04/03/2025
𝗔𝗡𝗚 𝗣𝗔𝗚𝗣𝗔𝗕𝗔𝗗𝗟𝗜𝗦 𝗦𝗔𝗡𝗚 𝗔𝗕𝗢 𝗜𝗡𝗗𝗜 𝗜𝗦𝗔 𝗞𝗔 𝗞𝗜𝗡𝗔𝗛𝗔𝗡𝗚𝗟𝗔𝗡𝗢𝗡 𝗦𝗔 𝗣𝗔𝗚𝗧𝗨𝗠𝗔𝗡 𝗦𝗔𝗡𝗚 𝗣𝗨𝗔𝗦𝗔 𝗞𝗔𝗚 𝗣𝗔𝗚𝗟𝗜𝗞𝗔𝗪 𝗦𝗔 𝗞𝗔𝗥𝗡𝗘
Sa pagsugod sang Panahon sang Kwaresma, madamo nga mga Katoliko ang nagapadulong sa simbahan agud magtambong sa Misa sang Miyerkules sang Abo ukon Ash Wednesday, nga ginapakita pinaagi sa pagbadlis sang abo sa agtang.
Samtang ang ini nga tradisyon may daku ang kahulogan sa simbahan, importante gid nga mapaathag nga ang pagpabadlis sang abo indi mandatoryo nga bahin sang pagpuasa kag paglikaw sang karne nga kinahanglan sa kwaresma.
May pila ka mga katoliko nga nagapati kay wala sila nakapabadlis sang abo indi na sila magpuasa kag maglikaw sa karne. Ang iban nagapati man nga maumpisa lang sila puasa kag maglikaw sa karne kon nabadlisan na sila sang abo. Ina nga pagpati sala kag dapat naton mapaathag.
𝗡𝗔𝗚𝗣𝗔𝗕𝗔𝗗𝗟𝗜𝗦 𝗞𝗔 𝗦𝗔𝗡𝗚 𝗔𝗕𝗢 𝗨𝗞𝗢𝗡 𝗪𝗔𝗟𝗔 𝗢𝗕𝗟𝗜𝗚𝗔𝗗𝗢 𝗚𝗜𝗗 𝗔𝗡𝗚 𝗧𝗔𝗚𝗦𝗔 𝗞𝗔 𝗞𝗔𝗧𝗢𝗟𝗜𝗞𝗢 𝗠𝗔𝗚𝗣𝗨𝗔𝗦𝗔 𝗞𝗔𝗚 𝗠𝗔𝗚𝗣𝗔𝗨𝗠𝗢𝗗 𝗦𝗔 𝗞𝗔𝗥𝗡𝗘
Ginahatagan bug-at sang opisyal nga pagpanudlo sang Simbahan nga Katoliko ang importansia sang puasa kag abstinencia sa panahon sang kwaresma bilang importante nga bahin nga mga bulohaton nga nagapauswag sa pagtubo espirituwal kag pagdisiplina sa kaugalingon.
Ang Code of Canon Law sang Simbahan (Canon 1251) ginmitlang ang obligasyon naton sa pagpaumod sa karne sa Miercules badlis sang abo ukon "Ash Wednesday" kag mga Biyernes sang kwaresma, sa amo man ang pagpuasa sa Adlaw sang Miercules badlis sang Abo kag Biernes Santo.
Buot silingon, ang pagpalhit sang abo isa ka ritwal nga nagapakita sa pagsugod sang kwaresma pero ang pagpuasa kag pagpaumod sa karne isa ka mando sang Simbahan nga dapat tumanon.
Ang pagsunod sang kasuguan sang Simbahan indi lang bahin sang aton obligasyon kundi isa man ka pamatood sang aton bug-os nga paghigugma sa Dios kag sa aton isigkatawo.
Tumanon naton ang kasuguan kag magpangabuhi nga matuod-tuod nga Kristiyano!
Magpuasa kita kag magpaunod sa karne, indi kay nagpapabadlis ka lang abo pero wala ka nagapuasa kag nagapaumod sa karne.
