08/07/2026
SPIRIT BALITA LOKAL
Samtang ginasaulog sang Arkidiosesis sang Capiz ang lokal nga Jubileo subong nga Hulyo 2026, ginpadaku sini ang padayon nga pag-uswag sang mga bokasyon sang pagkapari, sa diin may kabug-osan nga 171 ka mga seminaristas ang nagapaidalum subong sa pormasyon sa tatlo ka mga seminaryo.
Suno sa Arkidiosesis, ang mga seminaristas ang yara sa nagkatuhay nga mga institusyon, nga nagapakita sang tayuyon nga pangako sang Simbahan sa pagpreparar sang palaabuton nga mga pari para sa pastoral nga ministeryo.
Ang nagapanguna sa kadamuon sang mga seminaristas amo ang St. Pius X Seminary sa Lawa-an, syudad sang Roxas, nga nagaserbe seminaryo menor sang Arkidiosesis, nga may 100 ka mga seminaristas nga nagatuon subong. Gintukod sang 1957, ang institusyon padayon nga nagaserbe bilang panguna nga balay sang pormasyon para sa mga pamatan-on nga lalaki nga nagahantop sang pagkapari sa sekondarya nga lebel.
Samtang, ang Sancta Maria Mater et Regina Seminarium, ang seminary mayor sang Arkidiosesis nga nahamtang sa Cagay, Roxas City, may yara sang 59 ka mga seminaristas nga nagatinguha sang pilosopikal kag teolohikal nga pormasyon bilang preparasyon sa ordinasyon sa pagkapari. Ang seminaryo nangin instrumento sa pagporma sang mga kaparian sa diosesis nga karon nagaalagad sa nagkalain-lain nga mga parokya kag mga ministeryo sa sulod kag sa guwa sang Capiz.
Nagakompleto sang listahan amo ang 12 ka mga seminaristas gikan sa Arkidiosesis sang Capiz nga sa karon nagapaidalum sa pormasyon sa University of Santo Tomas Central Seminary, sa diin nagapadayon ang ila pagtuon sa teolohiya kaupod ang mga seminaristas gikan sa iban pa nga mga diosesis sa pungsod.
Ang gintingob nga kabug-osan nga 171 ka mga seminaristas nagaserbe nga pamatuod sa nagapadayon nga mga pagtinguha sang Arkidiosesis sa pagpasanyog sang mga bokasyon sang pagkapari kag pagsiguro sang pagpadayon sang iya pastoral nga misyon.
Ang presentasyon sang mga seminaristas kabahin sang pag-obserbar sang Arkidiosesis sang iya duha ka kadalag-an subong nga Hulyo—ang ika-75 nga anibersaryo sang Diosesis sang Capiz, nga gintukod sang Hulyo 11, 1951, kag ang ika-50 nga anibersaryo sang pagbayaw sini bilang Arkidiosesis sang Capiz sang Enero 17, 1976.
Kaangut sini, ang mga lideres sang Simbahan sa pagpamuno ni Most Rev. Victor B. Bendico, D.D., Arzobispo sang Capiz nag-engganyo sa mga tumuluo nga magpadayon sa pagpangamuyo para sa mga bokasyon sang pagkapari kag relihiyoso kag sa pagsuporta sa mga seminaristas samtang nagaagi sila sa mga tinuig sang espirituhanon, intelektuwal, tawhanon, kag pastoral nga pormasyon bilang pagpreparar para sa ila palaabuton nga ministeryo sa Simbahan.
