Camillian Vocation PH

05/03/2023

MABUTING BALITA AT PAGNINILAY: “Diyos ay Liwanag”

Marso 5, 2023. Ikalawang Linggo ng Apatnapung Araw na Paghahanda.

(Ngayon po ay araw ng Linggo, magsimba po tayo.)

MABUTING BALITA
Mateo 17, 1-9
Ang Mabuting Balita ng Panginoon ayon kay San Mateo

Noong panahong iyon, isinama ni Hesus si Pedro, at ang magkapatid na Santiago at Juan, at sila’y umakyat sa isang mataas na bundok. Samantalang sila’y naroon, nakita nilang nagbagong anyo si Hesus: nagliwanag na parang araw ang kanyang mukha, at pumuting parang busilak ang kanyang damit. Nakita na lamang at sukat ng tatlong alagad sina Moises at Elias na nakikipag-usap kay Hesus. Kaya’t sinabi ni Pedro kay Hesus, “Panginoon, mabuti pa’y dumito na tayo.

Kung ibig ninyo, gagawa ako ng tatlong kubol: isa sa inyo, isa kay Moises at isa kay Elias.” Nagsasalita pa siya nang liliman sila ng isang maningning na ulap. At mula rito’y may tinig na nagsabi, “Ito ang minamahal kong Anak na lubos kong kinalulugdan. Pakinggan ninyo siya!” Ang mga alagad ay natakot nang gayun na lamang nang marinig nila ang tinig, at sila’y napasubasob.

Nguni’t nilapitan sila ni Hesus at hinipo. “Tumindig kayo,” sabi niya, “huwag kayong matakot.” At nang tumingin sila ay wala silang nakita kundi si Hesus.
At habang bumababa sila sa bundok, iniutos ni Hesus sa kanila, “Huwag ninyong sasabihin kaninuman ang pangitain hangga’t hindi muling nabubuhay ang Anak ng Tao.”

Ang Mabuting Balita ng Panginoon.

Pagninilay:

Isang mapagpalang Linggo po sa ating lahat! Ang mga alagad ay gustong manatili sa mataas na estado na iyon. Kaaya-aya para sa kanilang makita nang ganoon si Hesus na nagliliwanag. Pati ang paligid ay nagliliwanag na tila araw. Ang mga ito’y mga bahagyang pagpapakita ng luwalhati ng Panginoong Hesus. Sino ba naman ang ayaw ng ginhawa at luwalhati? Subalit ang magandang pagtuunan ng pansin ay ang pagkatapos nito. Ito’y natapos ay bumaba rin sila sa bundok. Hindi nagtagal at nagpasakit at ipinako sa Krus si Hesus. Siya’y namatay. Sa ating buhay, hindi rin laging mayroong ginhawa.

Maraming beses tayong kailangang bumababa sa bundok. Maraming pagkakataon na saglit lang ang saya o tuwa matapos ay pagdurusa na naman. Sa pagpapakita ni Hesus ng Kanyang Liwanag ngayong araw na ito. Isa itong paalala sa atin na bagamat tila saglit lang ang mga kasiyahan sa mundo. Mayroon tayong higit na mas dapat paghandaan – doon kung saan ang Ligaya ay hindi natatapos. Doon kung saan wala nang pighati o lungkot. Walang iba ito kung hindi sa langit.

Gaya ni Hesus, ang Langit ay mararating sa pamamagitan ng pagbubuhat ng ating Krus sa buhay. Ang Krus na ito ay binibitbit ng may pag-ibig at sa tamang paraan. Ang mga sakripisyo sa ating buhay para sa mga mabubuting bagay para sa kapwa at sa pamilya ay isang Krus. Madali bang magpakabuti lalo’t kapag inaaway ka na? Madali bang magbigay kung ikaw mismo sa sarili ay maraming inaalala? Madali bang ipagtanggol ang tama kung tayo’y aalipustahin ng iba? Malamang ang sagot mo ay hindi.

Ang pagiging mabuti ay may kaakibat na sakripisyo.
Ang pagmamahal ay may kaakibat na paghihirap – mga gawa para sa minamahal. Masakit magbigay ngunit kung aalalahanin nating dito tayo magkakaroon ng buhay na walang hanggan, mas magiging madali ito. May gantimpala ang Diyos hindi man ito agad-agad makita sa ngayon. Magkakaroon tayo ng pag-asang ipagpatuloy ang mga laban sa buhay sa pamamagitan ng grasya at awa ng Diyos.

Si Hesus ang Liwanag ng ating buhay at hindi ito magbabago. Sa gitna ng mabibigat at madilim na pagsubok at problema, tawagin natin Siya at kapitan. Tila tayo mga punong nakatanim nang mabuti at mayroong sapat na Liwanag, tubig at hangin kung ganito. Diyos ang magtatawid sa atin sa anumang kakaharapin. Amen. +

Pagnilayan po natin ito. Amen. +
Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +

Pagninilay ni: F.M.M.J.
Pinagmulan ng Pagbasa: Tagalog Mass Readings © Awit at Papuri Communications

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

02/03/2023

The Camillian Father's Official Website: http://www.camillian.ph/vocation-and-discernment/

VOCATION AND DISCERNMENT

Vocation is a call from God to follow Christ in any form of life. It involves God’s call and our human response in discipleship. It is a divine gift since God initiates the activity, “Come and See” (John 1:39). The human response in discipleship must be seen as an ongoing relationship between God and the individual in a process of discernment, leading to a “tale of friendship with the Lord” (VC, 64).

Visit our website to read the full post: http://www.camillian.ph/vocation-and-discernment/

28/02/2023

Happy birthday Fr. Evan Paul Villanueva, MI! Father Evan is the current Provincial Superior of the Camillian Fathers.

May we pray for him this day and may we remember also to pray for vocations!

God bless us.

-------------------
BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

Happy Birthday Fr. Evan Paul Villanueva, MI

26/02/2023

MABUTING BALITA AT PAGNINILAY: “Laban sa Masama”

Pebrero 26, 2023. Unang Linggo ng Apatnapung Araw na Paghahanda.

(Ngayon po ay araw ng Linggo, magsimba po tayo. Ito po ay ating banal na obligasyon. Ang pagninilay po ay mababasa matapos ang ebanghelyo.)

MABUTING BALITA
Mateo 4, 1-11
Ang Mabuting Balita ng Panginoon ayon kay San Mateo

Noong panahong iyon: si Hesus ay dinala ng Espiritu sa ilang upang tuksuhin ng diyablo. Doon, apatnapung araw at apatnapung gabi nag-ayuno si Hesus, at siya’y nagutom. Dumating ang manunukso at sinabi sa kaniya, “Kung ikaw ang Anak ng Diyos, gawin mong tinapay ang mga batong ito.” Ngunit sumagot si Hesus, “Nasusulat,
‘Hindi lamang sa tinapay nabubuhay ang tao,
kundi sa bawat salitang namumutawi sa bibig ng Diyos.”
Pagkatapos nito’y dinala siya ng diyablo sa taluktok ng templo sa Banal na Lungsod. “Kung ikaw ang Anak ng Diyos,” sabi sa kanya, “magpatihulog ka, sapagkat nasusulat,
‘Ipagbibilin niya sa kanyang mga anghel na ingatan ka,’
‘Aalalayan ka nila,
upang hindi ka matisod sa bato.’”

Sumagot si Hesus, “Nasusulat din naman, ‘Huwag mong subukin ang Panginoon mong Diyos.’”
Pagkatapos, dinala din siya ng diyablo sa isang napakataas na bundok. Mula roo’y ipinatanaw sa kanya ang lahat ng kaharian ng sanlibutan at ang kayamanan ng mga ito. At sinabi ng diyablo, “Ibibigay ko sa iyo ang lahat ng ito, kung magpapatirapa ka at sasamba sa akin.”

Sumagot si Hesus, “Lumayas ka, Satanas! Sapagkat nasusulat,
‘Ang iyong Diyos at Panginoon ang sasambahin mo;
Siya lamang ang iyong paglilingkuran.’”
At iniwan siya ng diyablo. Dumating ang mga anghel at naglingkod sa kanya.
Ang Mabuting Balita ng Panginoon.

Full Readings: https://www.awitatpapuri.com/2023/02/26/linggo-pebrero-26-2023/

Pagninilay:

Isang mapagpalang unang Linggo ng Kuwaresma! Pagtuunan natin ng pansin ang tatlong tugon ni Hesus sa mga tukso. Una, “Hindi lamang sa tinapay nabubuhay ang tao.” Ikalawa, "Huwag mong subukin ang Panginoon mong Diyos.” Panghuli, sinabi ni Jesus, “Lumayas ka, Satanas!” at “Ang iyong Diyos at Panginoon ang sasambahin mo; Siya lamang ang iyong paglilingkuran.” Kapag tayo ay nasa harap ng tukso, gagamitin din natin ang mga ito at tandaan ang tatlong mahahalagang bagay na ito.

Mayroon tayong tatlong kaaway: ang mundo, ang diyablo, at ang laman. Binigyan din tayo ng Diyos ng tatlong haligi ng Kuwaresma upang kontrahin ang mga ito: ang pagbibigay o kawanggawa, panalangin, at pag-aayuno – una sa pagkain at kung hindi man ay sa kasalanan at sa mga bagay na nagdadala sa atin sa kasalanan.

Ang unang tugon ni Jesus sa mga tukso ay nagpapahiwatig na hindi tayo dapat masyadong abala sa kung ano ang kakainin, kung ano ang isusuot, o alinman sa mga materyal na bagay sa mundo. Hindi tayo nabubuhay sa tinapay lamang - ang tinapay ay kumakatawan sa ating mga pangangailangan sa katawan.
Nabubuhay din tayo sa pamamagitan ng Salita ng Diyos.

Kung mayroon tayo ng lahat ng kailangan natin o anumang gusto natin sa mundo, ngunit kulang sa kabanalan, maaring mawawalan tayo ng buhay na walang hanggan. Ano ang kahulugan ng pagkakaroon ng lahat ng gusto natin sa mundo kapag makakaranas tayo ng walang hanggang kamatayan pagkatapos? Ngunit, sa pamamagitan ng pagbabawas ng ating mga alalahanin para sa pagkain at iba pang mga pangangailangan ng katawan, maaari nating linisin ang ating mga kaluluwa at magbigay ng mas maraming oras para sa panalangin at pag-ibig sa kapwa. Kapag tayo ay nagsisi at ginawa ang tama, tayo ay maliligtas.

Pangalawa, kapag tayo ay nananalangin, ilalagay natin ang ating buong pagtitiwala sa Kanya. Ang paghamon sa Diyos ay nangangahulugan na kulang tayo sa pananampalataya sa Kanya at kailangan natin ng patunay mula sa Kanya. Gayunpaman, mayroon na Siyang isang patunay ng lahat ng ito na sumasaklaw sa lahat - ang Krus. Ito ay nagpapahiwatig ng pinakadakilang pag-ibig na maibibigay sa atin higit sa sinuman at ito ay mula sa Diyos.

Napatunayan pa Niya lalo ito noong isinakripisyo Niya ang Kanyang sarili para sa atin hanggang sa kamatayan. Sa huli, alam natin na maraming mga tukso sa ating paligid, ngunit mapagtatagumpayan natin ito sa pamamagitan ni Hesus. Ang mga tao ay madaling mabulag ng maraming kapangyarihan, pera, katanyagan, o prestihiyo.

Gayunpaman, ang pamumuhay ng mundo ay sumasalungat sa buhay ng isang tunay at tapat na Kristiyano na nababahala lamang sa paggawa ng mabuti sa iba. Mayroon tayong dalawang pagpipilian. Una, hindi nating gugustuhin bumili tungo sa pagpapayaman sa ating sarili sa labis na paraan o ang ikalagawa, hindi nating gugustuhin magbigay.

Isa lamang ang dapat nating piliin, at sa pagpapasya, nawa'y piliin natin ang Diyos at ang Kanyang mga paraan - Siya na nagmamahal sa atin sa kabila ng ating pagiging makasalanan mula pa sa simula. Ang pinakamatibay na ating sanggalang ay ang Banal na Katawan at Dugo ni Hesus sa Banal na Misa. Amen. +

Pagnilayan po natin ito. Amen. +

Saint Camillus de Lellis, pray for us!

Pagsasalin ni: C.J.T.
Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +

Pagninilay ni: F.M.M.J.
Pinagmulan ng Pagbasa: Tagalog Mass Readings © Awit at Papuri Communications

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

19/02/2023

MABUTING BALITA AT PAGNINILAY: “Pagpapatawad sa Kaaway”

Pebrero 19, 2023. Ika-7 Linggo sa Karaniwang Panahon.

MABUTING BALITA
Mateo 5, 38-48
Ang Mabuting Balita ng Panginoon ayon kay San Mateo

Noong panahong iyon, sinabi ni Hesus sa kanyang mga alagad: “Narinig ninyo na sinabi, ‘Mata sa mata at ngipin sa ngipin.’ Ngunit ngayo’y sinasabi ko sa inyo: huwag ninyong labanan ang masamang tao. Kung may sumampal sa iyo sa kanang pisngi, iharap mo pa sa kanya ang kabila. Kung ipagsakdal ka ninuman upang makuha ang iyong baro, ibigay mo sa kanya pati ang iyong balabal.

Kung sapilitang ipapasan sa iyo ng manlulupig ang kanyang dala nang isang kilometro, pasanin mo ito nang dalawang kilometro. Magbigay ka sa nanghihingi sa iyo, at huwag mong pahindian ang nanghihiram sa iyo.
“Narinig na ninyong sinabi, ‘Ibigin mo ang iyong kaibigan at kap**tan mo ang iyong kaaway.’

Ngunit ito naman ang sabi ko: ibigin ninyo ang inyong mga kaaway, at idalangin ninyo ang mga umuusig sa inyo upang kayo’y maging tunay na anak ng inyong Amang nasa langit. Sapagkat pinasisikat niya ang araw sa masasama at sa mabubuti, at pinapapatak niya ang ulan sa mga banal at sa mga makasalanan.

Kung ang mga umiibig sa inyo ang siya lamang ninyong iibigin, ano pang gantimpala ang inyong hihintayin? Hindi ba’t ginagawa rin ito ng mga publikano? At kung ang binabati lamang ninyo’y ang inyong mga kapatid, ano ang nagawa ninyong higit kaysa iba? Ginagawa rin iyon ng mga Hentil! Kaya, dapat kayong maging ganap, gaya ng inyong Amang nasa langit.”

Ang Mabuting Balita ng Panginoon

Full Readings: https://www.awitatpapuri.com/2023/02/19/linggo-pebrero-19-2023/

Pagninilay:

Isang mapagpalang Linggo po sa ating lahat! Malapit na po ang panahon ng Kuwaresma, ang paghahanda para sa Semana Santa. Ito’y magsisimula na sa Miyerkules ng Abo, Pebrero 22. Ano kaya ang maiaalay mo sa Panginoon? Alam ba ninyo na isang kaaya-ayang alay sa Diyos ang magpatawad ng mga kaaway at mga nakasakit sa atin? Dahil sabi sa Ebanghelyo, dito tayo nagiging tunay na anak ng Diyos. Hindi lang basta dahil nabinyagan kaya tayo naging anak ng Diyos, dapat mayroon ding gawa na gaya ng gawa ng Diyos. Kapag lumaki na ay dapat sinisikap maging Hesus sa ibang tao.

Ang Hesus na ating Diyos at Panginoon ay walang hangganan ang pagpapatawad. Araw-araw ay nagpapatawad Siya ng kasalanan ng marami. Sa umpisa pa lang ng ating araw, kapag tayo’y mayroon nang masamang naisip tungkol sa kapwa, sa loob ng bahay o sa social media – ito’y pagkakasala na bagamat hindi awtomatikong nakakamatay kung maituring.

Subalit, ang mga iyon ay kasalanan pa rin. Sa Banal na Misa at sa Kumpisal ay mapapatawad tayo ng Diyos sa mga kasalanang hindi malubha, at kahit malubha ay maaring mapatawad sa Kumpisal. Sa ating sariling mga nakasakitan, hindi naman ibig sabihin ng pagpapatawad ay pagkakasundo na. Ibig sabihin ng pagpapatawad ay pag-iwas sa hangaring maghiganti, maningil ng sala na tila utang. Ganito rin ang Diyos sa atin.

Hindi na natin dapat inaalala ang kanilang pagkakasala laban sa kanila ngunit lahat ng ito’y tinataas natin sa Diyos. Kung gayon, sa tulong Niya, mas makakayang magpatawad – malalaman natin ito kung tayo’y nakakapanalangin para sa taong nakasakit sa atin. Kung tayo lamang ay mahirap ngunit kapag kasama ang Diyos at may grasya Niya, lahat ay posible. Amen. +

Pagnilayan po natin ito. Amen. +
Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

12/02/2023

MABUTING BALITA AT PAGNINILAY: "Ating Pagkamakasalanan”

Pebrero 12, 2023. Ika-6 Linggo sa Karaniwang Panahon.

(Ngayon po ay Linggo, magsimba po tayo.)

MABUTING BALITA
Mateo 5, 17-37
Ang Mabuting Balita ng Panginoon ayon kay San Mateo

Noong panahong iyon, sinabi ni Hesus sa kanyang mga alagad: “Huwag ninyong akalaing naparito ako upang pawalang-bisa ang Kautusan at ang aral ng mga propeta. Naparito ako, hindi upang pawalang-bisa kundi para ipaliwanag at ganapin ang mga iyon. Tandaan ninyo ito: magwawakas ang langit at ang lupa, ngunit ang kaliit-liitang bahagi ng Kautusan ay di mawawalan ng bisa hangga’t hindi nagaganap ang lahat.

Kaya’t sinumang magpawalang-halaga kahit sa kaliit-liitang bahagi nito, at magturo nang gayon sa mga tao, ay ibibilang na pinakamababa sa kaharian ng Diyos. Ngunit ang gumaganap ng Kautusan at nagtuturo na tuparin iyon ay ibibilang na dakila sa kaharian ng Diyos.

Sinasabi ko sa inyo: kung ang pagsunod ninyo sa kalooban ng Diyos ay tulad lamang ng pagsunod ng mga eskriba at mga Pariseo, hindi kayo makapapasok sa kaharian ng Diyos.

“Narinig ninyo na noong una’y inutos sa mga tao, ‘Huwag kang papatay; ang sinumang makamatay ay mananagot sa hukuman.’ Ngunit ngayo’y sinasabi ko sa inyo: ang map**t sa kanyang kapatid ay mananagot sa hukuman; ang humamak sa kanyang kapatid ay mananagot sa Sanedrin, at sinumang magsabi sa kanyang kapatid ‘ulol ka!’ ay mapapasaapoy ng impiyerno.

Kaya’t kung naghahandog ka sa Diyos, at maalaala mo na may sama ng loob sa iyo ang kapatid mo, iwan mo muna ang iyong handog sa harap ng dambana at makipagkasundo ka sa kanya. Saka ka magbalik at maghandog sa Diyos.

“Kung may magsakdal laban sa iyo sa hukuman, makipag-ayos ka sa kanya habang may panahon, bago ka niya iharap sa hukom. At kung hindi’y ibibigay ka niya sa hukom, na magbibigay naman sa iyo sa tanod, at ikaw ay mabibilanggo. Sinasabi ko sa iyo: hindi ka makalalabas doon hangga’t hindi mo nababayaran ang kahuli-hulihang kusing.”

“Narinig ninyo na noong una’y iniutos sa mga tao, ‘Huwag kang makikiapid.’ Ngunit ngayo’y sinasabi ko sa inyo: ang sinumang tumingin nang may mahalay na pagnanasa sa isang babae, sa isip niya’y nakiapid na siya sa babaing iyon. Kung ang mata mo ang siyang nagiging sanhi ng iyong pagkakasala, dukutin mo at itapon!

Sapagkat mabuti pang mawalan ka ng isang bahagi ng katawan kaysa buo ang iyong katawang itapon sa impiyerno. Kung ang iyong kamay ang siyang nagiging sanhi ng iyong pagkakasala, putulin mo at itapon! Mabuti pang mawalan ka ng isang bahagi ng katawan kaysa buo ang iyong katawang itapon sa impiyerno.

“Sinabi rin naman, ‘Kapag pinahiwalay ng lalaki ang kanyang asawa, ito’y dapat niyang bigyan ng kasulatan ng paghihiwalay.’ Ngunit ngayo’y sinasabi ko sa inyo: kapag pinahiwalay ng lalaki ang kanyang asawa nang hindi naman ito nangangalunya, at ito’y nag-asawang muli, ang lalaking iyo’y nagkasala – itinulak niya ang kanyang asawa sa pangangalunya.

At sinumang mag-asawa sa babaing hiniwalayan ay nangangalunya.”
“Narinig pa ninyo na noong una’y iniutos sa mga tao, ‘Huwag kang sisita sa iyong pinanumpaang pangako bagkus ay tupdin mo ang iyong sinumpaan sa Panginoon.’ Ngunit ngayo’y sinasabi ko sa inyo: huwag na kayong sumumpa kung nangangako kayo.

Huwag ninyong sabihing, ‘Saksi ko ang langit,’ sapagkat ito’y trono ng Diyos; o kaya’y ‘Saksi ko ang lupa,’ sapagkat ito’y tuntungan ng kanyang mga paa. Huwag din ninyong sabihing, ‘Saksi ko ang Jerusalem,’ sapagkat ito’y lungsod ng dakilang Hari. Ni huwag mong sabihing, ‘Mamatay man ako,’ sapagkat ni isang buhok sa iyong ulo’y hindi mo mapapuputi o mapaiitim.

Sabihin mo na lang na ‘Oo’ kung oo at ‘Hindi’ kung hindi; sapagkat buhat na sa masama ang anumang sumpang idaragdag dito.”
Ang Mabuting Balita ng Panginoon.

Full Readings: https://www.awitatpapuri.com/2023/02/12/linggo-pebrero-12-2023/

Pagninilay:

Isang mapagpalang Linggo po sa ating lahat! Minsan, iniisip natin na hindi tayo masasamang tao tulad ng iba kung hindi tayo mga kriminal na pumapatay o nanggagahasa sa iba, at kung hindi tayo katulad ng mga napapanood natin sa mga teleserye sa telebisyon na nangangalunya.

Gayunpaman, hinahamon tayo ng Panginoon ngayon na lampasan ang karaniwang pag-iisip at suriing mabuti ang ating sarili. Sinabi Niya na kapag ang isang tao ay tumingin nang may pagnanasa, ang taong iyon ay nagkasala na ng pangangalunya. Sinabi niya na ang pagpatay sa isang kapatid ay hindi nangangahulugan lamang ng pagpatay sa kanilang katawan. Maaari rin itong p**t na tumutukoy sa makasalanang galit, sapagkat mayroon namang hindi.

Ang mga ito ay dahil ang kasalanan ay nagmumula sa loob sa ating mga puso. Bago magkasala ang tao sa kanyang gawa, siya ay nagkasala na sa pamamagitan ng pag-iisip. Samakatuwid, kailangan muna nating bantayan ang ating pag-iisip upang maiwasan ang kasalanan. Imposibleng gawin ito nang walang tulong ng panalangin.

Sa biyaya at liwanag ng Diyos, malalaman natin kung ano ang tama o mali at magkakaroon tayo ng lakas piliin na sundin ang tama. Sa kapangyarihan ng Diyos, tayo na Kanyang mga anak, ay maaaring labanan ang mga tukso simula sa ating mga iniisip, nadarama, at mga 'di magandang hangarin.

Panahon na ngayon upang suriin ang ating sarili matapos tayong mapaalalahanan ng katotohanang ito sa Ebanghelyo ngayon. Tanungin natin ang ating sarili, "Paano ako nagkasala sa aking mga iniisip at aking mga salita?" Pagkatapos, suriin din ang ating mga aksyon at makikita natin kung paano nagmula ang makasalanang gawaing iyon mula sa kasalanan natin sa ating salita.

Kung gagawin natin ito araw-araw, o gabi-gabi bago tayo matulog sa panalangin at humingi ng tawad sa Diyos, makakalapit tayo sa Diyos at sa kabanalan. Ang mga sakramento ng Banal na Eukaristiya at ang pagkumpisal sa pari ay ang dalawang haliging magpapatayo sa atin sa tuwing tayo ay bumagsak. Binibigyan tayo ng Diyos ng mga biyayang kailangan natin palagi hangga't ninanais natin ang mga ito. Amen. +

San Camilo ng Lellis, ipanalangin mo po kami.

Pagnilayan po natin ito. Amen. +
Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +

Pagninilay ni: F.M.M.J.
Pinagmulan ng Pagbasa: Tagalog Mass Readings © Awit at Communications

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

03/02/2023

Come and see...

Celebration of the Feast of the Presentation of the Lord inside the seminary.

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

29/01/2023

MABUTING BALITA AT PAGNINILAY: “Sino ang Pinagpala?”

Enero 29, 2023. Ika-4 na Linggo sa Karaniwang Panahon.

(Ngayon po ay Linggo, magsimba po tayo.)

MABUTING BALITA
Mateo 5, 1-12a
Ang Mabuting Balita ng Panginoon ayon kay San Mateo

Noong panahong iyon, nang makita ni Hesus ang napakaraming tao, umahon siya sa bundok. Pagkaupo niya’y lumapit ang kanyang mga alagad, at sila’y tinuruan niya ng ganito:
“Mapalad ang mga aba na wala nang inaasahan kundi ang Diyos, sapagkat makakasama sila sa kanyang kaharian.”

“Mapalad ang mga nahahapis, sapagkat aaliwin sila ng Diyos.”
“Mapalad ang mga mapagpakumbaba, sapagkat tatamuhin nila ang ipinangako ng Diyos.”
“Mapalad ang mga nagmimithing makatupad sa kalooban ng Diyos, sapagkat ipagkakaloob sa kanila ang kanilang minimithi.”
“Mapalad ang mga mahabagin, sapagkat kahahabagan sila ng Diyos.”

“Mapalad ang mga may malinis na puso, sapagkat makikita nila ang Diyos.”
“Mapalad ang mga gumagawa ng daan sa ikapagkakasundo, sapagkat sila’y ituturing ng Diyos na mga anak niya.”
“Mapalad ang mga pinag-uusig dahil sa kanilang pagsunod sa kalooban ng Diyos, sapagkat makakasama sila sa kanyang kaharian.”

“Mapalad kayo kapag dahil sa aki’y inaalimura kayo ng mga tao, pinag-uusig at pinagwiwikaan ng lahat ng uri ng kasamaan na pawang kasinungalingan. Magdiwang kayo at magalak, sapagkat malaki ang inyong gantimpala sa langit.”
Ang Mabuting Balita ng Panginoon.

Full Readings: https://www.awitatpapuri.com/2023/01/29/linggo-enero-29-2023/

Pagninilay:

Isang mapagpalang Linggo po sa ating lahat! Ngayon, natunghayan natin ang tanyag na sermon sa bundok Panginoong Hesus - ang mga pinagpala o "The Beatitudes." Ayon sa diksyunaryo, ang ibig sabihin nito ay "Supreme Blessedness". Sino ba ang hindi gustong pagpalain? Masasabi natin na lahat tayo ay gustong pagpalain. Subalit, kung titignan natin kung sino ang tinawag ni Jesus na pinagpala, tila ito ay kakaiba.

Ang mga pinagpapala ay ang mga dukha sa espiritu, mga nagdadalamhati, mapagpakumbaba, may matinding hangarin na sumunod sa kalooban ng Diyos, pinag-uusig at inaalimura dahil sa pagsunod sa Diyos at marami pang iba. Ngunit, ang lahat ng ito ay lubhang kabaligtaran ng itinuturo sa atin ng mundo, hindi ba?

Ang espiritu ng sanlibutan ay sumisingit sa ating isipan na kailangan nating taglayin ang lahat ng kayamanan, karangyaan at kapangyarihan upang maging masaya. Kaya't ang pagtalikod sa nga karangyaan upang pagpahalagahan ang Diyos nang higit sa lahat ay salungat sa gawi ng mundo. Ngunit, ano ang punto ng lahat ng ito? Dahil sa pagiging dukha sa espiritu, paghahapis at pagiging mapagpakumbaba, natututo tayong umasa sa Diyos lamang.

Makikilala natin Siya na ibang-iba sa mundo. Minsan, kailangan natin ng paalala na ang mundong ito ay pansamantala lamang, dahil tayo ay madaling mabulag ng mga bagay ng mundo na nakakalimutan natin ang Diyos. Sa mga pagdurusa, mas nakikita natin Siya. Mas lumalapit tayo sa Kanya sa pamamagitan ng pag-iwas sa mga makamundong bagay na karaniwang pumupuno sa ating puso at isipan.

Kapag tayo ay nagdadalamhati, aaliwin tayo ng Diyos. Kapag tayo ay mapagpakumbaba na walang ibang bagay na hinahangad, magkakaroon tayo ng tunay na kapangyarihan mula sa Diyos. Nariyan ang totoong kapangyarihan dahil hindi tayo kukuha ng anuman para sa ating sarili. Alam natin na ang lahat ng awtoridad ay mula sa Diyos at tayo lamang ay mga sisidlan at kasangkapan ng Kanyang biyaya at kapangyarihan.

Kay limitado natin kung tayo ay dumedepende lamang sa ating sarili! Ngunit, kung matututo tayong manalig sa Diyos at magtiwala sa Kanya nang walang pag-aalinlangan, anuman ang mga problema, pagsubok o pagsalungat na ating kinakaharap, maaari tayong magtagumpay sa pamamagitan ng Diyos na ating Kalasag at Batong Tanggulan. Amen. +

Pagnilayan po natin ito. Amen. +
Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +

Pagninilay ni: F.M.M.J.
Pinagmulan ng Pagbasa: Tagalog Mass Readings © Awit at Communications

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]

19/01/2023

Happy and blessed birthday, Fr. Cido, MI!

GIFT OF LIFE With all our hearts we greet our dear Superior Fr. Placido De Jose, MI a joy-filled birthday!

Fr. Cido is the Local Superior of the Scholasticate and Seminary Community.

19/01/2023

What is Vocation?
What is your Vocation?

18/12/2022

MABUTING BALITA AT PAGNINILAY: “Pamilya ay Mahalaga”

Disyembre 18, 2022. Ikaapat na Araw ng Misa de Gallo (Misa sa Madaling Araw).

Fourth Sunday of Advent (Violet).

MABUTING BALITA
Mateo 1, 18-24
Ang Mabuting Balita ng Panginoon ayon kay San Mateo

Ganito ang pagkapanganak kay Hesukristo. Si Maria na kanyang ina at si Jose ay nakatakda nang pakasal. Ngunit bago sila nakasal, si Maria’y natagpuang nagdadalang-tao. Ito’y sa pamamagitan ng Espiritu Santo. Isang taong matuwid itong si Jose na kanyang magiging asawa, ngunit ayaw niyang mapahiya si Maria, kaya ipinasiya niyang hiwalayan ito nang lihim.

Samantalang iniisip ni Jose ito, napakita sa kanya sa isang panaginip ang isang anghel ng Panginoon. Sabi nito sa kanya, “Jose, anak ni David, huwag kang matakot na tuluyang pakasalan si Maria, sapagkat siya’y naglihi sa pamamagitan ng Espiritu Santo. Manganganak siya ng isang lalaki at ito’y pangangalanan mong Hesus, sapagkat siya ang magliligtas sa kanyang bayan sa kanilang mga kasalanan.”

Nangyari ang lahat ng ito upang matupad ang sinabi ng Panginoon sa pamamagitan ng propeta:
“Maglilihi ang isang dalaga at manganganak ng isang lalaki,
at tatawagin itong Emmanuel”
ang kahuluga’y “Kasama natin ang Diyos”.

Nang magising si Jose, sinunod niya ang utos ng anghel ng Panginoon; pinakasalan niya si Maria.
Ang Mabuting Balita ng Panginoon.

Pagninilay:

Isang mapagpalang Linggo po sa ating lahat! Ito na nga ang huling Linggo ng Adbiyento at sa susunod na Linggo ay simula na ng Pasko! Napakaganda ng ating Ebanghelyo sapagkat makikita natin kung paanong pinili ng Diyos na magkatawangTao sa pamamagitan ng pagkakaroon ng pamilya gaya natin. Pinili Niya si Jose at si Maria upang maging magulang bagamat hindi talaga siya galing mula kay Jose sa laman. Sapagkat ang ating tuon ay para sa Mesiyas na si Hesus, hindi natin gaanong napagtutuunan ng pansin ang Kanyang ama dito sa lupa na si Jose.

Masunurin si San Jose sa Diyos. Wala siyang alinlangan basta’t kalooban ng Diyos. Sadyang napakalaki at napakalawak ng plano ng Diyos na pagkakatawangTao kaya marahil ay hindi niya iniisip na siya’y karapat-dapat para dito. Subalit noong siya’y inatasan ng Diyos sa pamamagitan ng anghel na ituloy ang pagpapakasal kay Maria, siya’y buong pusong sumunod. Ganito rin tayo sa mga plano ng Diyos sa atin. Marahil ay marami tayong nakikitang balakid na kailangang lagpasan ngunit kung iyon ang talagang plano ng Diyos, mangyayari iyon at Siya ang bahala sa lahat.

Kailangan lamang din nating matutong magtiwala sa Kanya. Ganito rin ang ating inang si Maria. Hindi niya alam kung paano mangyayari ang siya’y magkakaroon ng anak subalit nagtanong siya, “Paano ito mangyayari?” At sinagot siya ng anghel ng Panginoon na siya’y lulukuban ng Espiritu Santo. Walang imposible sa Diyos. Lahat ay mangyayari ayon sa kanyang plano.

Ngayong darating na panahon ng Kapaskuhan ay magkakaroon na naman tayo ng maraming pagtitipon o salu-salo. Makakaharap ulit natin ang ating mga pamilya at kaanak. Isang mahalagang alalahanin sa lahat sa gitna ng mga hidwaan, sama ng loob at mga ‘di pagkakaunawaan, ay ang disenyo ng Diyos na pamilya bilang ugat ng ating buhay. Kailangan nating magpatawad at magpasensya. Isang hudyat nito ay kung payapa na tayo at walang negatibong hangarin o iniisip. Hindi tayo mabubuhay ng walang pamilya. Maganda at plano ito ng Diyos para ipagpatuloy ang buhay sa mundo. Kung mayroon mang hindi pagkakasundo at hidwaan, ito’y buhat sa demonyo na gustong sirain ang plano ng Diyos.

Subalit ang nagtatagumpay sa lahat ng kahinaan at pagkakasakitan ay ang pag-unawa gamit ang karunungan ng Diyos, pag-intindi, pag-uusap at pagpapatawad. Dito tayo tunay na magkakaroon ng kapayapaan at pagkakaisa sa pamilya gaya ng nangyari sa Banal na Pamilya dahil sila’y sumunod sa kalooban ng Diyos sa kabila ng mga balakid na kinaharap. Sila’y nagtagumpay, naging Tahanan ng Mesiyas dito sa mundo at naging daan para sa kaligtasan ng lahat. Ang ating kanya-kanyang pamilya ay mayroon ding mahalagang misyon. Alamin at alagaan natin ito at gawing sentro ang Diyos upang maging maayos, mabuti at matiwasay ang lahat sa atin. Amen. +

Pagnilayan po natin ito. Amen. +

Saint Camillus de Lellis, ipanalangin mo po kami. +

Pagpalain po tayong lahat ng Mapagmahal at Makapangyarihang Diyos, at ipagsanggalang nawa Niya tayo laban sa tukso at masasama ngayon at magpakailanman. Amen. +

Pagninilay ni: F.M.M.J.
Pinagmulan ng Pagbasa: Tagalog Mass Readings © Awit at Papuri Communications

-------------------

BE ONE OF US!
Be a Camillian Brother or Priest.
If You Are:
-a senior high school graduate;
-a college undergraduate;
-a college graduate or a professional
Contact now:
The Vocation Team
St. Camillus Seminary
105 B. Gonzales St., Varsity Hills, Loyola Heights,
1108 Quezon City, Philippines
Mobile N0.: 09453901003
Landline: 398 1300
Email: [email protected]
[email protected]