21/12/2023
ANG MAAYONG BALITA KARONG ADLAWA
DISYEMBRE 22, 2023–Biyernes
SANTA MARIA, HULAGWAY UG INAHAN SA SIMBAHAN
Sagad natong mga Pilipino, mga igsoon, mahilig kaayo ta ug tapok-tapok ilabi na kung adunay mga okasyon sa atong mga pamilya ug katilingban nga kinahanglan saulogon - mga birthdays, death anniversaries, fiestas, christmas, ug uban pang mga okasyon sa atong kinabuhi. Ug lakip niining pagsaulog, dili jud na mawala ang gamay’ng inum-inom ug videoke nga maoy mas nakapadungag ug kaanindot sa selebrasyon.
Mga igsoon, ang atong ebanghelyo karon nagpasidungog sa usa ka awit ni Maria diha sa iyang tumang kalipay - ang magnificat. Puno sa Espirito Santo, migawas sa baba ni Maria kining mga pulonga - mao kini ang iyang awit sa Ginoo alang sa tanang mga maayo ug kahibungang mga butang nga nahitabo sa iyahang kinabuhi, tungod sa kaayo sa Ginoo.
Kung kita kaha, mga igsoon, ang tagaan ug higayon nga muhatag sa atong awit sa Ginoo; unsa kaha nga awit atong ikapasundayag Kaniya? Tinuod nga dili tanan nahitabo sa atong kinabuhi, mga igsoon, maayo; aduna usab mga kalisdanan ug kasakit - apan bisan pa man niining mga dili nindot nga kasinatian, kita usab unta mag-awit sa Ginoo uban sa tumang kalipay susama ni Maria. Ato usab untang mayawit pinaagi sa atong baba ang pagpasalamat sa Dios sa tanang grasya nga atong nadawat ilabi na nga magpakatawo na pag-usab Siya sa atong kinabuhi. Kini ang atong pangutana sa atong tagsa-tagsa ka mga kaugalingon karon: “Unsa kaha ang akong awit alang sa Ginoo niining tali-abot nga pasko sa Iyang pagkatawo?” Nagkadaiya kining atong mga awit ug atoa kining ihalad tanan sa Ginoo pinaagi niining pag-ampo: “Ginoo, sayod ka sa tanan; sayod ka sa akong mga pag-ampo ug awit sa kinabuhi. Hinaut nga Imoha kining paminawon aron kining akong pagsaulog sa pasko sa Imong pagkatawo magmakahuloganon. Amen.
PASIUNA
Karon, mao na ang ikapito nga adlaw sa atong Misa de Gallo. Niining kasaulogan karon, atong pamalandongan ang maanindot ug pinakataas nga pag-ampo ni Maria nga gitawag ug MAGNIFICAT. Madungog nato kini diha sa Ebanghelyo. Kini gisubli-subli na sa makadaghan nga naghubit ug dakong pasalamat ug pagdayeg sa Ginoo tungod sa dakong butang nga iyang gihimo ngadto sa iyang ubos nga suIugoon. Kita gihagit niining maong mensahe sa pagtamod sa Ginoo isip atong Dios sa paagi nga mahigugmaon ug puno sa kalipay matag karon ug unya sa atong kinabuhi.
olor: White or Blue
Antipona sa Pagsugod
Ikaw ang tinuod ug angayan sa tanang mga pagdayeg, O Bulahang Birhen Maria; Ikaw ang Inahan ni Cristo, among Ginoo; Ikaw ang nagaandam sa Simbahan sa usa ka nagasidlak nga modelo sa tanang hiyas.
The Gloria is said
PAG-AMPO SA KATILINGBAN
MAG-AMPO KITA
Amahan nga Makagagahum sa tanan, ang imong tunhay’ng pulong nahimong tawo uban kanamo diha nga ang Birhen Maria mitugyan sa iyang kinabuhi aron sa pag-alagad sa imong laraw sa kaluwasan. Ibayaw ang among mga hunahuna diha sa mabantayong paglaum aron madungog namo ang tingog nga nagsangyaw sa imong himaya, ug ablihi ang among kasingkasing sa pagdawat sa Espiritu Santo.
Kini among gipangayo pinaagi sa among Ginoong JesuCristo imong Anak, nga buhi ug hari uban kanimo ug sa Espiritu Santo, Dios nga usa, hangtud sa kahangturan. Amen.
ANG PAGBASA GIKAN SA UNANG BASAHON NI SAMUEL (1 Sm. 1: 24-28)
Ug sa nalutas na niya ang bata, gidala niya sa templo sa GINOO didto sa Silo. Nagdala usab siya’g torong baka nga nagpanuigo’g tulo ka tuig, usa ka bakid nga trigo ug usa ka puntil nga panit nga gisudlan niya’g bino. Unya giihaw nila ang toro ug ilang gidala ang bata ngadto kang Eli. Unya miingon si Ana kang Eli, “Kon nahinumdom ka pa, ako kadtong babaye nga mibarog dinhi sa imong atubangan ug nag-ampo sa GINOO. Kining bataa ang akong gipangayo sa GINOO ug gidungog niya ang akong pag-ampo. Busa gitugyan ko siya sa GINOO aron mag-alagad siya kaniya sa tibuok niyang kinabuhi.” Ug gisimba nila didto ang GINOO.
ANG PULONG SA GINOO.
SALAMAT SA DIOS
SALMO RESPONSORYO
(1 Sm. 2:1, 4-5, 6-7, 8)
T. Ang akong kasingkasing nalipay diha sa Ginoo nga akong Manunubos.
Ang akong kasingkasing nalipay diha sa Ginoo, ang akong gahom gibayaw diha sa akong Dios. Akong gibuntog ang akong mga kaaway; Nalipay ako sa akong kadaugan.
T. Ang akong kasingkasing…
Ang mga pana sa gamhanan nangabali, samtang ang mahuyang nagabakos og kusog. Ang mga busog nagpasuhol og pan samtang ang mga gutom nangahapla. Ang landay nga asawa nanganak og pito ka anak, samtang ang inahan sa daghan nagamingaw.
T. Ang akong kasingkasing…
Ang Ginoo nagpahamtang sa kamatayon ug nagahatag sa kinabuhi; nagabanlod siya ngadto sa kahiladman, ug nagabanhaw siya pag-usab. Ang Ginoo nagahimo sa kabus ug nagahimo sa datu siya nagabanlod sa ubos, ug siya usab ang nagabayaw.
T. Ang akong kasingkasing…
Iyang gibangon ang hangol gikan sa abog gikan sa abog iyang giisa ang kabus, aron pagpalingkod kanila uban sa mga hamili, ug paghimo og mahimayaong trono sa ilang kabilin.
T. Ang akong kasingkasing…
ALELUYA
T. Aleluya.
Umari ka, Hari sa tanang mga nasud tinubdan sa kahiusa ug pagtuo sa imong Simbahan: luwasa ang tanang katawhan, ang imong kaugalingong binuhat.
T. Aleluya.
ANG PAGBASA GIKAN SA EBANGHELYO SUMALA NI SAN LUCAS (Lk. 1:46-56)
Unya miingon si Maria, “Nagdayeg ang akong kasingkasing sa Ginoo, Ug nagmalipayon ang akong kalag tungod sa Dios nga akong Manluluwas. Tungod kay nahinumdom siya kanako, nga iyang ubos nga sulugoon! Ug sukad karon ang tanang tawo motawag kanako’g bulahan, tungod sa mga dagkong butang nga gihimo kanako sa Gamhanang Dios. Balaan ang iyang ngalan; Nagpakita siya’g kaluoy sa tanan nga may kahadlok kaniya, gikan sa usa ka kaliwatan ngadto sa laing kaliwatan. Gibakyaw niya ang iyang bukton nga gamhanan. Ug gipatibulaag niya ang mga tawo nga mapahitas-on uban sa tanan nilang laraw. Gipukan niya ang mga hari nga gamhanan gikan sa ilang mga trono, Ug gituboy ang mga mapaubsanon. Gibusog niya sa mga maayong butang ang mga gigutom, Ug iyang gipapahawa nga walay dala ang mga dato. Gituman niya ang iyang saad sa atong mga katigulangan; mitabang siya kang Israel nga iyang sulugoon, ug nahinumdom siya pagpakitag kaluoy kang Abraham, ug sa tanan niyang mga kaliwat hangtud sa kahangturan!” Mipuyo si Maria og mga tulo ka bulan uban kang Isabel, ug unya mipauli sa ila.
ANG EBANGHELYO SA GINOO.
DAYGON IKAW, O CRISTO
KATILINGBANONG PAG-AMPO
P: Nagasunud sa panig-ingnan ni Maria, atong daygon ug pasalamatan ang Dios Amahan nga sa kabuhong sa iyang pagkamanggihatagon mihatag kanato sa iyang bugtong Anak atong Manluluwas ug Manunubos : ANG AMONG KAUGALINGON MOSANGYAW KANIMO, GINOO.
1. Nga ang Santo Papa ug mga kaobispohan sa Simbahan, sama kang Maria, maminaw sa Pulong sa Dios ug dili maglangan sa pagsangyaw niini. Mag-ampo kita sa Ginoo.
2. Nga ang mga inahan molantaw kang Maria isip usa ka matuud nga dangpanan ug tuburan sa paglaum diha sa mga higayon sa pagsulay ug kasakitan. Mag-ampo kita sa Ginoo.
3. Nga sa atong paghatag og pasidungog kang Maria diha sa atong kinabuhi ug sa atong mga panimalay mapalawom nato ang pag-ila sa iyang Anak. Mag-ampo kita sa Ginoo.
4. Nga pinaagi sa pagpangama ni Maria, ang mga kabus ug dinaugdaug, mahimong gawasnon gikan sa ilang kahimtang. Mag-ampo kita sa Ginoo.
5. Nga ang mga nangamatay dawaton nga makauban sa mga Santos ug moduyog kang Maria sa walay katapusang pagdayeg sa Ginoo. Mag-ampo kita sa Ginoo.
P:Langitnong Amahan, nagapasalamat kami kanimo alang sa mensahe sa kalinaw nga gidala ni Maria dinhi ning masamok namong kalibutan. Hatagi kami sa panabang nga among gikinahanglan sa matag adlaw aron mahimo kaming matinud-anon kanimo. Kini among gipangayo pinaagi ni Cristo among Ginoo. Amen.
PAG-AMPO SA MGA GASA
O Ginoo, ang Espiritu Santo nga nagpuno kang Maria Santisima, magsantos niining mga gasa nga ani-a sa among altar.
Kini among gipangayo Kanimo pinaagi ni Cristo among Ginoo. Amen.
EYUKARISTIKANHONG PAG-AMPO: Prepasyo ni Santa Maria, Hulagway ug Inahan sa Simbahan II. (p.13)
Antipona sa Pangalawat
Bulahan ikaw, O Maria, puno ka sa grasya: gihangad namo ang among mga mata nganha Kanimo isip masigang modelo sa mga birtud alang sa tibuok hugpong sa mga pinili sa Dios.
PAG-AMPO HUMAN
SA PANGALAWAT
MAG-AMPO KITA
Ginoong Dios, Kanimo nahalad namo diha sa sakrispisyo ang mga misteryo sa Imong altar; ug kami nakadawat uban sa mahigugmaong kasingkasing sa lawas ug dugo sa Imong Anak, itugot nga ang Imong Simabahan nagsud-ong kanunay sa Mahal nga Birhen Maria aron kami motubo sa kadasig sa pagtuo, mapamatud-an sa gugma ug madasig sa paglaum alang sa umaabot nga himaya.
Kini among gipangayo pinaagi ni Cristo among Ginoo. Amen.
