21/09/2025
IKA-XXV DOMINGO NIN ORDINARIONG PANAHON
Septiembre 21, 2025 - TAON C.
Patara-tara:
JUSTICIA. Magdadanay an justicia digdi sa kinaban kun mayo nin nagdadaya asin an gabos honesto sa saindang ginigibo. Kaipuhan na papagdanayon an tunay na pagtitiwala sa lambang saro. Magkasararo kita sa pagpamibi sa celebracion nin Eucaristia na maglakop lugod an karahayan asin katanosan sa manlaenlaen na lugar sa paagi kan liwanag nin tunay na justicia.
MGA BABASAHON:
ENOT NA BABASAHON (Amos 8:4-7)
Ipinapaabot satuya kan enot na an babasahon kapahayagan ni Profeta Amos na kaipuhan an pagrespeto kan derecho nin lambang saro. Kaipuhan na haleon an pandaraya sa kapwa. Hinanyogon po niato an enot na babasahon.
Pagbasa sa Libro ni Profeta Amos.
Ini hinanyoga nindong mga nag-aapi sa mga daing sukat, mga nagpapasakit kan mga dukha sa daga, asin nagsasabi: "Noarin daw matatapos an bagong bulan, tanganing makapabakal kami nin mais? Asin an Sabado, tanganing ikasaod mi an trigo, mapasadit an takad asin mapalangkaw an halaga, makadaya sa paggamit nin mga salang timbang, mabakal sa pirak an mga dukha, asin an mga daing sukat mabakal sa sarong padis na sapin, asin ikapabakal an trigong daing data?" An Kagurang-nan nagsumpa sa dakulang ngaran ni Jacob: "Dai ko malilingawan sagkod pa man an saindang mga gibo."
Tataramon kan Kagurangnan.
SALMO RESPONSORIAL (Salmo 113:1-2.4-6.7-8)
Simbag: Pag-omawon an Kagurangnan, paraampon nin mga dukha.
1. Omawon nindo, omawon nindo an ngaran nin Kagurangnan.b mga surugoon nin Kagurangnan, Pag-omawon an ngaran nin kagurangnan ngonian asin sagkod pa man. (S)
2. Halangkaw sa gabos na banwaan an kagurangnan, halangkaw sa kalangitan an saiyang kamurawayan.
Siisay an orog sa Kagurangnan, satuyang Dios na yaon sa saiyang trono sa kaitaasan; na minaduko hale sa kaitaasan, minadungaw, minadungaw sa langit asin sa daga? (S)
3. Hale sa alpog binabangon niya an mga dukha;ا hale sa basurahan binabangon an mapakumbaba, asin pinapatukaw kaiba kan mga prinsipe, mga prinsipe kan saiyang banwaan: (S)
IKADUWANG BABASAHON (1 Timoteo 2:1-8)
An ikaduwang babasahon iyo an manonongod kan mga tataramon ni San Pablo na nagpapahayag kan pangangaipo na ipahiling kan mga lideres kan banwaan an saindang dayupot asin honestong pag-utob kan saindang katongdan. Hinanyogon po niato an ikaduwang babasahon.
Pagbasa sa Enot na Surat ni San Pablo ki Timoteo.
Kaya enot sa gabos, nagsasadol ako na an mga paghagad, mga pamibi, mga pakimaherak, saka mga pasalamat kaipohan idolot para sa gabos na tawo, para sa mga hade asin sa iba pang mga autoridad, tanganing mamuhay kitang matiwasay, matoninong, magalang sa Dios asin ginagalangan. Marahay iyan asin nakakapaogma sa Dios na satong Paraligtas, na nagmamawot na an gabos makaligtas, asin makamidbid kan katotoohan. Huli ta saro sana an Dios asin saro sana an tagapag-ultanan nin Dios saka kan mga tawo - an tawo na si Cristo Jesus. Idinusay niya an saiyang buhay sa pagtubos kan gabos na tawo, na patunay nin Dios sa tamang panahon. Iyan an dahelan kaya sinugo ako bilang apostol saka paratukdo sa mga pagano, tanganing ipahayag sainda an mensaje nin pagtubod asin katotoohan. Dai ako nagpuputik. Totoo an sinasabi ko! Kaya mawot ko na sa lambang pagtiripon saen man na lugar, an mga lalaki dapat na mamibi, mag-itaas nin kamot, mayong raot sa boot o kaanggotan sa kapwa.
Tataramon kan Kagurangnan.
EVANGELIO (Lucas 16:1-13 0 16:10-13)
An Evangelio iyo an manonongod sa kapahayagan ni Jesus na an siisay man na dai napagkakatiwalaan sa sadit na bagay dai man mapagkakatiwalaan kan dakulang bagay. Matindog po ang gabos sa pagrokyaw kan Marahay na Bareta.
✠ Pagbasa kan Evangelio na Sinurat ni San Lucas.
An maimod sa dikit na bagay, maimbod man sa dakul; an madaya sa dikit na bagay, madaya man sa dakul. Kaya kun dai kamo mapapaniwalaan kan kayamanan sa kinaban na ini, siisay an mapaniwala saindo kan tunay na kayamanan? Kun dai kamo mapapaniwalaan kan sadiri nin iba, siisay an matao saindo kan talagang para saindo? "Mayong surugoon na makakapaglingkod sa duwang kagurangnan, huli ta ikakaongis niya an saro asin mamomotan niya an saro; magigin maimbod siya sa saro asin pag-oolog-ologon an saro. Dai kamo makakapaglingkod sa Dios asin sa kayamanan."
Marahay na Bareta kan satong Kagurangnan.
PAMIBI NIN BANWAAN:
PADI: Mga tugang, ipamibi niato an mga kaipohan kan Simbahan, kan satuyang banwaan, parroquia asin familia.
SIMBAG: Kagurangnan, hinanyoga an samuyang pamibi.
1. An bilog na Simbahan, tanganing sararo an tingog sa paghagad asin paggibo kan minamawot kan gabos na iyo an pagkasararo asin katoninongan sa bilog na Pilipinas. Mamibi kita.
2. Tangani na sa bilog na Pilipinas, mapundo an pagsiriplingan asin pag-iriwal, makamtan an biyaya nin pagkasararo asin katanosan. Mamibi kita.
3. Tanganing makamtan an katoninongan sa bilog na Pilipinas, sa satuyang mga puso asin mga harong, asin saen man kita magduman. An pagkasararo asin pagkaburunyog iyo lugod an balaog sato nin Dios na dapat tang hingowahon. Mamibi kita.
4. Tanganing an satuyang gobierno asin mga tawo marahay na makapagbaklay pasiring sa pag-uswag, paghirahay asin pagbago kan satuyang nacion minsan kanigoan an mga kaulangan. Mamibi kita.
PADI: Langitnon na Ama, kaheraki kami. Tawan samo an samuyang mga kamawotan. Huli ki Cristo na samuyang Kagurangnan.
Amen.
