07/09/2026
Ugmang adlawa Septiyembre 8, 2026, ato’ng handumon ug saulogon ang Adlaw’ng Natawhan sa Mahal nga Birhen Maria. Usa sa mga kalihukan nga ato’ng ipahigayon isip pagpasidungog sa ato’ng Langitnon’g Inahan mao ang MARIAN SERENADE.
Sugdan kini pinaagi sa pag-Aurora alas 4:00 sa kadlawon, gikan sa nagkalain-lain’g mga kapilya sa parokya, padulong sa ato’ng Simbahan, aron ang tanan makaabot sa dili pa mag-alas 5:00 sa buntag.
Ang mga Kapilya nga duol sa Simbahan gidasig nga maglakaw, samtang kadtong gikan sa mas layo nga mga lugar mahimong magsakay. Sa pag-Aurora, palihug dad-a ang inyo’ng mga imahen sa Mahal nga Birhen Maria isip timaan sa ato’ng pagtuo, debosyon, ug gugma ngadto sa ato’ng Langitnon’g Inahan.
Pag-abot sa Simbahan, isunod ang MARIAN SERENADE, diin ato’ng ipadayag pinaagi sa mga awit ang ato’ng gugma ug pagpasidungog sa Mahal nga Birhen Maria. Human sa Marian Serenade, pagasundan kini sa Santos nga Misa ug Floral Offering alang sa ato’ng Langitnong Inahan.
Busa, gihangyo ug gidasig ang matag Sona ug Kapilya nga mag-organisar ug mangandam alang niini’ng matahum nga kalihukan. Ato’ng hiusaon ang ato’ng mga kasingkasing, pagtuo, ug mga tingog aron sa paghatag og usa ka halangdon’g pagpasidungog ngadto sa Mahal nga Birhen Maria sa iya’ng espesyal nga adlaw.
Viva la Virgen Maria!
Malipayon’g Adlaw’ng Natawhan, Mahal nga Birhen Maria!
