26/03/2024
GIYA SA PAGKOMPISAL( Sakramento sa pagkompisal)
Ang Kompisal o Penitensiya mao ang Sakramento nga gitukod ni Jesukristo aron kita pasayloon sa atong mga sala. Kay kitang tanan makasasala nagkinahanglan nga mangompisal sa Pari.
Pangutana: Nganong adto sa Pari?
Tubag: Ang Pari maoy nakadawat gikan ni Jesus sa gahum ug awtoridad sa pagpasaylo sa sala.
PAGSUSI SA KONSIYENSYA- Hinumdumi ang imong mga sala nga tanan. Kining musunod nga Talaan sa mga sala makatabang kanimo sa paghinumdom sa imong mga sala apan ikompisal lamang ang mga sala nga imong nabuhat. ANG NAPULO KA SA SUGO SA DIOS:
NAHAUNANG SUGO SA DIOS. "Dili ka magbaton ug mga dios gawas Kanako".
( Gisugo kanato sa Nahaunang Sugo sa Dios ang pagsimba saDios ug Kaniya lamang)
* Gibiyaan mo ba ang imong pangadyeon sa buntag ug sa gabii, o sa matag pagkaon?
* Nagduhaduha ka ba ug butang bahin sa atong tinuhoan? Gikaulaw mo ba ang pagtuman sa imong katungdanan sa tinuohan?
Nakabasa ka ba sa mga basahon nga nagsupak sa atong tinuohan ug nitoo ka niini? Nakigkita ug nitoo ka ba sa usa manghimalad? Nangulipas ka ba sa imong tinuohan?
IKADUHANG SUGO SA DIOS " Dili mo gamiton ang ngalan sa Dios sa kawang."
(Gisugo kanato sa Ikaduhang Sugo sa Dios ang pagtahod sa santos nga ngalan sa Dios, ang pagtahod sa mga Santos ug sa mga butang nga sagrado, ug ang pagtuman sa atong mga panumpa ug panaad.)
* Nigamit ka ba sa ngalan sa Dios sa pagpasipala lamang? Nakabugalbugal ba ikaw o nakatiawtiaw sa mga tawo o mga butang nga hinalad ngadto sa Dios?
* Nakapanumpa ba ikaw sa dili tinuod o sa walay kinahanglan? Nakalapas ka ba sa imong mga saad?
* Gipanghimaraut o gitunglo mo ba ang imong kaugalingon o ang uban?
IKATULONG SUGO SA DIOS " Santuson mo ang Adlaw sa Pahulay"
( Gisugo kanato sa Ikatulong Sugo sa Dios ang pagsimba sa Dios sa mga Domingo ug sa mga Pista nga iglilihi, pinaagi sa pagtambong sa Misa ug pagtagad sa mga pag-ampo ug sa ubang mga buhat nga maayo).
* Nakalapas ka ba sa tinuyo sa pagsimba sa mga Domingo ug piyesta nga iglilihi? Naulahi ka ba sa Misa?
* Nakahimo ka ba o nakasugo paghimo sa mga mabug-at nga buluhaton sulod ning mga adlawa sa walay kinahanglan?
* Kulang ka ba sa kaligdong sulod sa Simbahan? Makapila man kini?
IKAUPAT NGA SUGO SA DIOS " Tahuron mo ang imong amahan ug ang imong inahan."
(Gisugo kanato sa ikaupat nga Sugo sa Dios ang pagtahod ug paghigugma sa atong mga ginikanan ug ang pagsugot sa tanan nga ilang mga sugo nga dili sala).
* (Mga Anak) Masinupakon ka ba o walay tahud sa imong mga ginikanan? Gihatagn mo ba sila ug kasubo ug wala ka ba motabang sa ilang mga kinahanglan?
* ( Mga Ginikanan) Wala ka ba magpakabana pagtudlo sa imong mga anak sa ilang mga pangadyeon, sa pagpadala kanila ngadto sa Simbahan ug ngadto sa tulunghaan nga Katoliko? Nakahatag ka ba kanila ug dautang panig-ingnan? Wala ba lang ikaw magtagad sa pagbantay kanila: mahitungod sa mga kauban nga ilang ikakuyog-kuyog sa mga basahon nga ilang ginabasa, ang mga sine nga ilang gitan-aw, ug uban pa?
IKALIMANG SUGO SA DIOS "Dili ka mupatay."
(Gisugo kanato sa ikalimang Sugo sa Dios ang Pagpanghinaut sa kaayohan sa atong isigkatawo, ang pagtahod sa iyang mga katungod ug ang pagpasaylo sa atong mga kaaway).
* Nakadagmal ka ba ug nakasamad sa uban?
* Gidaut mo ba ang imong panglawas tungod sa hilabihan nga pag-inum, ug uban pa?
* Naninguha ka ba pagpanimalus, nagadumili ka ba pagpasaylo?
* Nadala mo ba ang uban ngadto sa pagpakasala?
* Ming-uyon ka ba o kabahin ba hinoon ako sa pagpatay sa bata sa sabakan?
IKAUNOM UG IKASIYAM NGA SUGO SA DIOS "Dili ka manapaw" Dili mo kaibgan ang asawa sa imong isigkatawo"
(Gisugo kanato sa ikaunom nga Sugo sa Dios nga magpaputli kita ug magmaligdong sa atong mga panan-aw, mga pulong, mga buhat ug mga hunahuna.)
* Nagabaton ka ba sa tinuyo sa mga malaw-ay nga hunahuna? tinguha?
* Nahimo mo ba ang malaw-ay nga buhat sa imong kaugalingon o kuyog sa uban?
* Nagapahamtang ba ikaw sa peligro sa pagpakasala batok sa kaputli diha sa pagkuyogkuyog sa mga dautang kauban, pagbasa sa mga dautang basahon, pagkanunay sa mga dautang dapit, sa mga peligro nga sayaw, mga sine, ug uban pa?
* Ang sala batok sa ika-unom ug ikasiyam nga sugo: Pagkamaluibon, pag-ipon-ipon, pamuta, pangulag, pakighilawas. Naghimo ka ba niini?
IKAPITO UG IKANAPULO NGA SUGO SA DIOS "Dili ka mangawat" Dili mo panghinauton ang manggad sa imong isigkatawo."
(Gisugo kanato sa Ikapitong Sugo sa dios ang dili panghilabut sa mga butang sa atong isigkatawo, ang pagtahod sa iyang mga katigayunan ug pagbayad sa atong mga utang.)
(Gisugo kanato sa Ikanapulo ka sugo sa dios ang pagpahiuyon sa pagkabutang nga gipahamtang kanato sa Dios.
* Nakapangawat ka ba?
* Nakapanglimbong ka ba?
* Wala ba ikaw magtagad pagbayad sa kadaut nga nahimo?
* Wala ba ikaw magtagad pagbayad sa imong mga utang?
* Nagbaton ka ba sa mga butang nga kinit-an o kinawat?
* Nagtinguha ba ikaw pagpangawat?
IKAWALONG SUGO SA DIOS " Dili ka magbutang-butang ug dili ka mamakak".
(Gisugo kanato sa Ikawalong Sugo sa Dios ang pagtahod sa dungog sa atong isigkatawo ug ang pag-asoy sa matuod.
* Nakapamakak ka ba?
* Gibutyag mo ba ang tinagong mga kasaypanan sa uban?
* Nahimo mo ba, tungod sa kasina o kasilag, ang pagbutangbutang mahitungod sa imong isigkatawo?
* Gihukman mo ba ang uban sa hinanali lamang?
* Gidudahan mo ba ang uban sa dili matuod?
* Ningdawat ka ba ug soborno?
UNSAON PAGKOMPISAL
1. Luhod sa kompisalan ug pangurus, unya mamulong: "Bendisyoni ako, padre, kay nakasala ako.
2. Unya mag-asoy ka sa imong kahimtang: "Ako olitawo (dalaga,minyo balo)", ug sa gidugayon kanus-a ka pa nagkompisal: " Usa na ka bulan, tuig) kutob karon gikan sa ulahi ko nga pagkumpisal nga maayo."
3. Karon isugod ang tanan mong mga sala, isulti ug makapila nimo mabuhat ang sala. Inigkatapus mog panugid, moingon ka " Mao ra kining tanan, Padre."
4. Unya paminawa pag-ayo ang isulti sa Pari kanimo. Hinumdumi gayud ang penitensiya nga ihatag sa Pari kanimo ug kon wala kaayo nimo madungog, o dili ka makahimo o dili makamao sa pangadyeon nga gisugo, sultihi siya niini.
5. Samtang naghatag kanimo ang Pari absolusyon, pangadyea ang Ginoo kong Jesukristo o ang Akto sa Paghinulsol. Pangurus sa pagbendisyon kanimo sa Pari.
6. Gikan sa kompisalan moadto ka sa lingkoranan ug moluhod. Magpasalamat ka sa Dios tungud sa iyang kalooy ug pasaylo. Tumanon mo dayon ang penitensiya nga gihatag kanimo sa Pari.
