Ina Ng Buhay Parish

27/08/2026

𝐃𝐀𝐈𝐋𝐘 𝐑𝐄𝐀𝐃𝐈𝐍𝐆𝐒 | 𝐀𝐔𝐆𝐔𝐒𝐓 27, 2026
Huwebes ng Ika-21 Linggo sa Karaniwang Panahon (II) | Paggunita kay Santa Monica

🙏UNANG PAGBASA
Ang simula ng unang sulat ni Apostol San Pablo sa mga taga-Corinto | 1 Corinto 1, 1-9

Mula kay Pablo na tinawag ng Diyos upang maging apostol ni Kristo Hesus, at mula sa ating kapatid na Sostenes –

Sa simbahang nasa Corinto – sa mga hinirang ng Diyos upang maging kanya sa pamamagitan ng pakikipag-isa kay Kristo Hesus kasama ng mga hinirang sa lahat ng dako, na tumatawag sa pangalan ng Panginoong Hesukristo, ang Panginoon nating lahat:

Sumainyo nawa ang pagpapala at kapayapaan mula sa Diyos na ating Ama at sa Panginoong Hesukristo.

Lagi akong nagpapasalamat sa Diyos dahil sa mga pagpapala niya sa inyo sa pamamagitan ni Kristo Hesus. Sapagkat sa inyong pakikipag-isa sa kanya, kayo’y umunlad sa lahat ng paraan, maging sa pananalita at kaalaman. Ang katotohanang ipinangaral namin tungkol kay Kristo ay malinaw na nakikita sa inyo anupat hindi kayo nagkulang sa anumang kaloob na espirituwal, habang hinihintay ninyong mahayag ang ating Panginoong Hesukristo. Kayo’y aalalayan niya hanggang sa wakas upang matagpuan kayong walang kapintasan sa Araw ng ating Panginoong Hesukristo. Tapat ang Diyos na tumawag sa inyo upang kayo’y makipag-isa sa kanyang Anak na si Hesukristong ating Panginoon.

Ang Salita ng Diyos.

🙏SALMONG TUGUNAN
Salmo 144, 2-3. 4-5. 6-7

Pupurihin ko ang ngalan
ng P**n magpakailanman.

Pupurihin ko’t pasasalamatan ang Diyos araw-araw,
di ako titigil ng pasasalamat magpakailanman.
Dakila ang P**n, at karapat-dapat na siya’y purihin;
ang kadakilaan niya ay mahirap nating unawain.

Pupurihin ko ang ngalan
ng P**n magpakailanman.

Sa alinmang lahi, ang iyong ginawa ay papupurihan,
ihahayag nila ang mga gawa mong makapangyarihan.
Ang karangalan mo at pagkadakila’y ipamamalita,
at isasaysay ko ang mga gawa mo na kahanga-hanga.

Pupurihin ko ang ngalan
ng P**n magpakailanman.

Ang mga gawa mong makapangyariha’y ipamamalita;
sa lahat ng tao’y aking sasabihing ikaw ay dakila.
Ihahayag nila ang lahat ng iyong mga kabutihan,
aawitin nila ang kabutihan mo’t iyong kabaitan.

Pupurihin ko ang ngalan
ng P**n magpakailanman.

🙏ALELUYA
Mateo 24, 42a. 44

Aleluya! Aleluya!
Lagi tayong magtanod
sapagkat di natin talos
ang pagbabalik ni Hesus.
Aleluya! Aleluya!

🙏MABUTING BALITA
Ang Mabuting Balita ng Panginoon ayon kay San Mateo
| Mateo 24, 42-51

Noong panahong iyon, sinabi ni Hesus sa kanyang mga alagad, “Kaya magbantay kayo, sapagkat hindi ninyo alam kung anong araw paririto ang inyong Panginoon. Tandaan ninyo ito: kung alam lamang ng puno ng sambahayan kung anong oras ng gabi darating ang magnanakaw, siya’y magbabantay at hindi niya pababayaang pasukin ang kanyang bahay. Kaya maging handa kayong lagi, sapagkat darating ang Anak ng Tao sa oras na di ninyo inaasahan.

“Ang tapat at matalinong alipin ang siyang pinapamahala ng kanyang panginoon sa ibang mga alapin, upang bigyan sila ng kanilang pagkain sa karampatang panahon. Mapalad ang aliping iyon, kapag dinatnan siyang gumagawa ng gayun sa pagbabalik ng kanyang panginoon! Sinasabi ko sa inyo: pamamahalain siya ng kanyang panginoon sa lahat ng kanyang ari-arian. Ngunit kung masama ang aliping iyon, sasabihin niya sa sarili, ‘Matatagalan pa bago magbalik ang aking panginoon,’ at sisimulang bugbugin ang kanyang mga kapwa alipin, at makipagkainan at makipag-inuman sa mga lasenggo. Babalik ang panginoon ng aliping iyon sa araw na hindi niya inaasahan at sa oras na hindi niya alam. Buong higpit na parurusahan siya ng Panginoon, at isasama sa mga mapagpaimbabaw. Doo’y tatangis siya at magngangalit ang kanyang ngipin.”

Ang Mabuting Balita ng Panginoon.

27/08/2026

𝐃𝐀𝐈𝐋𝐘 𝐑𝐄𝐀𝐃𝐈𝐍𝐆𝐒 | 𝐀𝐔𝐆𝐔𝐒𝐓 26, 2026
Miyerkules ng Ika-21 Linggo sa Karaniwang Panahon (II)

🙏UNANG PAGBASA
Pagbasa mula sa ikalawang sulat ni Apostol San Pablo sa mga taga-Tesalonica | 2 Tesalonica 3, 6-10. 16-18

Mga kapatid, iniuutos namin sa inyo sa pangalan ng Panginoong Hesukristo, na layuan ang mga tamad at ayaw mamuhay ayon sa mga tagubilin namin sa inyo. Alam naman ninyo na dapat ninyong tularan ang aming ginawa. Hindi kami nahiyang magtrabaho nang kami’y nariyan pa. Hindi kami tumanggap ng anumang bagay kaninuman nang hindi namin binabayaran. Nagpagal kami araw-gabi upang hindi maging pasanin ng sinuman sa inyo. Ginawa namin ito hindi dahil sa wala kaming karapatang maghintay ng inyong tulong kundi upang kayo’y bigyan ng halimbawang dapat sundan. Nang kasama pa namin kayo, ito ang tagubiling ibinigay namin sa inyo: “Huwag ninyong pakanin ang sinumang ayaw gumawa.”

Ang Panginoon na bukal ng kapayapaan ang siya nawang magkaloob sa inyo ng kapayapaan sa lahat ng pagkakataon. Nawa’y sumainyong lahat ang Panginoon.

Akong si Pablo ang sumulat ng pagbating ito: Binabati ko kayo. Ito ang aking lagda sa lahat ng sulat ko. Ganito ako sumulat.

Nawa’y sumainyong lahat ang pagpapala ng ating Panginoong Hesukristo.

Ang Salita ng Diyos.

🙏SALMONG TUGUNAN
Salmo 127, 1-2. 4-5

Mapalad ang sumusunod
na taong may takot sa D’yos.

Mapalad ang bawat tao na sa Diyos ay may takot,
ang maalab na adhika’y sumunod sa kanyang utos.
Hindi siya magkukulang sa anumang kailangan,
ang buhay ay maligaya’t uunlad ang kanyang buhay.

Mapalad ang sumusunod
na taong may takot sa D’yos.

Ang sinuman kung ang Diyos buong pusong susundin,
buhay niya ay uunlad at laging pagpapalain.
Mula sa Sion, pagpapala nawa ng Diyos ay tanggapin,
at makita habang buhay, pag-unlad ng Jerusalem.

Mapalad ang sumusunod
na taong may takot sa D’yos.

🙏ALELUYA
1 Juan 2, 5

Aleluya! Aleluya!
Lubos na magtatamasa
ng pag-ibig ng D’yos Ama
ang sumunod sa Anak n’ya.
Aleluya! Aleluya!

🙏MABUTING BALITA
Ang Mabuting Balita ng Panginoon ayon kay San Mateo | Mateo 23, 27-32

Noong panahong iyon, sinabi ni Hesus, “Sa aba ninyo, mga eskriba at mga Pariseo! Mga mapagpaimbabaw! Ang katulad ninyo’y mga libingang pinaputi, magaganda sa labas, ngunit sa loob ay puno ng kabulukan at buto ng mga patay. Ganyang-ganyan kayo! Sa paningin ng tao’y mabubuti kayo, ngunit ang totoo, punung-puno kayo ng pagpapaimbabaw at kasamaan.

“Sa aba ninyo, mga eskriba at mga Pariseo! Mga mapagpaimbabaw! Ipinagtatayo ninyo ng mga libingan ang mga propeta at ginagayakan ang mga puntod ng mga taong namuhay nang matuwid. At sinasabi ninyo, ‘Kung kami sana’y nabuhay sa kapanahunan ng aming mga ninuno, hindi namin ipapapatay ang mga propeta.’ Sa sinabi ninyong iyan, inaamin ninyong kayo’y mga anak ng mga nagpapatay sa mga propeta! Sige! Tapusin ninyo ang pinasimulan ng inyong mga ninuno!”

Ang Mabuting Balita ng Panginoon.

27/08/2026

𝐌𝐄𝐃𝐈𝐂𝐀𝐋 𝐌𝐈𝐒𝐒𝐈𝐎𝐍 𝐀𝐍𝐃 𝐁𝐀𝐑𝐀𝐍𝐆𝐀𝐘 𝐂𝐀𝐑𝐀𝐕𝐀𝐍

Bilang bahagi ng pagdiriwang ng ating ika-40 na Parochial Fiesta, sa pangunguna ng Parish Social Action Ministry (PSAM), buong puso naming inaanyayahan ang lahat ng ating mga ka-parokya ng Ina ng Buhay Parish na makibahagi sa isang makabuluhang programa ng paglilingkod sa ating komunidad.

Magkakaroon po tayo ng LIBRENG MEDICAL MISSION at BARANGAY CARAVAN ngayong August 29, 2026 (Sabado), mula 8:00 AM hanggang 11:00 AM sa INBP Multi-Purpose Hall.

Halina’t makiisa, magpasuri, at samantalahin ang mga serbisyong handog para sa ating mga ka-parokya. Sama-sama nating ipagdiwang ang ika-40 taon ng ating kapistahan sa pamamagitan ng pagmamalasakit, paglilingkod, at pagkakaisa. ❤️

Libre at bukas para sa lahat!

24/08/2026

𝐃𝐀𝐈𝐋𝐘 𝐑𝐄𝐀𝐃𝐈𝐍𝐆𝐒 | 𝐀𝐔𝐆𝐔𝐒𝐓 25, 2026
Martes ng Ika-21 Linggo sa Karaniwang Panahon

🙏UNANG PAGBASA
Pagbasa mula sa ikalawang sulat ni Apostol San Pablo sa mga taga-Tesalonica | 2 Tesalonica 2, 1-3a. 14-17

Tungkol naman sa pagparito ng ating Panginoong Hesukristo at sa pagtitipon niya sa atin, ipinamamanhik namin sa inyo, mga kapatid, na huwag kayong magugulat agad o mababahala sa balitang dumating na ang Araw ng Panginoon. Huwag kayong maniniwala kahit sabihin nilang ito’y hula o pahayag, o kaya’y sulat na galing sa amin o sa anumang paraan, huwag kayong padadaya kaninuman.

Tinawag kayo ng Diyos sa pamamagitan ng Mabuting Balitang ipinahayag namin sa inyo upang makasama sa kaluwalhatian ng ating Panginoong Hesukristo. Kaya nga, mga kapatid, manatili kayong matatag sa mga katotohanang itinuro namin sa inyo, maging sa salita o sa sulat.

Aliwin nawa kayo ng ating Panginoong Hesukristo at ng ating Diyos at Ama na umibig sa atin at sa kanyang habag ay nagbigay sa atin ng walang pagbabagong lakas ng loob at matibay na pag-asa. Bigyan nawa kayo ng matatag na kalooban upang inyong maipahayag at maisagawa ang lahat ng mabuti.

Ang Salita ng Diyos.

🙏SALMONG TUGUNAN
Salmo 95, 10. 11-12a. 12b-13

Panginoo’y paririto
upang hatulan n’ya tayo.

“Panginoo’y siyang hari,” sa daigdig ay sabihin,
“sanlibuta’y matatag na, kahit ito ay ugain;
sa paghatol sa nilikha, lahat ay pantay sa paningin.”

Panginoo’y paririto
upang hatulan n’ya tayo.

Lupa’t langit ay magsaya, umugong ang kalaliman,
lahat kayo na nilikhang nasa tubig ay magdiwang.
Ang bukirin at ang lahat ng naroon ay sumisigaw.

Panginoo’y paririto
upang hatulan n’ya tayo.

Pati mga punongkahoy sa galak ay mag-awitan.
Ang P**n ay pupurihin, pagkat siya ay daratal,
paririto sa daigdig, upang lahat ay hatulan.
Tapat siya kung humatol at lahat ay pantay-pantay.

Panginoo’y paririto
upang hatulan n’ya tayo.

🙏ALELUYA
Hebreo 4, 12

Aleluya! Aleluya!
Buhay ang salita ng D’yos,
ganap nitong natatalos
tanang ating niloloob.
Aleluya! Aleluya!

🙏MABUTING BALITA
Ang Mabuting Balita ng Panginoon ayon kay San Mateo | Mateo 23, 23-26

Noong panahong iyon, sinabi ni Hesus, “Sa aba ninyo, mga eskriba at mga Pariseo! Mga mapagpaimbabaw! Ibinibigay ninyo ang ikapu ng gulaying walang halaga ngunit kinaliligtaan ninyong isagawa ang lalong mahahalagang aral sa Kautusan: ang katarungan, ang pagkahabag, at ang katapatan. Tamang gawin ninyo ang mga ito, ngunit huwag naman ninyo kaliligtaang gawin ang iba. Mga bulag na taga-akay! Sinasala ninyo ang niknik sa inyong inumin, ngunit nilulunok ninyo ang kamelyo!

“Sa aba ninyo, mga eskriba at mga Pariseo! Mga mapagpaimbabaw! Nililinis ninyo ang labas ng tasa at ng pinggan ngunit ang loob nito’y puno ng mga nahuthot ninyo dahil sa kasakiman at pagsasamantala. Bulag na Pariseo! Linisin mo muna ang mga nasa loob ng tasa at ng pinggan, at magiging malinis din ang labas nito!”

Ang Mabuting Balita ng Panginoon.

24/08/2026

𝐃𝐀𝐈𝐋𝐘 𝐑𝐄𝐀𝐃𝐈𝐍𝐆𝐒 | 𝐀𝐔𝐆𝐔𝐒𝐓 24, 2026
Kapistahan ni Apostol San Bartolome

🙏UNANG PAGBASA
Pagbasa mula sa aklat ng Pahayag | Pahayag 21, 9b-14

Wika ng anghel sa akin, “Halika, at ipakikita ko sa iyo ang Babaing makakaisang-dibdib ng Kordero.” Nilukuban ako ng Espiritu, at inihatid ako ng anghel sa ibabaw ng isang napakataas na bundok. Ipinakita niya sa akin ang Jerusalem, ang Banal ng Lungsod, na bumababa mula sa langit buhat sa Diyos. Nagliliwanag ito dahil sa kaningningan ng Diyos; kumikislap na gaya ng hiyas na haspeng sinlinaw ng kristal. Ang pader nito’y makapal at mataas at may labindalawang pinto, bawat isa’y may bantay na anghel. Nakasulat sa mga pinto ang pangalan ng labindalawang lipi ng Israel. Tatlo ang pinto ng bawat panig: tatlo sa silangan, tatlo sa timog, tatlo sa hilaga, at tatlo sa kanluran. Ang pader ng lungsod ay may labindalawang saligang-bato at nakasulat dito ang pangalan ng labindalawang apostol ng Kordero.

Ang Salita ng Diyos.

🙏SALMONG TUGUNAN
Salmo 144, 10-11. 12-13ab. 17-18

Talastas ng mga tao
dakilang paghahari mo.

Magpupuring lahat sa iyo, O Panginoon, ang iyong nilalang;
lahat mong nilikha ay pupurihin ka’t pasasalamatan.
Babanggitin nilang tunay na dakila ang ‘yong kaharian,
at ibababalitang tunay kang dakila’t makapangyarihan.

Talastas ng mga tao
dakilang paghahari mo.

Dakila mong gawa’y upang matalastas ng lahat ng tao,
mababatid nila ang kadikalaan ng paghahari mo.
Ang paghahari mo’y sadyang walang hanggan, hindi magbabago.

Talastas ng mga tao
dakilang paghahari mo.

Matuwid ang Diyos sa lahat ng bagay niyang ginagawa;
kahit anong gawin ay kalakip doon ang habag at awa.
Siya’y nakikinig at handang tumulong sa lahat ng tao
sa sinumang taong pagtawag sa kanya’y tapat at totoo.

Talastas ng mga tao
dakilang paghahari mo.

🙏ALELUYA
Juan 1, 49b

Aleluya! Aleluya!
G**o, Anak na Butihin
ng Diyos Amang masintahin,
ika’y hari ng Israel.
Aleluya! Aleluya!

🙏MABUTING BALITA
Ang Mabuting Balita ng Panginoon ayon kay San Juan | Juan 1, 45-51

Noong panahong iyon, hinanap ni Felipe si Natanael, at sinabi rito, “Natagpuan namin si Hesus na taga-Nazaret, ang anak ni Jose. Siya ang tinutukoy ni Moises sa kanyang sinulat sa Kautusan, at gayun din ng mga propeta.” “May magmumula bang mabuti sa Nazaret?” Tanong ni Natanael. Sumagot si Felipe, “Halika’t tingnan mo.”

Nang malapit na si Natanael ay sinabi ni Hesus, “Masdan ninyo ang isang tunay na Israelita; siya’y hindi magdaraya!” Tinanong siya ni Natanael, “Paano ninyo ako nakilala?” Sumagot si Hesus, “Bago ka pa tawagin ni Felipe, nakita na kita nang ikaw ay nasa ilalim ng puno ng igos.” “Rabi, kayo po ang Anak ng Diyos! Kayo ang Hari ng Israel!” wika ni Natanael. Sinabi ni Hesus, “nanampalataya ka ba dahil sa sinabi ko sa iyong nakita kita sa ilalim ng puno ng igos? Makakikita ka ng mga bagay na higit kaysa rito!” At sinabi niya sa lahat, “Tandaan ninyo: makikita ninyong bukas ang langit, at ang mga anghel ng Diyos ay manhik-manaog sa kinaroroonan ng Anak ng Tao!”

Ang Mabuting Balita ng Panginoon.

24/08/2026

𝐃𝐀𝐈𝐋𝐘 𝐑𝐄𝐀𝐃𝐈𝐍𝐆𝐒 | 𝐀𝐔𝐆𝐔𝐒𝐓 23, 2026
Linggo ng Ika-21 Linggo sa Karaniwang Panahon

🙏UNANG PAGBASA
Pagbasa mula sa aklat ni propeta Isaias | Isaias 22, 19-23

Sinabi ng Panginoon kay Sabnang katiwala sa palasyo:
“Aalisin kita sa iyong katungkulan,
at palalayasin sa iyong kinalalagyan.
Tatawagin ko sa araw na iyon ang aking lingkod,
si Eliaquim na anak ni Helcias.
Siya ang pagsusuutin ko ng iyong buong kasuotan,
ibibigay ko sa kanya ang iyong kapangyarihan,
siya ang magiging pinakaama ng Jerusalem at ng Juda.
Ibibigay ko sa kanya ang susi ng bahay ni David;
ang kanyang buksa’y walang makapagsasara
at walang makapagbubukas ng ipininid niya.
Itatayo ko siyang parang haligi ng tolda
itatayo ko nang matibay sa isang matatag na lugar
at siya’y magiging marangal na luklukan
para sa sambahayan ng kanyang ama.”

Ang Salita ng Diyos.

🙏SALMONG TUGUNAN
Salmo 137, 1-2a. 2bk-3. 6 at 8bk

Pag-ibig mo’y di kukupas,
gawain mo’y magaganap.

Ako, P**n, buong pusong aawit ng pasalamat,
sa harap ng mga anghel, pupurihin kitang ganap.
Sa harap ng iyong templo ay yuyuko at gagalang,
pupurihin kita roon, pupurihin ang ‘yong ngalan.

Pag-ibig mo’y di kukupas,
gawain mo’y magaganap.

Dahilan sa pag-ibig mo at sa iyong katapatan,
ika’y tunay na dakila, pati iyong kautusan.
Noong ako ay tumawag, tinanggap ko ang tugon mo,
sa lakas mong itinulong ay lumakas agad ako.

Pag-ibig mo’y di kukupas,
gawain mo’y magaganap.

Dakila man ang P**ng D’yos, mahal din niya ang mahirap
kumubli ma’y kita niya yaong hambog at pasikat.
Ang dahilan nito, P**n, pag-ibig mo’y di kukupas.
at ang mga sinimulang gawain mo’y magaganap.

Pag-ibig mo’y di kukupas,
gawain mo’y magaganap.

🙏IKALAWANG PAGBASA
Pagbasa mula sa sulat ni Apostol San Pablo sa mga taga-Roma | Roma 11, 33-36

Napakasagana ng kayamanan ng Diyos! Di matarok ang kayamanan, karunungan at kaalaman ng Diyos! Hindi malirip ang kanyang mga panukala at pamamaraan! Gaya ng nasusulat:

“Sapagkat sino ang nakaalam sa pag-iisip ng Panginoon,
O sino ang nakapagkaloob ng anuman sa Diyos
para siya nama’y gantimpalaan?”

Sapagkat mula sa kanya at sa pamamagitan niya at sa kanya ang lahat ng bagay. Sa kanya ang karangalan magpakailanman! Amen.

Ang Salita ng Diyos.

🙏ALELUYA
Mateo 16, 18

Aleluya! Aleluya!
Ikaw, Pedro, ang saligan
ng aking simbahang banal
na daig ang kamatayan.
Aleluya! Aleluya!

🙏MABUTING BALITA
Ang Mabuting Balita ng Panginoon ayon kay San Mateo | Mateo 16, 13-20

Noong panahong iyon, dumating si Hesus sa lupain ng Cesarea ng Filipos. Tinanong niya ang kanyang mga alagad, “Sino raw ang Anak ng Tao, ayon sa mga tao?” At sumagot sila, “Ang sabi po ng ilan ay si Juan Bautista kayo. Sabi naman ng iba, si Elias kayo. At may nagsasabi pang si Jeremias kayo o isa sa mga propeta.” “Kayo naman, ano ang sabi ninyo? Sino ako?” tanong niya sa kanila. Sumagot si Simon Pedro, “Kayo po ang Kristo, ang Anak ng Diyos na buhay.” Sinabi sa kanya ni Hesus, “Mapalad ka, Simon na anak ni Jonas! Sapagkat ang katotohanang ito’y hindi inihayag sa iyo ng sinumang tao kundi ng aking Amang nasa langit. At sinasabi ko naman sa iyo, ikaw ay Pedro, at sa ibabaw ng batong ito ay itatayo ko ang aking simbahan, at hindi makapananaig sa kanya kahit ang kapangyarihan ng kamatayan. Ibibigay ko sa iyo ang mga susi ng kaharian ng langit: ang ipagbawal mo sa lupa ay ipagbabawal sa langit, at ang ipahintulot mo sa lupa ay ipahihintulot sa langit.” At mahigpit niyang tinagubilinan ang kanyang mga alagad na huwag sabihin kaninuman na siya ang Kristo.

Ang Mabuting Balita ng Panginoon.

24/08/2026

𝑮𝑹𝑨𝑵𝑫 𝑴𝑨𝑹𝑰𝑨𝑵 𝑬𝑿𝑯𝑰𝑩𝑰𝑻 | 40𝒕𝒉 𝑷𝑨𝑹𝑶𝑪𝑯𝑰𝑨𝑳 𝑭𝑰𝑬𝑺𝑻𝑨 𝑪𝑬𝑳𝑬𝑩𝑹𝑨𝑻𝑰𝑶𝑵

Sa pagdiriwang ng ating ika-40 Parochial Fiesta, buong galak nating binuksan ang 2nd Grand Marian Exhibit para sa lahat!

Muli nating nasilayan ang iba’t ibang marilag at kahanga-hangang imahen ng Mahal na Ina mula sa iba’t ibang parokya—bawat isa ay sumasalamin sa natatanging debosyon, pananampalataya, at pagmamahal ng sambayanan kay Maria.

Nawa’y magsilbi ang exhibit na ito bilang pagkakataon upang higit nating mapagnilayan ang kagandahan ng ating pananampalataya at ang malalim na debosyon kay Maria, Ina ng Buhay. Sa bawat imahen, nawa’y mas lalo nating madama ang kanyang paggabay at pag-aaruga habang patuloy tayong lumalakad tungo sa kanyang Anak na si Hesus.

Maria, Ina ng Buhay, ipanalangin mo kami!

23/08/2026

𝑮𝑹𝑨𝑵𝑫 𝑴𝑨𝑹𝑰𝑨𝑵 𝑬𝑿𝑯𝑰𝑩𝑰𝑻 | 40𝒕𝒉 𝑷𝑨𝑹𝑶𝑪𝑯𝑰𝑨𝑳 𝑭𝑰𝑬𝑺𝑻𝑨 𝑪𝑬𝑳𝑬𝑩𝑹𝑨𝑻𝑰𝑶𝑵

Sa pagdiriwang ng ating ika-40 Parochial Fiesta, buong galak nating binuksan ang 2nd Grand Marian Exhibit para sa lahat!

Muli nating nasilayan ang iba’t ibang marilag at kahanga-hangang imahen ng Mahal na Ina mula sa iba’t ibang parokya—bawat isa ay sumasalamin sa natatanging debosyon, pananampalataya, at pagmamahal ng sambayanan kay Maria.

Nawa’y magsilbi ang exhibit na ito bilang pagkakataon upang higit nating mapagnilayan ang kagandahan ng ating pananampalataya at ang malalim na debosyon kay Maria, Ina ng Buhay. Sa bawat imahen, nawa’y mas lalo nating madama ang kanyang paggabay at pag-aaruga habang patuloy tayong lumalakad tungo sa kanyang Anak na si Hesus.

Maria, Ina ng Buhay, ipanalangin mo kami!

DISCLAIMER: No copyright infringement intended. All music content belongs to its respective owners and rights holders.

Send a message to learn more

23/08/2026

LIVE | 21ST SUNDAY IN ORDINARY TIME
August 23, 2026 | 6:30 PM

First Reading:
Isaiah 22: 19-23

Responsorial Psalm:
"Lord, your love is eternal; do not forsake the work of you hands."

Second Reading:
Romans 11: 33-36

Gospel:
Matthew 16 : 13-20

Mass Presider: Rev. Fr. Francis Han

23/08/2026

𝐇𝐀𝐑𝐀𝐍𝐀 𝐊𝐀𝐘 𝐌𝐀𝐑𝐈𝐀

Mga Himig ng Pananampalataya, Pag-ibig, at Pagpupugay kay Maria, Ina ng Buhay

Bilang isa sa mga natatanging handog ng ating ika-40 Kapistahan, sama-sama nating ipagdiwang ang pananampalataya sa pamamagitan ng musika at awit para kay Maria, Ina ng Buhay.

Sa gabing ito, magsasama-sama ang mga tinig mula sa Ina ng Buhay Parish at mga kapatid na parokya upang maghandog ng mga awitin bilang alay ng pananampalataya, pagmamahal, at debosyon kay Maria, Ina ng Buhay.

📅 Setyembre 5, 2026
🙏 Pagkatapos ng Banal na Misa ng Nobenaryo

Halina’t makiisa sa isang makabuluhang gabi ng awit, panalangin, at pagpupugay, kung saan ang bawat himig ay magiging alay at ang bawat tinig ay magiging panalangin kay Maria.

Sama-sama nating awitan at parangalan si Maria, Ina ng Buhay. 💙