13/03/2025
PANALANGIN PARA SA PILIPINAS. 🇵đź‡
Dakilang Diyos na makapangyarihan sa lahat, kami po ay lumalapit sa Iyo na may kababaang-loob at lubos na pananampalataya. Walang sinuman ang makahihigit sa’Yo at sa kapangyarihan ng Iyong salita.
Kami po ay naninikluhod sa Iyong Presensya bilang isang bansa, naniniwala sa Iyong salita na sinabi sa Mga Awit 33:12, “Mapalad ang bansa na ang Dios ay ang Panginoon.”
Ang aming mahal na bansang Pilipinas ay Iyong lupang hinirang at tinawag sa Iyong Pangalan. Ikaw ang tunay at nag-iisang Diyos. Kami po ay sumasamo na sa Iyong kabutihan, matugunan ang aming panalangin para sa pagkakaisa, kaayusan, katuwiran, at kapayapaan sa mga oras na ito.
Bilang isang bansang kumikilala sa Iyo at sa Iyong kabanalan, O Diyos, patawarin Mo po kami sa aming kakulangan na maihayag at sundin ang Iyong katotohanan. Pakalinisin Mo ang aming mga puso at isipan. Alisin Niyo po ang anumang galit, pagkakawatak-watak, at kasamaan sa aming mga puso. Turuan Niyo po kaming magtulungan bilang isang bayan.
Nananalangin po kami para sa aming mga pinuno. Bigyan Niyo po sila ng karunungan, katapatan, at malasakit upang kanilang magampanan ang kanilang tungkulin nang may katarungan at pagmamahal sa Iyo at sa bayan.
Malaya Kang kumilos, O Diyos, at buwagin ang anumang gawa ng kaaway maging ang kanyang mga plano na sumisira sa aming bansa at sa buhay ng aming mga kapwa Pilipino. Itinatakwil namin ang kaaway at pinapawalang-bisa ang anumang gawain nya sa aming bansang Pilipinas, sa Pangalan ni Hesus.
Naniniwala po kami, Panginoong Diyos, na ang katarungan Mo, katuwiran Mo, at ang Iyong layunin ang siyang mananaig sa aming bansa. Sapagkat ayon sa Iyong salita sa 2 Cronica 7:14, "Kung ang aking bayan, na tinatawag sa aking pangalan, ay magpapakumbaba, mananalangin, hahanapin ang aking mukha, at tatalikuran ang kanilang masasamang gawa, diringgin ko sila mula sa langit, patatawarin ko ang kanilang kasalanan, at pagagalingin ko ang kanilang lupain."
Maghari ka, O Diyos, sa aming mga puso, sa aming bansa, sa aming pamahalaan, at sa lahat ng mga pinunong ginawaran mo ng kapangyarihan dito sa Pilipinas at sa buong mundo.
Ikaw ang Diyos ng mga diyos at Hari ng mga hari. Kaya sa Iyo lamang ang lahat ng papuri at pagsamba. Ito po ang aming pagsamo’t dalangin sa Pangalan ni Hesus, Amen.
