24/02/2025
Ecumenical Council of Churches in Bohol (ECCB)
Iglesia Filipina Independiente | United Church of Christ in the Philippines | Apostolic Catholic Church
ANG OPISYAL NGA PAGPADAYAG SA ECCB PARA SA EDSA PEOPLE'S POWER
25 Pebrero 2025
*TAWAG SA HUSTISYA, PANAGHIUSA, UG PAGBAG-O*
"Ayaw kamo pagpahiuyon niining kalibutana, hinunoa, pagpabag-o kamo pinaagi sa kabag-ohan sa inyong hunahuna, aron inyo nga masuta kung unsa ang maayo, husto, ug hingpit nga kabubut-on sa Diyos."
— Roma 12:2
Pagpabilin nga buhi ang Espiritu sa EDSA: Usa ka Panawagan sa Katawhan sa Simbahan
Samtang atong gisaulog ang ika-39 nga anibersaryo sa EDSA People’s Power Revolution, atong hinumduman nga kini dili lamang usa ka panghitabo sa kasaysayan, kundi usa ka padayon nga panawagan sa hustisya, panaghiusa, ug pagbag-o sa atong katilingban. Sa usa ka kalibutan nga gipuno sa panagbangi, korapsyon, ug pagpanglupig sa kabus, ang panaghiusa sa katawhan sa Diyos mao ang tinud-anay nga suga nga naglamdag sa dalan padulong sa tinuod nga kagawasan.
Ang panaghiusa sa Iglesia Filipina Independiente (IFI), United Church of Christ in the Philippines (UCCP), ug Apostolic Catholic Church (ACC) sa lalawigan sa Bohol usa ka buhing pagpamatuod nga ang Kristohanong pagtuo dili lamang nagatungod sa denominasyon kundi naghiusa sa usa ka misyon: ang pagbarug alang sa katawhan, ang pakigbisog batok sa pag-abusar sa gahum, ug ang padayon nga pakig-uban sa mga kabus ug mga gi-pasagdan sa katilingban.
TAWAG SA MGA KATAWHAN SA SIMBAHAN
Kami isip usa ka Ecumenical Council sa Bohol, nagpakabana sa panghitabo sa atong nasud. Dili kita angay magpakahilom sa taliwala sa pagpanglupig ug kawalay hustisya. Ang tinuod nga simbahan wala lamang sulod sa mga pultahan sa atong mga kapilya kundi nagalihok sa dalan, nagapakigbisog uban sa katawhan, ug nagatudlo sa kamatuoran nga walay kahadlok.
Ang EDSA People’s Power nagapahinumdom kanato nga ang pagtoo walay kinutoban sa altar kundi makita sa buhat sa panaghiusa. Sama sa giingon sa Kasulatan:
"Ipadayon ang hustisya ug buhata ang maayo, kay ang kaluwasan sa Diyos haduol na."
— Isaias 56:1
Pinaagi sa panaghiusa sa IFI, UCCP, ug ACC, nagapadayon kita sa pakigbisog alang sa tinuod nga kalinaw ug hustisya. Ang simbahan dili lamang magtudlo, kundi kinahanglan usab molihok.
PANAWAGAN SA KATAWHANG MAKAMASA
Kita nga anaa sa mga komunidad, sa mga barangay, sa kaumahan, sa baybay, ug sa mga syudad—kita ang tinuod nga gahum sa nasud! Ayaw tugoti nga ang inyong tingog mapahilom sa mga gahum nga nagpakabuta-bungol sa mga pagpakigbisog ug pangandoy sa katawhang kabus, nga nagtinguha og hustisya, kalinaw, ug tinuod nga kausaban sa katilingban.
Ang EDSA People’s Power usa ka pakigbisog sa kabus batok sa pagpang-abuso sa gahum. Ug hangtod karon, daghan gihapon ang gipanghimulos, gitamakan ang ilang katungod, ug walay igong pagtagad sa ilang panginahanglan. Ang panaghiusa sa Ecumenical Churches sa Bohol nagapanawagan: PANAHON NA SA PAGBARUG!
"Ang Espiritu sa Ginoo ania kanako, tungod kay siya nagdihog kanako sa pagdala sa Maayong Balita sa mga kabus."
— Lucas 4:18
PANAWAGAN SA MGA ANAA SA PANGGAMHANAN
Kamo nga gitugyanan sa katungdanan—mga opisyal sa barangay, lungsod, probinsya, ug nasud; ang inyong gahum dili alang sa inyong kaugalingon kundi alang sa katawhan. Ayaw gamita ang inyong posisyon alang sa kaugalingong interes. Ang katawhan nagatan-aw, ug ang Diyos nagahukom sa mga buhat sa matag usa.
"Panalipdi ninyo ang matarong ug likayi ang dautan."
— Amos 5:15
Sa Bohol, among panawagan nga ang gobyerno magmatinud-anon, magpakabana, ug manginahanglan og hustisya alang sa tanan, dili lamang sa pipila. Ang Simbahan dili magpakahilom kung adunay pang-abuso sa gahum, pagpihig sa kabus, ug pagpanglimbong sa katawhan.
ANG ATONG HAGIT NIINING 2025 MIDTERM ELECTION UG SA UMAABOT
Ang EDSA People’s Power usa ka hagit, dili lang usa ka selebrasyon. Kini nagtudlo kanato nga adunay gahom ang katawhan diha sa pagpili ug mangulo nga nahisubay sa pagpatuman ug mga programa ug balaod alang sa katawhan. Mao nga sa panaghiusa sa katawhan ug Simbahan, ang tinuod nga kausaban mahimong matuman.
“Ayaw kamo pagkapoy sa pagbuhat sa maayo, kay sa hustong panahon kamo mangani.”
— Galacia 6:9
Ang EDSA People Power Revolution dili lang usa ka panghitabo—kundili usa ka misyon alang sa atong kaugmaon!
PIRMADO ILAWOM SA ECCB:
Ecumenical Council of Churches in Bohol (ECCB)
Iglesia Filipina Independiente (IFI)
(SGD)RT. REV. WARNER C. BULACAN (IFI BISHOP)
(SGD)VERY REV'D JESUS ESTAMPA (ECCB VICE CHAIR)
(SGD)REV'D REYNA FLOR ABO-ABO (ECCB TREASURER)
(SGD)REV'D DEACON AMBROSIO IPIL III (ECCB COORDINATOR)
United Church of Christ in the Philippines (UCCP)
(SGD)BISHOP FELY TENCHAVEZ (UCCP BISHOP)
(SGD)PSTR. JAPHET ESTORQUE (ECCB CHAIR)
(SGD)REV'D SHIELA MAE NILUAG (ECCB SECRETARY)
(SGD) PSTR. ANGEL OPIALA (ECCB COORDINATOR)
Apostolic Catholic Church (ACC)
(SGD)MOST REV'D FERDIMAR SUMALA (ACC BISHOP)
(SGD)REV'D FR. JUHANES PADILLO (ECCB AUDITOR)
25 Pebrero 2025
