21/06/2026
Kung tatanungin ako kung ano ang pagmamahal,
hindi mo maririnig sa akin ang mga katagang
"love is blind,"
"love is full of sacrifice,"
o "love is patient."
Dahil kung tatanungin mo ako,
tahimik kong ituturo ang aking tatay.
Dahil para sa akin,
isa siya sa mga pinakakonkretong halimbawa ng pagmamahal.
Hindi sa mga salitang binibitawan,
kundi sa mga gawaing inuulit-ulit araw-araw.
Sa pagbangon nang maaga,
sa pag-uwi nang pagod,
sa pagpili sa pangangailangan ng pamilya bago ang sarili niyang kagustuhan.
Ito ay para sa mga tatay.
Sa tunay na tatay,
sa tumayong tatay,
sa piniling maging tatay.
Sa mga tatay na hindi naghangad ng pagkilala,
pero nakatanggap na nito nang maraming beses mula sa mga pusong inalagaan nila.
Salamat.
Salamat sa pagiging halimbawa ng lakas.
Hindi lamang sa kung paano ninyo nabubuhat ang mabibigat na bagay,
kundi sa kung paano ninyo kami binubuhat
sa tuwing hindi na namin kayang pasanin ang mga hamon ng buhay.
Salamat sa pagsama.
Sa paghahatid at pagsundo,
sa paghihintay,
sa pakikinig kahit pagod na pagod na.
Salamat sa mga sakripisyong hindi namin nakikita.
Sa mga pangarap na ipinagpaliban,
sa mga luha na itinago,
sa mga problemang kayo lamang ang may alam.
Salamat sa mga gabing kayo ang huling natutulog
at sa mga umagang kayo ang unang nagigising.
Madalas, hindi kayo ang pinakamaingay sa loob ng tahanan.
Hindi kayo laging nagsasabing mahal ninyo kami.
Pero sa bawat oras ng trabaho,
sa bawat pawis na pumapatak,
sa bawat desisyong inuuna ang pamilya,
doon namin naririnig ang inyong "mahal kita."
Dahil ang pagmamahal ng isang ama ay madalas hindi nasusulat sa mga liham,
hindi naipo-post sa social media,
at hindi laging nasasabi nang malakas.
Ngunit ito ang uri ng pagmamahal na tahimik na nananatili.
Matatag.
Maaasahan.
At handang magbigay kahit walang kapalit.
Kaya kung tatanungin mo ako kung ano ang pagmamahal,
hindi ko ito hahanapin sa mga depinisyon ng libro,
o sa mga katagang madalas nating marinig.
Ituturo ko ang aking tatay.
At sasabihin,
"Ganito ang pagmamahal."
Tahimik.
Matatag.
At araw-araw na pinipiling manatili.
Para sa lahat ng tatay,
salamat.
Maaaring hindi namin ito nasasabi palagi,
pero marami sa kung sino kami ngayon
ay dahil sa kung sino kayo para sa amin.
At habang buhay naming dadalhin
ang mga aral, sakripisyo, at pagmamahal na ipinakita ninyo.
Maligayang Araw ng mga Ama. ❤️
✍️Mae Ann Macalinao
Happy Fathers Day to our everyday Heroes!
All Glory to God.
