Sinag Milagrosa - Our Lady of Miraculous Medal Parish, Peñabatan

30/04/2026

VIVA SAN JOSE!

Malugod at taos-pusong inaanyayahan ang buong sambayanan sa banal at makabuluhang pagdiriwang ng Kapistahan ni San Jose Manggagawa ng Pamayanan ng San Jose Manggagawa, Peñabatan ngayong ika-1 ng Mayo.

Ang banal na prusisyon ay sisimulan sa ganap na ika-6:00 ng umaga bilang pagpaparangal at pagpapasalamat sa ating pintakasing patron. Ito ay susundan ng pagdiriwang ng Banal na Misa sa ganap na ika-9:00 ng umaga na gaganapin sa Kubol ni San Jose Manggagawa, Peñabatan na pangungunahan ni Reb. P. Jimmy Palaganas.

Ang kapistahang ito ay pinangungunahan nina Bro. Santi Santos, SPPC Chairman ng SPPC Peñabatan, at Bb. Elsa Dionisio, Hermano Mayor para sa kapistahan ni San Jose Manggagawa.

Nawa’y sama-sama nating dakilain ang Panginoon sa pamamagitan ng halimbawa ni San Jose Manggagawa—isang huwaran ng kasipagan, kababaang-loob, at tapat na paglilingkod.

Inaanyayahan ang lahat na makiisa sa pananalangin at pakikiisa sa biyayang hatid ng pagdiriwang na ito.

Sumainyo ang kapayapaan ng Panginoon.

26/04/2026

SERMON NI FATHER
Ika-apat na Linggo ng Pasko ng Muling Pagkabuhay

Linggo ng Mabuting Pastol

“Only in the noise of silence can the voice of the Good Shepherd be heard. ’’

19/04/2026

SERMON NI FATHER
Ikatlong Linggo ng Pasko ng Muling Pagkabuhay

“In our own brokenness, we are never alone. He is with us. He, too, is broken…’’

18/04/2026

Maligayang Kaarawan po, Bishop Dennis!

Mula sa Parokya ng Mahal na Birhen ng Medalya Milagrosa, kami po ay taos-pusong nagpapasalamat sa Panginoon sa kaloob ng inyong buhay at tapat na paglilingkod bilang pastol ng Kanyang kawan. Sa inyong patnubay, patuloy naming nasasaksihan ang buhay na patotoo ng pananampalataya, kababaang-loob, at malasakit sa sambayanan ng Diyos.

Dalangin po namin na patuloy kayong pagkalooban ng masaganang biyaya, matibay na kalusugan, at walang humpay na lakas ng loob upang magampanan ang banal na tungkulin na ipinagkaloob sa inyo. Nawa’y patuloy kayong akayin ng Espiritu Santo at kalingain ng Mahal na Birhen sa bawat hakbang ng inyong
paglilingkod.

Ad multos annos po!

17/04/2026

13/04/2026

SERMON NI FATHER
Linggo ng Mabathalang Awa

“Magdiwang tayo at magpasalamat — may awa ang Diyos.

Nahaharap natin ang hirap ng buhay — may awa ang Diyos.

Sasaatin ang kapayapaan, sa ating sarili, sa ating daigdig — may awa ang Diyos!’’

10/04/2026

07/04/2026

PAMPAROKYANG PEREGRINASYON 2026
DEBOSYON MILAGROSA | LENTEN PILGRIMAGE

Mga larawan kuha sa naganap na Parish Lenten Pilgrimage noong Lunes Santo, (Marso 30, 2026) sa mga parokya sa Diyosesis ng San Pablo, Lalawigan ng Laguna.

Ang buong Parokya ng Mahal na Birhen ng Medalya Milagrosa ay taos pusong nagpapasalamat sa lahat ng mga naging bahagi ng Pamparokyang Peregrinasyon. Nawa ang gawaing ito ay masalamin natin si Kristo sa bawat kapwa nating nakakasalamuha, puno ng pag-asa sa hindi nagmamaliw na awa, ng ating Diyos na pag-ibig ay lubhang dakila. Muli po, maraming maraming salamat sa pakikiisa.

Narito ang mga parokya na naging bahagi ng Parish Lenten Pilgrimage 2026.

📍 Parokya ng San Polycarpio - Cabuyao, Laguna
📍 Parokya ng San Juan Bautista - Calamba, Laguna
📍Katedral at Parokya ng San Pablo, Unang Ermitanyo - San Pablo, Laguna
📍 Pambansang Dambana at Parokya ng San Antonio de Padua - Pila, Laguna
📍 Parokya ng Inmaculada Concepcion - Sta. Cruz, Laguna
📍 Pandiyosesis ng Dambana at Parokya ng Mahal na Birhen ng Guadalupe - Pagsanjan, Laguna
📍 Parokya ng San Sebastian - Lumban, Laguna

06/04/2026

SERMON NI FATHER
Domingo de Pascua

“Si Hesus ay muling nabuhay! Nalupig Niya at napagtagumpayan ang kamatayan. Binuksan para sa atin ang buhay na walang hanggan.

Tuloy-tuloy ang tagumpay. Hayaan nating buhay si Hesus sa ating sambayanan, pamilya, sariling buhay, sapagkat mayroong pagkakaisa at damayan, kababaang-loob at paglilingkod, pagpapatawad at pagmamahal. Iyan ang tunay na tagumpay!’’

04/04/2026

“Hindi Siya narito; Siya ay muling nabuhay.” (Lucas 24:6)

Sa Dakilang Kapistahan ng Pasko ng Muling Pagkabuhay, buong kagalakan nating ipinagdiriwang ang tagumpay ni Kristo laban sa kasalanan at kamatayan. Ang Kanyang Muling Pagkabuhay ang pinagmumulan ng ating pag-asa at patunay ng walang hanggang pag-ibig ng Diyos sa sangkatauhan.

Sa liwanag ng Panginoong muling nabuhay, inaanyayahan tayong lahat na magpanibago ng ating pananampalataya at patuloy na mamuhay bilang mga saksi ng Kanyang pag-ibig, awa, at pag-asa sa ating pang-araw-araw na buhay.

Kasabay ng masayang pagdiriwang na ito, ang Parokya ng Mahal na Birhen ng Medalya Milagrosa ay taos-pusong nagpapasalamat sa lahat ng naging kabahagi sa mataimtim at makabuluhang paggunita ng Mahal na Araw sa ating pamayanan ng pananampalataya.

Lubos po ang aming pasasalamat sa mga Traffic Enforcers, Barangay Tanod, Marshals, at Kapulisan na tumulong sa pagpapanatili ng kaayusan at kaligtasan ng lahat; sa Parish Pastoral Council at Sub-Parish Pastoral Council; sa mga Camarero ng mga Banal na Imahen; sa lahat ng mandated organizations ng parokya; sa mga Sponsors at nag-alay ng pamisa; sa mga Sponsors ng Altar Decorations at Altar of Repose; sa mga Sponsors ng Lights and Sounds; sa mga pamilyang tinapatan ng mga Estasyon ng Krus; sa mga Liturgical Ministries; sa Parish Youth Dancers; sa Parish Office Staff; sa mga Apostoles; at sa lahat ng mga mananampalataya at mga pamilya na nakibahagi sa pamamagitan ng kanilang paglilingkod, sakripisyo, at panalangin upang maging maayos, mataimtim, at makabuluhan ang ating pagdiriwang ng mga banal na araw.

Nawa’y ang biyaya ng Panginoong muling nabuhay ay patuloy na magbigay-liwanag sa ating mga puso at sa ating pamayanan.

Maligayang Pasko ng Muling Pagkabuhay!
Aleluya! Aleluya! Aleluya!

04/04/2026

Maligayang Pasko ng Muling Pagkabuhay!

Matapos nating samahan ang Panginoon sa mga araw ng Kanyang pagpapakasakit—sa katahimikan ng Huwebes Santo, sa pagninilay ng Biyernes Santo, at sa paghihintay ng Sabado de Gloria—ngayon ay buong galak nating ipinahahayag ang pinakadakilang balita ng ating pananampalataya: ang Panginoong Hesukristo ay muling nabuhay.

Ang muling pagkabuhay ni Kristo ay paalala sa atin na ang kadiliman ay hindi kailanman mananaig sa liwanag, at ang kamatayan ay walang huling salita. Sa Kanyang tagumpay, binuksan Niya ang daan tungo sa bagong buhay at nagbigay ng pag-asa sa bawat pusong naghahanap ng liwanag.

Sa gitna ng mga pagsubok ng ating buhay—mga paghihirap, pangamba, at mga pasaning dala natin araw-araw—inaanyayahan tayo ng Panginoon na magtiwala sa Kanya. Kung paanong ang krus ay nauwi sa muling pagkabuhay, gayon din ang ating mga pagdurusa ay maaaring maging daan tungo sa bagong pag-asa kung tayo ay mananatiling tapat sa Kanya.

Nawa’y ang pagdiriwang ng Pasko ng Pagkabuhay ay magpanibago sa ating pananampalataya, magpasigla sa ating pag-ibig sa Diyos at sa kapwa, at magbigay sa atin ng lakas upang maging saksi ng muling nabuhay na Kristo sa ating mga pamilya, pamayanan, at pang-araw-araw na buhay.

Kasama ng Mahal na Birhen ng Medalya Milagrosa, patuloy nating ipahayag sa buong mundo ang kagalakan ng Ebanghelyo:

Aleluya! Ang Panginoon ay muling nabuhay! Siya ay tunay na nabuhay! Aleluya!

Maligayang Pasko ng Muling Pagkabuhay sa inyong lahat.