22/08/2026
PAGGUNITA SA PAGKA-REYNA NG MAHAL NA BIRHEN MARIA
Ngayong araw, ang Santa Iglesia ay ipinagdiriwang ang paggunita ang Pagka-Reyna ng Mahal na Birheng Maria, isang pagdiriwang na nagpapaalala sa atin ng kanyang natatanging papel bilang Ina ni Kristo at mapagkumbabang lingkod ng Diyos. Sa kanyang buhay, nakita natin ang isang pusong marunong sumunod, magtiwala, at buong pagmamahal na tumugon sa kalooban ng Diyos.
Ang kanyang pagiging Reyna ay hindi nakabatay sa kapangyarihan o karangyaan, kundi sa pag-ibig, pagpapakumbaba, at paglilingkod. Bilang Ina ng ating Panginoong Hesukristo, itinuturo niya sa atin na ang tunay na kadakilaan ay matatagpuan sa pusong handang magsabi ng “Oo” sa Diyos at maglingkod sa kapwa.
Ngayong hapon, halina at magtipon bilang isang sambayanan sa Banal na Misa. Sa gitna ng ating mga gawain at anumang hamon ng buhay, maglaan tayo ng panahon upang manalangin, makinig sa Salita ng Diyos, at sama-samang magpasalamat sa Kanyang mga biyaya.
Sa piling ng ating mga kapatid sa pananampalataya, ating ipagdiwang ang pag-ibig ng Diyos at hingin ang paggabay ni Maria upang higit nating makilala, mahalin, at sundin ang kanyang Anak na si Hesukristo.
Halina, makiisa, at magsimba ngayong hapon, alas 4:30 ang panalangin ng Rosario at susundan ng Novena kay San Juan Bautista at ang pagdiriwang ng Banal na Misa.
Sa pamamagitan ni Maria, patungo kay Kristo.
