Sta. Barbara Parish

29/05/2026

MASDAN | Mga tampok na tagpo mula sa pagdiriwang ng Ika-50 Taong Ginintuang Jubileo ng Parokya ni Sta. Barbara na may temang “Pasasalamat, Pagsasabuhay, at Pagmimisyon.” Isang paglalakbay ng pananampalataya, paglilingkod, at pagkakaisa ng sambayanang parokya sa loob ng limang dekada ng biyaya at misyon.

Muli nating balikan ang mga makabuluhang sandali ng pagdiriwang at sama-samang magpasalamat sa Diyos sa Kanyang walang sawang paggabay sa ating parokya.

Editor: Ej Dela Cruz
Drone Shots: Ralph Reyes
Produced by: DCSCM

29/05/2026

‎“Kung kailan minamahal ko na ang ginagawa ko, at saka naman ako inalis”.
‎
‎
‎Madalas kapag tayo’y inilagay ng Diyos sa isang lugar na hindi tayo pamilyar, ang una kaagad nating nagiging tugon ay “Lord, bakit po ako?” at “Lord, anong pong gagawin ko ro’n?”. Tila baga ating kinukwestyon ang will o kagustuhan ng Panginoon para sa atin. Ganiyan ang naging kaganapan sa aking buhay nang maipadala ako rito sa inyong simbahan, ang Parokya ni Sta. Barbara. At nang ako ay dumating dito at nagtungo sa harap ng simbahan at napasabi kaagad ako ng “Diyos ko po”. Pumasok ako sa loob ng simbahan at napasambit na naman ng “Diyos ko po”. Ako ay naglibot-libot at ang akin lang naturan ng araw na ’yon ay “Diyos ko po”. Nakakatawa man kung iisipin ngunit ito ang katotohanan sa aking karanasan dito sa Parokya ni Sta. Barbara.
‎
‎Sa aking unang misa, sa gospel na binasa noong araw na iyon ay napatanong kaagad ako sa Diyos, “Ano ang magiging misyon ko rito sa Sta. Barbara?”. Ang naging tugon Niya “Maglinis Ka.” Hindi lamang ng simbahan bilang gusali kundi ng kaayusan nito bilang tahanan ng Diyos. Tulad ni Hesus na naglinis ng templo hindi Niya hinayaang mawalan ito ng kabanalan. Sa pagdaan ng mga taon, ang simbahan ay naging saksi sa pananampalataya ng maraming tao. Sa bawat misa, prusisyon, paglilinis, at simpleng paglilingkod mas lalo tayong napapalapit sa Diyos. Ang maliit o malaking ambag ng bawat isa ay nagiging bahagi ng pagpapatatag ng Simbahan. Tulad ni Father Caberte at ng mga taong buong pusong naglingkod sa simbahan nawa ay mapapanatili ang kaayusan nito sa pamamagitan ng pagkakaisa, paggalang, at malasakit sa tahanan ng Diyos.
‎
‎Matapos ang ilang na pamamalagi ko sa simbahan ni Sta. Barbara, nakatanggap naman ako ng tawag kay Bishop na aalisin na raw niya ako rito. Bigla akong nalungkot at nag-isip “Kung kailan minamahal ko na ang aking ginagawa, saka naman ako inalis.” Ngunit marahil hindi pa ito ang pagtatapos, kung hindi tanda na natupad na ang misyon na ipinagkatiwala ng Diyos sa akin. Parang sinasabi ni Lord na “Mission accomplished” ka na dahil ang tunay na paglilingkod sa simbahan ay hindi nasusukat sa haba ng pananatili, kundi sa pagmamahal, sakripisyo, at pananampalatayang naibahagi. Kaya naman na-realize ko na “I’ve done my work”. Ang mga naitulong, naitaguyod, at naipundar para sa simbahan ay mananatiling buhay sa puso ng pamayanan at magsisilbing gabay sa susunod na salinlahi. Kaya nawa’y maging malinis ang ating puso at maging matibay ang pananalig sa Diyos.
‎
‎
‎– Rev. Fr. Reynaldo Nicholas
‎
‎
‎
‎
‎

29/05/2026

MASDAN | Mga kuhang larawan mula sa naganap na Pag-aalay ng Bulaklak at Banal na Misa nitong ika-29 ng Mayo, 2026 bilang bahagi ng pagdiriwang ng Jubilee Octave para sa Ginintuang Jubileo ng Parokya ni Sta. Barbara. Ang banal na pagdiriwang ay pinangunahan ni Rev. Fr. Reynaldo Nicolas.

29/05/2026

29/05/2026

MASDAN| Nagkaisang nagtipon ang mga mananampalataya sa Banal na Misa bilang pagdiriwang at pasasalamat sa Ika-50 Anibersaryo ng Parokya ni Sta. Barbara, sa pangunguna ni Most Rev. Prudencio P. Andaya Jr.

Limang dekada ng pananampalatayang isinabuhay at tapat na paglilingkod sa Diyos at sambayanan sa diwa ng pasasalamat, pagsasabuhay, at paglilingkod.

29/05/2026

Inaanyayahan po ang lahat na makiisa sa pagdiriwang ng Banal na Misa bilang bahagi ng Ginintuang Jubileo ng Parokya ni Sta. Barbara. Sama-sama nating pasalamatan ang Panginoon sa limampung taon ng biyaya, pananampalataya, at paglilingkod.

Mayo 29, 2026 | 5:00 PM
Punong Tagapagdiwang: Rev. Fr. Reynaldo Nicolas

29/05/2026

MASDAN | Mga kuhang larawan mula sa naganap na Banal na Misa nitong ika-28 ng Mayo, 2026 bilang bahagi ng pagdiriwang ng Jubilee Octave para sa Ginintuang Jubileo ng Parokya ni Sta. Barbara. Ang banal na pagdiriwang ay pinangunahan ni Rev. Fr. Venes Paulo Matias.

29/05/2026

‎“Inialay ni Kristo ang Kaniyang sarili para sa lahat.”
‎
‎
‎GINUGINITA SI KRISTO BILANG KATAAS-TAASAN AT DAKILANG PARI.
‎
‎Sa Ebanghelyo, ang mga tao ay naghahandog sa Diyos ng kanilang mga ari-arian at mga alay bilang tanda ng kanilang pananampalataya at pagsamba sa Kaniya. Ngunit si Kristo bilang tunay at dakilang pari ay hindi nag-alay ng anumang bagay bagkus ang inialay Niya ay ang Kaniyang sariling buhay para sa kaligtasan ng lahat. Ito ang sukdulan at ganap na pag-aalay na masasabing “The Ultimate Sacrifice”. Ang pagsasakripisyong ito ni Kristo ay “once and for all”, minsan lamang ginawa ngunit sapat na para sa lahat at mapa sa magpakailanman. Hindi na natin maaaring ulitin ang pag-aalay ni Kristo sa Krus sapagkat naging ganap na ang Kaniyang ginawa para sa ating lahat.
‎
‎Sa tuwing ipinagdiriwang natin ang banal na Eukaristiya, hindi natin inuulit ang Kaniyang sakripisyo kundi inaalala natin at sinasariwa ang Kaniyang dakilang pagmamahal at pag-aalay ng sarili para sa atin. Mahalagang bahagi ng pag-aalay ni Kristo ang Kaniyang panalangin sa halamanan ng Getsemani, Kaniyang tinuran ang “Ama, ilayo Mo sa akin ang kalis na ito ng paghihirap, ngunit hindi ang kalooban Ko kundi ang kalooban Mo ang masunod”. Sa panalanging ito, ipinakita ni Kristo ang ganap na pagsunod at pagtitiwala sa Ama kahit may kasamang hirap, takot, at pagdurusa. Tinanggap Niya ang paghihirap alang-alang sa kaligtasan ng sanlibutan. ‎Dahil dito, ang sakripisyo ni Kristo ay masasabing huwaran ng pag-aalay na maaari nating tularan araw-araw.
‎
‎Tayo rin ay tinatawagan na magsakripisyo sa pamamagitan ng pagmamahal, paglilingkod, pagtitiis, at pananampalataya sa Diyos. Tulad ni Abraham na handang ialay ang kaniyang nag-iisang anak dahil sa matibay na pananampalataya kay Yaweh ay tayo rin nama’y inaanyayahan na magtiwala at sumunod sa Diyos kahit mahirap at mabigat ang ating pinagdaraanan. ‎Sa pagkilala kay Kristo bilang Kataas-taasang Pari nawa ay matutunan nating ialay ang ating sarili sa Diyos at mamuhay nang may pananampalataya, pagpapakumbababa, pagsunod, at pagmamahal sa Kaniya.
‎
‎
‎– Rev. Fr. Venes Paulo Matias
‎
‎
‎
‎

27/05/2026

‎“Dito ka nararapat, at para rito kang tunay.”
‎
‎Taong-tao.
‎
‎Katulad ng mga alagad sa Ebanghelyo, parehong-pareho rin tayo. Taong-tao kung ituring dahil tunay naman talagang pangtao kung tayo ay mag-isip at kumilos. May kahinaan, may pagnanais na mapansin, may paghangad ng mas mataas na lugar. Sa mabuting balita ayon kay Marcos , no’ng makakita ng pagkakataon ang dalawang alagad ay madali silang nagnais ng karangalan; lumapit sila kay Hesus at nakiusap na gawin silang katuwang Niya: isa sa Kaniyang kaliwa at ang isa sa Kaniyang kanan. At ng ito ay malaman ng sampu, nagalit sila at lumapit din sa Panginoon upang humingi ng kanilang pwesto sa kaharian ng Kaniyang Ama. Masasaksihan na tao-taong ugali ng mga apostol, itong mga ugaling hanggang ngayon ay nakikita rin natin sa ating sarili.
‎
‎Ngunit itinuro ni Hesus na hindi dapat ganoon ang paglilingkod na ating gagawin. Ang siyang nauna ay dapat mahuli sapagkat sila ang magga-guide o magpapatnubay sa ibang nahuli upang matutong maglingkod. Ang pinuno ay hindi naghahari kung hindi nagpapakita kung paano magmahal at maglingkod.
‎Gaya ni Hesus na Siya mismong naghugas ng paa ng Kaniyang mga alagad kung saan ang Hari ay naging alipin para sa lahat. At matapos umakyat si Hesus sa langit ay tuluyan ng hindi bumalik ang mga alagad sa dati nilang buhay sa kabila ng pangungutya, pasakit, hirap, at pag-uusig sa kanila ng mga tao. Sapagkat ang Panginoon mismo ang nagturo sa kanila kung paano ang tamang paglingkod. Hindi lamang isang g**o si Hesus kundi Siya rin ang nagsisilbing source of life na bukal ng lakas, pag-asa, pagmamahal, at ang dahilan ng kanilang pananatili.
‎
‎Minsan sa pananatili natin sa simbahan, hindi natin naiiwasan na magkaroon ng tampo, sama ng loob, at pagkamuhi sa ating mga kapatid sa pananampalataya. At dahil dito, nawawalan na tayo ng amor sa paglilingkod. Napapagod tayo, nasasaktan tayo, at nagnanais tayong bumitiw. Ngunit sana ay ating alalahanin kung saan tayo nagsimula at alalahanin natin kung sino ang unang tumawag sa atin. Siya ang unahin mong paglingkuran sapagkat kaya ka naglilingkod ay dahil sa Kaniya. Siya ang modelo, g**o, at patnubayat natin, at sa bawat pagod, luha, at sakripisyo. Hilingin natin ang Kaniyang grasya upang manatili tayong tapat sa paglilingkod sa Kaniya. Dahil kapag masaya tayo sa ating ginagawa o napapasaya tayo ng ating ginagawa ay tila sinasabi ni Lord:
‎”Dito ka nararapat, at para rito kang tunay.”

27/05/2026

𝐌𝐀𝐒𝐃𝐀𝐍 | Mga kuhang larawan mula sa isinagawang banal na misa ngayong ika-27 ng Mayo, taong dalawang libo at dalawampu’t anim, bilang bahagi ng makabuluhang pagdiriwang ng Ginintuang Jubileo ng Parokya ni Sta. Barbara.

Sa pamamagitan ng sama-samang pananalangin at taimtim na pakikiisa ng mga mananampalataya, muling naipadama ang diwa ng pananampalataya, pasasalamat, at pagkakaisa ng pamayanan.

Ang banal na misa ay pinangunahan ni 𝐑𝐞𝐛𝐞𝐫𝐞𝐧𝐝𝐨 𝐏𝐚𝐝𝐫𝐞 𝐑𝐲𝐚𝐧 𝐀𝐝𝐫𝐢𝐚𝐧 𝐌. 𝐀𝐠𝐮𝐢𝐧𝐚𝐥𝐝𝐨.

27/05/2026

Bukas ay ang “Araw ng Pagsasabuhay” bilang bahagi ng Ginintuang Jubileo ng Parokya ni Sta. Barbara. Tampok sa araw na ito ang Called to Witness Servant Leaders’ Convention na magsisilbing paanyaya upang higit pang mapalalim ang diwa ng paglilingkod at pananampalataya.

Sama-sama rin nating ipagdiwang ang Pag-aalay ng Bulaklak at makiisa sa Banal na Misa bilang pasasalamat sa biyaya at pagmimisyon ng ating parokya.

Mayo 28, 2026
1:00 PM — Called to Witness Servant Leaders’ Convention
Panauhing Tagapagsalita: Rev. Rommel Perez Marcelo

5:00 PM — Banal na Misa
Punong Tagapagdiwang: Rev. Fr. Venes Paulo Matias