29/04/2026
Ang Paggunita kay San Pio Quinto, Papa
Samantalang ang Santo Papa sa Roma ay nakikipanayam sa mga kardinal, bigla itong nagtungo sa bintana, tumingala sa langit at nagwika, "Hindi ngayon ang oras ng pagpupulong, tayo'y magpasalamat sa Diyos at nagtatagumpay ang mga hukbo!" Sa isang himala ng Diyos, napag-alaman ng Santo Papa ang maluwalhating pagwawagi ng mga Kristiyano laban sa mga Turko sa look ng Lepanto. Ito ang maningning na tagumpay ng Kristiyanismo laban sa Mahometanismo noong Oktubre 7, 1571 sa ilalim ng pamumuno ng Santo Papang si San Pio V. Siya ang nagtalaga ng kapistahan ng Mahal na Birhen ng Santo Rosaryo sa ika-7 ng Oktubre, bilang pasasalamat sa Diyos sa tagumpay ng Lepanto. Siya rin ang Santo Papang nagbigay sa atin ng Katesismo ng Tridentino, ng Brevario (dasalan ng mga pari) at ang Roman Missal.
Galing sa isang mahirap na angkan sa Bosco Marengo noong taong 1504, si Miguel Ghislieri ay naging obispo noong taong 1556 at kardinal noong 1558. Nang mamatay si Papa Pio IV, si Miguel ang nahalal na Santo Papa sa pangangasiwa ni San Carlos Borromeo at tinaglay ang pangalang Pio V--isang pangalang kilalang-kilala sa kasaysayan dahil sa pagsugpo niya sa maraming katiwalian sa Roma, sa Protestantismo at sa Mahometanismo. Ipinasunod ni San Pio V ang kapasyahan ng Kapulungan ng Tridentino tungo sa disiplina eklesiyastika, kabanalan ng mga alagad ng Diyos at pagpapatayo ng mga seminaryo.
Malaki ang tiniis ng santong ito, bunga ng kanyang panunungkulan bilang Santo Papa at ng kanyang sariling pagpapakasakit. "Dagdagan mo Panginoon, ang aking mga krus, ngunit dagdagan mo rin ang aking pagtitiis," hiling niya sa Diyos. Namatay si San Pio V noong Mayo 1, 1572.
San Pio Quinto, ipanalangin mo kami.
