14/09/2026
SETYEMBRE 15 | PAGGUNITA SA MAHAL NA BIRHENG MARIA NA NAGDADALAMHATI
Ang Mahal na Birheng Maria na Nagdadalamhati ay ginugunita bilang Ina na nakibahagi sa paghihirap at pagdurusa ng kanyang Anak na si Hesus. Sa paanan ng Krus, matatag niyang tinanggap ang matinding sakit ng isang inang nakakakita sa pagdurusa ng kanyang minamahal na Anak, subalit hindi siya sumuko sa dalamhati. Sa halip, buong pusong isinuko niya ang lahat sa kalooban ng Diyos. Ang kanyang mga luha ay naging saksi ng kanyang walang hanggang pagmamahal at pananampalataya, na siya ring nagbibigay ng lakas sa mga mananampalataya sa oras ng kanilang sariling pagdurusa.
Ipinaalaala sa atin ng paggunitang ito na kung si Maria ay nagtiis ng hirap kasama ng kanyang Anak, gayon din naman ang Simbahan ay nagtiis din ng hirap kasama ni Kristo na kanyang Panginoon sa loob ng mga panahon ng mga pag-uusig at pagsubok na pinagdaraanan ng mga kaanib nito sa buong daigdig mula noong una hanggang sa kasalukuyan. Sa pamamagitan din ng mga pinagdaraanang paghihirap at pagsubok makakaisa ang lahat kay Maria at sa kanyang Anak, ang Panginoong Hesukristo.
Mahal na Birheng Nagdadalamhati, Ipanalangin mo kami.
