06/10/2026
Ang pinipintuhong imahen ng Mahal na Birhen sa simbahan ng parokya ay kaloob ni Obispo Villegas at ng EDSA Shrine sa bagong parokya. Ito ay inukit noong 2004 ni G. Luis Ac-ac, isang mahusay at kilalang mang-uukit mula sa Paete, Laguna. Inilalarawan ng imahen ang Mahal na Birheng Maria habang itinataas ang kanyang Banal na Sanggol na si Hesus, na may hawak na dahon ng olibo sa kanyang kanang kamay. Ito ay simbolo ng kapayapaan, halaw sa Aklat ng Genesis, kung saan isang kalapati ang bumalik kay Noe na may dalang bagong pitas na dahon ng olibo sa tukanito, na palatandaan na humupa na ang tubig-baha at naibalik na ng Diyos ang kapayapaan at buhay sa lupa (8:11).
Sa Pilipinas, bukod sa simbahan ng Kasiglahan Village, mayroon ding kaparehong imahen ng Mahal na Birhen na nakadambana sa Parokya ng Maria, Reyna ng Kapayapaan sa Bacolod City, Negros Occidental, na inukit naman ni Maximo Vicente. Subalit ang pinagmulan ng ganitong imahen ay mula sa France at tinatawag itong โNotre-Dame de France, Reine de la paixโ (Mahal na Ina ng Pransya, Reyna ng Kapayapaan).
Noong 1937, nakakuha ng inspirasyon si Roger de Villiers para sa estatwa ng Birhen sa tuktok ng gusali sa pamamagitan ng paglikha ng imahen ng Reyna ng Kapayapaan, na may taas na 7 m, para sa tuktok ng Pontifical Pavilion ng Universal Exhibition sa Paris noong 1937, na naging Marian Pavilion sa sumunod na taon bilang pag-alaala sa ika-300 anibersaryo ng pagtatalaga ni Louis XIII sa Mahal na Birheng Maria bilang Reyna ng Kapayapaan. Pagkatapos ng eksibisyon, ninais ni Jean Cardinal Verdier, PSS,Arsobispo ng Paris, na ang makinรกng na-estatwa ng Mahal na Birhen ay hindi dapat maglaho, bagkus ay ilagay sa isang burol na malapit sa Paris at maging katumbas ng Sacrรฉ-Cลur sa Montmartre. Sa kabila ng pagsisikap ng Cardinal, nabaon sa limot ang kanyang mithiin dahil sa digmaan noong 1939 at sa kanyang pagkamatay noong 1940.
Pagkalipas ng halos 50 taon, naisakatuparan ni Edmond Fricoteaux, isang notaryo sa Saint-Denis, ang paglalagay ng estatwa sa Baillet-en-France, 18 km sa hilaga ng Paris. Nagsimula ang lahat matapos niyang samahan ang kanyang asawa sa isang peregrinasyon sa Roma noong Abril 1984, nang mapakinggan niya ang homilya ni Cardinal Bernardin Gantin sa Basilika ng Santa Maria Maggiore na tumimo sa kanyang puso at nagbunsod sa kanya na mangumpisal. Nagdulot ito ng higit na pagkauhaw sa Diyos, kayaโt nagbasa siya ng mga talambuhay ng mga santo, lalo na ang mga aklat na โFather Larny, Priest and Mysticโ at โThe Secret of Maryโ ni San Luis Maria de Montfort. Nag-uumapaw sa pagmamahal sa Mahal na Birheng Maria, nag-aayos siya ng maraming peregrinasyon. Bunga ng kanyang panalangin, ninais niyang maghandog ng isang kaloob sa Mahal na Birhen, at napagtanto niyang kalooban din ito ng Diyosโang maglagay ng isang malaking estatwa ng Mahal na Birhen. Sa biyaya ng Diyos, nakatabi niya sa eroplano si P. Renรฉ Laurentin. Nahimok siyang ipagpatuloy ang kanyang balak at nagtagubilin na kailangan niya ang pahintulot ng lokal na obispo, ang suporta ng isang relihiyosong kongregasyon, at higit sa lahat, kailangang ipinapakita ng Mahal na Birhen si Hesus sa estatwa. Ang obispo ay ang obispo ng Pontoise at ang Kongregasyon ay ang Servants of Jesus and Mary na itinatag ni P. Larny. Matapos ang paghahanap, natagpuan ni Edmond ang malaking estatwa noong 1938, at ito ay inilagay sa Baillet-en-France at binasbasan noong Oktubre 15, 1988.
Noong Abril 30, 2026, nagpetisyon sa Santa Sede si Obispo Ruperto Santos ng Antipolo, kaisa ang Parokya ng Maria, Ina ng Kapayapaan sa Kasiglahan Village sa pangunguna ni Reberendo Padre Michael Barboza Balatbat, OFS, upang ang banal na imahen ng Mahal na Birhen ay gawaran ng koronasyon sa ngalan at kapangyarihan ng Santo Papa. Ipinagkaloob ng Santa Sede ang nasabing kahilingan sa pamamagitan ng bisang dekreto ng Dicasterium de Culto Divino at Disciplina Sacramentorum noong Mayo 31, 2026. Isasagawa ang koronasyon ni Arsobispo Charles John Brown, Apostolic Nuncio, sa Oktubre 28, 2026.
Viva La Virgen!
Source: Le sanctuaire de la Confrรฉrie Notre-Dame de France, Reine de la Paix ; statues, mรฉdailles et objets de dรฉvotion, ร Baillet-en-France (Val-d'Oise).
Isinalin sa Tagalog ang original na texsto mula sa wikang French.
Rdo. Padre Michael Barboza Balatbat, OFS
