13/02/2022
BASAHIN | Ang buong HOMILIYA ng LUBOS NA KAGALANG-GALANG ROBERTO O. GAA sa Pagdiriwang ng Banal na Eukaristiya bago ang naganap na People's Rally sa QCMC.
Magandang Umaga po sainyong lahat.
Kagabi po binabati ako ng mga kamag-anak ko, ng mga kaibigan ko, sinasabi sa akin, “congratulations Bishop!”, ang sabi ko sa kanila “ipagdasal niyo po ako, mahirap po ito”. Alam natin na ang simbahan mahirap mag-endorso ng kandidato.
Ako'y natutuwa sa buong proseso na aming pinagdaanan.
Kasi nakita namin sa aming sarili, unang-una, yung kasalatan ng simbahan, at ito’y ipinahayag din sa ating unang pagbasa (Jer 17:5-8), “kapag tayo ay umasa sa tao, kasumpa-sumpa ang ating kondisyon, pero ang taong umaasa sa Diyos ay magiging masagana” Ganun nga ang proseso na aming pinagdaanan, inumpisahan po natin, siguro duon sa pre-synodal consultaion pa, at sinasabi duon na, ito yung panahon na kailangan nating makinig, kung ano ang sinasabi ng Diyos sa mga nagsisimba o kaya sa mga hindi na rin nagsisimba at inumpisahan natin ito sa Pari.
Alam niyo po. Sa Diocese of Novaliches, every November po, nagkakaroon kami ng budget hearing, parang bihira po ito mangyari sa simbahan, may budget hearing pa, at duon naming pinaliwanag, ano ba ang priorities natin?
At sinabi ko na isa sa mga importanteng gagawin tayo ang manguna sa ating discernment, tayo ang manguna, alamin natin papano nga bang kilatisin natin yung proseso nating pinagdadaanan sa pagpili ng kandidato.
Tayo muna ang dadaan duon, ako nga ay napagod kasi pitong-pu’t tatlo pong Parokya na ipinaliwanagan po nito, ang sabi ko, “okey lang na mapagod kung magbubunga naman ito ng mabuti” Kaya ang nangyari po nuon, ipinaliwanag talaga, ano nga ba talaga ang discernment? Ipinaliwanag sa isang simpleng paraan, simpleng maunawaan, simpleng maituro.
Ito po ang sinasabi naming L.A.S.E.R. na kung saan yung letter L- Lifestyle. tinitingnan natin, ang lifestyle ba niya ay naayon sa isang naglilingkod? letter A- Achievements or Action. Ano nga ba ang nagawa na niya, ano nga ba ang track record? S- Supporters, na kung saan sino nga ba ang nagsusuporta sa kanya? Sino ang nagtataguyod sa kanya? Kasi makikita natin kung sino ang nagtataguyod sa kanya, saan din papunta ang pamamahala nitong kandidatong ito?, Letter E-Election conduct, siya ba ay sumusunod sa alituntunin o nagkakaroon ng bayaran, letter R- Reputation, ano nga bang reputation ng taong ito? Itong kandidatong ito? At sa lahat, ang pinakaimportante dito ay yung track record at achievements ng kandidato, kasi ito ang magpapatunay, ano nga ba ang ginawa na niya, ano ang importante sa kanya, ano ang ipagpapatuloy niya. At para sa akin, paulit -ulit po ito, ibat-ibang speakers pero pareho lang ang model ng discernment. Last Tuesday, pagkatapos ng mahabang panahon para sa pagkilatis, nagkaroon po ang meeting ang kaparian, at duon tinanong, ano nga ba ang ating tugon? Ano nga ba ang ating discernment? mind you, ang discernment po dito ay personal.
Ang bawat isang pari ay pinapahalagahan ng sariling pagkilatis, magkakaiba ang pinagdaanan, magkakaiba ang konteksto pero iisa ang proseso, pwedeng makaroon ng ibat-ibang produkto o end-result, at ang nagyari pa nga duon, may isang pari ang tumayo, sinabi sa kapulungan ng mga pari, “bishop bigyan niyo na lang kami ng “mandate” susunod na lang kami” Ang sabi ko, sa isip-isip ko, ayaw kong gawin yun, kasi buburahin niya ang bawat discernment ng isang tao, yung pagkilatis ng isang tao, mawawala. Para sa akin napakahalaga yun.
Pinagpatuloy ang pagkunsulta at pagtatanong. Ang nangyari, sinigurado namin na mayroon kaming quorum, duon sa clergy assembly and we have arrived at a consensus, ibig sabihin, nagkaruon ng pagtutugma-tugma ang personal discernment na pwede nating sabihin na ito ay naging communal discernment kaya nga ang mga pari dito, mga servants leaders ng mga Parokya, mga miyembro ng mga Parokya, ito po ang pagpapahayag ng ating communal discernment, AMEN! (palakpakan) hindi ito utos ko, hindi ito utos ng pari, ito ay hatak ng konsensya, bunga ng ating pananalangin, at para sa akin, nagkakaroon tayo ng isang galaw, at higit sa lahat nagkakaroon din ng isang nagpapagalaw sa atin,
and I would dare say it is the Holy Spirit making us move. Alam niyo po kahit kami mga pari, hindi naming pwedeng gamitin ang polpito sa pagkakampanya, as private citizens, as private filipinos, we can express our own choice, at wala pong mali dito, at ito, kayo po, tayong lahat po dito, it is an expression of our own choice. Ako’y natutuwa kasi, nagumpisa lang tayong mag-organize last Tuesday, at ito po tayo ngayon. Ako’y nagpapasalamat sa mga tumugon, sa mga nagpapatuloy na nagninilay at nangingilatis, sa patuloy na tumutugon sa hamon ng kanilang panalangin. O sige, sabihin na natin, nandito nagpapahayag ng collective discernment ang simbahan but the church will remain open to all. Uulitin natin, the church will remain open to all. Wala po tayong iitsipwera wala po tayong ipagtatabuyan, kahit ibang kulay, iba ang oriyentasyon, ang lahat po ay kasama sa simbahan.
Bilang Obispo po, ito po ay malaking hamon para sa atin, dito natin nararamdaman ang ating kasalatan, na tayo ay humihingi ng tulong sa Diyos. Liwanagan ang ating isip.Liwanagan ang ating dadaanan. Upang sa bandang huli kahit anong mangyari, may kapanatagan ang ating loob. Sinasabi ko nga po sa mga kaparian o sa ilang kaparian pa lang, sinasabi ko na, napakatindi po ng mga volunteers na gumagalaw, at para sa akin, hindi ito magtatapos kapag may nanalo na.Ito po ay magpapatuloy kahit nagdeklara na kung sino ang nanalo. Sana nagising ang ating konsensya sa ating pakikiisa, sa ating responsibilididad sa pamahalaan, hindi po tayo nandito na pagkatapos nating iboto bahala na sila. Ito lang po ang ating umpisa, sa ating pakikilahok sa ating pamamahala. Kaya sana po, iisa ang ating pagalaw, iisa ang ating purpose, iisa sa ating paglakbay, para magkakasama tayong maglakbay at nagtutulungan, nakikilahok, sa lahat, hindi lang po sa simbahan kundi pat isa pangangailangan sa ating lipunan.
