02/01/2026
Sacred Heart of Jesus, I trust in you. 😇
UNANG BIYERNES NG TAONG 2026: Sa Roma 8:38–39, pinaaalalahanan tayo ni San Pablo ng isang napakalalim na katotohanang Ito, “walang anumang makapaghihiwalay sa atin sa pag-ibig ng Diyos na nahayag kay Kristo Hesus.” Kahit anong pagsubok tulad ng takot, kahinaan, kasalanan, o hirap ng buhay ay hindi kayang putulin ang ugnayang ito. Sa pagpasok ng bagong taon, ang mga salitang ito ay nagbibigay sa atin ng katiyakan at pag-asa. Maaaring hindi natin alam kung ano ang mangyayari sa mga susunod na buwan, ngunit tiyak tayo sa isang bagay na ito, “kasama natin ang Diyos,” at ang Kanyang pag-ibig ay nananatiling buo at tapat.
Ang debosyon sa Banal na Puso ni Hesus, lalo na tuwing Unang Biyernes ng buwan, ay paanyaya na mas lalong magtiwala sa Kanyang pag-ibig at awa. Ang Puso ni Hesus ay pusong nagmamahal nang lubos, pusong handang magpatawad, at pusong patuloy na naghihintay sa atin. Sa unang Biyernes ng taon, tayo ay inaanyayahang ialay ang ating sarili, ang ating mga plano, at maging ang ating mga sugat sa Kanyang Banal na Puso. Dito natin mararanasan na ang pag-ibig ng Diyos ay hindi lamang salita, kundi isang buhay na pag-ibig na kumikilos at umaakay sa atin araw-araw.
Sa pagsasama ng mensahe ng Roma 8:38–39 at ng debosyon sa Banal na Puso ni Hesus, natututo tayong mamuhay nang may matibay na pananampalataya. Kapag nahihirapan tayo, maaari tayong bumalik sa Puso ni Hesus at magpahinga roon, sapagkat tiyak na walang anumang makapaghihiwalay sa atin sa Kanyang pag-ibig. Sa bagong taong ito, nawa’y piliin nating manatili sa Kanyang pag-ibig at ipakita ito sa pamamagitan ng pagmamahal, pagtitiwala, at paglilingkod sa kapwa. ❤️
