13/06/2026
Bishop Mylo: Ang Pusong Nagmamalasakit, Naghahanap, at Nakikinig ang Pag-asa ng Sugatang Daigdig
PASIG CITY, June 13, 2026 — Pinangunahan ni Most Rev. Mylo Hubert C. Vergara, D.D., Obispo ng Pasig, ang pagdiriwang ng Banal na Misa sa ika-20 Pasig BEC Post Pentecost Assembly na ginanap sa Sta. Clara de Montefalco Parish noong Hunyo 13, 2026. Dinaluhan ito ng mga pari, seminarista, mga taong nakatalaga sa buhay-konsagrado, at mga kasapi ng iba't ibang Basic Ecclesial Communities (BECs) mula sa buong Diyosesis ng Pasig.
Kasama ni Bishop Vergara sa pagdiriwang sina Rev. Fr. Darwin Calderon, Parish Priest ng Sta. Clara de Montefalco Parish; Rev. Fr. Lito Jopson, Pasig BEC Priest Coordinator, Rev. Fr. John Glen Avila, Assistant BEC Priest Coordinator ng Diyosesis; Rev. Jomari Agno; mga seminarista; at mga relihiyoso at relihiyosa.
Ang taong ito ay nagmamarka ng ika-20 taon ng Pasig BEC Post Pentecost Assembly na may temang “BEC as Locus of Synodality: Hope for a Wounded World.”
Sa kanyang homiliya, inugnay ni Bishop Vergara ang tema ng pagtitipon sa kasalukuyang kalagayan ng mundo na patuloy na nasusugatan ng digmaan, hidwaan, at pagkakahati-hati.
“Patuloy ang digmaan sa Ukraine at sa Gitnang Silangan. Maraming tao ang nagdurusa at nasasaktan,” ani ng Obispo. “Ngunit hindi lamang sa pandaigdigang antas umiiral ang mga sugat. Maging sa ating mga pamilya, pamayanan, at maging sa puso ng bawat tao ay may mga sugat na dulot ng alitan, politika, at pagkakawatak-watak.”
Nagkataong ipinagdiriwang din ng Simbahan sa araw na iyon ang Memorial ng Kalinis-linisang Puso ni Maria. Dahil dito, hinikayat ni Bishop Vergara ang mga BEC workers na tularan ang puso ng Mahal na Birhen sa kanilang paglilingkod sa mga kawan at pamayanan.
Pusong Nag-aalala
Binigyang-diin ng Obispo ang unang katangian ng puso ni Maria: ang pusong nag-aalala.
Tinukoy niya ang tagpo sa Ebanghelyo kung saan nabalisa sina Maria at Jose nang mawala si Hesus sa Jerusalem. Ayon sa Obispo, ang pag-aalalang ito ay hindi lamang bunga ng pagmamahal kundi tanda rin ng malalim na malasakit.
Hinamon niya ang mga lider ng BEC na suriin ang kanilang konsensya: “Nag-aalala pa ba tayo sa ating kapwa?”
Binalaan niya ang mga mananampalataya laban sa tinatawag na “globalization of indifference” o pagiging manhid sa paghihirap ng iba. Ang tunay na lingkod ng BEC, aniya, ay marunong makinig sa hinaing ng mga miyembro ng kawan at may malasakit sa mga mahihirap, hikahos, at mga taong madalas na napapabayaan sa pamayanan.
Pusong Naghahanap
Ikalawang katangian ng puso ni Maria ang pagiging pusong naghahanap.
Ipinaalala ni Bishop Vergara na bumalik sina Maria at Jose upang hanapin ang nawawalang si Hesus. Ang paghahanap, aniya, ay nangangailangan ng pagkukusa, sakripisyo, at pagtitiyaga.
“Ganyan din ang tungkulin ng ating mga BEC workers,” aniya. “Hindi tayo dapat makuntento sa mga nasa loob na ng Simbahan. Kailangan nating hanapin ang mga napalayo sa pananampalataya, ang mga kulang sa kaalaman sa Diyos, at ang mga nangangailangan ng pag-akay pabalik sa buhay ng Simbahan.”
Hinimok niya ang mga lider na maging masigasig sa pag-anyaya sa mga tao na makilahok sa mga kawan at maliliit na pamayanang Kristiyano upang higit silang mapalapit kay Kristo.
Pusong Nakikinig
Pangatlong katangian ng puso ni Maria ang pagiging pusong nakikinig.
Ipinaliwanag ng Obispo na ang pakikinig ay mahalagang bahagi ng synodality—ang sama-samang paglalakbay bilang Simbahan.
Tulad ni Maria na nagtanong at nakinig kay Hesus sa Templo, ang mga lingkod ng BEC ay tinatawagan ding makinig sa mga karanasan, kwento, at paghihirap ng mga tao.
“Kapag nakikinig tayo sa mga tao, natututo rin tayo,” ani Bishop Vergara. “Sa kanilang mga kwento at pagsubok, lumalalim ang ating pananampalataya at lumalawak ang ating pananaw sa buhay.”
Dagdag pa niya, ang mga taong marunong makinig ay tumatanggap ng biyaya at lakas mula sa Diyos upang magpatuloy sa kanilang paglilingkod sa kabila ng mga hamon.
Pag-asa para sa Sugatang Daigdig
Sa pagtatapos ng kanyang homiliya, binigyang-diin ni Bishop Vergara na ang pusong nagmamalasakit, naghahanap, at nakikinig ay maaaring maging instrumento ng paghilom sa mga sugat ng mundo.
“Sa tulong ng awa ng Diyos,” wika niya, “ang pusong nag-aalala, pusong naghahanap, at pusong nakikinig ang magiging daan upang muling mamuno ang Diyos sa ating mga pamayanan at magbigay ng pag-asa sa ating sugatang mundo.”
Ang ika-20 Pasig BEC Post Pentecost Assembly ay bahagi ng patuloy na pagsisikap ng Diyosesis ng Pasig na palakasin ang mga Basic Ecclesial Communities bilang mga sentro ng pakikinig, pakikibahagi, at misyon sa gitna ng mga hamon ng makabagong panahon./ Fr. Lito Jopson, Pasig Soccom
Mga Larawan nina: Veron Futalan Villanueva at Archie Rebosa Llamado
