18/05/2024
MAYO 19, 2024
DOMINGO SA PENTEKOSTES
Mass during the Day
(Red)
Mga igsoon, atong gisaulog karon ang Pentekostes. Ang dakong hitabo sa nagpadayag nga sa buhing presensya sa Santisima Trinidad. Sa atong Ebanghelyo gihulagway ang pagkunsad ni Jesus sa mga tinun-an nga nangahadlok tungod sa pagpanglutos nga gibuhat sa mga Hudeo human si Jesus gisakit, gilansang sa krus. Ang Ginoo nikunsad kanila aron pagpadayag sa kalinaw, ug paghatag sa Espiritu Santo, paghatag kanila’g kasiguruhan nga siya sa kanunay maga-uban. Ug nga dili sila madaug sa ilang kahadlok.
Sa atong unang pagbasa sa mga buhat sa mga Apostoles (Acts: 2: 2-11) tataw nga gipadayag ang pagkunsad sa Espiritu Santo kalim-an ka adlaw human mabanhaw ang Ginoong Jesucristo. Sa pagsaysay, sa dihang nagkatigum na ang mga tinun-an sa usaka lugar, sa kalit adunay ningtungha gikan sa langit samag usa ka kusog nga huyop sa hangin, ug nilukop kini sa tibuok panimalay, ug dihadiha dunay mga daw dila sa kalayo nga nanugdong sa mga Apostoles ug napuno sila sa Espiritu Santo ug nanudlo sa mga katawhan sa nagkalainlaing pinulongan. Gipadayag dinhi ang paglig-on sa mga tinun-an sa pagsangyaw sa tanan nga mga katawhan.
Atong kahinumduman nga sa pagbuhat sa kalibutan anaa ang presensya sa Espiritu sa Diyos nga naglihok ibabaw sa katubigan,(Gen. 1:2). Ingon man sa pagbuhat sa tawo, gihuypan sa Ginoo ang ilong sa tawo ug nakabaton kinig ginhawa. Sa adlaw sa Pentekostes ang maong Espiritu sa Ginoo gipadayag pag-usab aron ang mga tinun-an makaangkon sa kaisog sa pagsangyaw sa Ebanhelyo sa nabanhaw’ng Jesus. Dinhi usab gipakita nga ang Espiritu Santo simbolo sa kabuhatan, sa kaisog, ug sa kinabuhi.
Adunay pulong sa English nga nagaingon “between goodbye and hello is a promise” ug ato kining malambigit sa atong gisaulog karon. Sa pagsaka ni Jesus sa langit, iyang gihatagan ug kasiguruhan ang iyang mga tinun-an nga mukunsad ang Espiritu Santo, ang manlalaban ug kini nahitabo. Ang Espiritu nga saad nikunsad sa matag kasing-kasing sa mga tinun-an aron sila malig-on ug makabaton ug kaisog sa pagsangyaw sa pulong sa Ginoo.
Sa atong panahon karon, ato gihapong mabati ang presensya sa Ginoo, pinaagi sa lamdag sa Espritu Santo sa matag usa kanato. makabalo o makasayud kita sa buhing timaan sa Santisima Trinidad kanato pinaagi sa atong mga kasinatian. Ug dili lamang kana, ang dako ug buhing timaan nga ang Espiritu sa Ginoo kanunay kanato nag-uban maong nga hangtud karon buhi ug malig-on pa gihapon ang atong simbahan ug nagpadayun sa pagsangyaw sa iyang misyon sa pagpanagat ug katawhan. Dili kita mahadlok kay aduna kitay manlalaban nga mao ang Espiritu sa kamatuoran.
Sa katapusan ang atong ikaduhang pagbasa nagpahinumdum kanato nga sama nga gigasahan ang mga apostoles panahon sa Pentekostes kitang tanan usab gigasahan ug nga kining tanang gasa nagagikan sa mao rang Espiritu, ang Espiritu Santo. Busa gitawag ug gihagit kita sa pagpalambo sa gasa nga atong nadawat alang sa kahiusahan sa atong katilingban ug kadayganan sa Diyos!
Ginoo, ipadala ang imong Espiritu ug bag-oha ang nawong sa yuta!
Pasiuna
Karon mao ang ika-singkwenta ka adlaw human sa pagsaulog nato sa pagkabanhaw sa atong Ginoo. Mao kini ang adlaw nga atong gihandumang pagkunsad sa Espiritu Santo ngadto sa Iyang mga tinun-an ug kita, isip Simbahan, natawo diha kang Cristo. Ang matag usa kanato nga nakadawat sa gasa sa Espiritu Santo diha sa atong bunyag ug kompirmasyon gihagit sa pagdiskobre sa nagkalain-laing mga gasa nga anaa sa matag-usa kanato. Manindog kita alang sa pagsugod sa Santos nga Eukaristiya.
Unang Pagbasa (Buhat 2: 1-11)
Nagdayeg ug nagpasalamat sila sa Dios. Naghisgot kini sa mga dagkung mga butang nga gihimo sa Ginoo, nga taliwala sa nagkalain-laing grupo sa mga tawo nakasulti sila og nagkalain-laing pinulongan ug nasinati nila nga napuno sila sa Espiritu Santo. Paminawon nato ang unang pagbasa.
KINUTLO GIKAN SA MGA BUHAT SA MGA APOSTOLES (Acts 2:1-11)
Sa pag-abot na sa adlaw sa Pentekostes, ang tanang magtutuo nagtigom sa usa ka dapit. Ug sa kalit may dahunog gikan sa langit, sama sa kusog nga huros sa hangin, ug milukop kini sa tibuok balay nga ilang gitigoman. Unya nakakita silag daw mga dila nga kalayo nga nanugdon diha sa matag usa kanila. Silang tanan napuno sa Espiritu Santo ug misulti sa nagkalainlaing pinulongan sumala sa gipasulti kanila sa Espiritu.
Sa Jerusalem may mga Judio nga relihiyoso kaayo nga gikan sa nagkalainlaing nasod sa kalibutan. Sa pagkadungog sa mga tawo sa kabanha, nanugok sila ug labihan nilang katingala kay ang tagsatagsa ka magtutuo nagsulti man sa tagsatagsa ka pinulongan sa mga namati. Busa sa dakong kahibulong, miingon sila, “Dili ba taga-Galilea man kining mga tawhana? Nganong nakasulti man sila sa atong tagsatagsa ka pinulongan? Dinhi kanato may mga taga-Partia, Media, Elam, Mesopotamia, Judea, Capadocia, Ponto, Asia, Frigia, Panfilia, Ehipto, ug sa mga dapit sa Libya duol sa Cirene; ug ang uban kanato taga-Roma, nga mga Judio ug mga dili Judio nga nakabig sa tinuohan sa mga Judio; ug may pipila pa kanato nga taga-Creta ug Arabia apan bisan pa niini, kitang tanan nakadungog kanila nga nagsulti sa atong tagsatagsa ka pinulongan mahitungod sa katingalahang mga butang nga gibuhat sa Dios.”
ANG PULONG SA GINOO.
SALAMAT SA DIOS.
SALMO RESPONSORYO
(Ps. 104:1, 24, 29-30, 31, 34)
T. Ginoo, ipadala ang imong Espiritu, ug bag-oha ang nawong sa yuta.
Dayga ang Ginoo, kalag ko! O Ginoo, akong Dios, dako gayod ikaw! Pagkadaghan sa imong mga buhat, O Ginoo! Puno ang yuta sa imong mga binuhat;
T. Ginoo, ipadala ang imong Espiritu, ug bag-oha ang nawong sa yuta.
Kon imong kuhaon ang ilang ginhawa, mangamatay sila ug mobalik ngadto sa abog. Sa imong pagpadala sa imong espiritu, magama sila, ug mabag-o nimo ang nawong sa yuta.
T. Ginoo, ipadala ang imong Espiritu, ug bag-oha ang nawong sa yuta.
Molungtad unta sa gihapon ang himaya sa Ginoo; ug malipay ang Ginoo diha sa iyang mga buhat! Makapahimuot unta kaniya ang akong isugilon; maglipay ako diha sa Ginoo.
T. Ginoo, ipadala ang imong Espiritu, ug bag-oha ang nawong sa yuta.
Ikaduhang Pagbasa (1 Cor 12: 3-7, 12-13)
Nagpadayag kini nga adunay nagkalainlaing hiyas nga Espirituhanon apan usa lamang ka Espiritu nga naghatag niini. Tataw kaayo nga ang kamatuoran nga aduna kitay nagkalainlaing mga hiyas apan usa lang ang tinubdan niini nga gikan sa Espiritu sa Dios. Gamiton nato kini alang sa kahimayaan sa Iyang ngalan ug alang usab sa atong mahigugmaong pag-alagad sa uban. Paminawon nato ang ikaduhang pagbasa.
KINUTLO GIKAN SA UNANG SULAT NI SAN PABLO NGADTO SA TAGA-CORINTO (1 Cor. 12:3-7, 12-13)
Busa kinahanglan hibaloan ninyo nga ang tawo nga gimandoan sa Espiritu sa Dios dili makatunglo kang Jesus, ug walay makasugid nga si Jesus mao ang Ginoo, gawas kon mandoan siya sa Espiritu Santo.
May nagkalainlaing mga hiyas nga espirituhanon, apan mao rang Espirituha ang naghatag niini. May nagkalainlaing paagi sa pag-alagad, apan mao rang Ginooha ang gialagaran. May nagkalainlaing katakus sa pag-alagad, apan usa ra ka Dios ang naghatag og katakus sa tagsatagsa alang sa tanang pag-alagad. Ang matag usa gihatagan og pipila ka ilhanan sa presensiya sa Espiritu alang sa kaayohan sa tanan.
Kay si Cristo sama sa usa ka lawas nga may daghang bahin apan usa ra ka lawas bisan kon nagkalainlain ang mga bahin niini. Sa samang pagkaagi, kitang tanan, mga Judio ug mga dili Judio, mga ulipon ug mga dili ulipon, gibunyagan diha sa usa ka lawas, pinaagi sa mao gihapong Espiritu, ug gipainom kitang tanan sa usa ka Espiritu.
ANG PULONG SA GINOO.
SALAMAT SA DIOS.
ALELUYA
T. Aleluya.
Umari ka, O Espiritu Santo. Pun-a sa kalayo sa imong gugma ang mga kasingkasing sa imong mga alagad.
T. Aleluya.
KINUTLO GIKAN SA EBANGHELYO SUMALA NI SAN JUAN (Jn.20: 19-23)
Sa pagkagabii na niadtong Dominggoha, nagtigom ang mga tinun-an sulod sa lawak ug gitrangkahan nila ang pultahan kay nahadlok man sila sa mga kadagkoan sa mga Judio. Unya mitungha si Jesus sa taliwala nila ug miingon, “Mainyo unta ang kalinaw.” Human siya makasulti niini, iyang gipakita kanila ang iyang mga kamut ug ang iyang kilid. Nalipay pag-ayo ang mga tinun-an sa ilang pagkakita sa Ginoo. Unya si Jesus miingon kanila pag-usab, “Mainyo unta ang kalinaw. Ingon nga gipadala ako sa Amahan, ako usab nagpadala kaninyo.” Gisulti niya kini ug unya gihuypan niya sila ug giingnan, “Dawata ninyo ang Espiritu Santo. Kon pasayluon ninyo ang mga sala sa mga tawo, gipasaylo kini; kon ang ilang mga sala dili ninyo pasayluon, dili usab kini pasayluon.”
ANG EBANGHELYO SA GINOO.
DAYGON IKAW, O CRISTO.
