24/05/2025
MALIGAYANG KAPISTAHAN SANTA JUANA DE CUZA!
Mayo 24
Ipinanganak si Santa Juana noong panahon ng paghahari ni Herodes Antipas, sa isang mayamang angkan ng Hudyo sa Galilea. Lumaki siya sa isang munting kastilyo sa burol ng Tiberias. Marahil bata pa lamang ay ipinagkasundo na siyang mapangasawa kay Cuza, na naging katiwala ni Herodes Antipas, ang tetrarka ng Galilea. Siya'y ginawa ng kaniyang asawa bilang tagapamuno ng salapi.
Walang tiyak na istorya ang kaniyang buhay, at tanging tradisyon ang nagsasabi nito. Ngunit malinaw ang katotohanang sumibol ang liwanag at pagbabago nang pumasok si Jesus sa kaniyang buhay. Kabilang siya sa mga babaeng pinagaling ng Panginoon, kasama sina Santa Maria Magdalena at Susanna.
Bilang asawa ni Cuza, ang tagapamahala ng ari-arian ng sambahayan ni Herodes Antipas, si Juana ay isang babaeng may kayamanan at impluwensya. Matapos pagalingin, sinamahan ni Juana si Jesus at ang labindalawang disipulo sa kanilang paglalakbay sa bawat bayan at tumulong sa pagsuporta sa ministeryo ng Panginoon. Isa siya sa bukal na nagkaloob ng mga pagkain at mga panustos para sa Panginoon at Kaniyang mga disipulo mula sa kanyang sariling kayamanan (Lucas 8:1–3).
Noong Linggo ng muling pagkabuhay, isa siya sa tatlong babaeng nagtungo sa libingan ni Hesus upang kumpletuhin ang ritwal ng paglilibing ng mga Hudyo para sa labi ni Hesus. Natuklasan nila at ibinalita sa mga alagad ang tungkol sa libingang walang laman (Lucas 24:1-4). Ang pangyayaring ito ay ang paulit-ulit niyang inihayag sa sinuman—pagpapahayag ng paghahari ng Diyos sa sanlibutan. Naging tapat siyang disipulo hanggang kamatayan.
Panalangin
O butihing disipulo ni Hesus, Santa Juana de Cuza, tulungan mo kaming ibahagi ang aming yaman at talino sa paglilingkod sa Banal na Simbahang Katolika na itinatag ni Kristo na iyong pinaglingkuran noong ikaw ay narito pa sa lupa. Ngayong ikaw ay kabilang na sa mga nagpupuri sa Kanya, ay papupurihan namin siya sa pamamagitan ng aming pagtugon na di naghahangad ng anumang kapalit at papuri kundi kami ay magbahagi ng buong puso at kaluluwa. Ikaw nawa ay maging huwaran namin sa gawain namin upang maging tapat at mapag-kumbaba mong Disipulo ni Hesus sa kapanahunan. Amen.
