Capilla de San Antonio de Padua

30/08/2026

Taos-pusong pagbati sa lahat ng ating mga Lectors and Commentators ng SPPC Pantubig sa matagumpay na Pagtatalaga at Pagsariwa ng Pangako.

Nawa’y patuloy kayong maging matapat na tagapagdala ng Salita ng Diyos, at maging inspirasyon sa bawat mananampalataya sa pamamagitan ng inyong paglilingkod, pananampalataya, at dedikasyon.

Patuloy nating paglingkuran ang Panginoon nang may kababaang-loob, pagmamahal, at buong puso.

Pagpalain nawa ng Diyos ang inyong paglilingkod!

29/08/2026

ORATIO IMPERATA
Para sa Labis na Pag-ulan

Ama naming makapangyarihan,
Ikaw ang aming kanlungan at lakas.
Sa gitna ng malakas na ulan at habagat,
lingapin Mo ang Iyong bayan.

Patahimikin Mo ang unos,
pahupain ang tubig na umaapaw,
at ilayo sa kapahamakan
ang bawat tahanan at pamayanan.

Tulad ng mga alagad na tumawag sa Iyo sa gitna ng bagyo,
kami rin ay buong tiwalang sumisigaw:
“Panginoon, iligtas Mo kami!” (Mt 8:25)

Ipadama Mo ang Iyong awa sa mga nangangamba,
kalakasan sa mga naglilingkod,
at pag-asa sa mga nasalanta.

Sa Iyong salita, Panginoon,
“Pinatatahimik Mo ang unos, at humuhupa ang mga alon.” (Awit 107:29)

Sa pamamagitan ni Hesukristo kasama ng Espiritu Santo magpasawalang hanggan.
Amen.

N. Panginoon naming Diyos, ipakita Mo na ang pag-ibig Mong wagas.
B. Kami ay lingapin at sa kahirapan ay Iyong iligtas.

Virgen Inmaculada Concepcion de Malolos, ipanalangin mo kami.
San Miguel Arkanghel, ipanalangin mo kami.
San Lorenzo Ruiz, ipanalangin mo kami.
San Pedro Calungsod, ipanalangin mo kami.
San Juan de Dios, ipanalangin mo kami.
San Rafael Arkanghel, ipanalangin mo kami.
San Antonio de Padua, ipanalangin mo kami.

15/08/2026

𝐌𝐚𝐥𝐢𝐠𝐚𝐲𝐚𝐧𝐠 𝐊𝐚𝐚𝐫𝐚𝐰𝐚𝐧, 𝐒𝐚𝐧 𝐀𝐧𝐭𝐨𝐧𝐢𝐨!

Ipinanganak sa Lisbon, Portugal noong Agosto 15, 1195, si Fernando Bulhon y Tavero. Nabuhay siya nang matagal na panahon at namatay sa Padua, Italya. Tumanggap siya ng abito Pransiskano sa isang bisita na nakalaan kay San Antonio Abad kaya tinaglay ang pangalang ANTONIO. Nang masaksihan niya ang masayang paglilipat ng relikya ng mga martir Pransiskano mula sa Morocco noong 1220, nanukal sa kanyang puso ang maalab na nasang maging Pransiskano. Siya ay nagtungo sa Africa sa hangaring maging martir, subalit nagkasakit at napilitang magbalik sa Portugal. Ang kanilang sasakyang-dagat ay napadpad sa pulo ng Sicily, Timog Italya at napasama siya sa sa mga Pransiskanong patungo sa lunsod ng Assisi upang dumalo sa pangkalahatang pulong ng mga Pransiskano.

Ang kadalubhasaan niya sa Banal na Kasulatan at Teolohiya ay nakilala sa isang ordinasyon ng mga pari sa Forli nang siya’y mangaral nang walang kahanda-handa, dahil sa pagdating ng paring inaasahang magsermon. Humanga sa kanyang talino at kabanalan ang tagapagtatag ng mga pransiskano na si San Francisco ng Asisi at iniatang sa kanyang balikat ang mataas na tungkulin. Ang kanyang kabantugan bilang predikador ay lumaganap sa Pransiya at Italya; at gayon din ang kanyang maraming himalang ginawa sa mga makasalanan, maysakit, mga ina at mga nawawalan o nananakawan. Ang Niño Jesus ay nagpakita sa kanya. Ang isang hindi naniniwala sa Santisimo Sakramento ay sumampalataya nang makita niya ang isang himala ni San Antonio: ang isang kabayong gutom na gutom ay nanikluhod sa harap ng Ostiya konsagrada sa halip na kanin ang damo.

Sumalangit siya noong Hunyo 13,1231, araw ng Martes – ito ang dahilan kung bakit si San Antonio ay pinipintuho sa araw ng Martes.

15/08/2026

07/08/2026

𝙃𝘼𝙇𝙄𝙉𝘼 𝘼𝙏 𝙈𝘼𝙂𝙋𝙍𝙐𝙎𝙄𝙎𝙔𝙊𝙉 𝙎𝘼 𝙆𝘼𝙍𝘼𝙉𝙂𝘼𝙇𝘼𝙉 𝙉𝙄 𝙎𝘼𝙉 𝙍𝘼𝙁𝘼𝙀𝙇 𝘼𝙍𝙆𝘼𝙉𝙂𝙃𝙀𝙇 𝙉𝘼 𝘼𝙏𝙄𝙉𝙂 𝙋𝘼𝙏𝙍𝙊𝙉!

Inaanyayahan po namin ang lahat na nagmamay-ari ng mga imahen ng ating patron ng bayan at pintakasi na si San Rafael Arkanghel na dumalo at makiisa sa gaganaping kauna-unahang SAN RAFAEL REPLICA PROCESSION sa darating na ika-28 ng Setyembre, 2026, Bisperas ng Kapistahan ni San Rafael Arkanghel.

Layunin nito na lalo pang maipalaganap at paigtingin ang debosyon sa ating Mahal na Patrong San Rafael Arkanghel at upang mas maipakilala pa siya sa ating komunidad at karatig pamayanan.

Malugod po naming inaanyayahan ang lahat na mayroong inaalagaang imahen ni San Rafael na isama ito sa nasabing prusisyon. Magpatala po tayo sa opisina ng ating parokya at para sa iba pang detalye ay hanapin si Bro. John Matthew Basa. Kasabay ng inyong pagpapatala ay mayroon pong ibibigay na Isang testimony Form kaugnay ng inyong Pagdedebosyon Kay San Rafael Arkanghel.

Sa mga may maliliit at table top na imahen ni San Rafael, maaari niyo itong isama sa prusisyon. Bitbitin kung nanaisin. Maraming salamat po

04/08/2026

PANAWAGAN SA MGA TESTIMONYA KAUGNAY NG PAGDEDEBOSYON KAY SAN RAFAEL ARKANGHEL.

Mayroon ka bang kuwento ng panalanging sinagot, kagalingan, paggabay, proteksiyon, o biyayang natanggap sa pamamagitan ng debosyon kay San Rafael Arkanghel?

Inaanyayahan ka naming ibahagi ang iyong personal na testimonya upang maging inspirasyon, pag-asa, at pagpapatibay ng pananampalataya sa marami.

Maaaring ang iyong simpleng kuwento ang maging daan upang mas marami pang makilala at maranasan ang mapagmahal na paggabay ng ating Patron na si San Rafael Arkanghel.

Maaring Ipadala ang inyong testimonya sa mga sumusunod:
Email: [email protected]
Facebook: GRANADA-San Juan de Dios Parish
o iwan ito sa Opisina ng ating Parokya.

"Ang iyong kwento ay maaaring maging inspirasyon at pag-asa sa iba pang mananampalataya."

03/08/2026

"To be a priest is to be a bridge between God and His people—a vessel of His grace, mercy, and unconditional love."

Sa bawat Banal na Misa, sa bawat sakramento, at sa bawat tahimik na panalangin para sa kawan—maraming salamat po, Father, sa inyong walang sawang paglilingkod. Ang inyong buhay ay tunay na repleksyon ng pagmamahal at pagpapakumbaba ni Kristo.

Nawa’y patuloy kayong pagpalain, ingatan, at bigyan ng lakas ng Panginoon sa inyong bokasyon. Maligayang Araw ng mga Pari!

29/07/2026

"𝐀𝐧𝐠 𝐦𝐠𝐚 𝐲𝐚𝐦𝐚𝐧𝐠 𝐝𝐚𝐩𝐚𝐭 𝐧𝐚𝐭𝐢𝐧𝐠 𝐢𝐩𝐮𝐧𝐢𝐧 𝐚𝐲 𝐚𝐧𝐠 𝐦𝐠𝐚 𝐲𝐚𝐦𝐚𝐧 𝐧𝐚 𝐚𝐭𝐢𝐧𝐠 𝐦𝐚𝐝𝐚𝐝𝐚𝐥𝐚 𝐬𝐚 𝐥𝐚𝐧𝐠𝐢𝐭." -𝐅𝐫. 𝐇𝐚𝐦

(Sipi sa kanyang pagninilay sa Ikatlong Araw ng Pagsisiyam sa Dakilang Kapistahan ng Kristong Hari noong Nobyembre 19, 2023 sa ating bisita.)

Ang buong pamayanan ng Capilla de San Antonio de Padua ay taos pusong nakikiramay sa pamilya ni Rdo. P. Hamilton F. Cruz, MSP. Maraming salamat sa pagmamahal at paglilingkod sa aming pamayanan. Makamit mo nawa ang buhay na walang hanggan sa piling ng Poong Maykapal.

✝️ Rdo P. Hamilton F. Cruz, MSP
02.28.1978 - 07.29.2026

28/06/2026

Francisco at Perez, itinalagang Hermanidad ng Flores

Narito ang ilan sa mga kuhang larawan kaugnay ng Banal na Misa kaugnay ng Bihilya ng Dakilang Kapistahan nina San Pedro at San Pablo na sinundan ng Pagtatalaga ng Hermanidad ng Flores de Mayo 2027 sa katauhan nina G. Manuel Francisco at Bb. Noeve Princess Perez na pinangunahan ni Rdo. P. Gerry Fortunato, Kura Paroko ng Parokya ng San Juan de Dios.

(c) Nathaniel Saimon

27/06/2026

"Tuhog na bulaklak sadyang salit - salit.
Sa mahal mong noo'y aming ikakapit.
Lubos ang pag - asa't, sayo'y pananalig.
Tanggapin mo handog, lubos na pag - ibig."

Halina at ating saksihan ang Pagtatalaga ng Hermanidad ng Flores de Maria 2027 sa katauhan nina G. Manuel Francisco at Bb. Noeve Princess Perez , bukas, Hunyo 28,2026 matapos ang Banal na Misa sa ganap na ika - 6 ng gabi.

Ang pagtatalaga ay pangungunahan ng Kura Paroko ng Parokya ng San Juan de Dios, Rdo. P. Gerry Fortunato.