https://www.facebook.com/1223838941033272/

Kaabag Ni Kristong Hari, J. Gonzales Avenue, Tagum City (2026)

07/09/2026

septembre 8, 2026
ADLAW NGA NATAWHAN NI SANTA MARIA NGA BIRHEN
Piyesta

Mga igsoon, kon magsaulog kita og birthday, kasagaran atong pangutan-on: Pila na imong edad? Asa ang handa? Unsa ang regalo? Apan sa adlawng natawhan ni Maria, lahi ang pangutana: Ngano nga gihatag sa Dios si Maria ngadto sa kalibotan?
Sa Ebanghelyo, taas kaayo ang talaan sa mga kaliwatan ni Jesus. Daghang mga ngalan nga lisod litokon ug daw walay kalabotan sa atong kinabuhi. Apan usahay ang kaliwatan dili man gani nato basahon; diretso na ta sa mas sayon nga bahin. Apan walay pulong sa Ebanghelyo nga walay kahulugan.
Ang matag ngalan nag-ingon: Ang Dios wala mangluwas kanato gikan sa layo; misulod Siya sa atong kasaysayan.

1. Ang Dios naglihok bisan sa gubot nga kasaysayan
Ang kagikan ni Jesus dili puro santos ug matarong. Adunay hari nga maayo, apan adunay usab daotan; adunay matinumanon, apan adunay malapason; adunay mga kadaugan, apan adunay mga kapakyasan, pagluib ug kaulaw.
Kon kita pa ang mosulat sa kaliwatan sa Manluluwas, tingali atong tangtangon ang mga tawong adunay bati nga rekord. Gusto nato nga limpyo ang tanan. Apan wala sila tangtanga sa Dios.
Ngano? Kay ang kaluwasan dili sugilanon sa kahingpit sa tawo, kondili sugilanon sa pagkamatinumanon sa Dios.
Basin adunay bahin sa kasaysayan sa atong pamilya nga dili nato gustong hisgotan—panag-away, pagkabungkag sa relasyon, bisyo, pagbudhi, kapakyasan, o dugay nang kasakit. Basin kita mismo adunay kagahapon nga gusto natong kalimtan.
Ang Ebanghelyo nag-ingon: Dili kinahanglan tangtangon sa Dios ang imong kagahapon aron makahimo Siya og bag-ong kaugmaon. Ang samad mahimong agianan sa grasya. Ang kapakyasan mahimong sinugdanan sa pagkakabig. Ang gubot nga kasaysayan mahimong kasaysayan sa kaluwasan kon atong itugyan ngadto Kaniya.
Wala giila sa Dios ang sala nga maayo. Apan walay sala, kasakit, o kapakyasan nga labaw pa sa Iyang gahom sa pagtubos.

2. Ang pagkatawo ni Maria mao ang hilom nga kaadlawon sa kaluwasan
Walay dakong kasaba sa pagkatawo ni Maria. Walay trumpeta, parada, o pahibalo gikan sa palasyo. Usa lamang ka batang babaye ang natawo sa usa ka ordinaryong pamilya. Apan ang langit nasayod nga pinaagi kaniya, nagkaduol na ang Manluluwas.
Sama kini sa kaadlawon. Sa dili pa makita ang adlaw, hinay-hinay nga mosidlak ang kahayag. Dili pa hayag ang tanan, apan nahibalo kita nga humana ang kagabhion.
Si Cristo mao ang Adlaw; si Maria mao ang kaadlawon nga nagpahibalo nga duol na ang Kahayag.
Kini importante alang kanato kay usahay gusto nato nga dako ug makita dayon ang buhat sa Dios. Mangayo kita og klarong milagro, dali nga tubag, o kalit nga kausaban. Apan kasagaran ang Dios magsugod sa gamay ug hilom:
• usa ka pag-ampo nga walay nakakita;
• usa ka pagpasaylo nga lisod ihatag;
• usa ka tawo nga mipili nga magmatinud-anon;
• usa ka inahan nga walay undang sa pag-ampo alang sa iyang anak;
• usa ka anak nga mibalik sa Dios;
• usa ka gamay nga “oo” ngadto sa husto nga buhat.
Ayaw tamaya ang gagmayng sinugdanan. Ang pagkatawo ni Maria nagtudlo nga ang pinakadakong buhat sa Dios kasagaran magsugod nga hilom, yano, ug dili dayon mailhan.

3. Si Maria gihatag aron si Emmanuel mahimong kauban nato
Sa kataposan sa Ebanghelyo, giingon: “Pagatawgon siya og Emmanuel,” nga nagpasabot, “Ang Dios uban kanato.”
Mao kini ang tumong sa pagpili kang Maria. Wala siya gipili aron siya lamang ang dayegon, kondili aron pinaagi kaniya si Jesus moabot kanato. Ang tanang bahin sa kinabuhi ni Maria nagatudlo ngadto kang Cristo.
Ang tinuod nga debosyon kang Maria dili mohunong kang Maria. Siya kanunay nag-ingon: “Buhata ninyo ang tanan nga iyang isulti kaninyo.” Kon atong gihigugma si Maria, kinahanglan mas moduol kita kang Jesus. Kon atong gipasidunggan si Maria, kinahanglan makita usab sa atong kinabuhi ang iyang pagpaubos, kaligdong, pagtuo ug pagsunod.
Apan ang Emmanuel dili lamang ngalan ni Jesus. Kini saad nga ang Dios anaa uban kanato:
• sa kalipay ug sa kasubo;
• sa kahimsog ug sa balatian;
• sa malinawon ug sa gubot nga pamilya;
• sa tubag ug bisan sa kahilom;
• sa atong pagkahugno ug pagbangon;
• ug bisan sa kamatayon.
Dili ang presensya sa Dios nagpasabot nga wala nay problema. Nagpasabot kini nga wala na kitay problema nga atubangon nga nag-inusara.

4. Ang atong “oo” mahimong sinugdanan sa kaluwasan sa uban
Wala pa mahibaloi sa batang Maria ang misyon nga naghulat kaniya. Apan ang Dios adunay plano alang sa iyang kinabuhi. Sa takdang panahon, iyang gisugat ang plano sa Dios pinaagi sa iyang fiat: “Matuman unta kanako sumala sa imong pulong.”
Dili sayon ang iyang “oo.” Kini adunay risgo sa kaulaw, pagsalikway, kasakit ug espada nga motuhop sa iyang kasingkasing. Busa ang “oo” ni Maria dili huyang nga pagtugot; kini maisog nga pagsalig.
Kita usab gitawag sa pag-ingon og “oo”:
• “Oo” sa pagpasaylo bisan nasakitan;
• “Oo” sa pag-alagad bisan walay pagdayeg;
• “Oo” sa kamatuoran bisan adunay mawala;
• “Oo” sa pagpadayon bisan gikapoy;
• “Oo” sa kabubut-on sa Dios bisan dili pa nato masabtan ang tanan.
Usahay maghunahuna kita nga personal lamang ang atong mga desisyon. Apan ang “oo” ni Maria nahimong panalangin sa tibuok kalibotan. Ingon man, ang atong pagkamatinumanon mahimong tubag sa pag-ampo sa uban. Ang imong “oo” ngadto sa Dios mahimong sinugdanan sa pag-ayo sa imong pamilya, paglaom sa usa ka tawo, ug kaluwasan sa usa ka kalag.

Panapos
Mga igsoon, sa pagkatawo sa Mahal nga Birhen Maria, atong hinumdoman ang tulo ka kamatuoran:
Una, ang Dios makahimo og kasaysayan sa kaluwasan gikan sa atong gubot nga kagahapon.
Ikaduha, ang dagkong buhat sa Dios kasagaran magsugod sa gagmay ug hilom nga paagi.
Ikatulo, ang usa ka matinumanong “oo” mahimong pultahan aron si Jesus mosulod sa kinabuhi sa uban.
Sa atong pagsaulog sa birthday ni Mama Mary, dili lamang kita moingon, “Happy Birthday, Mama Mary.” Mangayo usab kita kaniya:
Maria, Kaadlawon sa Kaluwasan, tudloi kami sa pagsalig sa Dios bisan dili pa klaro ang tanan. Himoa kaming sama kanimo—mapainubsanon sa pagdawat, maisog sa pag-ingon og “oo,” ug matinumanon sa pagdala kang Jesus ngadto sa uban. Amen.

ANG PAGBASA GIKAN SA BASAHON NI PROPETA MIQUEAS (Mi. 5: 1-4)

Katawhan sa Jerusalem, panagan kamo kay misulong na ang mga kaaway. Giataki na nila ang mga pangulo sa Israel. Miingon ang Ginoo, “Apan ikaw, O Bethlehem, Efrata, bisag ikaw ang labing gamay nga lungsod sa Juda, anha maggikan kanimo ang usa ka hari sa Israel kansang kagikan sukad pa gayod sa kakaraanan.” Busa itugyan sa Ginoo ang iyang katawhan sa ilang mga kaaway hangtod nga manganak na ang babayeng nagbati; unya ang tanan niyang kadugo nga gipamihag mamauli na sa ilang nasod. Inig-abot niya, harian niya ang iyang katawhan sa gahom nga gikan sa GINOO ug sa kahalangdon nga gikan gayod sa GINOONG DIOS. Magpuyo nga layo sa kadaot ang iyang katawhan, kay ang katawhan sa tibuok kalibutan moila man sa iyang pagkagamhanan, ug magdala siyag kalinaw.

ANG PULONG SA GINOO.
SALAMAT SA DIOS.

SALMO RESPONSORYO
(Ps. 13:4, 6)

T. Nagasadya ako pag-ayo diha sa Ginoo.

Bisan nagasalig ako sa imong kaluoy, pasadyaa ang akong kasingkasing diha sa imong kaluwasan.

T. Nagasadya ako…

Paawita ako mahitungod sa Ginoo, “Siya maayo gayod kanako”

T. Nagasadya ako…

ALELUYA
T. Aleluya.
Bulahan Ikaw, O Birhen Maria angayan ikaw sa tanang pagdayeg, diha kanimo nagagikan ang katarong, si Cristo ang Ginoo.
T. Aleluya.

ctto Hala Ang Kabaw

06/09/2026

Septembre 7, 2026 – Lunes

Sa Ebanghelyo, adunay tawo nga paralisado ang tuo niyang kamot. Apan imbis malipay nga maayo siya ni Jesus, ang mga Pariseo nangita hinuon og ikasumbong batok Kaniya tungod kay adlaw kadto sa Igpapahulay.

Gipakita niini nga posible diay nga relihiyoso ang usa ka tawo, apan sirado gihapon ang kasingkasing. Mas importante pa alang sa mga Pariseo ang pagtuman sa ilang interpretasyon sa balaod kaysa pagluwas sa tawo nga nagaantos.

Miingon si Jesus sa tawo: “Ituy-od ang imong kamot.” Tingali naulaw siya sa iyang kapansanan ug dugay na niya kining gitago. Apan ang parte sa iyang kinabuhi nga iyang ikaulaw mao usab ang bahin nga gihikap ug giayo sa Ginoo.

Ingon usab kita adunay “paralisadong kamot”—mga bahin sa atong kinabuhi nga dili na makahimo og maayo:
• kamot nga dili na motabang;
• kasingkasing nga dili na mopasaylo;
• baba nga dali mosaway apan lisod modasig;
• pagtuo nga aktibo sa ritwal apan walay kalooy sa isigkatawo.
Gitawag kita ni Jesus nga ituy-od ngadto Kaniya ang atong kahuyang. Dili nato kinahanglan tagoan ang atong samad, kasakit ug kapakyasan. Ang atong gitago tungod sa kaulaw mahimong dapit diin ipadayag sa Dios ang Iyang gahum.

Ang tinuod nga pagsimba dili lamang makita sa atong pagtuman sa mga lagda, kondili sa atong pagkaandam sa pagbuhat og maayo ug pagluwas sa kinabuhi. Ang balaod sa Dios dili babag sa gugma; kini dalan ngadto sa gugma.
Pangutana sa pamalandong: Aduna bay tawo nga kinahanglan nakong kab-uton sa akong kamot—aron tabangan, pasayloon o dasigon?

Pag-ampo:
Ginoong Jesus, ayuha ang mga bahin sa akong kinabuhi nga naparalisar tungod sa kasakit, garbo ug kahadlok. Tudloi ako sa paggamit sa akong mga kamot, pulong ug kinabuhi sa pagbuhat og maayo. Amen.

ANG PAGBASA GIKAN SA UNANG SULAT NI SAN PABLO NGADTO SA TAGA-CORINTO (1 Cor. 5:1-8)

Gidungog na nga may nakighilawas diha kaninyo, ug hilabihan kini kangil-ad nga bisan gani ang mga pagano wala makabuhat sa ingon; kay gisuginlan ako nga may usa ka tawo nga nakigpuyo sa iyang ina-ina. Unya nagpagarbo hinuon kamo! Angay unta nga masubo kamo ug papahawaon sa inyong pundok ang nakabuhat niini. Alang kanako, bisan tuod layo ako kaninyo, kauban gihapon ako ninyo diha sa espiritu; ug sa ngalan sa atong Ginoong Jesus, gihukman ko na ang naghimo niining mangil-ad nga butang, sama ra nga uban ako kaninyo. Sa inyong pagtigom, nakigtagbo ako kaninyo diha sa espiritu pinaagi sa gahum sa atong Ginoong Jesus nga nakig-uban kanato. Itugyan kining tawhana kang Satanas aron laglagon ang iyang lawas, ug ang iyang espiritu maluwas unya sa pagbalik sa Ginoo.
Dili maayo nga kamo magpagarbo! Nasayod kamo sa giingon, “Ang gagmay’ng patubo makapatubo sa tibuok minasa.” Kinahanglan nga inyong isaIikway ang daang patubo sa sala aron maputli gayod kamo. Unya mahisama kamo sa bag-ong minasa nga walay patubo, ingon sa akong nahibaw-an nga kamo mao gayod. Kay si Cristo, ang nating karnero sa Pangilin sa Pagsaylo, gikahalad na. Busa saulogon ta ang kombira sa walay paggamit sa pan nga sinambogan sa daang patubo nga mao ang patubo sa sala ug kalaw-ayan, kondili sa pan nga walay patubo, ang pan sa kaputli ug sa kamatuoran.

ANG PULONG SA GINO
SALAMAT SA DIOS.

SALMO RESPONSORYO
(Ps. 5:5-6, 7, 12)

T. Unahi ako diha sa imong katarong, Ginoo.

Kay ikaw, O Dios dili malipay diha sa kadautan; walay tawong dautan nga magpabilin diha kanimo; dili unta mobarog ang mapahitas-on diha sa imong atubangan. Gidumtan mo ang tanang nagabuhat og dautan.

T. Unahi ako…

Gilaglag mo ang tanan nga nagasulti og bakak; ang mamumuno ug ang limbongan gikasilagan sa Ginoo.

T. Unahi ako…

Apan ang tanan nga nagadangop kanimo maglipay unta ug magsadya sa kahangturan. Panalipdi sila, aron ikaw mahimong kalipay kanila nga nahigugma sa imong ngalan.

T. Unahi ako…

ALELUYA
T. Aleluya.
Abliha ang akong mga mata, O Ginoo, aron makakita ako sa mga katingalahan sa imong balaod.
T. Aleluya.

ctto Hala Ang Kabaw

06/09/2026

September 6, 2026- Domingo
IKAKAWHAAN UG TULO NGA DOMINGO SA TUIG
Color: Green

Adunay bana nga mibalik gikan sa simbahan. Gipangutana siya sa iyang asawa:
“Unsa man ang wali ni Father?”
Mitubag ang bana: “Bahin sa pagtul-id sa isigkatawo.”
Miingon dayon ang asawa: “Maayo kaayo! Unsa may imong nakat-onan?”
Mitubag ang bana: “Giingnan mi ni Father nga kon adunay sayop ang usa ka tawo, storyahon siya nga kamo rang duha.”
Nalipay ang asawa: “Maayo! Kinsa man imong unang storyahon?”
Mitubag ang bana: “Ikaw unta, pero basin mas maayo nga magdala kog duha ka saksi!”
Usahay, ganahan kaayo kitang motul-id sa uban, apan dili kita andam nga kita usab tul-iron. Mas sayon ang pagtan-aw sa sayop sa uban kaysa pag-ila sa atong kaugalingong sayop.
Apan ang mensahe sa mga pagbasa karon dili lamang bahin sa pagtul-id. Kini mahitungod sa responsibilidad, gugma, ug panaghiusa.

Koneksyon sa Tulo ka Pagbasa
Sa unang pagbasa, gihimo sa Dios si propeta Ezekiel nga tigbantay sa katawhan. Kon adunay tawo nga naglakaw ngadto sa kadaot, obligasyon niya ang pagpahimangno. Ang dili pagpahimangno mahimong usa ka matang sa pagpasagad.

Sa ikaduhang pagbasa, gipatin-aw ni San Pablo nga ang tanan natong obligasyon matuman pinaagi sa usa ka sugo:
“Higugmaa ang imong isigkatawo sama sa imong kaugalingon.”
Busa, ang pagtul-id dili angay maggikan sa kasuko, pagdumot o pagpaulaw. Kinahanglan kini maggikan sa gugma.

Sa Ebanghelyo, gihatagan kita ni Jesus og klarong pamaagi sa pag-atubang sa sayop:
1. Istoryaha una siya nga kamo rang duha.
2. Kon dili siya maminaw, pagdala og usa o duha ka saksi.
3. Kon magpadayon gihapon siya, ipaabot kini sa komunidad.
4. Ang tumong dili ang pagdaog sa argumento, kondili ang pagdaog pagbalik sa usa ka igsoon.

Mao kini ang koneksyon sa tulo ka pagbasa:
Ang Dios nagtawag kanato sa pagpahimangno, apan kinahanglan buhaton kini uban sa gugma, aron mapasig-uli ang panaghiusa.

Unang Pamalandong: Ang Tinuod nga Gugma Dili Magpakahilom Kon Adunay Kadaot
Adunay mga higayon nga moingon kita:
“Kinabuhi man na niya.”
“Dili na nako problema.”
“Pasagdan na lang kay basin masuko.”
Apan kon nakita nato nga ang usa ka tawo nagpadulong sa kadaot, ang gugma dili mahimong magpakahilom.
Pananglitan, kon ang ginikanan nakakita nga ang iyang anak nalulong sa sugal, bisyo o dili maayong barkada, dili gugma ang pagpasagad aron dili masuko ang anak. Ang tinuod nga gugma adunay kaisog sa pag-ingon:
“Anak, nasakitan ko sa imong gibuhat, dili tungod kay gusto kong kontrolon ka, kondili tungod kay nahigugma ko kanimo ug dili ko gustong madaot ang imong kinabuhi.”
Kon adunay higala nga nagluib sa iyang bana o asawa, dili tinuod nga pagkahigala ang pagtago ug pagdasig sa sayop. Ang tinuod nga higala dili lamang mokatawa uban kanato; siya usab adunay kaisog sa pagpahimangno kanato.
Apan hinumdumi: dili tanan nga pagpahilom kalinaw, ug dili tanan nga pagsulti gugma. Mahimong nagsulti kita, apan ang atong tuyo mao ang pagpanimalos, pagpakaulaw o pagpamatuod nga kita ang husto.
Sa dili pa motul-id, pangutan-a ang kaugalingon:
“Gusto ba nakong maluwas siya, o gusto lamang nakong mapildi siya?”

Ikaduhang Pamalandong: Istoryahi ang Tawo, Ayaw Istoryahi ang Tanang Tawo
Miingon si Jesus:
“Kon makasala batok kanimo ang imong igsoon, adtoa siya ug sultihi siya sa iyang sayop nga kamo rang duha.”
Klaro kaayo ang pamaagi ni Jesus: adto sa tawo, dili sa Facebook; pakigsulti kaniya, dili pagsulti bahin kaniya.
Apan usahay balihon nato ang proseso. Ang nakasala mao ang kataposang makadungog sa problema. Ang unang makadungog mao ang silingan, barkada, mga kauban sa trabaho ug social media.
Pananglitan, nasuko kita sa usa ka kauban sa GKK. Imbis nga duolon siya, mangita dayon kitag kakampi:
“Kabalo ba ka unsay iyang gibuhat nako?”
Dayon ang problema tali sa duha ka tawo mahimong problema sa tibuok komunidad. Ang gamay nga samad nahimong dakong pagkabahin.
Daghan unta sa atong panagbangi ang masulbad kon sundon lamang nato ang Ebanghelyo:
• Dili dayon mag-post.
• Dili dayon magpadungog-dungog.
• Dili dayon mangita og kakampi.
• Dili dayon maghimo og istorya.
• Duolon una ang tawo ug makigsulti nga adunay kalumo ug respeto.
Kon ang atong tuyo mao ang pag-ayo, pribado nato siyang duolon. Kon ang atong tuyo mao ang pagpakaulaw, ipahibalo nato sa tanan.
Ang pagpakigsulti nag-ayo; ang paglibak nagpadako sa samad.

Ikatulong Pamalandong: Ang Pagtul-id Kinahanglan Uban sa Pagpaubos
Sa dili pa kita motudlo sa sayop sa uban, kinahanglan una natong susihon ang atong kaugalingon.
Tingali husto ang atong gisulti, apan sayop ang atong tono.
Tingali tinuod ang atong reklamo, apan kulang kita sa pagpaminaw.
Tingali nasayop siya, apan tingali adunay bahin sa problema nga kita usab ang hinungdan.
Pananglitan, ang bana moreklamo:
“Dili na gyud ka maminaw nako!”
Apan basin ang iyang asawa dugay nang misulay pagsulti, wala lamang siya maminaw.
Ang lider moreklamo:
“Dili mosunod ang mga miyembro!”
Apan basin wala niya sila paminawa, pasabta o apila sa pagdesisyon.
Sa pagtul-id, dili kita moadto isip hukom nga walay sayop. Moadto kita isip igsoon nga nanginahanglan usab sa kaluoy sa Dios.
Ang maayo nga paagi mao ang pag-ingon:
“Nasakitan ko sa nahitabo. Mahimo ba kitang mag-istorya? Gusto kong masabtan ang imong bahin ug masulbad nato kini.”
Lahi kini sa:
“Sayop gyud ka! Ikaw ang hinungdan sa tanan!”
Ang unang pahayag nag-abli sa kasingkasing. Ang ikaduha nagpatindog og paril.

Ikaupat nga Pamalandong: Ang Katuyoan Mao ang Pagpasig-uli, Dili Pagpahawa
Miingon si Jesus:
“Kon maminaw siya kanimo, nabawi mo ang imong igsoon.”
Wala Siya moingon: “Napildi mo ang imong kontra.”
Miingon Siya: “Nabawi mo ang imong igsoon.”
Kini ang sukdanan sa Cristohanong pagtul-id: dili kon kinsa ang nidaog, kondili kon ang relasyon naayo ba.
Usahay sa panaglalis, mapamatud-an nato nga kita ang husto, apan mawala ang atong higala. Modaog kita sa argumento, apan mapildi ang relasyon.
Sa pamilya, adunay magtiayon nga dili na magtingogay tungod kay walay gustong mouna og sorry. Sa GKK o parokya, adunay mga miyembro nga dili na motambong tungod sa usa ka panagbangi nga wala matarong og atubang.
Ang pangutana dili lamang: “Kinsa ang nakasala?” Ang mas importante nga pangutana mao: “Unsaon nato pag-ayo ang relasyon?”
Ang pagpangayo og pasaylo dili pasabot nga ikaw lamang ang nasayop. Usahay nagpasabot kini nga mas importante kanimo ang relasyon kaysa imong garbo.

Hagit
Karong semanaha, mahimo natong buhaton ang mosunod:
1. Hunonga ang paglibak.
Kon adunay problema sa usa ka tawo, ayaw una kini isulti sa uban. Duola ang tawo nga hingtungdan.
2. Pag-ampo una sa dili pa motul-id.
Hangyoa ang Ginoo nga limpyohan ang imong tuyo ug hatagan ka og hustong mga pulong.
3. Pilia ang husto nga panahon ug lugar.
Ayaw siya tul-ira atubangan sa daghang tawo, ilabi na kon taas pa ang emosyon.
4. Paminawa usab ang iyang bahin.
Tingali adunay mga butang nga wala nato masabti.
5. Likayi ang pagpakaulaw sa social media.
Ang public post dili kasagaran makahatag og private healing.
6. Dawata usab ang pagtul-id.
Kon kita ang gipahimangnoan, ayaw dayon kasuko. Pangutan-a: “Aduna bay kamatuoran sa iyang gisulti?”
7. Pagkuha og usa ka lakang padulong sa pagpasig-uli.
Tawagi ang tawo nga dugay na nimong wala kastorya. Pag-ingon: “Mahimo ba kitang mag-istorya? Dili ko gusto nga magpabilin kitang ing-ani.”

Panapos
Mga igsoon, ang komunidad dili madaot tungod kay adunay mga tawo nga nasayop. Kitang tanan masayop. Ang komunidad madaot kon ang sayop tubagon pinaagi sa paglibak, garbo, pagdumot ug pagdumili sa pagpasaylo.
Ang tinuod nga Cristohanong komunidad dili komunidad sa mga hingpit nga tawo. Kini komunidad sa mga makasasala nga andam motul-id ug magpatul-id, mopasaylo ug mangayog pasaylo, ug magtinabangay sa pagbalik ngadto sa Ginoo.
Busa, kon kinahanglan kitang mosulti, mosulti kita uban sa gugma. Kon kinahanglan kitang maminaw, maminaw kita uban sa pagpaubos. Kon adunay samad, dili nato kini ipasundayag—atong tambalan. Kon adunay nahisalaag, dili nato siya hukman—atong tabangan sa pagpauli.
Kay ang tumong dili ang pag-ingon:
“Ako ang husto ug ikaw ang sayop.”
Kondili:
“Igsoon ta. Atong ayohon kini, kay dili ko gusto nga mawala ka.”

PASIUNA

Mga igsoon:
Unsay atong buhaton kon makasala ang atong igsoon? Igo ba lang kita sa pagsaway kaniya? O kaha piyongon nato ang atong mga mata ug moingon: "Magbalantay ba ako sa akong igsoon?" Ang daotan makaangin kanatong tanan. Ingon man usab ang tanang maayo. Sa Dios, ang matag tawo may bili, lakip ang makasasala. Gibuhat kita sa Dios nga may tulubagon sa usa'g usa. Ug buhaton nato kining atong responsibilidad ubos sa diwa sa gugma ug pagtahod. Kon makasala ang atong igsoon batok kanato, pasayloon ta siya. Kon makasala siya batok sa uban, tabangan ta siya nga makabarog pag-usab ug dili ta siya hukman ni isalikway. Dili ba mao man kini ang gibuhat sa Dios kanato? Manindog kita ug atong awiton ang pasiunang awit.

UNANG PAGBASA (Ez. 33: 7-9)
Gikan sa mga panagna ug mga kasinatian ni propeta Ezequiel, sa dihang napukan ang Jerusalem ug gibihag ang mga Israelita didto sa Babilonia. Hangtod karon ang mensahe ni Ezequiel nakasentro sa mga sala sa katawhan sa Juda ug sa silot sa Dioskanila. Karon nga ang katawhan anaa sa mangil-ad nga kahimtang, paglaom ug kadasig ang gipaabot sa propeta kanila. Atong paminawon ang unang pagbasa.

KINUTLO GIKAN SA BASAHON NI PROPETA EZEQUIEL (Ez. 33:7-9)

"Busa ikaw, O tawo, gipili ko ingon nga magbalantay sa nasud sa Israel. Ang ipasulti ko kanimo maoy imong isulti kanila agig pasidaan. Kon moingon ako sa usa ka tawong dautan, 'Mamatay ka gayod,' ug unya wala mo siya pasidan-i sa pagbiya sa dautan niyang buhat, mamatay siya nga makasasala, apan ikaw ang paninglan ko sa iyang kamatayon. Apan kon gipasidan-an mo ang maka-sasala sa pagbiya sa dautan niyang binuhatan apan wala niya kini tagda, mamatay siya nga makasasala apan wala kay tulubagon."

ANG PULONG SA GINOO.
SALAMAT SA DIOS.

SALMO RESPONSORYO

Ps. 95:1-2, 6-7, 8-9

T. Kon karon makadungog kamo sa iyang tingog, ayaw patig-aha ang inyong mga kasingkasing.

Umari kamo, awitan ta nga malipayon ang Ginoo; isang-yaw ta ang bato sa atong kaluwasan. Yukboan ta siya uban sa pasalamat; awitan ta siya nga malipayon ug mga salmo.

T. Kon karon...

Umari kamo, manghapa kita sa pagsimba; mangluhod kita atubangan sa Ginoo nga nagbuhat kanato. Kay siya man ang atong Dios, ug kita ang katawhan nga iyang gidumala, Ang panon nga iyang gitultolan.

T. Kon karon...

Hinaut unta nga karon ma-mati kamo sa iyang tingog; "ayaw tig-aha ang inyong mga kasingkasing sama didto sa Meriba.

Sama sa adlaw ni Massah didto sa kamingawan diin gisulayan ako sa inyong

mga katigulangan. Ila akong gisuta bisan nakakita sila sa akong mga buhat.

T. Kon karon...

IKADUHANG PAGBASA (Rom 13:8-10)
Gugma ang nagsumada sa tanang mga sugo. Paghigugmaay kamo sa usa'g usa sama nga nahigugma kamo sa inyong kaugalingon. Kon buhaton ninyo kini, natuman ninyo ang balaod. Kay ang gugma mao man ang sukaranan ug diwa sa tanang mga sugo. Atong paminawon ang ikaduhang pagbasa.

KINUTLO GIKAN SA SULAT NI SAN PABLO NGADTO SA TAGA-ROMA (Rom 13:8-10)

Ayaw pagapos sa utang gawas sa utang sa paghigugmaay. Ang nahigugma sa iyang isigkatawo nakatuman sa Balaod. Ang kasugoan nga nag-ingon, "Ayaw panapaw, ayaw pagpatay, ayaw pangawat, ayaw kaibog," kining tanan ug uban pa, nalangkob sa usa ka sugo, "Higugmaa ang imong isigkatawo sama sa imong kaugalingon." Ang nahigugma sa iyang isigkatawo dili gayod makaako paghimog dautan sa iyang isigkatawo. Busa ang paghigugma mao ang katumanan sa Balaod.

ANG PULONG SA GINOO.
SALAMAT SA DIOS.
BERSO SA DILI PA ANG EBANGHELYO

T. Aleluya
Dalaygon ikaw, Amahan, Ginoo sa langit ug yuta; kay imong gipadayag sa mga gagmay ang mga misteryo sa gingharian.
T. Aleluya.

ctto Hala Ang Kabaw

04/09/2026

SEPTEMBER 5, 2026- Sabado
IKAKAWHAAN UG DUHA NGA SEMABA SA TUIG

Sa Ebanghelyo, gigutom ang mga tinun-an, busa namupo sila og uhay ug mikaon. Apan imbis nga makita sa mga Pariseo ang ilang kagutom, ang ilang nakita mao ang ilang “kalapasan.”
Mao usab kini usahay ang mahitabo kanato: makita nato ang sayop, apan dili nato makita ang samad; makita nato ang binuhatan, apan dili nato masabtan ang kahimtang sa tawo. Dali kitang mohukom tungod kay ang atong mga mata nagtan-aw lamang sa gawas, samtang ang Dios nagtan-aw sa sulod sa kasingkasing.

1. Ang balaod walay pulos kon mawala ang tawo
Importante ang mga lagda ug balaod kay naghatag kini og kahapsay ug direksiyon. Apan dili kini ang katapusang tumong. Ang tumong sa matag balaod sa Dios mao ang pagpanalipod sa kinabuhi, dignidad ug relasyon sa tawo ngadto Kaniya ug sa isigkatawo.
Ang problema sa mga Pariseo dili kay nahigugma sila sa balaod, kondili kay mas gihigugma nila ang balaod kaysa tawo nga gipanalipdan unta niini. Nakita nila ang adlaw nga Igpapahulay, apan wala nila makita ang gigutom nga tawo.
Mahimo kitang sakto sumala sa balaod apan sayop diha sa gugma. Mahimo kitang modaog sa argumento apan mapildi sa pagkatawhanon.

2. Ang paghukom usahay usa ka paagi sa pagtago sa atong kaugalingong kahuyang
Sayon ang pagpangita og sayop sa uban kay dili na nato kinahanglan tan-awon ang atong kaugalingong kakulang. Ang mga Pariseo nagtan-aw sa kamot sa mga tinun-an nga namupo og uhay, apan wala nila tan-awa ang ilang kaugalingong kasingkasing nga kulang sa kalooy.
Sa dili pa kita mosaway, pangutan-on nato ang kaugalingon:
Nasayod ba ko sa iyang tibuok istorya? Nasabtan ba nako ang iyang giantos? Ang akong pulong ba makatabang sa iyang pagbangon o modugang lamang sa iyang kasakit?
Dili pasabot nga pasagdan nato ang sayop. Apan ang pagtul-id nga gikan sa gugma nagtinguha sa pagluwas; ang paghukom nga gikan sa garbo nagtinguha lamang sa pagpaubos.

3. Si Jesus mao ang Ginoo sa atong panahon ug kinabuhi
Miingon si Jesus: “Ang Anak sa Tawo mao ang Ginoo sa adlaw nga Igpapahulay.” Kini nagpasabot nga ang sentro sa atong pagtuo dili lamang mga lagda, iskedyul o tradisyon—kondili si Jesus mismo.
Posible nga kompleto kita sa relihiyosong katungdanan apan halayo ang kasingkasing gikan Kaniya. Mahimong magsimba kita apan dili makapasaylo; mag-ampo apan kusog manglibak; mosunod sa ritwal apan magpabiling walay pagtagad sa gigutom ug nag-antos.
Ang tinuod nga pagsimba dili lamang pagpahulay gikan sa trabaho. Kini mao ang pagpahulay diha sa presensya sa Dios aron mapahiuli ang atong kasingkasing ug mahimo kitang tinubdan sa pagpahiuli sa uban.

Hagit
Ayaw lamang pangutan-a, “Nakasunod ba ko sa balaod?” Pangutan-a usab:
“Pinaagi sa akong gibuhat, adunay tawo nga nabusog, nahupay, nadawat ug napaduol ngadto sa Dios?”
Kay sa kataposan, ang balaod nga walay gugma mahimong bato nga atong ilabay sa uban. Apan ang balaod nga gipuno sa kalooy mahimong kamot sa Dios nga mobayaw sa nahulog.

KINUTLO GIKAN SA UNANG SULAT NI SAN PABLO NGADTO SA TAGA-CORINTO (1 Cor. 4:9-15)

Sa akong hunahuna, mao rag ang Dios nagbutang kanamong mga apostoles sa labing ubos nga dapit. Sama kami sa mga tawo nga gihukman nga patyon atubangan sa katawhan-usa ka talan-awon alang sa tanang anghel ug sa tanang tawo. Kay tungod kang Cristo kami mga buangbuang, apan maalamon kamo diha kang Cristo. Huyang kami, apan kamo lig-on. Tinamay kami apan kamo pinasidunggan. Hangtud gayod niining mga taknaa, gigutom ug giuhaw kami, nagkagidlay, gipamunalan, ug nadiindiin kami; apan bisan pa niini, naningkamut gayod kami pagtrabaho aron mabuhi. Kon may motunglo kanamo, manalangin kami; kon lutoson, magpailob kami; kon pakaulawan, tubagon namo sa malumong mga pulong. Hangtud karon nahisama kami sa basura nga gisalibay diha sa yuta.

Gisulat ko kini dili aron sa pagpakaulaw kaninyo, kondili aron sa pagtudlo kaninyo ingon nga pinangga kong mga anak. Kay bisan pa kon duna kamoy napulo ka libo ka magtutudlo diha kang Cristo, usa lamang ang inyong Amahan. Kay sa inyong kinabuhi diha kang

Cristo Jesus, nahimo ako nga inyong Amahan pinaagi sa akong pagdala sa Maayong Balita nganha kaninyo.

ANG PULONG SA GINOO.
SALAMAT SA DIOS.

SALMO RESPONSORYO
Ps. 145:17-18, 19-20, 21

T. Haduol ang Ginoo sa tanan nga nagasangpit kaniya.

Ang Ginoo matarong diha sa tanan niyang mga paagi, ug balaan diha sa tanan niyang mga buhat. Ang Ginoo haduol sa tanan nga nagasangpit kaniya, sa tanan nga nagasangpit kaniya diha sa kamatuoran.

T. Haduol ang Ginoo...

Gituman niya ang gipangandoy nila nga mahadlokon kaniya, gidungog niya ang ilang
singgit ug giluwas sila. Ang Ginoo nagaamping sa tanan nga nahigugma kaniya apan ang tanang dautan iyang laglagon.

T. Haduol ang Ginoo...

Magbungat unta ang akong ba-ba sa kadayganan sa Ginoo, ug ang tanang mga tawo magdayeg sa iyang balaang ngalan sa kahangturan.

T. Haduol ang Ginoo...

BERSO SA DILI PA ANG EBANGHELYO

T: Aleluya.
Ang tanan nimong mga balaod malig-on, O Ginoo, gipabarog hangtud sa kahangturan.
T: Alehiya.

ctto Hala Ang Kabaw

03/09/2026

SEPTEMBER 4, 2026- Biyernes
IKAKAWHAAN UG DUHA NGA SEMANA SA TUIG

Sa Ebanghelyo, gipangutana si Jesus nganong ang mga tinun-an ni Juan ug mga Pariseo kanunay magpuasa, apan ang Iyang mga tinun-an mokaon ug moinom. Gitubag sila ni Jesus pinaagi sa hulagway sa pamanhonon, bag-ong panapton, ug bag-ong bino.
Ang sentro sa mensahe: dili mahimong dawaton ang kabag-ohan nga dala ni Cristo kon magpabilin kitang hugot nga nagkupot sa daang paagi sa panghunahuna ug pagkinabuhi.

1. Usahay gusto nato si Jesus, apan dili nato gusto nga usbon Niya kita.
Ganahan kita sa panalangin sa Ginoo, apan dili sa conversion nga Iyang gipangayo. Ganahan kita nga motambong og Misa, mag-ampo ug magserbisyo, apan basin magpabilin gihapon ang kasuko, garbo, pagdumot, paglibak o dili pagpasaylo.
Mao kini ang problema sa bag-ong bino nga gisulod sa daang sudlanan: gusto nato ang bag-ong grasya, apan dili nato gustong biyaan ang daang kinaiya.

2. Ang pagtuo dili lamang “pagdugang” kang Jesus sa atong kinabuhi.
Ang bag-ong panapton dili lang itapak sa daang bisti. Si Jesus dili lang dugang sa atong schedule—Misa sa Domingo, gamayng pag-ampo, dayon balik sa naandan.
Ang tinuod nga pagkakristohanon mao ang pagtugot kang Cristo nga bag-ohon ang tibuok kinabuhi: unsaon nato pagtan-aw sa uban, pagdumala sa kwarta, paggamit sa social media, pag-atubang sa kaaway, pagserbisyo, ug pagpasaylo.

3. Aron makadawat og bag-ong bino, kinahanglan mahimong bag-ong sudlanan.
Matag adlaw adunay bag-ong grasya ang Dios. Apan usahay ang problema dili kay walay grasya; puno lang kaayo ang atong kasingkasing sa daan nga mga butang.
Puno sa kasakit nga dili buhian.
Puno sa garbo nga dili mopasaylo.
Puno sa “mao naman gyud ko ani.”
Puno sa “mao naman ni among naandan.”

Apan ang Ebanghelyo nag-ingon: Ayaw himoa nga prisohan ang imong kagahapon. Ang grasya sa Dios kanunay adunay gahum sa paghimo kanimo nga bag-o.

Busa ang pangutana karong adlawa dili lamang, “Unsa may bag-ong ihatag sa Ginoo kanako?” Mas importante tingali:
“Ginoo, unsa man ang daan sulod kanako nga kinahanglan nakong buhian aron adunay luna alang sa Imong bag-ong grasya?”

KINUTLO GIKAN SA UNANG SULAT NI SAN PABLO NGADTO SA TAGA-CORINTO (1 Cor. 4:1-5)

Isipa kami nga mga sulugoon ni Cristo nga gitugyanan sa mga tinagong kamatuoran sa Dios. Ug kinahanglan sa usa ka tinugyanan nga magbinuotan siya sa iyang agalon. Wala ako mabalaka nga hukman ako ninyo o sa bisan unsang tawhanong hukmanan, kay wala man gani ako maghukom sa akong kaugalingon. Tin-aw kaayo ang akong konsensiya, apan wala kini magpasabot nga wala gayod akoy sala. Ang Ginoo ray maghukom kanako. Busa ayaw kamo paghukom kang bisan kinsa sa dili pa moabot ang hustong higayon. Ang katapusang paghukom unya na himoa sa pag-abot sa Ginoo, kay ipadayag niya ang ngil-ad nga mga tinagoan ug ibutyag ang gililong nga mga tinguha sa kasingkasing sa tawo. Niadtong adlawa magdawat ang tagsatagsa sa pagdayeg nga angay kaniya gikan sa Dios.

ANG PULONG SA GINOO.
SALAMAT SA DIOS.

SALMO RESPONSORYO
Ps. 37.3-4, 5-6, 27-28, 39-40

T. Ang kaluwasan sa matarong naggikan sa Ginoo.

Salig sa Ginoo ug pagbuhat sa maayo, aron magpuyo ka diha sa yuta ug maghimulos sa kalinaw. Paglipay diha sa Ginoo, ug hatagan ikaw niya sa mga gipangandoy sa imong kasingkasing.

T. Ang kaluwasan...

Itugyan sa Ginoo ang imong dalan; salig kaniya, ug mobuhat siya. Padan-agon niya ang katarong alang kanimo sama sa kahayag, masiga sama sa udtong tutok ang imong katarungan.

T. Ang kaluwasan...

Talikdi ang dautan ug buhata ang maayo, aron molungtad ka sa kahangturan; Kay ang Ginoo mahigugmaon sa matarong, ug dili mobiya sa iyang buotan nga mga alagad Ang mga malapason gilaglag ug ang kaliwat sa mga dautan giputol.

T. Ang kaluwasan...

Ang kaluwasan sa matarong naggikan sa Ginoo; siya ang ilang dalangpanan sa panahon sa kagul-anan. Ug ang Ginoo nagatabang kanila ug nagluwas kanila; gilikay niya sila sa dautan ug giluwas sila kay midangop man sila kaniya.

T. Ang kaluwasan...

BERSO SA DILI PA ANG EBANGHELYO
T: Aleluya.
Kon karon makadungog kamo sa iyang tingog, ayaw patig-aha ang inyong mga kasingkasing.
T: Aleluya.

ctto Hala Ang Kabaw

Kaabag Ni Kristong Hari

07/09/2026

06/09/2026

06/09/2026

04/09/2026

03/09/2026

Address

Website

Alerts

Shortcuts

Share

Category

Listing takedown request