19/09/2026
San Isidro Labrador Chapel
September 19, 2026
Ebanghelyo: Lucas 8:4-15 - Ang Parabula sang Manugsab-og sang binhi
Sang nagtipon ang madamo nga tawo nga naghalin sa nagkalain-lain nga banwa, nagsugid si Jesus sang isa ka paanggid:
"May isa ka manugpugas nga naglagas sang iya binhi. Samtang nagapugas siya, ang iban nahulog sa dalan kag natapakan, kag ginkaon sang mga pispis. Ang iban nahulog sa kabatoan, pagtubo sini nalaya tungod wala sing basa. Ang iban nahulog sa kasampinitan, kag sang magtubo ang mga sampinit, gintuk-an ang binhi. Pero ang iban nahulog sa maayo nga duta, nagtubo kag nagbunga sang sing ka gatos ka pilo." Dayon nagsinggit si Jesus, "Ang may dulunggan nga makabati, mamati!"
Kag ginpahayag ni Jesus: "Ang binhi amo ang Pulong sang Dios."
Ang sa dalan - amo ang nagabati pero ginakuha sang yawa sa tagipusoon agud indi maluwas. Ang sa bato - nalipay sa pagbaton pero wala sing gamot, nagatalikod sa tion sang pagsulay. Ang sa sampinit - amo ang ginatuk-an sang mga kabalaka, manggad kag kalipayan sa kabuhi, gani wala nagabunga. Apang ang sa maayo nga duta, amo ang may maayo kag matarong nga tagipusoon, nagapamati, nagabaton, kag nagapadayon nga nagabunga sa pag-antos.
Pamalandong
Hindi tanan nga duta pareho. May duta sa dalan nga matig-a na kay pirmi naagyan, may duta nga mababaw lang kay puro bato sa dalom, may duta nga daw maayo pero puno sang hilamon, kag may duta nga gin-andam gid.
Amo man ang aton tagipusoon subong nga Sabado.
Pamangkuton ta ang kaugalingon: Ano bala ako nga duta subong?
1. Duta sa Dalan? Madasig kita mabalda. Nagamisa, pero ang hunahuna ara sa cellphone, sa utang, sa chismis. Pagtapos sang Misa, wala na nadumduman ang Ebanghelyo. Ginpatapakan lang sang kasakuon ang Pulong.
2. Duta nga Mabato? Mainit kita sa una. Makahibi pa sa retreat, kusog mag-amen. Pero pag-abot sang pagsulay - ginlibak, nagmasakit, wala kwarta - dali lang malaya. Kay wala pa nagdalom ang gamot sa pagpangamuyo.
3. Duta nga Masampinit? Ini ang pinakadelikado sa aton. Hindi kita malain nga tawo, pero puno kita sang kabalaka. "Paano ang balayran? Ano ang bwas?" Kag ginatuk-an man kita sang handum sa manggad kag kalipayan. Gusto ta sang dali nga kalipay, gani nalipatan ang mabudlay pero matuod nga bunga.
Gusto sang Ginoo nga mangin Maayo nga Duta kita. Ano ang kinaiya sini? Siling ni Lucas, "may maayo kag matarong nga tagipusoon, nga nagatipig sang Pulong kag nagabunga sa pag-antos."
Indi manugbunga sang isa ka adlaw lang. Ang humay indi man magbunga pagkasab-og. Kinahanglan sang pag-antos ukon perseverance. Adlaw-adlaw nga pagpamati, adlaw-adlaw nga pagpili sang maayo bisan kapoy.
Ang binhi sang Pulong daw gamay lang, daw ginlubong sa duta kag daw patay, pero pareho sang sa una nga pagbasa subong, "Ginpanggas sa kadunot, mabanhaw sa pagkadili madunot." Ang imo gamay nga pag-antos subong, ang imo hilom nga pagpangamuyo, ang imo pagpasensya sa bana, sa asawa, sa kaingod - ina tanan binhi nga sa ulihi pabungahon sang Dios sa himaya.
Pangamuyo:
Ginoong Jesus, Ikaw ang Manugsab-og. Ipasulod man ang Imo Pulong sa akon tagipusoon. Dugha ang katig-a sang akon dalan, kuhaa ang mga bato sang akon kaakig, kag hawanan ang mga sampinit sang akon kabalaka.
Hatagi ako sang maagwanta kag matarong nga tagipusoon, nga bisan sa kahinaay, magapadayon sa paglakat sa atubangan Mo, sa kasanag sang mga buhi.
Amen.
