31/05/2026
MEMORY VERSE FOR SUNDAY, MAY 31, 2026
"Ibinigay na sa akin ang lahat ng kapangyarihan sa langit at sa lupa" (Mateo 28:18)/"All authority in heaven and on earth has been given to me." (Matthew 28:18)
Panalangin: Sa ngalan ng Ama, ng Anak, at ng Espiritu Santo. O, Diyos ng kasaysayan, kami nagpupuri at nagpapasalamat sa Inyong walang hanggang kadakilaan, pagkalinga, at pagmamahal sa amin. Sa banal na misteryo ng Trinidad, patuloy po kayong nangungusap at nananawagan sa kahalagahan ng pagkakaisa, respeto, katarungan at hustisya, sa pagpapanibagong-hubog at tunay na pagbabago, at laloโt higit sa Dakilang Misyon ng paglilingkod lalo sa mga api at pinagsasamantalahan. Kaya naman, dalangin namin na gabayan kami sa pagtugon at pagsasabuhay ng lahat ng iyon. Sa ngalan ni Hesus, Amen.
Sa pagninilay na ito ng Dakilang Komisyon (Great Commission), ibinabalik ako sa panahon kung kailan ko naisip na pasukin ang buhay ng paglilingkod at serbisyo. Mula pa sa panahon na nabigyan kami ng pagkakataong maglingkod bilang mga g**o sa Sunday School at Vacation Church School, kung saan hindi bababa sa singkuwentang mga bata ng komunidad ang naabot at natuturuan. Hanggang sa maagang sinanay sa ibaโt ibang gawain ng simbahan, partikular sa gawain ng mga kabataan. Hanggang sa paglilingkod sa mas malawak na pamayanan ng mananampalataya sa Ecumenical Movement, at laloโt higit, ng piliin kong manirahan at magpatuloy sa paglilingkod sa mga abang pamayanan ng timog-silangang Mindanao. Sa munting simbahan na aking pinanggalingan, na una kong naging training ground, lumago at nahubog ang aking pananampalataya at kamalayang naglilingkod at nagsasabuhay sa dakilang Pagkabuhay-na Muli (resurrection).
Sa kabuuang teksto ng dakilang Komisyon, ipinakita ang isang larawan ng Kristong buhay (Anak), isinugo ng Ama (magulang), kasama ng Ama ang Anak na nagsugo sa Espirito Santo, ang katotohanang patuloy na kumikilos ang Banal na Trinidad (Holy Trinity), at ngayon Siyang nagbibigay sa atin ng isang malaki at mabigat na misyon โ ang maglingkod sa Kanyang bayan.
Ang Dakilang Misyon ay ang nagpapatuloy na paalala sa atin bilang mga mananampalataya at tagasunod ni Kristo, na hindi natatapos sa pagsisimba at pagbabasa ng Bibliya, ang ating tungkulin para maabot ang kaharian ng Diyos. Panawagan ito ng pagkilos, ng pagsasabuhay, ng paglilingkod. Sadlak pa rin sa dusa at hirap ang mamamayang Pilipino. Walang kahihiyang niyuyurakan pa rin ng maraming sobrang-yaman at nang mga nasa kapangyarihan ang dangal at dignidad ng mga tao. Laganap pa rin at patuloy ang paggrabe ng kawalan ng trabaho at lupa, kumersiyal na edukasyon, limitado at kapos na serbisyo medikal, โdi makatarungang buhis na harapang ibinubulsa ng iilan, nagpapatuloy na political unrest and dissatisfaction. Kasama na rin ang mabilis na pagkasira ng Inang kalikasan bunga ng kasakiman at pagsasawalang bahala.
Isinusugo tayo (misyon) at binibigyang kapangyarihan (empowering) na saan mang dako ng daigdig isapamuhay ang ating pananampalataya, tulad ng pagsugo ni Hesus sa kanyang mga disipulo. Buhay na halimbawa ang buhay ng nabuhay-na-muli na si Hesus na marapat nating tularan โ nagtuturo, nagpapagaling, nagbibigay buhay, kritikal sa mga kaganapan ilalim sa imperyong Romano maging sa pagmamalabis ng mga may kapangyarihan (sa loob at labas ng Templo), at kailanman laging isinasaalang-alang ang mga dukha at mahihirap, mga bata at matatanda, ang mga kababaihan, ang mga inaapi at pinagsasamantalahan.
Kaya, tayo ay sama-samang humayo at maglingkod sa Diyos!
A reflection on Matthew 28:16-20 by Ms. Benny F. Mendoza (Episcopal Diocese of Central Philippines)
Image: "Scutum Fidei" (Shield of the Faith/Shield of the Trinity) stained window at Trinity Episcopal Church on the Green (Diocese of Connecticut, The Episcopal Church, Anglican Communion)
ECP.Official
