27/07/2024
MAIKA-17 A DOMINGO TI KADAWYAN A TAWEN
HULIO 28, 2024
UMUNA A MAIBASA :
2 Ar-ari 4:42-44
Iti naminsan, adda maysa a tao a naggapu idiay Baal Salisa. Inikkanna ni Eliseo iti duapulo a tinapay a naaramid iti umuna a sebada a naapit iti dayta a tawen ken sumagmamano a kappuros a mais. Imbaga ni Eliseo iti adipenna nga ipakanna daytoy kadagiti profeta ngem kinuna ti adipen, "Makaanay kadi daytoy a k***n ti sangagasut a tattao?"
Insungbat ni "Itedmo a k***nda gapu ta kuna ti Apo a k***nda ket addanto pay matda." Iti kasta, indasar ti adipen ti taraon ket kas imbaga ti Apo, nangan amin ket adda pay natda.
Ti Sao ti Apo
SALMO RESPONSORIO :
Salmo 145:10-11, 15-16, 17-18
SUNGBAT : Sibubuslon a mangted ti Apo, ket pennekenna ti tunggal maysa.
Idaydayawdaka dagiti amin a parsuam, O Apo,
Ket dagiti adipenmo, itan-okdaka.
Ti dayag ti pagariam ti sawenda,
Ket ti bilegmo, saritaenda. (sungbat)
Mangnamnama kenka ti amin a parsua,
Ken ikkam ida iti k***n no masapulda.
Sibubuslon a mangtedka kadakuada,
Ket pennekem ti tunggal maysa. (sungbat)
Nalinteg ti Apo iti amin a dalanna
Ken naasi iti amin nga aramidna.
Asideg ti Apo kadagiti amin nga umawag kenkuana;
Wen, kadagiti sipupudno nga agdawat iti tulongna. (sungbat)
MAIKADUA A MAIBASA
Efeso 4:1-6
Kas maysa a balud gapu iti panagserbik iti Apo, yunay-unayko nga agbiagkayo kas maikari iti nangayaban ti Dios kadakayo. Kanayon koma a napakumbaba, naemma ken naanuskayo. Ipakitayo ti ayatyo babaen ti panagtitinnulongyo. Aramidenyo ti amin a kabaelanyo a mangtaginayon iti panagmaymaysa nga ited ti Espiritu babaen ti talna a mamagsinggalut kadakayo. Adda maysa a bagi ken maysa nga Espiritu, kas iti kaadda ti maysa a namnama a nangayaban ti Dios kadakayo. Adda maysa nga Apo, maysa a pammati, maysa a buniag. Adda maysa a Dios ken Ama ti amin a tao, Apo ti amin, agtrabaho iti amin ken adda iti amin.
Ti Sao ti Apo
EBANGHELIO :
Juan 6:1-15
Binallasiw ni Jesus ti Dan-aw ti Galilea (wenno, Dan-aw ti Tiberias). Simmurot kenkuana ti nakaad-adu a tattao, agsipud ta nakitada dagiti nakaskasdaaw nga inaramidna idi pinaimbagna dagiti masaksakit. Simmang-at ni Jesus iti maysa a bantay. Nagtugaw sadiay agraman dagiti adalanna. Asideg sidin ti Fiesta ti Paskua dagiti Judio.
Inwaras ni Jesus ti panagkitana ket nakitana ti nakaad-adu a tattao nga umas-asideg kenkuana. Iti kasta, kinunana ken Felipe, "Panggatangantayo ngata iti makaanay a k***n dagitoy a tattao?" (Kinunana daytoy a pangsuot ken Felipe. Kinapudnona, ammo idin ni Jesus ti aramidenna.) "Saan nga umanay ti duagasut a pisos nga igatang iti tinapay a pagbibingayanda uray saggabassitda laeng," kinuna ni Felipe. "Adda maysa nga ubing a lalaki ditoy a nagbalon iti lima a tinapay a sebada ken dua nga ikan," kinuna ni Andres a maysa kadagiti adalanna ken kabsat ni Simon Pedro. "Ngem ania met ngay dagitoy iti kastoy a kaadu ti tao?" Imbaga ni Jesus a pagtugawenda dagiti tattao. (Karuotan sadiay.) Nagtugaw ngarud dagiti amin a tattao. Aglimaribu dagiti lallaki.
Innala ni Jesus dagiti tinapay, nagyaman iti Dios, sana imbunong kadagiti nakatugaw a tattao. Kasta met ti inaramidna kadagiti ikan. Nanganda agingga iti napnekda. Idi nabsogda aminen, kinuna ni Jesus kadagiti adalanna, "Urnongenyo dagiti natda ket awan ibelbellengyo," inurnongda ngarud dagiti amin a natda, ket napno ti sangapulo ket dua a basket iti natda kadagiti lima a tinapay a saan a nai-bus dagiti tattao. Idi makita dagiti tattao sadiay ti milagro nga inaramid ni Jesus, kinunada, "Awan duadua nga isu daytoy ti Profeta nga umay ditoy lubong!" Idi madlaw ni Jesus nga umay dagiti tattao a mangala kenkuana tapno pilitenda nga isaad nga ari, nagpakni manen nga is-isuna kadagiti bambantay.
Ti Ebanghelio ti Apo
KARARAG DAGITI MAMATI
Dios nga Amami, babaen ti ipapatay ken panagungar ti bugbugtong nga Anakmo, nataykami iti basol ket naikkankami iti baro a biag. Isu ti nagserbi a kas linnaaw a nangpadam-eg ti namaga a daga ken nagpapudot iti nalamiis a panagpuspusomi. Tulongannakami ngarud a manglaksid iti amin a kita ti basol ket iti tunggal kararag kunami:
Apo, denggennakam kadi.
Para kadagiti mangidadaulo ti nacristianoan a pammati, ni Santo Papa N., dagiti obispo ken papadi, tapno agballaigida koma a mangiwaragawag ti Sao ti Dios babaen ti panangibiagda kadagiti talugading nga insuro in Apotayo a Jesus a Cristo. Dawatenmi kenka Apo.
Para kadagiti mangiturturay iti pagiliantayo a Pilipinas tapno babaen ti pannilaw ti Espiritu Santo makitada koma dagiti kasapulan ti tao ken mangngegda dagiti adu nga as-asugda. Dawatenmi kenka Apo.
Para kadagiti kakabsattayo nga addaan ti nasayaat a panagbiag tapno matukay koma ti pusoda a mangibingay wenno mangiranud ti sanikuada para kadagiti marigrigat ken agkasapulan. Dawatenmi kenka Apo.
Para kadatayo amin a natipontipon iti daytoy a padaya tapno agtalinaed koma ti panagkaykaysa ken panagiinnayattayo iti tunggal maysa. Dawatenmi kenka Apo.
Para kadagiti patpatgentayo a minatay tapno makikaysada komanยธ kadagiti anghel ken sasanto ti Dios iti nailangitan a lugar. Dawatenmi kenka Apo. เผ
Dios a mannakabalin amin, sika ti kamang ken sarikedkedmi bayat ti panagdaliasatmi iti rabaw ti daga. Tulongannakam a manggun-od ti napudpudno a nacristianoan a panagbiag tapno maikarikami a makiranud iti karim a ragsak nga awan patinggana. Daytoy ti dawatenmi gapu met laeng ken Jesus a Cristo nga Anakmo ken Apomi. Amen.
