimat (Ummat ku) ha Hadīth sin Rasul (ﷺ): «Ha susungun mag pulakkanat in ummat ku…»]
Mataud manga Hadīth kiyariwāyat sin manga kaimaman -kiyaulungan sila sin Allâh- namayta' sin pag pulakkanat sin ummat sin Rasul (ﷺ) ha susungun zaman.
Daing ha manga Hadīth yattu, amuin kiyariwāyat hi Imam Ahmad (241H.) daing kan Abu Hurairah -Kiyaridāan siya sin Allâh-, laung niya: Nag sabda in Rasul (ﷺ):
(فترقت اليهود على إحدى أو اثنتين وسبعين فرقة، وتفترق أمتي على ثلاث وسبعين فرقة).
أخرجه الإمام أحمد في مسنده، (8377).
«Napulakkanat in manga Yahūd pa kapituwan tag-isa -atawa tag-duwa- tumpukan. Iban mapulakkanat in ummat ku pa kapituwan tag tūw tumpukan».
Ma'na sin kalimat Ummat ku:
In Ma'na sin kalimat (Ummat ku) ha Hadīth ini: Ummat sin Rasul (ﷺ) amuin manga miyagad ha panawag tawag niya. hati niya: manga kamusliman. Amuin pag tawagun Ummat Ijābah.
Bissara sin manga kaulamaan ha pag ma'ana sin kalimat ini:
Laung hi Al-Khattābi (388H.): "Sabda niya: «Iban ha susungun mapulakkanat in ummat ku pa kapituwan tag tūw tumpukan» manunjūki pa in manga tumpukan ini katān wayruun naka guwa' daing ha āgama (Islām). Sabab sin hīnang sila katān sin Nabī (ﷺ) daing ha ummat niya".
[Ma'ālimu As-sunan, 4/395]
Dungdungi in bayta' niya: "Manunjūki pa in manga tumpukan ini katān wayruun naka guwa' daing ha āgama (Islām)". Hati niya: Muslim sila katān, wayruun lamud sin Yahūd iban Nasāra.
Laung hi Mulla 'Ali Al-Qarī (1014H.): "Biyayta' hi Al-Abharī: 'Sabunnāl tuud in maksud sin Ummat (ha Hadīth ini) Ummat Ijābah ha kamatauran (Ulama').".
[Mirqātu Al-Mafatīh, 1/259]
Laung hi Ad-Dihlawi Al-Hanafi (1052H.): "In lāhil (sin bissara), gamman in subay (hi pag ma'na), in miyaksud (ha Hadīth) Ummat Ijābah ha sabda niya: «Mag pulakkanat in Ummat ku pa kapituwan tag-tū tumpukan»."
[Lama'atu at-TanqĪh, 1/493]
Laung hi As-Sindī (1138H.): "«Magpulakkanat in ummat ku…» Laung nila (manga Ulama'): 'In maksud: Ummat Ijābah, manga Ahlulul Qiblah (manga kamusliman hambuuk in Qiblah)."
[Fathu Al-wadūd 4/114]
Hati niya: in manga mag pulakkanat ha susungun pa kapituwan tag-tu tumpukan, in sila ini manga kamusliman.
Pangasubu: Unu manjari ta ma'nahan in kalimat (Ummat ku) ha Hadīth ini: Ummat ijābah iban Ummat da'wah (manga bukun muslim, biya' sin manga Yahud iban manga Nasara)?
Jawab: Bunnāl in ummat sin Rasul (ﷺ) nabahagi' nag duwa:
1. Ummat Ijābah (manga kamusliman).
2. Ummat da'wah (manga bukun muslim).
Sumagawa' ha Hadīth ini, in ma'na sin kalimat (Ummat ku) Ummat Ijābah (Manga kamusliman) sadja. Di' manjari hilamud in Ummat da'wah. Sabab sin sulang ini ha pamaham sin manga ulama' amuin nasabbut natu' hainduun.
Apabīla in kalimat (Ummat ku) ma'nahan pa ummat ijābah iban ummat da'wah, malayu' siya pa maksud sin Hadīth. Sabab:
1. Bang masabbut in kalimat (Ummat ku) ha biyaini in uslūb (dāhan) sin bissara, manunjūki siya pa manga kamusliman sadja ha kamawmuhan.
• Laung hi As-San'ānī (1182H.): "In kalimat Ummat ku bang masabbut ha bissara sin Nabī (ﷺ) wayruun maksud niya malaingkan amura in Ummat ijabah ha kamawmuhan". [Hadīth iftirāq Al-Ummah, p71]
• Laung hi Ad-Dihlawī Al-Hanafī (1052H.): "Iban in kamatauran nasabbut ha Hadīth ha uslub (dahan) biyaini, in maksud kaniya manga Ahlul Qiblah (kamusliman)." [Lama'atu at-TanqĪh, 1/493]
2. In maksud sin Hadīth, bayta' bang unu in jumatu ha susungun, ha kaibanan Riwāyat laung sin Rasul (ﷺ):
(... وَإِنَّ أُمَّتِي سَتَفْتَرِقُ... ) أخرجه ابن ماجه، (3993)، وانظر: مسند أحمد (16937)، سنن أبي داود، (4597)، سنن الدارمي، (2560).
«Iban sabunnāl tuud in Ummat ku ha susungun magpulakkanat da…»
Hati niya: in pag pulakkanat ini ha susungan waktu, bukun ha zaman sin Rasul (ﷺ). Sabab sin wayruun pag pulakkanat ha zaman in Rasul (ﷺ), awn wahi mag turun daing ha langit. [kitaa in: Wasatiya Ahlissunnah p289]
Angkanna, di' manjari ma'nahan in kalimat (Ummat ku) sin Ummat Ijābah iban Ummat Da'wah. Sabab in pag pulakkanat sin kamusliman iban sin manga dugaing āgama biya' sin manga Yahud iban Nasara jimajatu na ha zaman pa sin Rasul (ﷺ).
والله أعلم. وصلى الله وسلم على نبينا محمد وعلى آله وصحبه أجمعين.
✍️ Sheikh Ahmad Ghazie hafizahullah
![[Ma'na sin kalimat (Ummat ku) ha Hadīth sin Rasul (ﷺ): «Ha susungun mag pulakkanat in ummat ku…»]Mataud manga Hadīth kiy...](https://img5.prayers1.com/717/449/122113008387174499.jpg)
