The Roman Catholic Bishop of Tagum, Inc. (Rcbti) - Diocese of Tagum, Obispado de Tagum, Seminary Drive, Magugpo West, Tagum City (2026)

Q: What is the address?

Obispado De Tagum, Seminary Drive, Magugpo West

23/08/2026

|| AGOSTO 24, 2026 – Lunes
SAN BARTOLOME, Apostol, Piyesta

Wala gayod gihisgutan si Bartolome sa Ebanghelyo ni San Juan diin gikan ang atong pagbasa karon. Apan sumala sa daghang batid sa Kasulatan, ang tawo nga gitawag ni Juan nga Nataniel mao usab ang giila sa ubang tradisyon nga si San Bartolome. Busa, ang Simbahan sa iyang liturhiya naghiusa niini nga panglantaw aron ipakita kanato ang kahulugan sa iyang pagkahimo nga tinun-an, bisan pa sa lain-laing pamaagi sa pagngalan kaniya.

Sa Ebanghelyo, makita nato ang unang reaksyon ni Nataniel sa balita nga si Jesus gikan sa Nazareth. Sa una, murag adunay pagduhaduha o katingala siya, kay sa iyang pagsabot wala man giingon sa Kasulatan nga ang Mesiyas magagikan sa Nazareth. Apan si Jesus wala mosalikway kaniya; hinuon, gidayeg Siya ni Jesus nga usa ka tinuod nga Israelita, usa ka tawo nga matinud-anon ug nagapangita sa kamatuoran.

Ang mahinungdanong mensahe sa iyang kapistahan dili lamang ang iyang pagkatawo o ngalan, kondili ang paagi sa iyang pag-ila kang Jesus ug ang iyang pagtubag sa kamatuoran. Sama niya, gitawag usab kita sa pagbaton ug bukas nga kasingkasing, andam modawat sa pagpadayag sa Ginoo bisan asa pa kini maggikan. Ug sa dihang makaila kita kang Jesus, dili nato kini itago sama ni Felipe nga miduol kang Nataniel, kondili kinahanglan natong ipahayag pinaagi sa atong pulong ug buhat. Sa ingon niini, mahimong tinood usab kita nga mga tinun-an, sama ni San Bartolome, nga nakaila sa Ginoo ug nagpasakop Kaniya uban sa tibuok kasingkasing

KINUTLO GIKAN SA BASAHON SA ANG GIPADAYAG (Rv. 21: 9:14)
Unya miduol kanako ang usa sa pito ka anghel nga nagdalag pito ka panaksang puno sa pito ug katapusang katalagman. Miingon ang anghel, “Dali ngari ug patan awon ko ikaw sa Pangasaw onon, ang asawa sa Nating Karnero.’
Unya gigamhan ako sa Espiritu ug gidala sa anghel ngadto sa tumoy sa habog kaayong bukid ug gipakita kanako ang Jerusalem, ang Balaang Siyudad nga mikunsad gikan sa langit ug gikan sa Dios; naggilakgilak kini sa himaya sa Dios. Migilak ang siyudad sama sa bililhong bato nga daw haspe ug tin-aw sama sa bildo. May dako ug habog nga paril kini ug may napulog duha ka ganghaan nga gibantayan sa napulog duha ka anghel. Diha sa mga ganghaan, nahisulat ang mga ngalan sa napulog duha ka banay sa Israel. Kada kilid sa siyudad may tulo ka ganghaan: tulo sa silangan, tulo sa habagatan, tulo sa amihanan ug tulo sa kasadpan. Gitukod ang paril sa siyudad ibabaw sa napulog-duha ka sukaranang bato nga gisulatan sa ngalan sa napulog-duha ka apostoles sa Nating Karnero.

SALMO RESPONSORYO Ps. 145: 10-11, 12-13, 17-18
T. Ang imong mga higala nagtug-an sa himaya sa imong pagkahari, Ginoo.
Papasalamata kanimo ang tanan mong mga buhat, O Ginoo, ug padayga kanimo ang tanan nga nagtuo kanimo. Pasultiha sila bahin sa himaya sa imong gingharian ug pasuginla sila sa imong gahom.
T. Ang imong mga higala..
Pasaysaya sila sa katawhan mahitungod sa imong gahom ug sa mahimayaong kasanag sa imong gingharian. Ang imong gingharian maoy gingharian alang sa tanang katuigan, ug ang imong pagmando nagalungtad latas sa tanang kaliwatan.
T. Ang imong mga higala...
Ang Ginoo matarong diha sa tanan niyang mga paagi ug balaan diha sa tanan niyang mga buhat. Ang Ginoo haduol sa tanan nga nagsangpit kaniya, sa tanan nga nagatawag kaniya diha sa kamatuoran.
T. Ang imong mga higala...

+KINUTLO GIKAN SA BALAANG EBANGHELYO SUMALA NI SAN JUAN (Jn. 1: 45-51)
Gipangita ni Felipe si Natanael ug giingnan, “Gikahibalag namo ang gihisgotan ni Moises sa Basahon sa Balaod ug gihisgotan usab sa mga propeta. Siya mao si Jesus, ang anak ni Jose nga taga Nazaret. Duna ba goy maayo nga gikan sa Nazaret?” nangutana si Natanael. “Ngari ug tan-aw,” mitubag si Felipe. Sa pagkakita ni Jesus kang Natanael nga nagpadulong kaniya, miingon siya, “Aniay tinuod gayod nga Israelita ug walay ikasaway kaniya!”
“Nganong nakaila ka man kanako?” nangutana si Natanael kaniya.
Si Jesus mitubag, “Nakita ko ikaw didto ilalom sa kahoyng igera sa wala ka pa tawga ni Felipe.” Si Natanael mitubag, “Mag-tutudlo, ikaw mao ang Anak sa Dios! Ikaw ang Hari sa Israel!”
Si Jesus miingon, “Mituo ka ba tungod lang kay miingon ako kanimo nga nakita ko ikaw ilalom sa kahoyng igera? Makakita kag mas kahibulongan pa kay niini!” Ug miingon siya kanila, Sultihan ko kamo: makita ninyo ang langit nga maabli ug ang mga anghel sa Dios magsaka-kanaog diha sa Anak sa Tawo!”
----------

----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠

22/08/2026

|| AGOSTO 23, 2026 –
IKAKAWHAAG-USA NGA DOMINGO SULOD SA TUIG

Samtang kita naglawig sa kinabuhi niining kalibutana, anaa kita’y mahimamat na mga personalidad na mahimong dakong parte diha sa atong kinatibuk-ang kasinatian ug nahimo natong mga higala. Mao kini sila ang atong pamilya, barkada, silingan, kauban sa trabaho o skwelahan, kabanay sa simbahan, ug pati na pud ang mga tindera ug tindera na kanunay natong maduolan kung aduna kita’y panginahanglan. Kini sab sila mao’y nahimong dakong kabahin sa pagtabang ug umol sa atong pamatasan ug personalidad. Pero unsa man ang rason nganu nahimo kitang higala niining mga tawhana? Nganung mihatag man kita’g pagsalig kanila? Tunhay pa kaha ni atong pag higala o tungod lang kay naa tay makuha diha kanila?

Adunay panultihon na kanunay natong madungog nga nagkanayon, “tell me who your friends are, and I will tell you who you are”. Apan unsaon nato pagpaambit kung kinsa ang atong mga higala kung wa gayud ta nasayod kung kinsa ni sila? Gani man usahay adunay mga panahon nga mahibulong ko sa akong mga kasinatian uban sa akong mga higala. Sa dihang magtapok kami mga barkada, mahimuot ug magkatawa na lang ko maghuna-huna kung nganu nag amigo pa mi ani nila. Apan diha sa akong pagpamalandong, lihok gayud sa kaalam ug plano sa Diyos na mahimo ko ni silang mga higala luyo sa ilang mga kakulangan.

Diha sa ikaduhang pagbasa atong nasayran na gidayeg pag ayo ni San Pablo ang kaalam ug kinaadman sa Ginoo human niya pamalandongi ang Iyang plano sa kaluwasan. Gane usa sa gikaingon ni Santo Tomas Aquino nga ang atong tawhanong pagsabot dili igo motungkad sa kaalam sa Diyos, maong kailangan nato ug pagtoo alang Kaniya. Maong usahay aduna man higayon nga naa ta’y pagduda o napasakitan man ta sa atong mga higala, atong hinumdoman na kini sila nahimong kabahin sa atong kinabuhi kay kini usab parte sa plano sa Diyos alang kanato.

Ato sab kining masayran sa atong Ebanghelyo karun diha sa pagsalig ni Cristo ngadto kang San Pedro. Nga luyo sa iyang pagka-imperpekto ug kakulangan, gisaligan gihapon siya sa mga susi sa Gingharian sa Langit tungod kay nasayod man siya kung kinsa si Jesucristo. Maong ang hagit kanunay kanato isip usap ka Kristiyano, mahimo unta kitang tunhay nga saksi sa kinabuhi ug higala ni Kristo para mahimo kitang instrumento sa pagpaila kaniya ngadto sa uban.
Pamalandong ni Padre Jason Abryl Escote

UNANG PAGBASA (Is 22: 19-23) Ang pangulo maoy adunay res-ponsibilidad ngadto sa Dios. Gipiyal sa Dios ngadto sa iyang katawhan ang iyang trabaho. Gihatag niya kanila ang yawe sa panggamhanan. Sila ang adunay responsibilidad ngadto kaniya ug ngadto sa tanang katawhan.

KINUTLO GIKAN SA BASAHON NI PROPETA ISAIAS (Is 22: 19-23)
Mao kini ang giingon sa GINOO nga Labing Gamhanan, “Adtoa kining tinugyanan nga atua sa Sebna, nga maoy nagdumala sa palasyo sa hari ug ingna siya: ‘Palagputon ko ikaw sa imong katungdanan, ug gikan sa imong nahimutangan.”
“Niadtong adlawa paanhion ko ang akong sulugoon nga si Eliakim anak ni Hilkias, ug sul-oban ko siya sa imong bisti, ug baksan ko siya sa imong bakos, ug itugyan ko kaniya ang imong gahum; ug mahimo siyang pangulo sa mga molupyo sa Jerusalem ug sa Juda. Ug isangon ko sa iyang abaga ang katungod sa pag-abli sa balay ni David; siyay moabli niini ug walay makasira; mosira siya niini ug walay makaabli. Ibutang ko siya sa usa ka lig-on nga dapit daw usa ka ugsok, ug mahimo siyang garbo sa iyang banay.”

SALMO RESPONSORYO Ps. 138:1-2, 2-3, 6, 8
T. Ginoo, ang imong gugma walay katapusan; ayaw pagbiyai ang buhat sa imong mga kamot.
Pasalamatan ko ikaw, O Ginoo, sa tibuok kong kasingkasing, (kay imong gidungog ang mga pulong sa akong baba); sa atubangan sa mga anghel awiton ko ang imong kadayganan; Nagasimba ako didto sa imong balaan nga templo.
T. Ginoo, ang imong gugma…
Pasalamatan ko ang imong ngalan, tungod sa imong kaluoy ug imong kamatuoran: Sa akong pagsangpit, gipatalinghogan mo ako; imo akong gilig-on sulod sa akong kaugalingon.
T. Ginoo, ang imong gugma…
Ang Ginoo hataas, apan nagatan-aw siya sa mapaubsanon, ug nakaila siya sa mapahitas-on gikan sa halayo. Ang imong kaayo, O Ginoo, nagalungtad sa kahangturan; ayaw pagbiyai ang buhat sa imong mga kamut.
T. Ginoo, ang imong gugma…

IKADUHANG PAGBASA (Rom 11: 33-36) Himayaon ang Dios hangtod sa kahangturan. Gipasabot ni Pablo kon giunsa sa Dios sa pagluwas sa mga Judio ug mga pagano. Gidayeg niya ang Dios tungod sa iyang dakong kinaadman.

KINUTLO GIKAN SA SULAT NI SAN PABLO NGADTO SA TAGA-ROMA (Rom. 11: 33-36)
Mga igsuon: Pagkabahandianon gayod sa Dios ug pagkatulugkaron sa iyang kaalam ug kahibalo! Kinsay makasaysay sa iyang hukom?Kinsay makasabot sa iyang mga paagi? Sumala sa giingon sa Kasulatan:
“Kinsay nasayod sa hunahuna sa Ginoo? Kinsay makatambag kaniya? Kinsay nakahatag kaniya’g bisan unsa, aron iyang baslan?”
Kay siyay nagbuhat sa tanang butang, ug nahimong mao karon ang tanang butang pinaagi kaniya ug alang kaniya. Iya sa Dios ang himaya sa walay katapusan! Amen.

+KINUTLO GIKAN SA BALAANG EBANGHELYO SUMALA NI SAN MATEO (Mt. 16: 13-20)
Unya miadto si Jesus sa yuta duol sa lungsod sa Cesarea Filipo, ug didto nangutana siya sa iyang mga tinun-an, “Sumala sa mga tawo, kinsa man ang Anak sa Tawo?” Sila mitubag, “May nag ingon nga siya mao si Juan nga Magbubunyag; ang uban nag-ingon nga siya mao si Elias; samtang ang uban nag-ingon nga siya mao si Jeremias o laing propeta.” Si Jesus nangutana kanila, “Apan kamo, unsa may inyong ikasulti? Kinsa man ako?”
Ug mitubag si Simon Pedro, “Ikaw mao ang Mesiyas, ang Anak sa Dios nga buhi.”
Giingnan siya ni Jesus, “Simon, anak ni Jonas, bulahan ka gayod kay kining maong kamatuoran wala moabot kanimo gikan sa bisan kinsang tawo, kondili gihatag kanimo sa akong Amahan nga atua sa langit. Busa sultihan ko ikaw: ikaw si Pedro ug ibabaw niining bato tukoron ko ang akong Simbahan, ug bisan gani ang kamatayon dili gayod makabuntug niini. Ihatag ko kanimo ang mga yawi sa Gingharian sa langit: ang imong idili dinhi sa yuta, idili usab didto sa langit; ug ang imong itugot dinhi sa yuta, itugot usab didto sa langit.”
Unya gipinahan ni Jesus ang iyang mga tinun-an nga dili sila manugilon kang bisan kinsa nga siya mao ang Mesiyas.
----------

----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠

21/08/2026

|| AGOSTO 22, 2026 – Sabado
SANTA MARIA, BIRHEN UG RAYNA, Memorial

Dali ra kaayo kitang makasaway sa mga pangulo nga nakasala o adunay mga kahuyang. Tungod sa atong kasuko o kasagmuyo, usahay mangita pa kita ug uban nga mosuporta sa atong negatibong pagtan-aw aron hingpit silang isalikway ug dili na tahuron. Apan kini nga paagi sa paghunahuna makadala usab kanato sa paghusga nga kulang sa hustong pag-ila sa tibuok kamatuoran.

Sa Ebanghelyo, atong makita kung giunsa ni Jesus pag atubang ang mga pangulo sa iyang panahon. Bisan pa nga Siya adunay hingpit nga katungod sa pagbadlong ug pag awhag sa kausaban batok sa mga abusado ug makasasala nga mga lider, Siya nagpabilin nga matinud-anon sa pagtudlo sa kamahinungdanon sa pag-ila ug pagpugong sa kaugalingon. Dili lamang Siya usa ka Propeta, apan Siya ang Mesiyas ug Ginoo, ug bisan pa niana, Siya wala mag-awhag sa walay pagpugong nga paghukom.

Sa tinuod, tin-aw ang mga pulong ni Jesus: “Busa kinahanglan tumanon ninyo ug sundon ang tanan nga ilang gisugo kaninyo; ayaw ninyo sunda ang ilang mga buhat, kay wala man sila magtuman sa ilang giwali.” Nagpasabot kini nga angay nato tahuron ang angay tahuron nga awtoridad ug mga katungdanan, apan magmatngon usab kita nga dili sundon ang ilang sayop nga binuhatan. Sa ingon niini, gitawag kita sa Ginoo sa paghiusa sa pagtahod, hustisya, ug pagpakabuhi nga matarong nga walay paghukom sa uban.

KINUTLO GIKAN SA BASAHON NI PROPETA EZEQUIEL (Ez. 43:1-7)
Tapos niini gidala ako sa tawo ngadto sa ganghaan nga nag-atubang sa sidlakan. Unya akong nakita ang himaya sa Dios sa Israel nga naggikan sa sidlakan. Ang iyang tingog sama sa dahunog sa dagat ug misanag ang yuta sa iyang himaya. Ang panan awon nga akong nakita sama sa panan-awon nga nakita ko sa paglaglag niya sa siyudad sa Jerusalem, ug sama sa panan-awon nga nakita ko didto sa daplin sa Suba sa Sebar; ug mihapa ako sa yuta. Sa pagsulod sa himaya sa GINOO sa Templo miagi kini sa ganghaan nga nag-atubang sa sidlakan. Gibayaw ako sa espiritu ug gidala ako ngadto sa sulod nga hawanan. Nakita ko didto nga milukop sa Templo ang himaya sa Ginoo. Samtang ang tawo nagbarug sa akong tupad, nabati ko ang tingog sa GINOO nga nakigsulti kanako gikan sa Templo. Giingnan ako Niya, “Tawo, mao kini ang dapit sa akong trono ug ang dapit nga akong tumbanan, diin magpuyo ako uban sa mga Israelita hangtud sa kahangturan. Sila ug ang ilang mga hari dili na magpasipala sa balaan kong ngalan pinaagi sa ilang pagsimba’g mga diosdios ug paghimo’g monumento sa patay na nga mga hari.

SALMO RESPONSORYO Ps. 85:9-10, 11-12, 13-14
T. Ang himaya sa Ginoo magpuyo sa atong yuta.
Pamati-on ko ang gisangyaw sa Dios; sa Ginoo – kay nagsangyaw siya sa kalinaw. Haduol gayud ang Iyang kaluwasan kanila nga mahadlokon Kaniya, ang himaya nagapuyo sa atong yuta.
T. Ang himaya sa Ginoo...
Ang kalooy ug ang kamatuoran magatagbo; ang katarong ug kalinaw maghagkanay. Ang kamatuoran mogitib gikan sa yuta, ug ang katarong modung-aw gikan sa langit.
T. Ang himaya sa Ginoo...
Ang Ginoo mohatag sa Iyang mga kaayohan ug ang atong yuta mohatag sa iyang abot. Ang katarong maglakaw sa iyang atubangan, ug ang kaluwasan diha sa iyang pagaagi-an.
T. Ang himaya sa Ginoo...

+KINUTLO GIKAN SA BALAANG EBANGHELYO SUMALA NI SAN MATEO (Mt. 23:1-12)
Unya miingon si Jesus sa mga tawo ug sa iyang mga tinun-an, “Ang mga magtutudlo sa Balaod ug ang mga Pariseo mao ang may katungod sa paghubad sa Balaod ni Moises; busa kinahanglan tumanon ninyo ug sundon ang tanan nga ilang isugo kaninyo. Apan ayaw ninyo’g sunda ang ilang mga buhat. Kay wala man sila magtuman sa ilang giwali. Nagbugkos sila og bug-at nga mga karga ug gipapas-an nila sa mga tawo, apan dili gani sila mogamit bisa’g usa na lang ka tudlo aron pagtabang pagpas-an sa maong karga. Himoon nila ang tanan aron lamang pagpasigarbo ngadto sa mga tawo. Tan-awa’g unsa ka dagko sa gisudlan nila sa mga sinulat nga mga bersikulo sa Kasulatan, nga ilang gibutang sa ilang mga agtang ug gibaligtos sa ilang mga bukton! Ug tan-awa’g unsa kataas ang sidsid sa ilang mga saput! Gusto sila sa labing maayong mga dapit sa mga kombira ug sa mga linaing lingkuranan sa mga sinagoga; gusto silang yukboan ug tahuron didto sa mga merkado, ug nga ang mga tawo motawag kanila’g ‘Magtutudlo.’ Ayaw kamo pagpahingala’g ‘Magtutudlo,’ kay kamong tanan managsuon man ug usa ra ang inyong Magtutudlo. Ug dinhi sa kalibutan ayaw tawga si bisan kinsa nga ‘Amahan,’ kay usa ra ang inyong Amahan nga atua sa langit. Ayaw usab kamo pagpatawag og ‘Pangulo,’ kay usa ra ang inyong pangulo nga mao ang Mesiyas. Ang labing daku kaninyo kinahanglang mahimo nga inyong sulugoon. Ug ipaubos ang magpataas sa iyang kaugalingon, ug ang magpaubos, ipataas.”
----------

----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠

20/08/2026

|| AGOSTO 21, 2026 – Biyernes
SAN PIO X, Pope, Memorial

Ang mga Pariseo, tungod kay mga batid sila sa Balaod, naningkamot sa pagpili ug pagtandi sa 613 ka mga sugo aron mahibal-an kon hain ang labing dako ug labing importante. Alang kanila, importante kaayo ang pagklasipikar sa mga sugo aron mahibal-an kung unsay labing angay tutokan. Apan si Jesus wala madala sa ilang paagi sa pangutana ug wala usab Siya motubag pinaagi sa pagpili ug usa lamang ka sugo.

Hinoon, gihatagan sila ni Jesus ug duha ka sugo: ang paghigugma sa Ginoo sa tibuok kasingkasing, kalag, ug hunahuna, ug ang paghigugma sa isigkatawo sama sa kaugalingon. Apan Iyang gipatin-aw nga ang ikaduha sama ka importante sa una. Busa, wala Siya nagtudlo nga adunay usa ka sugo nga labaw sa tanan, kondili nga kining duha dili mabulag sa usag usa. Dili mahimong moingon ang usa ka tawo nga nahigugma siya sa Dios apan wala siya mahigugma sa iyang isigkatawo.

Ang tinuod nga punto ni Jesus mao nga dili kinahanglan maglalis kung unsa ang pinakadakung sugo. Ang mas importante mao ang matinud-anong pagtuman sa tanang mga sugo nga nagagikan sa gugma. Kon ang atong paghigugma sa Dios ug sa isigkatawo mahimong sentro sa atong kinabuhi, ang tanang ubang mga balaod makakaplag sa ilang tinuod nga kahulugan ug matuman usab nato sa hustong paagi.

KINUTLO GIKAN SA BASAHON NI PROPETA EZEQUIEL (Ez. 37:1-14)
Gikuptan ako sa GINOO ug pinaagi sa iyang espiritu, gidala ako niya didto sa walug diin nagkatag ang mga bukug. Ug gilibotlibot niya ako sa pagpatan-aw niini, ug nakita ko nga nalukop sa bukug ang walug ug uga kini kaayo. Ug giingnan ako niya, “Tawo, mabuhi pa ba kining mga bukug?” Ug mitubag ako “GINOONG DIOS ikaw ray nasayod niini.”
Unya giingnan pa gayod ako niya, “Sultihi kining mga bukug nga mamati sila sa pulong sa GINOO. Nag ingon ang GINOONG DIOS kaninyo: Paginhawaon ko kamo ug mabuhi kamo pag usab. Hatagan ko kamug mga ugat ug unod ug panit, ug hatagan ko kamug gininhawa ug mabuhi kamo. Unya makaila na kamo nga ako mao ang GINOO.”
Busa misulti ako sumala sa gisugo kanako. Samtang nagsulti ako, may nabati akong kinanaas ug nagkauli ang mga bukug, ug nahimong tibuok nga lawas. Sa pagtan-aw ko, may mga ugat, unod ug panit na kini; apan dili pa moginhawa.
Unya giingnan ako sa Dios, “Tawo, sultihi ang hangin nga ako, ang GINOONG DIOS, nagsugo kaniya paghuros ug paghatag ug gininhawa niining patayng mga lawas aron mabuhi sila pag-usab.”
Busa misulti ako sumala sa gisugo kanako ug miginhawa na sila ug nabuhi, ug nanindug sila. Daghan sila kaayo.
Unya giingnan ako sa Dios, “Tawo, ang katawhan sa Israel sama niining mga bukug. Miingon sila, ‘Uga na ang among mga bukug, ug wala na kami paglaum; patay na gayod kami.’ Busa sultihi sila nga nag-ingon ang GINOONG DIOS, ‘Ablihan ko ang inyong mga lubong ug banhawon ko kamo, O katawhan ko! Dad-on ko kamo balik sa yuta sa Israel. Ug unya hibaw-an ninyo nga ako mao ang GINOO, inigbukas ko sa inyong mga lubnganan, ug inigbanhaw ko kaninyo, o katawhan ko! Papuy-on ko diha kaninyo ang akong espiritu, ug mabuhi kamo, ug ibutang ko kamo sa inyong kaugalingong yuta; unya hibaw-an ninyo nga ako, ang GINOO nga nakigsulti kaninyo, maoy naghimo niini. Ako ang GINOO nagsulti.”

SALMO RESPONSORYO Ps. 107:2 -3, 4-5, 6-7, 8-9
T. Pasalamati ang Ginoo, kay ang iyang gugma hangtud sa kahangturan.
Pasultia ang tinubos sa Ginoo, sila nga iyang gitubos gikan sa kamut sa kaaway. Ug iyang gitapok gikan sa kayutaan, gikan sa silangan ug kasadpan, gikan sa Amihanan ug sa Habagatan.
T. Pasalamati ang Ginoo…
Nasalaag sila didto sa kamingawan; wala sila katultol sa dalan ngadto sa siyudad nga walay nagpuyo. Gigutom sila ug giuhaw, naghigos sila sa ilang pagpanglakaw.
T. Pasalamati ang Ginoo…
Nagtawag sila sa Ginoo sa ilang kagul-anan; giluwas sila niya sa ilang mga kalisdanan. Ug gitultolan niya sila sa matarong nga dalan aron makaabut sila sa usa ka siyudad nga dunay mga tawo.
T. Pasalamati ang Ginoo…
Papasalamata sila sa Ginoo tungod sa iyang kaluoy ug sa iyang katingalahang mga buhat alang sa mga anak sa mga tawo. Tungod kay iyang gitagbaw ang gipangandoy sa ilang kalag. Ug gibuhong ang gigutom sa mga butang nga maayo.
T. Pasalamati ang Ginoo…

+KINUTLO GIKAN SA BALAANG EBANGHELYO SUMALA NI SAN MATEO (Mt. 22:34-40)
Sa pagkadungog sa mga Pariseo nga ang mga Saduseo gilupig ni Jesus sa katarungan, nagpanon sila sa pagduol kaniya, ug unya usa kanila, nga magtutudlo sa Balaod, misulay pagbitik kaniya pinaagig pangutana. “Magtutudlo,” nangutana siya, “unsa man ang labing dakong sugo sa Balaod?” Si Jesus mitubag, “‘Higugmaa ang Ginoo nga imong Dios sa tibuok mong kasingkasing, sa tibuok mong kalag, ug sa tibuok mong hunahuna.’ Kini ang labing dako ug ang labing importanting sugo. Ang ikaduha nga labing importanting sugo sama sa una: ‘Higugmaa ang imong isigkatawo ingon sa imong kaugalingon.’ Nagsukad niining duha ka sugo ang tibuok Balaod ni Moises ug ang mga pagtulon-an sa mga propeta.”
----------

----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠

19/08/2026

|| AGOSTO 20, 2026 – Huwebes
SAN BERNARDO, Abad ug Doktor sa Simbahan, Memorial

Ang Ginoo dili lamang buot nga moduol kita ug moalagad Kaniya. Labaw pa niana, buot Niya nga ang atong pag-alagad mahitabo sumala sa Iyang paagi ug kabubut-on. Dili igo nga adunay maayong tuyo; kinahanglan usab nga ang atong mga binuhatan magpahiuyon sa kabubut-on sa Dios ug sa Iyang mga pagtulon-an.

Kasagaran, gusto nato nga mag-alagad sa Ginoo pinaagi sa atong kaugalingong pamaagi ug pagsabot. Apan ang tinuod nga pag-alagad dili mag-agad sa atong personal nga gusto kondili sa pagkamasinugtanon ngadto sa Iyang giya. Pananglitan, ang usa ka tawo mahimong matinabangon sa uban apan maglisod sa pagpasaylo sa nakasala kaniya. Bisan pa sa iyang mga maayong binuhatan, gitawag gihapon siya sa Ginoo sa pagpasaylo kay mao kana ang paagi sa Dios ug dili lamang ang iyang kaugalingong paagi.

Mao kini ang mahinungdanong pagtulon-an nga atong makuha gikan sa Ebanghelyo: dili lamang ang yano nga pag alagad sa Ginoo ang gikinahanglan, kondili ang pagkahibalo usab kon unsaon nato Siya pag-alagad sa hustong paagi. Sa dihang atong ipahiuyon ang atong kinabuhi ug pag-alagad sa Iyang kabubut-on, ang atong mga buhat mahimong labi nga makapahimuot Kaniya ug mahimong tinubdan sa panalangin alang sa uban.

KINUTLO GIKAN SA BASAHON NI PROPETA EZEQUIEL (Ez. 36:23-28)
Ipakita ko unsa kabalaan ug kahalangdon ang akong ngalan nga inyong gipakaulawan, aron makaila sila nga ako mao ang GINOO, pinaagi sa akong buhaton kaninyo diha gayod sa ilang atubangan. Kay kuhaon ug tigomon ko kamo gikan sa nagkalainlaing nasod, ug dad-on ko kamo balik sa inyong yuta. Buboan ko kamug limpiyong tubig ug malimpiyo kamo sa tanan ninyong kahugawan lakip sa inyong pagkamaki diosdios. Hatagan ko kamug bag-ong kasingkasing ug bag-ong Espiritu, ug kuhaon ko ang inyong matig-a nga kasingkasing ug ilisan ko kinig kasingkasing nga masinugtanon. Ibutang ko sa sulod ninyo ang akong espiritu ug himoon ko kamong masinugtanon sa akong mga gimbut-an ug mga lagda. Adto na kamo puyo sa yuta nga gihatag ko sa inyong katigulangan, ug mahimo na kamong akong katawhan ug ako mainyo nang Dios.

SALMO RESPONSORYO Ps. 51:12-13, 14-15, 18-19
T. Ibubo ko kaninyo ang malinis nga tubig ug hugasan ko ang tanan ninyong mga sala.
Usa ka malinis nga kasingkasing gamaa dinhi kanako, O Dios, ug usa ka makanunayong espiritu bag-oha sulod kanako. Ayaw ako isalikway sa imong atubangan, ug ayaw kuhaa gikan kanako ang imong balaang espiritu.
T. Ibubo ko kaninyo…
Ibalik kanako ang kasadya sa imong kaluwasan, ug padayona dinhi kanako ang mauyonong espiritu. Tudloan ko ang mga malapason sa imong mga dalan, ug ang makasasala mamalik kanimo.
T. Ibubo ko kaninyo…
Kay dili ikaw mahimuot sa mga sakripisyo; kon maghalad ako ug halad nga sinunug, dili ikaw modawat niini. Ang akong sakripisyo, O Dios, mao ang mahinulsolon nga espiritu; usa ka kasingkasing nga mahinulsolon ug mapaubsanon, O Dios, dili nimo tamayon.
T. Ibubo ko kaninyo…

+KINUTLO GIKAN SA BALAANG EBANGHELYO SUMALA NI SAN MATEO (Mt. 22:1-14)
Migamit na usab si Jesus ug mga sambingay sa iyang pagpakigsulti sa mga tawo. “Ang Gingharian sa Langit sama sa usa ka hari nga naghikay ug usa ka kombira sa kasal alang sa iyang anak nga lalaki. Gisugo niya ang iyang mga sulugoon aron pagpahibalo sa mga dinapit nga paadtoon na sila sa kombira, apan mibalibad ang mga dinapit. Busa nagsugo siyag laing mga sulugoon ug giingnan niya, ‘Sultihi ninyo ang mga dinapit nga andam na ang kombira; giihaw na ang akong mga baka ug ang mga pinatambok nga nati, ug nahikay na ang tanan. Pangari na kamo sa kombira sa kasal!’ Apan wala magtagad ang mga dinapit, ug nagpadayon sila sa ilang mga buluhaton: ang usa miadto sa iyang uma, ang usa sa iyang tindahan, samtang ang uban midakop sa mga sulugoon, ug gibunalan ug gipatay nila. Tungod niini nasuko pag-ayo ang hari, ug gipadala niya ang iyang mga sundalo ug gipamatay kadtong mga mamumuno, ug gisunog ang ilang siyudad. Unya gitawag niya ang iyang mga sulugoon ug giingnan, ‘Andam na ang akong kombira sa kasal, apan dili angay niini ang mga tawo nga akong dinapit. Busa pangadto kamo sa kadalanan ug dapita ang tanan nga inyong makaplagan.’ Ug ang mga sulugoon nangadto sa kadalanan ug gidala nila ang tanan nga ilang nakaplagan, maayo ug dautan, ug napuno sa mga tawo ang dapit nga gikombirahan.
“Unya misulod ang hari aron pagtan-aw sa mga dinapit, ug nakita niya ang usa ka tawo nga wala magsul-ob ug bisti sa kasal. Gipangutana siya sa hari, ‘Higala, giunsa man nimo pagsulod dinhi nga wala ka man magsul-ob sa bisti sa kasal?’ Apan wala motingog ang tawo. Unya miingon ang hari sa iyang mga sulugoon, ‘Gapusa ninyo ang iyang mga kamut ug tiil ug ilabog siya ngadto sa kangitngitan sa gawas. Didto maghilak siya ug magkagot ang iyang mga ngipon.”’
Ug gitapus ni Jesus ang sambingay sa pag-ingon, “Kay daghan ang gidapit, apan diyotay ra ang gipili.”
----------

----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠

18/08/2026

|| AGOSTO 19, 2026 – Miyerkules
SAN EZECHIEL MORENO, Bishop, Memorial

Ang agalon adunay katungod sa pagbuot kon unsaon niya paggamit ang iyang kaugalingong kwarta. Sa samang paagi, ang Ginoo usab adunay katungod sa paghatag sa Iyang grasya ngadto kang bisan kinsa sumala sa Iyang kaalam ug kabubut on. Walay makasugo o makabuot alang Kaniya tungod kay Siya mao ang Agalon ug Tinubdan sa tanang panalangin.

Makita nato kini sa atong adlaw-adlaw nga kasinatian. Pananglitan, adunay duha ka tawo nga nag-ampo alang sa tabang sa Ginoo. Ang usa dugay nang aktibo sa Simbahan, samtang ang usa bag-o pa lamang mibalik ngadto sa pagtoo human sa taas nga panahon sa pagkalayo sa Dios. Apan ang duha makadawat sa grasya ug panalangin sa Ginoo. Kini nagpakita nga ang Dios dili magtan-aw sa ranggo o kahimtang sa tawo apan sa Iyang walay kinutuban nga gugma ug kalooy.

Tinuod gayod nga manggihatagon ang Ginoo ug walay pinalabi. Kung Iyang ipaambit ang Iyang kaayo ug grasya, maayo man o dautan nga tawo, adunay kahigayonan nga makadawat niini. Busa, kinahanglan natong hinumdoman nga ang Dios, isip Tinubdan sa tanang grasya, maoy nagtagad sa atong tinuod nga mga panginahanglan ug magahatag kanato sa angay ug labing maayo alang sa atong kaayohan.

KINUTLO GIKAN SA BASAHON NI PROPETA EZEQUIEL (Ez. 34:1-11)
Giingnan ako sa Ginoo, “Tawo, sultihi ang mga pangulo sa Israel nga nag ingon ang GINOONG DIOS: Mga magbalantay sa Israel, nganong kamo man hinuon ang naniguro pagkaon? Dili ba ang inyong katungdanan mao man ang pagpakaon sa mga karnero? Giihaw ug gikaon ninyo ang mga karnerong tambok ug gihimo ninyong bisti ang balhibo niini, apan wala ninyo pakan-a ang mga karnero. Wala ninyo lig-ona ang mga maluyahon, wala ninyo ayoha ang mga masakiton, wala ninyo lakilakii ang mga piangon, wala ninyo dad-a pagbalik ang mga nahisalaag, ni pangitaon ninyo ang nangawala. Hinonoa, gilisudlisod ninyo sila ug tig-a kamo sa inyong pagdumala kanila. Nagkatibulaag sila kay wala may nagbantay kanila, busa gipanukob sila sa mga mananap nga ihalas. Nagkatibulaag ang akong mga karnero diha sa mga bukid ug mga bungtod ug sa nagkalainlaing bahin sa nasud, apan walay nangita kanila.”
“Busa kamong mga magbalantay sa mga karnero, pamati sa pulong sa GINOO: Ingon nga ako buhing Dios, nag-ingon ang GINOO, sanglit nahimo mang tukbonon sa mga mananap ang akong mga karnero kay wala may nagbantay kanila ug wala may nangita sa akong mga karnerong nangawala, ug nabusog lamang sa ilang kaugalingon ang mga magbalantay niini, inay ilang pakan-on ang mga karnero, kamong mga magbalantay kinahanglan nga magmatngon niining pulong sa GINOO. Mao kini ang giingon sa GINOONG DIOS, ‘Makigbatok ako kaninyo, ug paninglan ko kamo sa akong mga karnero ug dili ko na kamo tugyanan sa katungod sa pagpakaon sa akong mga karnero. Dili na usab mahitabo nga ang mga magbalantay magpatambok lamang sa ilang kaugalingon. Luwason ko ang akong mga karnero gikan sa ilang mga ba-ba aron dili na sila makakaon pa niini.’
Nag-ingon ang GINOONG DIOS, “Ako mismo maoy mangita sa akong mga karnero."

SALMO RESPONSORYO Ps. 23:1-3, 3-4, 5, 6
T. Magbalantay kanako ang Ginoo; wala nay magmakulang pa kanako.
Magbalantay kanako ang Ginoo; wala nay magmakulang pa kanako. Sa lunhaw nga sibsibanan Iya ako nga gipapahulay; Sa daplin sa malinawon nga tubig Iya akong gidala; Iyang gihupay ang akong kalag.
T. Magbalantay kanako…
Iya ako nga gitultolan sa matarong nga agianan tungod sa Iyang ngalan. Bisan kon maglakaw ako sa walog sa kangitngitan wala akoy kahadlokan nga dautan; kay anaa ka man sa akong kiliran. Sa Imong igbubugaw ug sungkod gihatagan mo ako og kaisog.
T. Magbalantay kanako…
Gihikyaran mo ako og lamesa sa akong atubangan samtang nagtan-aw ang akong mga kaaway; Gidihogan Mo ang akong ulo og lana; nagaawas gayod ang akong kopa.
T. Magbalantay kanako…
Ang kaayo lamang ug kaluoy maoy magsunod kanako sa tanang mga adlaw sa akong kinabuhi. Magpuyo ako sa balay sa Ginoo, sa mga katuigan nga walay kinutuban.
T. Magbalantay kanako…

+KINUTLO GIKAN SA BALAANG EBANGHELYO SUMALA NI SAN MATEO (Mt. 20:1-16)
Si Jesus misugilon niining sambingay ngadto sa iyang mga tinun-an: “Ang Gingharian sa Langit sama sa tag-iya sa usa ka parasan nga sayo sa buntag milakaw aron pagpangita’g mga tawo nga iyang patrabahoon. Miuyon siya paghatag kanila sa naandang suhol nga usa ka denario ang adlaw, ug gipadala sila ngadto sa iyang parasan. Sa pagka-alas nuybe, miadto na usab siya sa merkado ug didto nakita niya ang pipila ka tawo nga nagtindog nga walay buhat, busa miingon siya kanila, ‘Trabaho usab kamo sa akong parasan, ug hatagan ko kamo’g hustong suhol.’ Ug nangadto sila. Unya sa pagkaalas dose ug sa pagka alas tres mao gihapon ang iyang gihimo. Hapit na kadto mo-alas singko nga miadto siya sa merkado ug didto nakakita siya’g Iaing pipila ka tawo nga walay buhat. Siya nangutana kanila, ‘Nganong giusikan man ninyo ang tibuok adlaw?’ Sila nanubag, ‘Kay wala may mipatrabaho kanamo.’ Ug miingon siya kanila, ‘Kon mao kana, trabaho usab kamo didto sa akong parasan.”
“Sa pagkasawomsom na, ang tag-iya miingon sa iyang kapatas, ‘Tawga ang mga mamumuo ug hatagi sila sa ilang suhol; unaha pagsuhol kadtong ulahing gipatrabaho ug ipaulahi kadtong unang gipatrabaho.’ Ang mga tawo nga misugod pagtrabaho sa alas singko sa hapon, gisuholan og usa ka denario ang matag usa kanila. Busa sa pagduol na sa mga tawo nga unang gipatrabaho, nagtuo sila nga labaw pa ang ilang madawat; apan ang usa’g usa kanila gihatagan usab og tagsa ka denario. Gidawat nila ang ilang suhol ug nagbagutbot sila batok sa agalon. Miingon sila, ‘Kining mga tawhana nga ulahi mong gipatrabaho nagtrabaho lamang sulod sa usa ka oras, samtang kami nagtrabaho sa tibuok adlaw ug napagba sa kainit. Apan bisan pa niini imo silang gihataga’g samang suhol nga imong gihatag kanamo.’ Ang agalon mitubag sa usa kanila, ‘Migo, pamati. Wala ako maglimbong kanimo, kay miuyon ka man sa suhol nga usa ka denario ang adlaw. Karon, dawata ang imong suhol ug pauli sa inyo. Maoy akong gusto nga kining tawhana nga ulahing gipatrababo hatagan sa samang suhol nga akong gihatag kanimo. Wala ba diay akoy katungod sa paggamit sa akong kuwarta sumala sa akong gusto? O nasina ka ba hinuon kay ako manggihatagon man?’ ”
Ug gitapos ni Jesus ang sambingay sa pag-ingon, “Busa kadtong naulahi mahiuna, ug kadtong nahiuna maulahi.”
----------

----------
𝐒𝐭𝐚𝐲 𝐈𝐧𝐟𝐨𝐫𝐦𝐞𝐝! 𝐒𝐭𝐚𝐲 𝐔𝐩𝐝𝐚𝐭𝐞𝐝!
𝐿𝑖𝑘𝑒, 𝐹𝑜𝑙𝑙𝑜𝑤 & 𝑆ℎ𝑎𝑟𝑒 𝑜𝑢𝑟 𝑆𝑜𝑐𝑖𝑎𝑙 𝑀𝑒𝑑𝑖𝑎 𝐴𝑐𝑐𝑜𝑢𝑛𝑡𝑠

The Roman Catholic Bishop of Tagum, Inc. (Rcbti) - Diocese of Tagum

23/08/2026

22/08/2026

21/08/2026

20/08/2026

19/08/2026

18/08/2026

Address

Telephone

Website

Alerts

Contact The Place Of Worship

Shortcuts

Share

Category

Listing takedown request