06/01/2026
Panalangin kay San Antonio de Padua
O mapalad na San Antonio, dumudulog kami sa iyo at itinataas namin ang aming isip at puso sa panalangin sa Diyos sa iyong pamamagitan. Dumaraing at nagluluhog ng kahilingan ang mga tao sa iyo sapagkat ikaw ay malapit sa trono ng Diyos sa piling ni Hesus at Maria.
Sa aking panalangin ay inilalakip ko ang mga daing ng mga maysakit buhat sa higaan ng hirap; ang nabibilanggo mula sa madilim na kanilang kanlungan; ang mga bihag mula sa mga kamay ng mga nang-aalipin sa kanila; ang mababait na pastol mula sa kanilang dampang tahanan; ang mga mandirigma mula sa larangan ng labanan; ang mga nangingibang bayan mula sa kanilang mga sasakyan; ang mga kabataan mula sa kanilang paaralan at libangan; ang mga magulang na nag-aaruga at nagpapakasakit para sa kanilang mga anak; at ang lahat ng mga makasalanan upang sila'y muling mahimlay sa iyong piling na puspos ng biyaya ng Diyos.
O makapangyarihang San Antonio, makamtan nawa namin sa inyong pamamagitan ang tulong at awa ng langit sa aming kalagayan, at nawa'y magtagumpay kami sa lahat ng aming mabubuting nasa at hangarin kung nauukol din lamang sa kaluwalhatian ng Diyos, sa lalong kapurihan mo at sa kagalingan ng aming kaluluwa.
Siya Nawa.
San Antonio, maging tanglaw at gabay ka sa aming buhay, Amen.
San Antonio, ipagkaloob nawa ng Diyos ang hinahanap namin dahil sa iyong pamamagitan, Amen.
San Antonio De Padua, ipanalangin mo kami.
