23/05/2026
Ika-13 na Anibersaryo kan Sakong Pagkapadi
Mayo 23, 2026. 5:00 PM
St. Isidore the Farmer Parish, Manambrag
“An Diyos an Nagpili, Ako an Nag-Iyo"
Ngonian na hapon, nagtitindog ako digdi bako bilang sarong perpektong padi. Nagtitindog ako bilang sarong tawo na 13 taon nang nagsasabi na sa Kagurangnan: “Ako ini, surogoon mo ako.”
13 taon na an nakaagi kan sinabi ko an sakong “IYO” sa aldaw kan sakong ordinasyon. Dai ko pa aram kun ano an naghahalat sako. Alagad aram ko kun siisay an nag-apod sako — si Hesus mismo, an Marhay na Pastor na dai minatunong sa paghanap sa saiyang mga karnero.
Sa laog kan 13 taon, dakul na an nangyari. May mga aldaw nin dakulang kaogmahan — mga bunyag, kasal, mga kaenot-enoteng komunion, mga aldaw na nahihiling ko mga tawona naghihingowa na magrani ki Kristo. May mga aldaw man nin kasakitan — mga lubong, mga pamilyang nagkaka-warak, mga puso na nasasakitan. Diyan ko nahiling na an pagkapadi bakong tungkol sako. Ini tungkol sa pagigin tulay, tanganing si Kristo an makaabot saindo.
Mga tugang, an sakong pagkapadi dai magigin posible kun bako dahil sa mga tawo na nakapalibot sako. Kamo an nagin sakong kusog, sakong pamilya, sakong kaogmahan. Sa lambang “Dios Mabalos, Padre o Salamat na grabe Padre” na nadadangog ko, sa lambang kamot na nagbibisa sako, sa lambang pamibi na itinatao nindo para sako, namamate ko an kamot kan Kagurangnan na nagtatao nin kusog sako.
Dakula an sakong pasasalamat sa Kagurangnan sa dakulang pagtabang sako. Salamat ki Maria, Ina kan mga Padi, na pirming nag-aataman sa sakong paglalakbay.
Sa Ebanghelyo kahapon sinabi ni Hesus: Magin saro lugod sinda gabos.” Iyo man ini an pangadyi ko para sato ngonian. Dai kita nagtitiripon ngonyan para sa sakong pagkapadi sana. Nagkakasararo kita huli ta gabos kita ina-apod na magin saro ki Kristo. Ako bilang padi, kamo bilang mga layko — pareho kitang parte kan Misyon ni Kristo.
Boot kong ipaabot saindo ngonian: Dai kamo magamo na magtubod. Dai kamo magamo na magserbi. Dai kamo magamo na magsabi nin “IYO” sa Dios, maski dai pa nindo namamate kun paano. Huli ta kun an Dios an nagpili, Siya man an mag-aataman.
Sa pagselebrar ko sa ika-13 taon sa pagkapadi, dai ko masabi na dakul akong nagibo. Ang masasabi ko sana: Dakula an ginibo kan Dios sako, sa paagi nindo. Kaya an sakong buhay, itinao ko otro ngonian sa saiya, asin saindo.
Salamat po sa pagkamoot, sa pag ako sako, pagpasensya, asin sa pagtubod nindo sako. Padagos kitang maglakaw, magserbi, asin magpangadyi bilang sarong pamilya kan Dios uya sa Manambrag.
San Isidro Labrador, ipamibi mo kami.
O Maria, Ina nin mga Padi, tabangi kami.
