Ang Humayo - Parokya ng Pag-akyat sa Langit ni Hesukristo

22/01/2026

Isang mabiyayang araw po sa ating lahat!

Ang buwan ng Enero ay panahong laan na natatangi sa Pilipinas upang parangalan ang salitang nagkatawang tao - ang Mahal na Poong Sto. Niño.

Kaugnay nito at bilang bahagi ng pagdiriwang ng Kapistahan sa taong ito, ipinababatid na magkakaroon ng Laro ng Lahi sa ika-24 ng Enero, Sabado sa ganap na ika-2:00 ng hapon dito sa ating simbahan. Ang lahat ng mga bata ay inaanyayahan na dumalo at makisaya sa mga palarong inihanda ng ating mga Hermano at Hermana.

Gayundin, sa ika-25 ng Enero ay gaganapin naman ang prusisyon at parada ng mga imahen ng Mahal na Poong Sto. Niño sa ganap na ika-2:00 ng Hapon. Ang pagtitipon ay mula ika-1:30 ng Hapon. Ang mga pagtitipunan o pagmumulan at ang ruta ay ang mga sumusunod:

SPPC TAAL: Mula sa Boundary ng Taal at Makinabang patungong simbahan ng Parokya

SPPC STO. CRISTO AT CENTRO: Mula sa Boundary ng Sto. Cristo at Longos (COLM) patungong simbahan ng Parokya

Magtatagpo ang tatlong SPPC sa may Bisita ng Sto. Cristo at sabay na pupunta sa simbahan

SPPC TRAMO: Mula sa tahanan ng Pamilya Pascual patungong simbahan ng Parokya

Ang lahat ay inaanyayahan na dumalo, makiisa, at makisaya sa pagdiriwang na ito.

Maraming salamat po, Viva Pit Señor!

21/01/2026

MUNTING HANDOG PARA KAY LOLO'T LOLA

Sa darating pong ika-22 ng Pebrero, 2026, ang Komisyon ng Kabataan ay magsasagawa ng isang Outreach Program para sa ating mga mahal na Lolo at Lola na nasa pangangalaga ng mga Madre sa EMMAUS HOUSE OF APOSTOLATES. Sila po ay mga lolo't lolang tahimik na nag-alay ng kanilang lakas at buhay para sa kanilang pamilya at komunidad - at ngayon, ang kailangan nila ay ang ating malasakit, pag-aaruga, at presensya.

Layunin po ng gawaing ito na matugunan ang kanilang pangunahing pangangailangan, makatulong sa pagpapanatili ng kanilang pasilidad, at higit sa lahat, ipadama sa kanila na sila ay mahalaga, inaalala, at hindi nag-iisa. Sa pagkakataong ito, kami po ay buong pagpapakumbabang kumakatok sa inyong mga pusong mapagbigay upang makiisa sa munting handog na may malaking kahulugan.

Narito po ang mga kagamitang maaari nating ialay bilang tanda ng ating pagkalinga at pagmamahal:
- Pagkain: Biscuit (tulad ng Skyflakes, Hansel, at iba pang walang palaman) at Instant Oatmeal
- Pangkalusugan: Adult Milk at Adult Diapers
- Personal na Gamit: Toiletries at mga damit (Daster, T-shirt, Shorts, at Pajamas)
- Pang-maintenance: Laundry Detergent, Panlinis ng Banyo, Walis, at Mop

Sa mga nagnanais pong magbahagi ng tulong, maging ito man ay in-kind o monetary, maaari po kayong makipag-ugnayan kina:
- Bro. Marvin Avanceña (Pangulo ng Komisyon ng Kabataan) https://www.facebook.com/PcyPPLH
- Bro. JC Magtalas (Pangulo ng Ministry of Altar Servers) https://www.facebook.com/people/Ministry-of-Altar-Server-Parokya-ng-Pag-Akyat-sa-Langit-ni-Hesukristo/100054500317931/
- Sis. Yzabella Ortega (Pangulo ng Komisyon ng Pamamahayag) https://www.facebook.com/PagakyatSaLangitniHesukristo

Maaari rin po nating ialay ang ating mga donasyon sa mga Banal na Misa. Pakilagyan lamang po ng tanda na ito ay para sa "Outreach Program para sa mga Lolo at Lola."

Sa bawat munting handog, may ngiting mabubuo. At sa bawat tulong, may pusong muling mapapalakas.

Maraming Salamat po sa inyong bukas na palad, wagas na pagmamalasakit, at pagmamahal sa ating mga nakatatanda. Pagpalain nawa kayo ng Panginoong Hesus na Umakyat sa Langit!

19/01/2026

18/01/2026

KAPISTAHAN NG PANGINOONG HESUS, ANG BANAL NA SANGGOL

Ang Kapistahan ng Sto. Niño ay ating ipinagdiriwang tuwing Ikatlong Linggo ng Enero na karaniwang nakaugnay sa Panahon ng Kapaskuhan kahit na ito ay bahagi na ng Karaniwang Panahon. Sapagkat tampok sa kapistahang ito ay ang mga bata, angkop ngang ipahayag na ang Kapistahan ng Sto. Nino ay kapistahan ng mga bata sapagkat sa kamusmusan nila ay naghahari ang Diyos.

Natatangi ang mga pagdiriwang ng liturhiya ng Kapistahan ng Sto. Niño dito sa Pilipinas. Inaalaala natin ang pagdating ng pananampalatayang Kristiyano sa Pilipinas noong 1521 at ang unang binyag na ginanap sa kapuluan ng Pilipinas. Ito ang batayan ng pagdiriwang ng Simbahang Katoliko ng ika-500 taon ng Pagdating ng Kristiyanismo sa ating bansa. Tunay na malalim at makukulay ang mga pagdiriwang sa karangalan ng batang Jesus, at ang napakahalagang aspeto ng kapistahang ito ay ang pamimintuho sa pagkabata ng Panginoon, bahagi ng misteryo ng Pagkakatawang-tao ng Diyos.

Sa konteksto ng kulturang Filipino, may ibayong kahulugan ang pagdiriwang ng kapistahang ito. Natatangi ang pagturing ng ating lipunan sa mga bata dahil sila ay pinagmumulan ng naiibang pag-ibig at kagalakan. Bukod dito, sila rin ay may natatanging aral na ibinibigay sa mga nakatatanda - ang kamusmusan at kababaang-loob.

Sa iba’t ibang lugar sa Pilipinas, makikita ang mga imahen ng Sto. Niño na nakapangalan sa bawat lugar na may malawak at mahabang kasaysayan ng debosyon: Ang Sto. Niño de Cebu, Sto. Niño de Kalibo, Sto. Niño de Tondo, Sto. Niño de Pandacan at dito sa ating diyosesis ay ang Sto. Niño de Malolos. Bahagi ng kalinangan ng mga komunidad, pamilya at mga samahan ang pagkakaroon ng imahen ng Sto. Nino sa kanilang mga tahanan, simbahan, opisina at pook-kalakalan o commercial establishments.

Karaniwang tampok ang mga imahen ng batang Jesus - ang Diyos na Nagkatawang-tao na nanahan kasama natin, Siya ay ang Batang-Hari na may putong ng koronang ginto sapagkat Siya ang Hari ng Sanlibutan at naghahari magpakailanman. Malimit na kulay p**a ang kapa at kasuotan ng iba’t ibang imahen sapagkat sumisimbolo ito sa Dugo ng Manunubos, ang Panginoong Jesukristo ay Siyang Martir na tumubos ng mga kasalanan ng sanlibutan. Hawak Niya ang globong ginto na sumisimbolo sa mundo, at ang setro na naglalarawan ng kanyang walang hanggang kapangyarihan sa sanlibutan.

Mahal na Poong Sto. Niño, maawa ka sa amin.

15/01/2026

VIVA PIT SEÑOR STO. NIÑO!

Sa ika-25 ng Enero ay ating ipagdiriwang ang isang kapistahan na malapit sa ating mga Pilipino, ang pasimula ng Kristiyanismo sa ating bansa - ang Sto. Niño. Kaugnay nito, kayo ay malugod naming inaanyayahan upang makiisa sa pagdiriwang na ito.

Hinihikayat ang lahat ng nagmamay-ari ng mga imahen ng Sto. Niño na dalhin ito sa ating simbahan at itanghal sa inilaang altar upang mabasbasang muli at bitbitin ito sa prusisyon sa gabi. Igayak at isaayos ang mga Sto. Niño.

Mahal na Poong Sto. Niño, maawa po kayo sa amin!

11/01/2026

𝗞𝗔𝗣𝗜𝗦𝗧𝗔𝗛𝗔𝗡 𝗡𝗚 𝗣𝗔𝗚𝗕𝗜𝗕𝗜𝗡𝗬𝗔𝗚 𝗦𝗔 𝗣𝗔𝗡𝗚𝗜𝗡𝗢𝗢𝗡

𝑯𝒊𝒏𝒅𝒊 𝒏𝒂𝒈𝒍𝒖𝒘𝒂𝒕, 𝒅𝒖𝒎𝒂𝒕𝒊𝒏𝒈 𝒔𝒊 𝑯𝒆𝒔𝒖𝒔 𝒎𝒖𝒍𝒂 𝒔𝒂 𝑵𝒂𝒛𝒂𝒓𝒆𝒕, 𝑮𝒂𝒍𝒊𝒍𝒆𝒂, 𝒂𝒕 𝒔𝒊𝒚𝒂'𝒚 𝒃𝒊𝒏𝒊𝒏𝒚𝒂𝒈𝒂𝒏 𝒏𝒊 𝑱𝒖𝒂𝒏 𝒔𝒂 𝑰𝒍𝒐𝒈 𝑱𝒐𝒓𝒅𝒂𝒏. (𝐌𝐚𝐫𝐜𝐨𝐬 𝟏:𝟗)

Ginugunita sa kapistahang ito ang pagpapahayag kay Hesus bilang Anak na minamahal na lubos ng Diyos, ang Mesiyas (Kristo), na nilukuban ng Espiritu Santo.
Mula sa tradisyon ng Simbahan sa Silangan tuwing Pagpapakita ng Panginoon, ang pagdiriwang ng Kapistahang ito sa Simbahan ng Roma ay sa oktaba o ikawalong araw matapos ang Pagpapakita ng Panginoon na nagsimula pa noong ikawalong dantaon. Pormal itong ipinakilala sa buong Simbahan sa pamamagitan ng Kalendaryo ng Roma noong 1960 at kasakuluyang ipinagdiriwang sa Linggo kasunod ng Dakilang Kapistahan ng Pagpapakita ng Panginoon bilang pagwawakas sa Panahon ng Pasko ng Pagsilang.

09/01/2026

PAMBANSANG KAPISTAHAN NG NUESTRO PADRE, JESUS NAZARENO
Pintakasi at Patron ng SPPC Tramo

Ang Nazareno na kilala rin bílang Poong Hesus Nazareno ay isang imahe ni Hesukristo na may pasan-pasang krus at nakabihis sa kulay na maroon. Ito ay matatagpuan sa National Shrine and Minor Basilica of Jesus Nazarene, o kilala bilang Simbahan ng Quiapo.

Ang imahen ng Mahal na Poong Jesus Nazareno ay kasinglaki ng tao, may maitim na balat at nililok ng isang taga Mexico na karpintero bago binili ng isang paring noong panahon ng Kalakalang Galeon.

Nitong nagdaang taon, sa kapasiyahan ng mga Obispo sa ating bansa, itinalaga ang ika-9 na araw ng Enero bilang ang Pambansang Kapistahan ng Mahal na Poong Jesus Nazareno. Binigyang linaw din ng pamunuan ng simbahan ng Quiapo ang pag-aalis sa salitang 'Itim' sa titulo ng Señor.

Sa ating Parokya, tinitingalang patron ng SPPC Tramo ang Mahal na Poong Hesus Nazareno.

Maligayang Kapistahan po sa lahat ng namimintuho sa Mahal na Poong Nazareno. Walang hanggang pasasalamat!

𝐕𝐈𝐕𝐀, 𝐍𝐔𝐄𝐒𝐓𝐑𝐎 𝐏𝐀𝐃𝐑𝐄 𝐉𝐄𝐒𝐔𝐒 𝐍𝐀𝐙𝐀𝐑𝐄𝐍𝐎!

05/01/2026

KAPISTAHAN NG MAHAL NA POONG JESUS NAZARENO

Kaugnay ng nalalapit na Kapistahan ng Mahal na Poong Nazareno, narito ang talakdaan ng mga gawain at pagdiriwang ng Banal na Misa para sa Triduo at Kapistahan sa Bisita ng Tramo. Inaanyayahan ang lahat na makiisa at magpasalamat sa Nuestro Padre Jesus Nazareno.

04/01/2026

DAKILANG KAPISTAHAN NG PAGPAPAKITA NG PANGINOONG HESUKRISTO | EPIPANYA

Ang Linggo pagkatapos ng unang araw ng Enero o ang Dakilang Kapistahan ni Maria, Ina ng Diyos, kasunod na ipinagdiriwang ng Simbahan ang Dakilang Kapistahan ng Pagpapakita ng Panginoon, o ang Epifania. Ito ay ang rebelasyon ng Diyos na nagkatawang-tao sa katauhan ng ating Panginoong Jesukristo hindi lamang sa mga Judio kundi para sa sangkatauhan, sapagkat ang pagdating ng Panginoon ay para sa lahat ng tao at sa lahat ng lahi sa buong daigdig. Sa lumang liturhiya ng Simbahan, ang pagdiriwang ng kapistahang ito ay tinatawag na Pagdalaw ng Tatlong Haring Mago o ang “Three Kings.”